1-2. Nxankiho nhu onlikana dhai ni wa rapasi ninlontte nhu ettima yoopacera?

 NKAHAYA mmuupuwele rapasi mmodha ohuiwale ettheko yoothaaciri. Nihiku nimodha onnileeliwa wiira anaan’yari-ye aamwiira asitenti ni ahuukhwa! Noomala wiiwa ihapari idho, onniriipiwa nrima vawaatta ni oxanka. Masi moottharelana, ennikhumelela etthu yooxankiha. Owo onnidhuwela wiira anaan’yari-ye aahonona mireerelo dhootheene dha ettheko ni aakhalana ivaale dhawaatta. Ndho ohiya owo olipelela orithi mireerelo dha ettheko, onrithi ivaale ni atthu anaan’yari-ye yaapacenra awa annilokiha enkhanyerera wiira alive ivaale dhootheene mwawaakuveya. Masi mooriipiha nrima, khaana nsurukhu wiira alive ivaale dhootheene.

² Emodha-modharu, nxankiho nhu onoolikana ni wa rapasi ola. Anaan’yari nhu oopacera, Adamu ni Eeva, yaari oomalela ni yaakhala opuro wooreera mparayiisu. (Maph. 1:27; 2:7-9) Awo yaahikhalana ekumi yoohakalaliha ni eparakha ya okhala mahiku ootheene. Masi mwawaakuveya itthu dhootheene dhahirukunuwa. Awo yahiyeleela okhala eparayiisu ele yooreera ni eparakha ya okhala mahiku ootheene. Ndho erithi seeni yaahiyenra awa ana? Biibiliya onlotta wiira: ‘Etampi yoovolowa moolumwinkuni mwaha wa nlopwana mmodha [Adamu], ndho etampi elo yooruuha okhwa. Dhiidho, okhwa ohaaphwanya atthu ootheene, okhala wiira atthu ootheene aattheka.’ (aRoma 5:12) Adamu oonihiyera erithi ya etampi, ndho etampi elo yooruuha okhwa. Etampi nirinthi nhu eri nkhama evaale yuulupale yeelo ootheene nhu nihinwerya nhu oliva.—Esal. 49:8.

3. Seeni itampi dhihu dhinlikana awa ni ‘ivaale’?

 ³ Yeesu ahilikanyiha itampi ni ‘ivaale.’ (Math. 6:12; Luka 11:4) Vaavo nimpaka nhu etampi, onlikana ni ompaacera Yehova, ndho nihaana oliva evaale elo. Akhala wiira khanimpa elo, noomala okhwa evaale elo enimala.—aRoma 6:7, 23.

4. (a) Nahaakhaliheriwe ni Yehova, eseeni yaaya onikhumelela ootheene nhu? (Esalimo 49:7-9) (b) Mbiibiliyani noolumo nawi “etampi” nintaphulelani? (Moone ekwaaturu eni: “Etampi.”)

⁴ Niire onniweryaneya hiyo okhalana itthu dhootheene Adamu ni Eeva ayelenla awa? Hiyo khaninwerya opaka elo meekhinhu. (Nsome Esalimo 49:7-9.) Vahaakhanle Yehova onikhalihera, hiyo khinaakhalana nlipelelo na ekumi yoohimala nhoolo ni ohihimusiwa. Ndho, naaya nikakhwa pahi voohikhalana nlipelelo nkhama eniireya awa ni inama.—Mus. 3:19; 2 Ped. 2:12.

5. Eseeni Tiithi nhu oopheta opanke iye wiira anikhalihere oliva evaale nirinthi nhu mwa etampi? (Moone-tho efootu ya ekaapa.)

⁵ Vano, nirowe nitthikele wuupuwela ntakihero na rapasi ninlontte nhu woopacerani wa yoosoma ela. Nkuupuwelani wiira ookhumelela nlopwana mmodha oothaaciri oniivahererya oliva ivaale dhootheene oriiyena. Rapasi ole aaya woonela dhai? Voohakanyera, owo anxukhurela vawaatta ni amwaakhulela nikhalihero nno. Emodha-modharu, Tiithi nhu oopheta Yehova ooniva etthu enwerya oliva moomalela evaale nirinthi nhu ni Adamu. Yeesu aahilotta yoovaha elo airaka: ‘Muluku oophetasa olumwinku, mpakha onvaha Mwane mmodheene, wiira ootheene ale anoonihera omwaamini yoowo ehipwetesiwe, masi ekhalena ekumi yoohimala.’ (Yohani 3:16) Ohiya-vo, yoovaha elo enninivaha eparakha yookhalana waataana wooloka ni Yehova.

