1. მუჭო მოქმედენს პირველობაშ შურ ხალხწკუმა?

ამდღა ქვეყნიერებას ბრელ ოცად, არძაშე უჯგუშო გემკარჩქინას დუდ დო ვაინტერეს, მუჭო იმოქმედენს მუშ საქციელ შხვეფშა. მაგალთო, ბიზნესმენქ შხვა ბიზნესმენეფს გიორჯგინასინ თიშენ, შილებე თიცალ მეთოდ გეგმირინუას, ნამუთ დაზარალენდჷ თინეფს. სპორტსმენქ შილებე შეგნებულო დაზიანას მოწინააღმდეგე, ნამდა ლაჸაფ მიგას. ახალგაზრდაქ უპატიოსნო მეთოდეფით შილებე ეცადას გამოცდეფიშ ჩაბარებას, ნამდა ჯგირ უნივერსიტეტის ჩერიცხას. ჩქი, ქრისტიანეფს, მარჩქილენა, ნამდა თეცალ მოქმედებეფ არასწორ რე. თენა „ხორციშ საქმეეფშა“ მიშურს (გალ. 5:19—21). მარა შილებენო იეჰოვაშ ნამთინე მსახურქ, გურუგუჩამუო პირველობა მინდომას? თენა სერიოზულ კითხვა რე, მუშენდა პირველობაშ შურს შეულებ საჯიმალოშ ართობას ეცილას.

2. მუს გუვარჩიენთ თე სტატიას?

² თე სტატიას გუვარჩიენთ, უარყოფით თვისებეფს, მუდგაქ შილებე გომრჩქინან პირველობაშ შურ. თეს გეძინელ, გუვარჩიენთ ბიბლიას მოჩამილ ღორონთიშ ართგურ მსახურეფიშ მაგალითეფს, მიდგაქ დუდ ეუჩილითეს შხვეფიშ უჯგუშეფო დუდიშ გიმორჩქინაშ სურვილს. პირველ რიგის, ქობძირათ, მუჭო შემლებნა შევამოწმათ ჩქინ მოტივეფ.

3. მუ ოკო ბკითხათ ჩქინ დუდის?

³ მინშა ჯგირ იჸუაფ, შევამოწმათ, მუ მოტივეფ მიღნა. შემლებნა ჩქინ დუდის ბკითხათ: მოსიამოვნუნო, მუჟამსით ფიფქრენქჷ, ნამდა შხვეფშე უჯგუშო იბძირექ? კრებას მთელ გურით თიშენ ფხანდენქო, ნამდა შხვეფშე უჯგუშო გემკოფრჩქინდე?  დოვარ მოკო არძაშ უჯგუშ ვაკეთე იეჰოვაშო? მუშენ ოკო დუსვათ ჩქინ დუდის თეცალ კითხვეფ? ქიდეკვირით, მუს იჩიებ ბიბლია.

4. მუშენ ოკო ვეშვადარათ ჩქინ დუდ შხვეფს, მუჭოთ თენა გალატელეფიშ 6:3, 4-ის რე მოჩამილ?

⁴ ბიბლია ელამჩანა, ჩქინ დუდ შხვეფს ვეშვადარათ (წეკითხით გალატელეფიშ 6:3, 4). ვეჸუაფ ჯგირ იფიფქრათ, ნამდა საქმეს შხვეფშე უჯგუშო ვორთუთ, მუშენდა შილებე სიამაყექ გენმევითარან დო ვართ თინა იჸუაფ ჯგირ იფიფქრათ, შხვეფ ჩქინდე უჯგუშო ორთნა საქმეს დო ჩქი მუთუნ ვეგშმალენა, მუშენდა შილებე თექ გურ გომტახან. თეცალ ფიქრეფ ვა რე გონივრულ (რომ. 12:3). ართ და, კატერინა, * მით საბერძნეთის ცხოვრენს, იჩიებ: „დუდის ვადარენდჷ თინეფს, მით უმოს სქვამეფ რდეს, მსახურებაშ გამოცდილება უღდეს დო ვა უჭირდეს შხვეფწკუმა დამეგობრება. ათეშენ დუდის უღირსო ბგინაფლენდჷ“. დღას ოკო ვაგმოჭყორდან, იეჰოვაქ მუშ მეგობრეფო თიშენ ვემემრჩქინეს, ნამდა სქვამეფ დო ჯგირ მორაგადეეფ ვორეთ ვარდა ბრელს მოწონს ჩქინწკუმა ურთიერთობა; ღორონთიქ თენა თიშენ აკეთ, ნამდა ქიპჸოროფეთ თინა დო ვურჩქილეთ იესოს (იოან. 6:44; 1 კორ. 1:26—31).

