Bathande Abantu
Sonke siyintsapho enye, kuba siyinzala ka-Adam. Kulindeleke ukuba abantu bentsapho enye bathandane baze bahloniphane, kodwa kule mihla kunzima ukulufumana uthando olunjalo. UThixo wethu onothando akayithandi loo nto.
ZITHINI IZIBHALO EZINGCWELE NGOTHANDO?
“Umele uthande omnye umntu ngendlela ozithanda ngayo nawe.”—LEVITIKUS 19:18.
“Qhubekani nizithanda iintshaba zenu.”—MATEYU 5:44.
KUTHETHA UKUTHINI UKUTHANDA ABANTU?
Khawujonge indlela uThixo alucacisa ngayo uthando eLizwini lakhe, kweyo-1 kwabaseKorinte 13:4-7:
“Uthando lunomonde yaye lunobubele.”
Khawucinge ngoku: Uziva njani xa abantu benobubele, benomonde kuwe, ibe bengabi namsindo naxa wenze iimpazamo?
“Uthando alunamona.”
Khawucinge ngoku: Uziva njani xa abantu bekucingela kakubi okanye bekumonela?
Uthando “aluzicingeli lona lodwa.”
Khawucinge ngoku: Uziva njani xa abantu bezimamela izinto ozithethayo ibe bengasoloko befuna kuviwe ngabo?
Uthando “alunanzondo.”
Khawucinge ngoku: UThixo ufuna ukubaxolela abantu abaguqukileyo ababekhe bamona. “Akazukusoloko ejonga iimpazamo, engazukuhlala ecaphukile ngonaphakade.” (INdumiso 103:9) Xa umntu esimonileyo esixolela, siye siyixabise loo nto. Ngoko nathi sifanele sibaxolele abanye xa besicaphukisile.—INdumiso 86:5.
Uthando “aluzivuyeli izinto ezimbi.”
Khawucinge ngoku: Siba buhlungu xa sibona abantu bevuya kuba sehlelwe zizinto ezimbi. Ngoko asimele sivuye xa abanye besehlelwa bubunzima, nokuba babekhe basiphatha kakubi.
Ukuze uThixo asisikelele, sifanele sibathande ngezi ndlela zichazwe eLizwini lakhe abantu, kungakhathaliseki ukuba ngoobani. Enye indlela esinokuyenza ngayo le nto kukunceda abantu abadinga uncedo.