6. Moolumo seeni a mbiibiliyani nin’ya nhu wiiwasasa yoosoma ela, ni mwaha wa seeni?

⁶ Nin’ya ottottela dhai nreerelo yoovaha ela yootepa otthuneya, Yehova oonivanhe iye wiira nileveleliwa itampi dhihu? Biibiliya onaakhula nikoho nna arumeelaka moolumo ala: Otthikela, ottipihiwa, oliveriwa, nkuttho, yawoopola, woopoliwa ni othokoreriwa okhala anaxariya. Yoosoma ela, nin’ya wiiwasasa ele entaphulela awa moolumo ala. Ndho wuupuwelela moolumo ala ni ele Yehova opanke iye wiira anilevelele, enawaacerera onxukhurela wihu.

YOOLAKELA: OTTHIKELA

7. (a) Ohiya oyeleela ekumi yoohima pahi, etthu seeni ekina Adamu ni Eeva ayeleela awa? (b) Mwaha wa okhala adhuulu Adamu ni Eeva, eseeni ninreerela nhu opaka? (aRoma 5:10, 11)

⁷ Adamu ni Eeva khayeleenle pahi eparakha ya okhala mahiku ootheene, masi ayeleela waataana ni Yehova. Woopacerani Adamu  ni Eeva yaaniirela mphantta emudhi ya Muluku. (Luka 3:38) Masi noomala ontthekela Yehova, owo ahiwiikara emudhi elo, elo yairanen’ye ehinaayare anamwane. (Maph. 3:23, 24; 4:1) Ndho, okhala wiira hiyo na adhuulu Adamu ni Eeva, nintthuneya otthikela wa Yehova. (Munsome aRoma 5:10, 11.) Ni moolumo makina, nihaana okhalana waataana wooloka ni Muluku. Erefereensiya emodha enlotta wiira noolumo na ekereku nitaphuleliwe nawi “otthikela” nintaphulela “omwiiriha nwanani okhala nxirikha.” Etthu yoohakalaliha, okhala wiira Yehova tiriinhe oweryaneya elo. Mooporani?

EPARAKHA: OTTIPIHIWA

8. Nintaphulelani noolumo nawi ottipihiwa aahiidho oliveriwa?

⁸ Biibiliya onniitthana okhala ottipihiwa ele Yehova opanke iye wiira oweryaneye apinaatamu oohimalela otthikela okhala axirikha-ye. Noolumo nna ninhela mpuwa waakakhanyiha etthu emodha ni etthu ekina erina efaita emodharu wiira eliveriwe etthu erimeenle. Dhawaatikiwa dha Ekereku dha Ekiristau, dhinnirumeela noolumo nikina ninlikana ni ‘ottipihiwa’ nenno nintaphulela etthu emodharu, nawi oliveriwa. (aRoma 3:25) Ndho oliveriwa onimwiiriha ntthu okhalana nrettele ni okhalana waataana wooloka ni Muluku.

9. Eparakha seeni ya okathi vakhaani Yehova avanhe iye aisarayeeli wiira ewerye oleveleliwa itampi-dha?

⁹ Yehova aahaava aisarayeeli eparakha ya okathi vakhaani wiira ekhalena waataana wooreera nuuwo. Khuta mwaakha awo yaanuupuwelela Nihiku na Ottipihiwa Itampi. Nihiku nno, nankuttho muulupale aanivaha mikuttho dha inama wiira nileveleliwe nloko nootheene. Ekhweeli wiira mikuttho dhaavahiwa khidhaawerya ottipiha moomalela itampi dha aisarayeeli, okhala wiira inama khidhaana efaita waaxira apinaatamu. Masi akhala wiira aisarayeeli yaanittharuwa ni yaanivaha mikuttho yaavekeliwa awa ni Yehova, owo aakhala olikaneene wiira aalevelele. (aHeb. 10:1-4) Ohiya-vo, mikuttho dhaavahiwa khuta nihiku ni idhe dhaavahiwa vamwaakhani dhaaniwuupusera aisarayeeli wiira yaari atthu oottheka ni yaanitthuneya etthu yuulupale wiira eleveleliwe moomalela.

10. Eseeni Yehova opanke iye wiira itampi dha apinaatamu ileveleliwe moomalela?

¹⁰ Eseeni Yehova opanke iye wiira itampi dha apinaatamu ileveleliwe moomalela? Owo aahiiriha wiira Mwane onimpheta iye vawaatta ‘aahivaherere ekwaha emodha pahi, wiira akuse itampi dha atthu awaatta.’ (aHeb. 9:28) Yeesu oovaha ‘ekumi-ye wiira awoopole atthu awaatta.’ (Math. 20:28) Ndho, yawoopola eseeni?

