1. მუ ჯგირობუა მოუღ თიშე ჩიებას, მუჭო გებგით ჭეშმარიტება?

 „ᲛᲣᲭᲝ გეგჷ ჭეშმარიტება?“ — თე კითხვაშა ალბათ ბრელშა გაჸინა პასუხ მინაჩემ. თენა რე ართ-ართ პირველ კითხვა, ნამდგას თანამორწმუნეეფ ართიანს ვოკითხუთ გაჩინებაფაშ დროს. ჩქი მოხიოლნა თიშ მორჩქილაფა, მუჭო გეჩინებაფეს დო იჸოროფეს და დო ჯიმალეფქ იეჰოვა დო ჩქინ ისტორიას ხოლო ხიოლით ვეჩიებუთ (რომ. 1:11). თეცალ ჩიებეფ გუმოშინანა, მუზმათ ძვირფას რე ჭეშმარიტება. თეწკუმა ართო, უმოსო გინმოჭყვიდირაფუანა, ვემვოტუათ „ჭეშმარიტებაშ შარათ“ გილულა, მუთ ნიშნენს, იფცხოვრათ თეშ, ნამდა მიბღათ იეჰოვაშე კურთხევეფ დო მოწონა (3 იოან. 4).

2. მუს გუვარჩიენთ თე სტატიას?

² თე სტატიას გუვარჩიენთ მუსხირენ მიზეზის, მუშენ მიჸორა ჭეშმარიტება დო მუჭო შემლებნა გუვაგრძელათ თე ძვირფას ძღვინიშ მიმართ ჸოროფაშ გიმოხანტუა. თე გარჩიება გამმანგარენა მარდულობას თიშ მიმართ, მუთ იეჰოვაქ აკეთ, ნამდა ჭეშმარიტებაშა ქუმომიჸონესკო (იოან. 6:44). თეწკუმა ართო, უმოსო გეგნმოჭყვიდირაფუანა, შხვეფს ხოლო გეგნოფჩათ ჭეშმარიტება.

3. მუ რე თი მნიშვნელოვან მიზეზ, მუდგაშ გურშენ მიჸორა ჭეშმარიტება?

³ ჩქი ბრელ მიზეზ მიღნა, მუდგაშ გურშენ მიჸორა ჭეშმარიტება. არძაშ უმოს მთავარ თინა რე, ნამდა მიჸორა იეჰოვა ღორონთ, ნამდგაშე მოურს ჭეშმარიტება. ბიბლიაშ საშვალებათ ჩქი იეჰოვა გეფჩინებაფეთ ხვალე ცა დო დედამიწაშ გუმაჭყაფალ, ირფელიშ შემალებე ღორონთო ვარინ, მოჸოროფე ზეციერ მუმათ ხოლო, მით მთელ  გურით ზრუნენს ჩქინდე (1 პეტ. 5:7). მიჩქნა, ნამდა ჩქინ ზეციერ ღორონთ რე „მოჭყოლოფე, შხვეფიშ გაჭირებაშ გურშა მიმაღალარ დო ხეთეშე ვერისხებუნ ფერ, გურხვე რე სიჯგირას დო ჭეშმარიტებას“ (გამ. 34:6). იეჰოვას უჸორს სამართალ (ეს. 61:8). თის გურს აჭჷ, მუჟამსით ორწყე ჩქინ ტანჯებას; თინა მზათ რე დო მანგარო ოკო, დანიშნულ დროს დამთხინუან არძა ოწუხებელ (იერ. 29:11). მართალო მუ დიდებულ დრო მელნა! ვართ რე გასაკვირ, მუშენ მიჸორა თაშ იეჰოვა!

4, 5. მუშენ შეადარ მოციქულ პავლექ ჩქინ იმენდ ღუზას?

