1, 2. ა) განსაკუთრებულო მუჟამ შილებე გამჭირდან პატიებაქ? ბ) მუ აპატუ დენისიქ ართ კოჩის?

 ᲮᲝᲛ ვაიჭირა პატიება? ბრელს ძნელ მაფუნა თეშ კეთება, განსაკუთრებულო თიმწკუმა, მუჟამსით მიდგაინ მანგარო ალმოჭუანა გურს. მარა გლახა გრძნობეფს მერუე დო ქაპატუენ თენა, ვეკეთებენ ფერ მუდგარენ ვა რე. თენა ჯგირო იძირე ჩქინ ართ დაშ, დენისიშ, a მაგალითშე, ნამდგაქ მანგარ დიდ ამბე აპატუ ართ კოჩის. 2017 წანას დენის დო მუშ ოჯახ ექსკურსიათ რდესჷ იეჰოვაშ მოწმეეფიშ მსოფლიო მთავარ სამმართველოს, ნამუთ თიმწკუმა გვალო ახალ გონწყუმილ რდჷ. ჸუდეშა ირთუდესინ, შარას მიდგარენს რულქ აკუცუ დო თინეფიშ მანქანას ქარაგვჷ. ავარიაშ დროს დენისიქ გონება მიოდინუ. მუჟამსით აზრშა ქუმორთჷ, ქიგეგ, ნამდა მუშ ქომონჯ, ბრაიან, დოღურე დო ბაღანეფს სერიოზულ დაზიანებეფ უღუდეს. დენის თიმ მომენტის თეშნერო იშინანს: „განადგურებულ ვორდჷ, სიზმარს ვორდინ მიჩქუდ“. მართალ რე, უკულ თიქ ქიგეგ, ნამდა თენა მართალო უბედურ შემთხვევა რდჷ დო თი შოფერ ვართ ნაშუმა ჸოფე, ვართ ნარკოტიკეფ ჸოფჷ მეღებულ დო ვართ თიცალ მუთუნს ნორთუე რულწკუმა, მუთ ყურადღებას შხვა მუდგაინშა გეგნაღალაფუანდ, მარა დენისის იშენით უჭირდჷ, ჟღამ ველედვუკო გურშა. ათეშენ ლოცულენდჷ დო იეჰოვას ირიათო თხინდჷ, სიმშვიდე ქიმეჩუკო.

² რახანს ავარიაშ დროს კოჩ რდჷ ღურელ, თი მანქანაშ შოფერ ოჭოფეს დო სასამართლო ბრალს დუმტკიცენდ-და, დახუნუანდეს. დენისის უწუეს, ნამდა თიშ ჩვენებაშ მიხედვით გინოჭყორდუდ თე კოჩიშ ამბე. თინა იჩიებ: „ჩქიმ ცხოვრებას არძაშ უფრაშ მომენტეფიშ გოშინას ფთხულენდეს, მუთ კინ ირფელს მომიახალენდ. თენა თიცალ რდჷ ჩქიმო, ითამ მიდგაინქ  ნჭყოლირ ადგილშა გედვალირ ძაფეფ გომინწყუკო დო ჯიმ ქიგმორღვუკო“. გვალო მუსხირენ მარაშა დენისიქ სასამართლოს გეგშართჷ დო ჩვენება მეჩჷ თი კოჩიშ წოხოლე, მიდგაქ თეშმაშხვა ჭუა მიორინუ თიშ ოჯახის. მუ თქუ თიქ სასამართლოს? დენისიქ მოსამართლეს თხუ, ვა დასაჯესკო თე კოჩ. b მუჟამსით დენისიქ მუშ სიტყვა გათუ, მოსამართლეს ნგარაქ გეუოლ დო თქუ: „25 წანა რე, მოსამართლე ვორექინ დო დაზარალებურიშ ოჯახ დამნაშავეშ შეცოდილაფას ქოთხულენდუნ თენა, დღას ვა მაფჷ ნაძირეფ. პირველო ვორწყექ, ადამიანს თეცალ ჸოროფა დო პატიება შეულებუდას“.