5. მუშ გურაფა შემლებნა ჯიმა ჰუენიშ შემთხვევაშე?

⁵ ხოლო ართ მუდგარენ შემლებნა ბკითხათ ჩქინ დუდის: და დო ჯიმალეფიშ თოლს მშვიდობას ვუნწყუნქო ხეს დოვარ ხშირას მიღჷ უთანხმოება თინეფწკუმა? ყურადღება ქიმიაქცით სამხრეთ კორეას მახორუ ჯიმა ჰუენიშ შემთხვევას. თინა ფიქრენდჷ, ნამდა პასუხიშმგებლობა უღუნ ფერ ჯიმალეფ ოცადდეს, თიშე უჯგუშო გემკარჩქინესკო დუდ. ჰუენი იჩიებ: „თინეფიშ მიმართ კრიტიკულ ვორდჷ დო ხშირას ვა ვოთანხმუდ, მუდგას თინეფ იჩიებდეს“. მუ რდჷ თეშ შედეგ? თინა აგრძელენს: „ჩქიმ თეცალ დამოკიდებულებაქ ეცილ კრებაშ ართობას“. ჰუენს მუშ ნამთინე მეგობარქ მეხვარ, ქიმეხვადკო, მუ პრობლემა უღუდ. თიქ დითირუ აზროვნება დო აგრძელენს უხუცესო მსახურებას. პირველობაშ შურიშ ნიშნეფს ჩქინ დუდის ხოლო ქობძირუნთ-და, ხეთეშე მოქმედება რე საჭირო.

6. მუჭოთ გალატელეფიშ 5:26-შე იძირე, ნამ გლახა თვისებეფს შეულებ პირველობაშ შურიშ გავითარება?

⁶ წეკითხით გალატელეფიშ 5:26. ნამ გლახა თვისებეფს შეულებ პირველობაშ შურიშ გავითარება? ართ-ართ რე ეგოიზმ. ეგოისტ კოჩ ამაყ რე დო ხვალე მუშ დუდშე ფიქრენს. მაჟია გლახა თვისება რე მენჯარიშობა. მენჯარიშ პიროვნებას ხვალე თინა ვაკო, მუთ შხვას უღჷ; თის ოკო, ნამდა შხვას მიდუღას საკუთრება. არგამა რე, მენჯარიშობა გოჯოგაფაშ ართ-ართ ფორმა რე. ჩქი მუშო ოკო რაგად, მოკონა, ირნერო ევუჩილითუათ დუდ თე გლახა თვისებეფს!

7. ნამ მაგალით ოძირანს, ნამდა ეგოიზმ დო მენჯარიშობა ზიანიშ მუმაღალარ რე?