⁴ ხოლო მუშ გურშენ მიჸორა ჭეშმარიტება? ჭეშმარიტებას ჯგირობუა მოუღ ჩქინდა. მაგალთო, ბიბლიურ ჭეშმარიტებაშა მიშურს მომავალიშ იმენდ. თიშ ეიონწყუმალო, მუ ძვირფას რე თე იმენდ, მოციქულ პავლექ ჭარჷ: „თე სანდო დო მტკიცე იმენდ ღუზაცალო რე ჩქინო“ (ებრ. 6:19). მუჭოთ ღუზა ოხვარ გემს, ართ ადგილს გერდას დო ტალღეფქ მუშ გემოშა ვეგლეჸუნას, თეშ ბიბლიაშა გერსხილ იმენდ მოხვარნა, სირთულეეფიშ დროს პრობლემეფს ვევაჸუნათ დო სიმშვიდე ვა ვოდინუათ.

⁵ მართალ რე, პავლე თე კონტექსტის ზეციერ იმენდიშ გურშენ იჩიებუდ, ნამუთ ცხებულ ქრისტიანეფს უღნა, მარა თე სიტყვეფ თი ქრისტიანეფს ხოლო ოხუ, მით დედამიწას მარადიულ სიცოცხლეს ელნა (იოან. 3:16). მუშო ოკო რაგად, მარადიულ სიცოცხლეშ იმენდიშ გურშენ გაგებაქ ჩქინ ცხოვრებას აზრ ქიმეჩ.

6, 7. მუ ჯგირობუა მოუღ ივონს მომავალიშ გურშენ იმენდიშ გაგებაქ?

⁶ გუვარჩუათ ივონიშ მაგალით, ნამუთ ბაღანობაშე ჭეშმარიტებას ვა რდე. ჭიჭენობას თის ღურაშა ოშქურუდ. ართშა წიგნშე თიცალ მუდგარენ ეშეკითხჷ, მუთ დღას ვა გოჭყოლად. თექ ჭარუდ: „ართ დღას შილებე ჭუმანერ დღაქ ვა გოთანდას“. ივონ იჩიებ: «თე სიტყვეფქ გურს მანგარო ქუმოფხვად დო მინშა მომავალშე ფიქრ ვა მორულუანდჷ. ფიფქრენდჷ: „მუშენ გოფრჩქინდჷ? გვალო თენა რენო ცხოვრება?“ ღურა ვა მოკოდ!».

⁷ მოზარდობაშ პერიოდის თიქ იეჰოვაშ მოწმეეფს ქეშეხვად. ივონ იჩიებ: „ქიდებჯერ, ნამდა არსებენდჷ დედამიწას მარადიულ ცხოვრებაშ იმენდ“. მუ ჯგირობუა მოუღ თე დას ბიბლიურ ჭეშმარიტებაშ გაგებაქ? თინა აგრძელენს: „ასე უკვე მშვიდას ბლურს, მუშენდა ვართ ღურაშა მოშქურ დო ვართ თიშე ფიფქრენქ, ჭუმან მუ იჸუაფ“. არგამა რე, ივონის მანგარო უჸორს ბიბლიურ ჭეშმარიტება დო თიშა ხიოლ მოუღ შხვეფწკუმა იმენდიშ გურშენ ჩიებას (1 ტიმ. 4:16).

8, 9. ა) მუჭო დაფას იესოშ იგავს მოშინაფილ ართ კოჩიქ ნაძირეფ განძ? ბ) თქვანო მუზმათ ძვირფას რე ჭეშმარიტება?

⁸ ბიბლიურ ჭეშმარიტებაშა ღორონთიშ სამეფოშ გურშენ სახიოლო ამბე ხოლო მიშურს. იესოქ თინა ტყობინაფილ განძის ქეშუდარ, მუჭოთ თეს მათეშ 13:44-ის ბკითხულენთ. იესოქ თქუ: „ზეციერ სამეფო მინდორს ტყობინაფილ განძის ქოგჷ, ნამდგას კოჩ ქოძირუნსინ, კინ ოტყობინუანს დო უკულ გახარებულ მეურს, მუთუნ ქაპალუნ-და, ირფელს გიმოჩანს დო ჸიდულენს თე მინდორს“. ქიდეკვირითო, თე კოჩ ვა გორუნდჷ განძის. მარა მუჟამსით ქოძირ, ბრელ მუდგარენ დათმჷ, ნამდა ხეშა ქეშუჸოთამუდკო თინა. მუთ ქუღუდუნ ირფელ გეგმოჩ, მუშენდა არჩქილედ, მუნერ ძვირფას რდჷ თინა, მუთ ძირჷ. ნაძირეფ ბრელით უმოს ძვირფას რდჷ თიშე, მუთ დათმჷ.