 3. მუქ მეჩჷ დენისის პატიებაშ ძალა?

³ მუქ მეჩჷ დენისის პატიებაშ ძალა? თინა ფიქრენდჷ, მუნერ პატიება შეულებ იეჰოვას (მიქ. 7:18). თაშ რე, მუჟამსით მარდულ ვაფუთ იეჰოვას თიშო, ნამდა მაპატიენა, უკულ უმოს ადვილ მაფუნა, ჩქი ხოლო ქუვაპატუათ შხვეფს.

 4. მუს ითხინს იეჰოვა ჩქინდე? (ეფეს. 4:32).

⁴ იეჰოვა ითხინს, მთელ გურით ვაპატუათ ართმაჟიას, ზუსტას თეშ, მუჭოთ მუქ მაპატუეს მთელ გურით (წეკითხით ეფესოელეფიშ 4:32). თინა ელჷ, ნამდა ირო მზათ იპჸით, ქუვაპატუათ თინეფს, მით გურს ალმოჭუანა (ფსალმ. 86:5; ლუკ. 17:4). თე სტატიას გუვარჩიენთ სუმ მხარეს, ნამუთ მიმეხვარებუნა პატიებას.

ᲗᲝᲚ ᲕᲐ ᲬᲙᲣᲠᲐᲗ ᲗᲥᲕᲐᲜ ᲒᲠᲫᲜᲝᲑᲔᲤᲨᲔ

 5. მუჭოთ იგავეფიშ 12:18-შე ბგებულენთ, მუჭო შილებე დუდის ბგინაფლენდათ, მუჟამსით მოწყინუანა?

⁵ შილებე მიდგაინიშ ნარაგადიშ ვარდა საქციელიშ გურშენ მანგარო ქელმაჭვან გურქ, განსაკუთრებულო თიმწკუმა, მუჟამსით მეგობარ ვარდა ოჯახიშ წევრ იქციებ თაშ (ფსალმ. 55:12–14). მინშა შილებე თექ თიცალო მიწყუნუან გურ, ნამდა ხამუშ გეშქუმალაცალქ მაჸუან (წეკითხით იგავეფიშ 12:18). თეცალ დროს შილებე იფიფქრათ, ნამდა შურო ოკო ვემვაქცუათ ყურადღება ჩქინ გრძნობეფს, მარა თეს ქივეცადებუთ-და, თენა თიცალ იჸი, ნამდა ხამ ქუმმოგან დო თინა ნჭყოლირ ადგილს ქინიპტუათ. ოკო ვეფიფქრათ, ნამდა წყენას შურო ყურადღებას ვემვაქციენთ-და, ირფელ მუშით გეგშენწყუაფ.

 6. მუ რეაქცია მიღუნა, მუჟამსით მოწყინუანა?

⁶ მუჟამსით მოწყინუანა, ჩქინ პირველ რეაქცია გურიშმოულა რე. მუჭოთ ბიბლიას ჭარჷ, მინშა შილებე კოჩიქ მუდგარენშე გერისხას. მარა თინა მაფრთხილენა, ნამდა თე ემოციაქ გვალო ვეპჭოფან ვარდა გურს ვალმოსქიდან წყენაქ (ფსალმ. 4:4; ეფეს. 4:26). მუშენ რე თენა მნიშვნელოვან? მუშენდა ხშირას ჩქინ ემოციეფს მოქმედებეფ მოჸუნს დო გარისხებულ კოჩიშ მოქმედებაქ ჯგირქ მუჭო ოკო იჸუას?! (იაკ. 1:20). ირო ოკო ფშუდან: მოწყინუანან თიმწკუმა, შილებე გარისხებაშე დუდიქ ვა მაჭოფან, მარა გურმოულირო დოფსქიდუთ დო ვარინ თენა, უკვე ჩქინ ხეს რე.