⁷ ეგოიზმ დო მენჯარიშობა მოგენს დაბინძურებულ საწვავს. თეცალ საწვავ თვითმფრინავს ქინაბეს-და, თიქ შილებე გოჩიხას შლანგეფ. შედეგო მატორ მუშობას მიოტენს დო თვითმფრინავ გექთოლუ. თეშნერო, ნამთინე შილებე ბრელ ხან რე იეჰოვას ომსახურ, მარა თიშ მოტივ ეგოიზმ დო მენჯარიშობა ქორენ-და, თაშ ქოფთქუათინ, თინა „გექთოლუ“ (იგავ. 16:18). თეცალ პიროვნება მიოტენს იეჰოვაშ მსახურებას დო მუჭოთ მუშ დუდის, თეშ შხვეფს ხოლო ზიანს ქიმიორინუანს. მუჭო შემლებნა დუდ დიფთხილუათ ეგოიზმ დო მენჯარიშობაშე?

8. მუჭო შემლებნა გივორჯგინათ ეგოიზმის?

⁸ ჩქი შემალებენა გივორჯგინათ ეგოიზმის, მუჟამსით ქიმვაჸუნუთ პავლე მოციქულიშ რჩევას, ნამუთ ფილიპელეფს მეჩჷ:  „მუთუნ ვაკეთათ მეტოქეობათ დო ეგოისტობათ, თეშ მანგიორო, რდათ თანდაბლეფ დო შხვეფ თქვან დუდშე უჯგუშეფო მირჩქინით“ (ფილ. 2:3). შხვეფ ჩქინდე უჯგუშეფო ქიმმორჩქუნან-და, უმოს ნიჭიერ დო უნარიან ადამიანეფს კონკურენტეფო ვემიფრჩქინანთ. თეშ გინაწონს, ჩქი მახიოლენა თინეფიშ წარმატება, განსაკუთრებულო თი შემთხვევას, მუჟამსით მუნეფიშ უნარეფს იეჰოვაშ ოდიდებელო ირინუანა. თე ძვირფას და დო ჯიმალეფ ხოლო პავლეშ რჩევას ქიმეჸუნან-და, თინეფ ხოლო ქოძირნა ჩქინ ჯგირ თვისებეფს. შედეგო, ჩქი არძა ხეს შევუნწყუნთ კრებაშ მშვიდობა დო ართობას.

9. მუჭო შემლებნა დუდ დიფთხილუათ მენჯარიშობაშე?

⁹ მოკრძალებაშ გავითარებათ ჩქი შემლებნა მენჯარიშობაშე დუდ დიფთხილუათ. თე თვისება მიმეხვარებნა თიშ ძირაფას, ნამდა რე მუდგარენეფ, მუდგაშ კეთებაშ უნარ ვა მიღნა. მოკრძალებურეფ ქიპჸით-და, ვევეცადებუთ, შხვეფიშ თოლს არძაშ უმოს ნიჭიერეფ დო უნარიანეფ ქოფრჩქინდათ. თეშ გინაწონს, მონდომას ვადვარკენთ, ქიდიბგურუათ თინეფშე, მიდგას ჩქინდე უმოს უნარ უღჷ. მაგალთო, წერმიბდგინათ, ნამდა კრებას ჯიმა ჯგირო აკეთენს მოხსენებეფს. ჩქი შემლებნა ბკითხათ თის, მუჭო ამზადენს მოხსენებას. ვარდა შილებე და ჯგირ მზარეულ რდას, თეცალ დროს შემლებნა რჩევა ფთხუათ თის, მუთ მიმეხვარებნა, ჩქი ხოლო ჯგირ მზარეულეფქ ქიპჸუათ. ახალგაზრდა ქრისტიანს შხვეფწკუმა დამეგობრება ქუჭირს-და, შეულებ რჩევა თხუას თიცალ პიროვნებას, მით ადვილო ემეგობრებ შხვეფს. თეშნერო, ჩქი ეიფჩილითუანთ მენჯარიშობას დო გუვაუჯგუშენთ ჩქინ უნარეფს.

10. მუ სირთულეს შეხვად გედეონქ?