ESAPO: YAWOOPOLA

11. (a) Moovarihana ni Biibiliya yawoopola eseeni? (b) Taani aaphwanela oliva yawoopola?

¹¹ Moovarihana ni Biibiliya, yawoopola esapo enlinvwa wiira ntthu aleveleliwe. a Mwa moonelo wa Yehova, yawoopola enniwerya oliverya itthu dhootheene dhirimeenle. Mooporani? Muupuwele ela: Adamu ni Eeva aayeleela ekumi yoomalela ni eparakha ya okhala valaponi mahiku ootheene. Mwaha wa elo, yawoopola yaahaana okhalana esapo emodharu ni ele erimeenle. (1 Tim. 2:6) Esapo elo yaahaana olinvwa ni nlopwana muulupale (1) oomalela, (2) arina eparakha ya okhala mahiku ootheene valaponi ni (3) aakhulela avahe ekumi-ye nkhama nkuttho wiira aniphwanyihe nreerelo. Ndho ntthu aarina mikhalelo idha, ekumi-ye yaanwerya oliverya ekumi yoomalela erimeenle.

12. Mathowa seeni anoonihera wiira Yeesu aari ntthu oophwanelela oliva yawoopola?

 ¹² Moone mathowa mararu anoonihera wiira Yeesu aari ntthu oophwanelele oliva yawoopola. (1) Owo ari oomalela ni ‘khanapake etampi.’ (1 Ped. 2:22) (2) Owo aahikhalana eparakha ya okhala mahiku ootheene valaponi ni (3) owo aahaakhulela okhwa ni ovahe ekumi-ye wiira anoopole. (aHeb. 10:9, 10) Yeesu aari oomalela nkhama aariiye Adamu ahinatthi opaka etampi. (1 aKor. 15:45) Okhwa wa Yeesu wooliverya etampi ya Adamu ni wootthikiha ela Adamu oyeleenle iye. (aRoma 5:19) Mwaha wa woopaka elo, Yeesu ookhala ‘Adamu ookhidhera.’ Vano khontthuneya ora ntthu nkina oomalela wiira alivere ele Adamu oyeleenle iye. Okhala wiira Yeesu ohookhwa ‘evaara emodha pahi.’—aHeb. 7:27; 10:12.

13. Ovirikana seeni orivo noolumo nawi ottipihiwa ni yawoopola?

¹³ Ovirikana seeni orivo noolumo nawi ottipihiwa ni yawoopola? Ottipihiwa itampi dhihu eparakha Yehova onivanhe iye wiira nitthikele okhala axirikha-ye. Yawoopola esapo elinvwe wiira ileveleliwe itampi dha apinaatamu. Esapo enthoonyera ephome ya Yeesu yeelo yiirinhe oweryaneya oleveleliwa itampi dhihu.​—​aEefe. 1:7; aHeb. 9:14.

ETTHU EKHUMELENLE: WOOPOLIWA NI OTHOKORERIWA OKHALA ANAXARIYA

14. Eseeni nin’ya nhu woona nenna-va?

¹⁴ Mireerelo seeni ekhumihera awa eparakha ya ottipihiwa itampi? Biibiliya onnirumeela moolumo oovirikana wiira aalotte mireerelo idho. Moolumo awo ankhala nkhama arina yootaphulela emodharu, masi khuta noolumo ninnilotta itthu dhoovirikana Yehova opanke iye wiira anilevelele. Vano, nirowe noone moolumo awo maili ni mireerelo anniphwanyiha awa.

15-16. (a) Mbiibiliyani, nintaphulelani noolumo nawi “woopoliwa”? (b) Ninoonela dhai odhuwela wiira nootaphuliwa itampi ni okhwa?

¹⁵ Mbiibiliyani, noolumo nawi woopoliwa nintaphulela otaphuliwa weiwo oweryanen’ye mwaha wa yawoopola. Nrummwa Pheeduru olontte wiira: ‘Nyuwo moodhuwela esapo moopoliwe nnyu, mwaha wa makhalelo nnyu oohiloka, yaawo muravihiwe nnyu ni ahavinre nnyu. Khamoopoliwe ni itthu dhimpweteya, nkhama ewooru aahiidho eparata. Ohiya-vo, moopoliwe ni ephome ya Kiriis­tu, erina efaita yuulupale, nkhama ephome ya ­mwaapwittipwitthi ooloka ni oohirakala.’​—1 Ped. 1:18, 19.

