IZenzo Zabapostile 28:1-31
28 Safika sikhuselekile, saza seva ukuba igama leso siqithi yiMalta.+
2 Abantu balapho ababethetha ulwimi esingalwaziyo basiphatha ngobubele kakhulu.* Basibasela umlilo baza basamkela sonke ngobubele kuba kwakunetha futhi kubanda.
3 Kodwa xa uPawulos wayeqokelela iinkuni waza wazifaka emlilweni, kwaphuma irhamba ngenxa yobushushu, lamluma esandleni.
4 Xa abantu balapho babona loo nyoka inetyhefu ijinga esandleni sakhe, bathi: “Nokuba sekutheni ngumbulali lo, nangona esindile elwandle, kodwa uBulungisa* akafuni aqhubeke ephila.”
5 Kodwa wayivuthululela emlilweni loo nyoka, akwabikho nto yenzekayo kuye.
6 Babelindele ukuba wayeza kudumba okanye awe ngequbuliso afe. Emva kokulinda ixesha elide baza babona ukuba akukho nto yenzekayo kuye, bayitshintsha ingqondo yabo baza bathi unguthixo.
7 Kufutshane naloo ndawo kwakukho imihlaba yendoda eyaziwayo kweso siqithi, egama linguPubliyo. Loo ndoda yasamkela yaza yasiphatha ngobubele iintsuku ezintathu.
8 Kwathi kanti utata kaPubliyo wayelele ebhedini, egula ngumkhuhlane yaye etsheqwa sisisu.* UPawulos waya kuye, wathandaza, wambeka izandla waza wamphilisa.+
9 Emva kokuba kwenzeke loo nto, kweza nabanye abantu beso siqithi ababegula baza baphiliswa.+
10 Kwakhona babonisa indlela abasixabise ngayo ngokusipha izinto ezininzi, yaye xa sasikhwela enqanaweni, bafaka zonke izinto esasizidinga.
11 Emva kweenyanga ezintathu sihleli kweso siqithi, sahamba ngenqanawa eyayinombhalo othi “Oonyana bakaZeyus.” Loo nqanawa yayisuka eAleksandriya yaye ichithe ubusika kweso siqithi.
12 Sahamba saya kwizibuko laseSirakuse, saza sahlala iintsuku ezintathu apho;
13 sasuka apho saya eRegiyo. Ngemini elandelayo, kwavela umoya wasemzantsi saza sayokufika ePuteyoli ngosuku lwesibini.
14 Apho sadibana nabazalwana baza basicenga ukuba sihlale nabo iintsuku ezisixhenxe, emva koko saya eRoma.
15 Xa abazalwana baseRoma bevayo ukuba siyeza, basihlangabeza bade bayokufika kwiNdawo Ka-Apiyo Ekuthengiswa Kuyo naseTavene-Ntathu. Wathi akubabona uPawulos wambulela uThixo waza waziva ekhuthazekile.+
16 Xa sade safika eRoma, uPawulos wavunyelwa ukuba azihlalele yedwa kodwa kubekho ijoni elimgadileyo.
17 Emva kweentsuku ezintathu, wabiza amadoda abalulekileyo amaYuda. Ukufika kwawo wathi: “Madoda, bantakwethu, nangona kungekho nto imbi ndiyenzileyo ebantwini okanye kumasiko ookhokho bethu,+ ndiye ndabanjwa eYerusalem ndasiwa kumaRoma.+
18 Emva kokundipheka endophula ngemibuzo,+ afuna ukundikhulula, kuba ayengenasizathu sakundibulala.+
19 Kodwa xa amaYuda asikhabayo eso sigwebo, kwanyanzeleka ndibhenele kuKesare.+ Le nto ndandingayenzi kuba ndimangalela isizwe sakowethu.
20 Yiloo nto ndiye ndacela ukuba ndithethe nani, kuba ndibotshwe ngeli tsheyini ngenxa yethemba lamaSirayeli.”+
21 Loo madoda athi kuye: “Akukho leta siyifumeneyo evela kwaYuda ethetha ngawe, ibe akukho mzalwana usuka apho oye wathetha kakubi ngawe.
22 Kodwa kuhle ukuba sive ukuba uthini wena, kuba nyhani ke, le nkonzo intsha+ igxekwa kuyo yonke indawo.”+
23 Ngoko babekelana usuku abaza kudibana ngalo naye, bafika bebaninzi kunakuqala kwindawo awayehlala kuyo. Ukususela kusasa de kwangokuhlwa, wabacacisela ebashumayeza ngokucokisekileyo ngoBukumkani BukaThixo,* ezama ukubeyisela ukuba bakholelwe kuYesu,+ esebenzisa uMthetho kaMoses+ neencwadi zabaProfeti.+
24 Abanye bazikholelwa izinto awayezithetha; abanye abazange bazikholelwe.
25 Ekubeni babephikisana, baqalisa ukuhamba, waza uPawulos wathi:
“Umoya oyingcwele wawunyanisile xa wathetha nookhokho benu usebenzisa Isaya umprofeti,
26 usithi, ‘Yiya kwesi sizwana uze uthi: “Ngokuqinisekileyo niza kuva, kodwa anizukuyiqonda loo nto niyivayo, ibe niza kujonga, kodwa akukho kwanto niza kuyibona.+
27 Kuba iintliziyo zaba bantu zilukhuni, bavile kodwa abenzanga nto ngaloo nto, bawavalile namehlo ukuze bangaze babone ngamehlo, bangaze beve ngeendlebe, ukuze neentliziyo zabo zingacacelwa yeyona nto ndiyithethayo, ziguquke, ndize ndibaphilise.”’+
28 Ze nazi ke ukuba umyalezo wendlela uThixo abasindisa ngayo abantu uthunyelwe kubantu beentlanga+ yaye baza kuwumamela.”+
29 *——
30 Wahlala iminyaka emibini kwindlu yakhe awayeyiqeshile,+ yaye wayebamkela ngobubele bonke abantu ababesiza kuye,
31 eshumayela kubo ngoBukumkani BukaThixo* ngaphandle kwesiphazamiso, yaye ebafundisa ngeNkosi uYesu Kristu, enenkululeko enkulu yokuthetha.*+
Umbhalo osemazantsi
^ Okanye “ngobuntu.”
^ NgesiGrike, eli gama nguDiʹke, ekusenokwenzeka ukuba libhekisela kuthixokazi wempindezelo okanye kuphawu lobulungisa.
^ Ngokoqobo, “enesisu segazi.”
^ Okanye “ngoRhulumente KaThixo.”
^ Funda Isihlomelo A3.
^ Okanye “ngoRhulumente KaThixo; ngoLawulo LukaThixo.”
^ Okanye “enesibindi.”