⁹ თქვა ხოლო თაშ ფიქრენთო ჭეშმარიტებაშე? მუშო ოკო რაგად, ქო! ჩქი მარჩქილენა, ნამდა ქვეყნიერებას მუთუნ ვა მიაჩინე თი ხიოლიშ მაფასა, მუთ იეჰოვაშ მსახურებას დო სამეფოშ  მართველობაშ დროს დედამიწას მარადიულ ცხოვრებაშ იმენდის მოუღ. ნებისმიერ მსხვერპლშა ულა ღირჷ თიშო, ნამდა მიღდან იეჰოვაწკუმა ხოლოშიან ურთიერთობა. იეჰოვაშა გურიშ გახარებას ჩქინდა არძაშ უმოს დიდ ხიოლ მოუღ (კოლ. 1:10).

10, 11. მუქ გინაჭყვიდირაფუ მაიკლის, დოთირუკო ცხოვრებაშ წეს?

¹⁰ ბრელქ დიდ მსხვერპლშა იდჷ, ნამდა მიღკო იეჰოვაშე მოწონა. ნამთინექ ვარია თქუ წარმატებულ კარიერაშე, მინქ — სიმდიდრეშ შაყარუაშე, შხვეფქ დოთირუეს მუნეფიშ ცხოვრებაშ წეს, მუჟამსით გეჩინებაფეს იეჰოვა. თაშ მოხვად მაიკლიშ შემთხვევას ხოლო, ნამუთ ბაღანობაშე ჭეშმარიტებას ვერდუდ. თინა ახალგაზრდობას კარატეს ვარჯიშენდჷ. მაიკლ იჩიებ: „ჩქიმო მანგარ მნიშვნელოვან რდჷ, ფიზიკურო ფორმას ვორდკო. მინშა ფიფქრენდჷ, ნამდა ჩქიმდა მითინს ვა მარიებედ“. მარა მუჟამსით თიქ ბიბლიაშ გურაფა ქიდიჭყჷ, ქიგეგ იეჰოვაშ დამოკიდებულება ძალადობაშენ (ფსალმ. 11:5). მაიკლ, თი წყვილიშ გურშენ, მიდგა ბიბლიას ოგურუანდჷ, იჩიებ: „თინეფს ჩქიმდა პირდაპირ დღას ვა უთქუალნა, მემტებუდკო კარატე. უბრალოთ აგრძელენდეს ჩქიმდა ბიბლიურ ჭეშმარიტებაშ გურაფას“.

¹¹ მუთ უმოსო იჩინებაფუანდჷ მაიკლ იეჰოვას, თით უმოსო ირდუდ იეჰოვაშ მიმართ თიშ ჸოროფა. თიშ გურს მანგარო შეხუ თი ფაქტიქ, მუჭო მიშურს იეჰოვა მუშ მსახურეფიშ მდგომარეობაშა. დროშ მიკულაწკუმა ართო, მაიკლიქ ქიმეხვად, ნამდა ცხოვრებაშ წეს ოკო დოთირუკო. თინა იჩიებ: „მიჩქუდ, ნამდა კარატეშ მეტება არძაშ უმოს რთულ გინაჭყვიდირალ იჸუაფუდ ჩქიმო. მარა თინა ხოლო მარჩქლედ, ნამდა თენა იეჰოვას გურს გუხარენდჷ დო დარწმუნებულ ვორდჷ, თიშ მსახურება ნებისმიერ მსხვერპლშა ღირუდ“. მაიკლ აფასენდჷ ჭეშმარიტებას, ნამდგას ქიმიოგორუ, მუდგაქ გინაჭყვიდირაფუ, გეგნოდგკო დიდ ნაბიჯ დო დოთირუკო ცხოვრებაშ წეს (იაკ. 1:25).

