მაჟია კორინთელეფ 2:1-17
2 გეგნოპჭყვიდ, თქვანდა ქუმურქინ, გურ წუხებათ ვეიფშათ.
2 ჩქიმდა თქვა მოიღუნა ხიოლ, დო თქვან გურ წუხებათ ევოფშ-და, მი გამხარენს გურს?!
3 თეიშახ მუთ მორჭარით, თიშენ მორჭარით, ნამდა თქვანდა ქიმიფშინ, გურქ წუხებათ ვარინ, ხიოლით ემაფშუკო თქვანიშ გურშენ, მუშენდა ბჯერსჷ, ნამდა მუდგას ჩქიმდა მოუღ ხიოლ, თქვანდა ხოლო თის მოუღ ხიოლ.
4 მანგარ შეწუხებულქ დო გურდამონკებულქ ჩილამურეფით მორჭარით, მარა თიშენ ვარ, ნამდა გურ წუხებათ ეიფშითკო, თიშენ მორჭარით, ნამდა გიჩქუდესკო, მუშმანწარას მიჸორთ.
5 მითინქ წუხებაშ მიზეზო გინირთ-და, თიქ ოწუხებელ ხვალე მა ვა გომრჩქინუნ, თეშიო-თაშიო, არძას გოირჩქინეს, მარა ვა მოკო, ბრელ იფჩუე თეშე დო სიტუაცია გუვაუფრაშე.
6 თიქ თქვანდე დასაჯებულქ იჸუ დო თენა ხოლო უბაღ.
7 ასე მთელ გურით ოკო ქაპატუათ დო გურშა ეუქექუათ, მუშენდა ნაბეტან წუხებას ვეგნაჸუნას.
8 ათეშენ ელაიჩანთ, ქაძირუათ თის თქვან ჸოროფა.
9 თი წერილ თიშენ ხოლო მორჭარით, ნამდა ქიგებგიკო, ბოლოშა ქიმეჸუნთ დო ვარ ირფელს.
10 მიდგას თქვა აპატიენთ, მა ხოლო ვაპატიენქ. მითინშა დაშებულ ქომპატიებუნ-და, თენა თიშენ ვაკეთ, ნამდა თქვა ქიმგეხვარითკო; ქრისტე რე თეშ მოწმე.
11 ართიანს ოკო ქუვაპატუათ, ნამდა სატანაქ ვეგმორჯგინან, მუშენდა ჯგირო მიჩქუნა, მუ გეგმეფ უღჷ თის.
12 მუჟამსით ტროაშა გენობრთჷ, ნამდა ქრისტეშ გურშენ სახიოლო ამბე გუვაცხადიკო დო კარქ ხოლო გუმანჯ უფალიშ საქმეშ ოკეთებელო,
13 მშვიდას იშენით ვა ვორდჷ, მუშენდა ვა ბძირჷ ჩქიმ ჯიმა ტიტე, ათეშენ თექიანეფს ჯგირობუა ქუდუჩინ დო მაკედონიაშა მიდაფრთჷ.
14 მადლობა ღორონთის, ნამუთ ირიათო ეწოპჸუნა, მუჭოთ ქრისტეწკუმა ართო ჩხუპშე დორთელ ჯარიშკოჩეფს, მიდგაქ ნტერეფს გიორჯგინეს. ღორონთ ჩქინ საშვალებათ ირდიხას აცხადენს მუშ დუდიშ გურშენ რჩქინას. თე რჩქინა ჰამო შურცალ რე.
15 ჩქი, მით ქრისტეშ გურშენ ვაცხადენთ, ღორონთშო ჰამო შურცალ ვორეთ. თე ჰამო შურს თინეფ ხოლო გინაფლენა, მით რსხებაშ შარას გერენა დო თინეფ ხოლო — მით ღურაშ შარას გერენა.
16 ბოლოს მიფშინენ თინეფშო თე შურ ღურაშ შურცალ რე, ნამდგას ღურა მოუღ, დო პირველო მიფშინენ თინეფშო — სიცოცხლეშ შურცალ, ნამდგას სიცოცხლე მოუღ. მი გიმოდირთუ თეცალ მსახურებაშო?
17 ჩქი გიმობდირთუთ, მუშენდა ჩქი ღორონთიშ სიტყვათ ვა ბვაჭრენთ*, მუჭოთ თეს ბრელ ორთჷ. თეშ გინაწონს, შურ დო გურით ფქადაგენთ ღორონთიშ წოხოლე, მუჭოთ ღორონთშე მოშქუმალირეფ დო ქრისტეშ მიმაჸუნალეფ!
სქოლიოეფ
^ იგულისხმებ კომერციულ საქმიანობა.