¹⁰ გუვარჩუათ, მუქ მოხვად მენაშეშ ტომელ გედეონი დო ეფრემელეფ შქას. იეჰოვაშ მოხვარათ გედეონი დო თიშ 300 ჯარიშკოჩიქ დიდებულო მიგეს ომი, მუდგას შეულებუდ თინეფ გაამაყკო. მუჟამსით ეფრემელეფქ გედეონს ქეშეხვადეს, თიშ მანგიორო ქუცქვაფდესკო, ნირზ ქუდუჭყეს, მუშენდა, მუჭოთ იძირენ, ამაყეფ რდეს დო გურქ მოურთეს, გედეონქ იეჰოვაშ ნტერეფწკუმა ომშა ვა ხეთეშე დუძახუნ. თინეფს  მთელ ყურადღება თიშა აფდეს გინოღალირ, ნამდა ხალხის პატი მუნეფიშ ტომშა უცემუდკო. სიამაყექ ეცილ თე ხალხის, ქოძირესკო უმოს მნიშვნელოვან მუდგარენ — გედეონქ განადიდ იეჰოვაშ სახელ დო დეცვჷ თიშ ხალხ (მსაჯ. 8:1).

11. მუჭო უპასუხ გედეონქ ეფრემელეფს?

¹¹ გედეონქ თანდაბლურო უპასუხ ეფრემელეფს: „თქვანზმა მა მუ მიკეთებ?!“. უკულ ქუგაშინ, მუ დიდ საქმე ოკეთებაფუ იეჰოვაქ თინეფს. შედეგო ეფრემელეფქ „დემშვიდეს“ (მსაჯ. 8:2, 3). გედეონქ თანდაბლურო მიქცუ, ნამდა ღორონთიშ ხალხწკუმა მშვიდობა ვადინუკო.

12. მუს ბგურაფლენთ ეფრემელეფ დო გედეონიშ მაგალითშე?

¹² მუს ბგურაფლენთ თე შემთხვევაშე? ეფრემელეფიშ მაგალითშე ბგურაფლენთ, ნამდა მთელ ყურადღება ჩქინ დუდიშ ვარინ, იეჰოვაშ განდიდებაშა ოკო მაფდან გინოღალირ. ოჯახიშ დუდეფს დო უხუცესეფს შეულებნა გედეონიშ მაგალითშე დიგურუან. მუნეფიშ მოქმედებათ მითინს გურ ქელაჭვეს-და, საჭირო რე, თიშ თოლით უჯინან საკითხის, ნამდა ქინანჭან, მუშენ ეწყინ თე პიროვნებას. თეს გეძინელ, შეულებნა ქაცქუან თი ჯგირ საქმეეფიშ გურშენ, მუთ თინეფს უკეთებნა. თეცალ საქციელ თანდაბლობაშ მაძირაფალ იჸუაფუდ, განსაკუთრებულო თიმ დროს, მუჟამსით თი პიროვნება რე მტყუან. და დო ჯიმალეფწკუმა მშვიდობა უმოს მნიშვნელოვან რე, ვინემ თიშ დამტკიცება, ნამდა მართალ ვორეთ.

13. მუ სირთულეს შეხვად ხანაქ დო მუჭო გიორჯგინ თის?

¹³ დეფიფქრათ ხანაშ მაგალითშე. თიშ ქომონჯ რდჷ ლევიან ელკანა, ნამდგას მანგარო უჸორდ ხანა. მარა ელკანას მაჟია ოსურ ხოლო ჸუნდჷ, ნამდგას ფენინა ჯოხოდ. ელკანას ხანა უმოსო უჸორდჷ, ვინემ ფენინა. მარა „ფენინას სქუალეფ ჸუნდჷ დო ხანას — ვარ“. ათეშ გურშენ ფენინა „მანგარო გაძიცანდჷ“ თის დო ოკოდ, გურ უწყუნუკო. მუს გინაფლენდჷ ხანა? თის მანგარო აფუდ გურ ელაჭვილ! „თინა ინგარდჷ დო მუთუნს ვა ჭკუმუნდჷ“ (1 სამ. 1:2, 6, 7). მარა ბიბლიას სოთინ ვა ჭარჷ, ნამდა ხანა მანგიორიშ გინოგაფას ოცადუდ. თეშ მანგიორო, თიქ იეჰოვას გეგნუფაჩ გურ დო ჯერდჷ, ნამდა ღორონთ ქიმეხვარებუდ. დითირუო ფენინაშ დამოკიდებულებაქ? ბიბლიაშე თენა ვეძირე. მარა ჩქი მიჩქუნა, ნამდა თეშ უკულ ხანაქ დირთინუ დო ვა უდინუაფ შინაგან სიმშვიდე. თინა „მეტო ვა ჸოფე მოწყინაფილ“ (1 სამ. 1:10, 18).