12, 13. მუჭო მეხვარ ბიბლიურ ჭეშმარიტებაქ მეილის?

¹² თიშ ოძირაფალო, მუ ძვირფას რე ჭეშმარიტება, ბიბლიაქ თინა ქეშუდარ ლამპას, ნამუთ უკმელას სინთანს (ფსალმ. 119:105; ეფეს. 5:8). მეილი, ნამუთ აზერბაიჯანშე რე, მანგარო აფასენს თის, მუთ ღორონთიშ სიტყვაშე გეგჷ. თიქ რელიგიურო გორთილ ოჯახის მირდჷ. მუამუშ მუსულმან რდჷ, დიდა — იუდეველ. მეილი იჩიებ: «ღორონთიშ არსებობაშ ირო ბჯერდჷ, მარა მიღუდ კითხვეფ, ნამუთ სვანჯის ვა მარზენდჷ: „მუშენ გუმოჭყეს ღორონთიქ? მუშენ იტანჯებნა ადამიანეფ თე ცხოვრებას დო უკულ ჯოჯოხეთის ხოლო მუშენ ოკო მოხვადან?“. ბრელ იჩიებუდ, ნამდა ირფელ ღორონთიშ ნებათ ხვადუდ, ათეშენ მიკვენდჷ, ღორონთ მარიონეტეფცალო მოქცუნანო — დიო განსაცდელს ქინმოჸოთანა დო უკულ ოხიოლნო თიშ ძირაფა, მუჭო იბტანჯებუთ?“».

¹³ მეილის ვემუტებ მუშ კითხვეფშე პასუხიშ გორუა. ჭიჭე ხანშა თიქ ბიბლიაშ გურაფა ქიდიჭყჷ დო ჭეშმარიტება ქიგეგ. თინა იჩიებ: „ბიბლიას მოჩამილ ლოგიკაქ, ნამუთ დუმაჯერებელ რდჷ, ცხოვრებაშ გურშენ ჩქიმ შეხედულება დომთირუ. ღორონთიშ სიტყვას ინოჭარილ გურაფეფქ, ნამუთ გონივრულ რდჷ, შინაგან სიმშვიდე ქომუჩ“. მეილიცალო, ჩქი ხოლო არძა განვადიდენთ იეჰოვას, „მიდგაქ უკმელაშე მუშ სარკო სინთეშა გეგშამჸონეს“ (1 პეტ. 2:9).

14. მუჭო შემლებნა ჭეშმარიტებაშ მიმართ ჸოროფაშ გამანგარება? (ქოძირით ჩარჩო  „შხვა შედარებეფ“).

¹⁴ თენა ხვალე მუსხირენ მაგალით რე თიშ ოძირაფალო, მუსხით ძვირფას რე  ჭეშმარიტება. მუშო ოკო რაგად, ხოლო ბრელ გუგაშინედან იჸი. ხომ ვემშახუნუანდით პირად გურაფას შხვა მიზეზეფიშ გიმორკვიებას? მუთ უმოსო მიჸორა ჭეშმარიტება, თით უმოსო დობგორუნთ თე ჸოროფაშ გიმოხანტუაშ საშვალებეფს.

15. მუჭო შემლებნა ვოძირათ, ნამდა მიჸორა ჭეშმარიტება?

¹⁵ ბიბლიაშ დო თიშა გერსხილ პუბლიკაციეფიშ რეგულარულ გიმორკვიებათ ვოძირანთ, ნამდა მიჸორა ჭეშმარიტება. ვა უღჷ მნიშვნელობა, მუსხი ხან რე, ჭეშმარიტებას ვორეთ, ჩქი ირიათო ოკო ბგურაფლენდათ. თე ჟურნალიშ პირველ გიშაშქუმალას თეცალ მუდგარენ ჭარუდ: „ჭეშმარიტება გჷ ჭიჭე, სქვამ ყვავილს, ნამუთ ტყურაშ ტყას მიშაჩანს. ქუგოკო, ქიმიოგორუენ-და, დაკვირებულ ოკო რდე . . . ხე ქიმეთხენ, ქუგოკონ-და, თუდო ოკო გეგმიკინე. ვეგეჯერდა ჭეშმარიტებაშ ხვალე ართ ყვავილს . . . გაგრძელ გორუა დო დოშაყარე უმოს მეტ“. გურაფა ძნელ საქმე რე, მარა ღირჷ მონდომაშა.