¹⁶ Mwaha wa nkuttho wa woopola, ninoowerya otaphuliwa itampi, okhwa ni mixankiho dhootheene dhinkhumiheriwa ni itthu idho. (aRoma 5:21) Voohaakanyera, nookhalana mathowa awaatta anniiriha onxukhurela Yehova vamodha ni Yeesu mwaha wa onoopola arumeelaka ephome erina faita yuulupale, niire dho, ekumi ya Yeesu. —1 aKor. 15:22.

17-18. (a)Ontaphulelani othokoreriwa okhala anaxariya? (b) Ndho elo entaphulelani wa hiyo?

¹⁷ Moovarihana ni Biibiliya, Yehova pooti onithokorera okhala anaxariya. Ndho vaavo eniiraneya awa elo, itampi dhihu dhinnukutthiwa. Masi elo khentaphulela wiira Yehova onnihiya opaka itthu moovarihana ni malamulo-ye axariya. Etthu emmwiiriha Yehova onithokorerya okhala anaxariya, kahi wiira ninoophwanelela aahiidho awo khanoona itampi dhihu. Masi okhala wiira Yehova ori olikaneene wiira amalihe itampi dhihu mwaha wa waamini ele Yehova ni Yeesu apanka awa wiira enoopole.​—⁠aRoma 3:24; aGal. 2:16.

¹⁸ Eseeni elo entaphulela awa hiyo? Wa ale athanliwe wiira elamulele ni Yeesu wiirimu entaphulela wiira nenna-va athokoreriwa okhala anaxariya ni aana a Muluku. (Tito 3:7;  1 Yoh. 3:1) Nitho itampi-dha dhooleveleliwa. Ndho mwaha wa elo, anthokoreriwa nkhama atthu ehitanke opaka etampi, tivondho anaakhulelihiwa awa ovolowa Moomweneni. (aRoma 8:1, 2, 30) Wa ale arina nlipelelo na okhala valaponi mahiku ootheene, aathokoreriwa okhala anaxariya nkhama axirikha a Muluku ni aaleveleliwa itampi-dha. (Yak. 2:21-23) Atthu an’ya woopowa okathi wa ekhotto ya Armaxedoni, akhalana eparakha ya ohikhwa. (Yohani 11:26) “Anaxariya” akhwiye vamodha ni “ale ahikhanle anaxariya” anoohihimusiwa. (Mit. 24:15; Yohani 5:28, 29) Wookhidherani, arumeyi ootheene awiiwelela a Yehova anookhalana ‘otaphuwa wa ovuwa wa aana a Muluku.’ (aRoma 8:21) Ndho ninnihakalala vawaatta, odhuwela wiira ninootthikela okhala aana a Muluku oomaleela ni okhalana waataana wooloka ni Tiithi nhu, Yehova!

19. Ele Yehova ni Yeesu apanka awa erukununse dhai nkhalelo nhu? (Moone-tho ekwaaturu eni: “ Ele Entaphulela awa wa Hiyo.”)

¹⁹ Khalai, nxankiho nhu waalikana ni wa rapasi ninlontte nhu woopacerani wa yoosoma ela, yoowo oyeleenle orithi mireerelo dha ettheko ni orithi ivaale dhawaatta dha anaan’yari-ye ohinwerya iye oliva. Masi Yehova oonikhalihera. Ndho mwaha wa eparakha ya ottipihiwa itampi ni olinvwa yawoopola, yoorukunsa nkhalelo nhu. Nitho mwaha wa omwaamini wihu Yeesu Kiriistu, nootaphuliwa aahiidho woopoliwa mwa etampi ni okhwa. Vaavo Yehova onnilevelela iye onnithokorerya nkhama atthu ehitanke opaka etampi. Masi etthu yootepa ootthuneya nenna-va, okhala wiira ninoowerya okhalana waataana wooloka ni Tiithi nhu oopheta, Yehova.

20. Eseeni nin’ya nhu woona yoosoma enttharelana?

²⁰ Hiyo ninninxukhurela Yehova vamodha ni Yeesu vaavo nnuupuwelela nhu itthu dhootheene anipakenla awa. (2 aKor. 5:15) Vahaakhanle wiira awo aanikhalihera khinaarowa okhala nlipelelo! Yoosoma enttharelana, nin’ya woona matakihero a mbiibiliyani, anoonihera wiira vaavo Yehova onnilevelela iye khanintthuneya wiivaha mathowa.