APRILI 13, 2016
ERASHIYA
Abasemagunyeni BaseRashiya Baqinisa Iinzame Zabo Zokuphelisa Umsebenzi WamaNgqina Osemthethweni
Kwimimandla eliqela yaseRashiya, abasemagunyeni bayaqhubeka nokutyhola amaNgqina kaYehova ngelithi unqulo lwawo luyingozi.
ETyumen, Kummandla WaseTyumen. Iofisi yomtshutshisi ityhole iNgqina elililungu Lombutho Wonqulo eTyumen (iLRO) ngokuhambisa iincwadi ekuthiwa ziyingozi. Emva kokuba eli Ngqina livalelwe, umtshutshisi uye wafuna ukuba umbutho iLRO upheliswe. iNkundla Ephakamileyo yaseRashiya iza kusingatha lo mcimbi ngoAprili 14, 2016.
E-Elista, IRiphabliki YaseKalmykia. Umphathi wamapolisa asekuhlaleni uyalele ukuba kwenziwe uphengululo kwiHolo YoBukumkani yamaNgqina e-Elista ibe athe afumene uncwadi lwamaNgqina olukuludwe loncwadi ekuthiwa luyingozi. Esebenzisa uncwadi ekuthiwe lufunyenwe xa bekuphengululwa, umtshutshisi weRiphabliki yaseKalmykia ufake isicelo sokuba upheliswe ngokusemthethweni umsebenzi wamaNgqina e-Elista. Eli tyala liseza kusingathwa yiNkundla Ephakamileyo yaseRashiya.
Amatyala okupheliswa kweLRO, kuquka lawo aseStariy Oskol naseBelgorod, nawo kulindeleke ukuba asingathwe yiNkundla Ephakamileyo yaseRashiya.
Mhlawumbi Ungayithanda Nale
EZISEMATHENI
Abasemagunyeni ERashiya Bengabhungisanga Bafuna Ukuvala Ikomkhulu LamaNgqina
Ileta elumkisayo evela kwabasemagunyeni eRashiya ithetha ngeenzame ezenziwayo zokuvala unqulo nomsebenzi wamaNgqina wokufundisa ngeBhayibhile owenziwa eRashiya.