14. მუშ გურაფა შემლებნა ხანაშ მაგალითშე?

¹⁴ მუშ გურაფა შემლებნა ხანაშ მაგალითშე? მითინ ჩქინწკუმა შეჯიბრებას ქაცადუნ-და, ვაგმოჭყორდან, ნამდა ჩქი შემლებნა, ჩქინ რეაქციაშ გაკონტროლება. დუდის უფლება ოკო ვემეფჩათ, გევაჸუნათ თის. თიშ მანგიორო, ნამდა უბადობას უბადობათ ვუპასუხათ, ქივეცადათ, მშვიდობა მიღდან თე პიროვნებაწკუმა (რომ. 12:17—21). თიქ ვეთირასინ ხოლო, ჩქი შემლებნა, ვა ვოდინუათ შინაგან სიმშვიდე დო ხიოლ.

15. მუ საერთო უღდეს აპოლოსის დო პავლეს?

 ¹⁵ ბოლოს გუვარჩუათ, მუშ გურაფა შემლებნა აპოლოსიშ დო პავლეშ მაგალითშე. თინეფს, ჟირხოლოს, ჯგირო უჩქუდეს წმინდა წერილეფ. თეწკუმა ართო, რდეს ცნობილ დო ჯგირ მასწავლებერეფ დო ბრელს მეხვარეს, ქრისტეშ მოწაფეთ გინორთას. მარა თინეფ ართიანს კონკურენტეფო ვემირჩქინანდეს.

16. მუნერ პიროვნება რდჷ აპოლოსი?

¹⁶ აპოლოსი ალექსანდრიაშე რდჷ, სოდეთ პირველ საუკუნეს ხალხ განათლებაშ მიოღებელო მიშჷ. თინა ჯგირ ორატორ რდჷ დო „წმინდა წერილეფ ხოლო ჯგირო უჩქუდ“ (საქ. 18:24). მუჟამსით აპოლოსი კორინთის მსახურენდჷ, ნამთინე ჯიმა თის შხვეფშე, თინეფ შქას პავლეშე, უმოს მაღალას გიორინუანდჷ (1 კორ. 1:12, 13). გეიაჸუნუო აპოლოსიქ თე სიტუაციას, ნამუთ ართობას ეცილებუდ? თენა თაშ ვეჸუაფუდ, მუშენდა ჭიჭე ხანიშ უკულ, მუჟამსით აპოლოსიქ კორინთ ქიდიტუ, პავლექ თის თხუ, ნამდა კინ დირთკო თექ (1 კორ. 16:12). აპოლოსი კრებაშ ართობაშ აკორღვაფას ქაცადუდკონ, პავლე დღას ვა თხინდჷ თის უკახლე დორთას. არგამა რე, აპოლოსი მუშ უნარეფს გიმირინუანდჷ ჯგირ საქმეეფშო — სახიოლო ამბეშ გაცხადებელო დო და დო ჯიმალეფიშ გურიშ ელაკინალო. ჩქი შემლებნა დარწმუნებულ ვორდათ, ნამდა აპოლოსი თანდაბალ პიროვნება რდჷ. მაგალთო, ბიბლიას ვა რე მოჩამილ, ნამდა აპოლოსიქ ითაკილ, მუჟამსით აკვილა დო პრისკილაქ „მიდეჸონეს დო უმოს ზუსტას გეუნწყეს ღორონთიშ შარა“ (საქ. 18:24—28).