 7. ხოლო მუ გრძნობეფქ შილებე გომრჩქინდან, მუჟამსით გურს მიწყუნუანა?

⁷ მუჟამსით გურს მიწყუნუანა, შილებე შხვა გლახა ემოციეფქ ხოლო გომრჩქინდან. მაგალთო, ართ და, ენი, იჩიებ: „ჭიჭე ვორდინ თეშ, მუაჩქიმქ დიაჩქიმ მიოტუ დო ჩქიმ ძიძა ქიმიჸუნ ოსურო, ათეშენ დუდის მეტებულო ბგინაფლენდჷ. მუჟამსით თინეფს სქუალეფქ ქეშეძინეს, თიცალ გრძნობა მიღუდ, ითამ მა ზედმეტ ვორდჷ. თეშ მიბრდჷ, ნამდა ფიფქრენდჷ, მითინს ვა ვოკოდ დო ვა უჸორდჷ“. და ჟორჟეტ ემინწყუნა, მუს გინაფლენდჷ, მუჟამსით ქომონჯიქ უღალატ. თინა იჩიებ: „ბაღანობაშე მეგობრეფ ვორდით. ართო მსახურენდით  პიონერეფო. თე ირფელიშ ართო მიკულაშ უკულ თიშ თეცალ საქციელქ გუმანადგურ“. ხოლო ართ და, ნაომი, იჩიებ: „დღას ვეფიფქრენდჷ, ნამდა ჩქიმ ქომონჯ გურს ქელმოჭუანდ. ათეშენ, მუჟამსით მიწუ, ნამდა ტყობაშე პორნოგრაფიას ნოჯინუე, თენა თიცალ რდჷ ჩქიმო, ნამდა თეზმა ხანს ბღალატენდუკო“.

 8. ა) მუშენ ოკო ვაპატუათ შხვეფს? ბ) მუ ჯგირობუა მოუღ პატიებას? (ქოძირით ჩარჩო  „მუ ოკო აკეთათ, მიდგაინქ გურ მანგარო ქოიწყუნუეს-და?“).

⁸ ჩქი ვეშემლებუნა გუვაკონტროლათ, მუს მიწინა ვარდა მუჭო მიმექციებუნა შხვეფ, მარა თე ირფელშე მუნერ რეაქცია მაღვენუნან თენა, უკვე ჩქინ ხეს რე. არძაშ უჯგუშ პასუხ თე დროს პატიება რე. მუშენ იფჩიებუთ თეს? ართ თიშენ, ნამდა მანგარო მიჸორა იეჰოვა დო თის ოკო, ვაპატუათ შხვეფს. თეწკუმა ართო, გურმოულირო ქოფსქიდუთ დო ვა ვაპატიენთ-და, უმოსო შილებე არასწორ გადაწყვეტილებეფ მიბღათ დო ჩქინ ჯანმრთელობას ხოლო ვეცილათ (იგავ. 14:17, 29, 30). დეკვირით, მუს იჩიებ ართ და, ქრისტინ: „მუჟამსით გურმოულირ ვარდა ნაწყენ ვორექ, კოჩ ვა ბძირუნს გოძიცებულს, ლურ მიტირხუ, არაჯანსაღ ოჭკუმალეფიშ ჭკუმუას იპჭყანქ დო მიჭირს ემოციეფიშ ჭოფუა, მუთ უკულ ქოთ ქომონჯწკუმა დო ქოთ შხვეფწკუმა ურთიერთობას გიოხე“.

 9. მუშენ რე ჯგირ, წყენაშე გეფთავისფალათ?