16. გურაფაშ ნამ მეთოდიქ იჸუ სქანო ეფექტურქ ბიბლიაშ კითხირიშ დროს? (იგავ. 2:4—6).

¹⁶ შილებე არძას ვა მიჸორდან კითხირ დო გურაფა. მარა იეჰოვა მირაგადნა,  გუვაგრძელათ გიმორკვიება, ნამდა უჯგუშო ქენვანჭათ ბიბლიურ ჭეშმარიტებას (წეკითხით იგავეფიშ 2:4—6). თეცალ მონდომაშ გიმორჩქინა ირიათო ჯგირობუას მომღანა. ჯიმა კორი იჩიებ, ნამდა ბიბლიაშ კითხირიშ დროს კონკრეტულ მუხლშა გინუღ ყურადღება. თინა ენწყუნს: „ბკითხულენქ არძა სქოლიოს დო ბგორუნქ მარგინალურ მუხლეფს. თეს გეძინელ, დამატებით ინფორმაციას ხოლო იბრკვიენქ . . . თე ირფელიშ ჭყოლოფათ ბიბლიაშ კითხირიშ დროს ბრელ მუდგარენს ბგურაფლენქ! ვა უღჷ მნიშვნელობა, ჩქი ხოლო თე მეთოდ მიღნა დოვარ შხვა, მარდულობას გიმოფხანტუნთ, მუჟამსით დროს გიმურთუნთ დო მონდომას ვა ვარკენთ ბიბლიაშ კითხირს (ფსალმ. 1:1—3).

17. მუს ნიშნენს ჭეშმარიტებაშ თანახმას ცხოვრება? (იაკ. 1:25)

¹⁷ მუშო ოკო რაგად, ხვალე ჭეშმარიტებაშ გურაფა ვა რე დასაბაღ. ჭეშმარიტებაქ სრულ სარგებელ ქუმომღანინ, საჭირო რე, თიშ თანახმას იფცხოვრათ. შხვა სიტყვეფით ქოფთქუათინ, ცხოვრებას გეგმიბრინუათ თინა, მუდგას ბგურაფლენთ. ხვალე თე შემთხვევას მომღანა ჭეშმარიტება ნამდვილ ბედნერობას (წეკითხით იაკობიშ 1:25). მუჭო შემლებნა დებრწმუნათ, ნამდა ფცხოვრენთ ჭეშმარიტებათ? ართ ჯიმა ელამჩანა, გეგმიბრკვიათ ჩქინ დუდ, ნამდა ქობძირათ, ქიბრინუანთ დო ვარ ნაგურეფუს დო ნამ მხარეს მოსაჭირნა გაუჯგუშება. თეშ გურშენ მოციქულ პავლექ თქუ: „კინ გუვაგრძელათ მოწესრიგებულო ულა ართ მიმართულებათ თიშ უმკუჯინუო, მი მუსხით რე მოწიფულ“ (ფილ. 3:16).

18. მუშენ ვა ვარკენთ მონდომას „ჭეშმარიტებაშ შარათ“ გილულას?

¹⁸ დეფიქრით, მუშმადიდა ჯგირობუა მოუღ, მუჟამსით ირნერო ვოცადუთ, გილაფრთათ „ჭეშმარიტებაშ შარათ“. თენა ჩქინ ცხოვრებას უჯგუშობაშა თირანს დო, თეწკუმა ართო, იეჰოვა დო და დო ჯიმალეფშა ხოლო მოუღ ხიოლ (იგავ. 27:11; 3 იოან. 4). თეშ უჯგუშ მიზეზეფ მუ ოკო მიღდან, ნამდა მიჸორდან ჭეშმარიტება დო იფცხოვრათ თიშ თანახმას?!