17. მუჭო შეუნწყუ ხე პავლექ მშვიდობას?

¹⁷ მოციქულ პავლეს უჩქუდ, მუ ჯგირ საქმეეფ აფუდ ნაკეთებ აპოლოსის, მარა თიშე ვა წუხენდჷ, ნამდა ხალხიშ თოლს თინა მუშე უჯგუშო გემკორჩქინდუდ. პავლეშ თანდაბლობაქ, მოკრძალებაქ დო გონიერებაქ  კორინთიშ კრებაშა მეჩამილ თიშ რჩევაშე ქიძირ. პავლეს ვა მოწონდჷ, მუჟამსით ხალხ იჩიებუდ: „მა პავლეშ ვორექ“. თეშ გინაწონს, თიქ მითითება მეჩჷ კორინთელეფს, ნამდა მთელ ყურადღება იეჰოვა ღორონთშა დო იესო ქრისტეშა აფდესკო გინოღალირ (1 კორ. 3:3—6).

18. მუს ბგურაფლენთ აპოლოსი დო პავლეშ მაგალითშე, მუჭოთ თენა 1 კორინთელეფიშ 4:6, 7-შე იძირე?

¹⁸ მუშ გურაფა შემლებნა აპოლოსიშ დო პავლეშ მაგალითშე? ჩქი შილებე მანგარო ფხანდენდათ იეჰოვაშო დო ბრელ პიროვნებას ვოხვარდათ, თიშ ნათილ მსახურო გინირთან. მარა მარჩქილენა, ნამდა ნებისმიერ წარმატება იეჰოვაშ კურთხევა რე. აპოლოსიშ დო პავლეშ მაგალითშე ხოლო ართ მუდგარენს ბგურაფლენთ — მუთ უმოს პასუხიშმგებლობა მიღნა, თით უმოსო ოკო შევუნწყუათ ხე კრებაშ მშვიდობას. მანგარო ვაფასენთ, მუჟამსით პასუხიშმგებელ ჯიმალეფ ხეს უნწყუნა მშვიდობა დო ართობას თით, ნამდა მუნეფიშ რჩევას ღორონთიშ სიტყვაშა გიორსხუანა დო ყურადღება მუნეფიშ დუდშა ვარინ იესო ქრისტეშა აფნა გინოღალირ, ნამუთ ჩქინ მაგალით რე (წეკითხით 1 კორინთელეფიშ 4:6, 7).

19. მუშ კეთება შემლებნა თითოულს? (ქოძირით ჩარჩო  „ვემნჭუათ პირველობაშა“)

¹⁹ ღორონთიქ არძას მუდგარენ ნიჭ ვარდა უნარ მუჩეს. ჩქი შემლებნა თე ძღვინ ართიანიშ მომსახურებაშო გიმიბრინუათ (1 პეტ. 4:10). შილებე ფიფქრენდათ, მუდგას ჩქი ვორთუთ, მანგარ მნიშვნელოვან ვა რე, მარა ჭიჭე საქმეეფ, ნამუთ ხეს უნწყუნს ართობას, მოგენს ანგურეფს, ნამდგას ჸუდეშ ოშენებელო იბრინუანთ. საჭირო რე, ბრელ იფხანდათ თიშო, ნამდა ჩეფთხინუათ ირნერ სურვილ, შხვეფიშ გინაწონს უჯგუშეფო იბძირედათ. მორთ გინოჭყვიდილ მაფდან, ირფელ გუვაკეთათ თიშო, ნამდა კრებაშ მშვიდობას დო ართობას ქეშუნწყუათ ხე (ეფეს. 4:3).