⁹ თიმწკუმა ხოლო, მუჟამსით მოწყინუესინ თი ადამიან სიტუაციაშ გიშასწორებელო მუთუნს ვართჷ, იშენით შემლებუნა მუდგაინიშ კეთება, ნამდა ნაკლებო დებზარალათ. ჟიშე მოშინაფილ ჟორჟეტ იჩიებ: „ძალამ ხანქ ქიდმესაჭირ, ნამდა ჩეფთხინეკო წყენა დო გურიშმოულა ჩქიმ ყოფილ ქომონჯიშ მიმართ, მარა შედეგო სასწაულ სიმშვიდე იბგინ“. მუჟამსით წყენაშე იფთავისფალებუთ, ფთხილანთ ჩქინ გურს გორგილაფაშე, ნამდა ართიქ მოწყინუესინ თიშ გურშენ, ირკოჩის გლახათ ვემვექცუათ. თეწკუმა ართო, ვოხვარუთ ჩქინ დუდის, გუვაგრძელათ ცხოვრება დო ვა ვოდინუათ ხიოლ (იგავ. 11:17). მარა მუ ოკო ვაკეთათ, პატიება იშენით ქომჭირან-და?

ᲛᲔᲠᲘᲗ ᲒᲚᲐᲮᲐ ᲒᲠᲫᲜᲝᲑᲔᲤᲡ

10. მუშენ რე საჭირო, ჩქინ დუდის მდგომარეობაშე გიშაულარო დრო ქიმეფჩათ? (ქოძირით სურათეფ).

¹⁰ მუჭო შეილებ მერუე გლახა გრძნობეფს? ართ-ართ საშვალება რე, ჭიჭე დრო გეგშეშქვე. მაგალთო, ტრავმირებულ ადამიანს მკურნალობაშ  უკულ ჭიჭე დრო ოსაჭირ, კუჩხის ქიგედირთასინ. თეშნერო, ემოციურ ტრავმაშ მეღებაშ უკულ ხოლო ჭიჭე დრო რე საჭირო მდგომარეობაშე გიშაულარო, ნამდა მზათ ქიჸუე პატიებაშო (ეკლ. 3:3; 1 პეტ. 1:22).

11. მუჭო მიგეხვარებუნა ლოცვა პატიებას?

¹¹ ქილოცით დო ქოთხით იეჰოვას, ქიმგეხვარან პატიებას. c ენი, ნამუთ ჟიშე მიფშინეთ, იშინანს, მუჭო მეხვარ თის ლოცვაქ. თინა მირაგადუნა: „იეჰოვას ფთხინდჷ, ოჯახიშ თითოულ წევრის ქუმაპატუესკო თი შეცდომეფ, ნამუთ დუშვით. უკულ წერილ ქიმეპჭარ მუაჩქიმს დო თიშ მაჟია ოსურს დო უწი, ნამდა პატიებულ მაფუდ თინეფშა“. ენიშო ადვილ ვა რდჷ თეშ კეთება, მარა დეკვირით, მუს იჩიებ თინა: „იმენდ მიღჷ, ნამდა იეჰოვაშ მაგალითიშ მეჸუნას დო პატიებას ვოცადუქინ თენა, ქიმეხვარებ მუაჩქიმს დო თიშ ოსურს, გეჩინებაფუან იეჰოვა“.

12. მუშენ ოკო მივენდათ იეჰოვას დო ვართ ხოლო ჩქინ გურს? (იგავ. 3:5, 6).

¹² იეჰოვას მიენდით დო ვართ ხოლო თქვან გურს (წეკითხით იგავეფიშ 3:5, 6). იეჰოვას ირო უჯგუშო უჩქჷ, მუ რე ჯგირ ჩქინო (ეს. 55:8, 9). თინა დღას ვა ფთხინა თიცალ მუდგარენს, მუთ დუმაზარალენა. ათეშენ, მუჟამსით მირაგადუნა, ნამდა ვაპატუათ, შემლებუნა ბჯერდან, ნამდა თენა აუცილებერო ჯგირ შედეგეფს ქუმომღანა (ფსალმ. 40:4; ეს. 48:17, 18). თაშ ვემიფქციებუთ დო ჩქინ გურს ქივენდებუთ-და, შილებე დღას ვეშმალებუან პატიებაქ (იგავ. 14:12; იერ. 17:9). ნაომი, ნამუთ ჟიშე მიფშინეთ, იჩიებ: „დუდშე ვა მაპატიებუ ჩქიმ ქომონჯშა, პორნოგრაფიას უჯინედუნ, დო ვამართლენდჷ ჩქიმ დუდის. მიმორჩქუდ, ნამდა ქუვაპატიენდ-და, შილებედ კინ გურ ქელმოჭუკო ვარდა გაჭყორდუკო, მუშმაშხვა ჭუა მუმორინუ. ფიფქრენდჷ, იეჰოვას ხომ ქარჩქილე-მაქ, მუს ბგინაფლენქ. მარა უკულ ქუგოფხვად, ნამდა იეჰოვას ჩქიმ გრძნობეფ არჩქილენ თენა ვა ნიშნენს, ნამდა ოთანხმ ჩქიმ აზრეფს. მართალ რე, თის უჩქჷ, მუს ბგინაფლენქ დო ქოთ თინა, ნამდა დრო მოსაჭირ მდგომარეობაშე გიშაულარო, მარა თინა ხოლო მანგარო ოკო, ნამდა ვაპატუე“. d

 ᲒᲚᲐᲮᲐ ᲔᲛᲝᲪᲘᲔᲤ ᲯᲒᲘᲠᲘᲗ ᲓᲝᲗᲘᲠᲔᲗ

13. მუჭოთ რომაელეფიშ 12:18–21-ის იძირე, მუ ოკო ვაკეთათ?

¹³ პატიება ვა ნიშნენს, უბრალოთ გინოჭყვიდილ მაფუდან, ვეფჩუათ მოხვალამირშენ. ჩქინ მიზან მშვიდობიან ურთიერთობაშ დორთინაფა ოკო რდასჷ, განსაკუთრებულო, მოწყინუესინ თი პიროვნება ჩქინ თანაქრისტიან ქორენ-და (მათ. 5:23, 24). ათეშენ, გურმოულირო დოფსქიდათინ თიშ მანგიორო, ოკო გიპჭყოლიდუათ წყენა დო ვაპატუათ (წეკითხით რომაელეფიშ 12:18–21; 1 პეტ. 3:9). მუ მიმეხვარებუნა თეშ კეთებას?

14. მუს ოკო ვოცადუდათ დო მუშენ?

¹⁴ ოკო ვეცადათ, ნამდა მოწყინუესინ თი ადამიანს იეჰოვაშ თოლით უჯინათ. მუჭო უჯინე იეჰოვა ადამიანეფს? თინა ირო ოცად, კოჩიშ გურს ჯგირ ქოძირას (2 მატ. 16:9; ფსალმ. 130:3). მუჭოთ წესინ, კოჩის თის ავოხვილუანთ, მუდგაშ ძირაფა მოკონა – ჯგირს ქობგორუნთ-და, ჯგირს ბძირუნთ, გლახას ქობგორუნთ-და – გლახას. მუჟამსით ადამიანიშ ჯგირ თვისებეფს ქიდვეკვირებუთ, უმოს ადვილ მაჸინა, ქუვაპატუათ. მაგალთო, ართ ჯიმა, ჯეროდ, იჩიებ: „გინვოჯინექინ, თანაქრისტიანშა პატიება  თიმწკუმა უმოს ადვილ მაფჷ, მუჟამსით თიშ შეცდომას ვარინ, ჯგირ მუთ უღუნ თის ვოკვირუქ“.

15. მუშენ იჸი ჯგირ, პიროვნებას ქოუწუათ, ნამდა პატიებულ გაფუნა?

¹⁵ ხოლო ართ მანგარ მნიშვნელოვან, მუდგაშ კეთება შეილებუნან, თინა რე, ნამდა ქოუწუათ ადამიანს, პატიებულ გაფუნან. მუშენ რე თენა აუცილებერ? ნაომი, ნამუთ ჟიშე მიფშინეთ, იჩიებ: «მუჟამსით ჩქიმ ქომონჯიქ პკითხჷ ქუმაპატიაო, ხონარქ ვეკმაღინ დო ვეკმარაგადუ ქო-მაქ. ქიმეფხვად, ნამდა სინამდვილეს ვა მაფუდ პატიებულ. დროშ მიკულაწკუმა ართო შემალებუ ქოუწიკო თის თე ჟირ მნიშვნელოვან სიტყვა: „პატიებულ მაფჷ“. მუჟამსით ჩქიმ ქომონჯიქ თენა ქიმირჩქილუ, თოლქ ჩილამურით გეიაფშჷ. მა ხოლო სასწაულ სიმშვიდე ქიბგინ, მუშენდა პატიებაქ შემალებუ. თევრეშე მოჸუნაფილ კინ დუმართჷ თიშ ნდობაქ დო თი ხოლოშიან ურთიერთობაქ, ნამუთ მიღუდეს».

16. მუ დიგურეთ პატიებაშ გურშენ?

¹⁶ იეჰოვას ოკო, ნამდა ვაპატუათ შხვეფს (კოლ. 3:13). მინშა მიჭირა თეშ კეთება, მარა, მუჟამსით უბრალოთ თოლს ვა პწკურუნთ ჩქინ გლახა გრძნობეფშე დო ქივებრძოლებუთ თინეფს, ჩქინ გლახა ემოციეფ ჯგირით დითირუ (ქოძირით ჩარჩო  „სუმ ნაბიჯ, ნამუთ პატიებას მიგეხვარებუნა“).

ᲞᲐᲢᲘᲔᲑᲐᲡ ᲯᲒᲘᲠ ᲨᲔᲓᲔᲒᲔᲤ ᲛᲝᲣᲦ

17. მუ მიზეზეფ მიღუნა პატიებაშო?

¹⁷ პატიებაშო ქიანაშ მიზეზ მიღუნა, მარა თინეფშე მუსხირენ ქიგიფშინათ. პირველ, თეთ ჩქინ მოჭყოლოფე ზეციერ მუმაშ, იეჰოვაშ, მაგალითის მეპჸუნთ დო გურს უხარენთ თის (ლუკ. 6:36). მაჟია, პატიებათ სიმარდულს გიმოფხანტუნთ თიშო, ნამდა იეჰოვა ჩქი ხოლო მთელ გურით მაპატიენა (მათ. 6:12). დო მასმა, მუჟამსით შხვეფს ვაპატიენთ, უთხილანთ ჩქინ ჯანმრთელობას დო ჯგირ ურთიერთობა მიღუნა შხვეფწკუმა.

18, 19. მუქ შილებე იჸუას პატიებაშ შედეგიქ?

¹⁸ შხვეფშა პატიებას შილებე დღას ვეფიფქრენდითინ თიცალ ჯგირ შედეგეფქ ქუმაჸუნას. ქიგიფშინათ დენისიშ შემთხვევა, ნამუთ დაჭყაფუს მიფშინეთ. თიქ უკულ გეგჷ, ნამდა თი შოფერს, ნამდგაქ თინეფიშ მანქანას არაგვჷ, თე ამბეშ უკულ დუდიშ ჸვილუა ნოლამუე. მარა დენისიქ მთელ გურით აპატუნ თიშ ძირაფაქ თიცალო იმოქმედ თიშა, ნამდა ბიბლიაშ გურაფა ქიდიჭყჷ.

¹⁹ შილებე პატიება მანგარ ძნელ მაფუდან, მარა თენა ღირჷ მონდომაშა, მუშენდა თექ შილებე დიდ კურთხევა ქუმომღან (მათ. 5:7). თაშ ნამდა, ირნერო ქივეცადათ, ჩქინ ზეციერ მუმა, იეჰოვაცალო, ჩქი ხოლო ვაპატუათ შხვეფს.