1, 2. ა) მუს ბგინაფლენთ, მუჟამსით ფიფქრენთ იესოშ ცხოვრებაშე დო მსახურებაშენ? ბ) მუს გუვარჩიენთ თე სტატიას?

 ᲐᲠᲫᲐᲡ მანგარო მონატრნა თი პიროვნება, მით ღურაქ მიდამღეს. მუჟამსით ფიფქრენთ თიშ ღურაშ წოხოლენ დღალეფშე, დუდშე შილებე ჭუაშ მეტის მუთუნს ვა ბგინაფლენდათ, დო ღურაშახ მანგარო ქოწვალენდჷ-და, თენა ხოლო უმოსო მიწყუნუანა გურს. მარა დროშ მიკულაწკუმა ართო შილებე ჩქინ გურჭუა გეგნოფორას ჯგირ მოგონებეფქ. მაგალთო, თიშ გოშინაქ, მუჭო მიმეხვარეს თე პიროვნებაქ, მუ დუმოგურეს დო მუჭო მოძიცინუანდეს, შილებე გურშა ემქექუან.

² თეშნერო, გურს მიჭუანა ბიბლიას თი მონაკვეთეფიშ კითხირ, სოდეთ იძირე, მუჭო აწამეს დო ჸვილეს იესო. განსაკუთრებულო, გოშინაშ ონჯუაშ პერიოდის, მუჟამსით უმოს დროს გიმურთუნთ თიშე ფიქრის, მუსხით ძვირფას რე იესოშ კეთებულ მსხვერპლ (1 კორ. 11:24, 25). მარა თე დროს, გურშა ემქექუანა თი ირფელშე დაფიქრება, მუთ იესოქ თქუ დო აკეთ დედამიწას ცხოვრებაშ დროს დო თიშე ფიქრ ხოლო, მუს ორთჷ ამდღა ჩქინო დო მუს გაკეთენს მომავალს. თე ირფელშე დო იესოშ ჸოროფაშე დაფიქრება აღბძრენა, საქმეეფით გეგმოფხანტათ მარდულობა.

3. მუშენ ვორეთ გიშაჸიდირალიშ მარდულეფ?

³ მუჟამსით ფიფქრენთ იესოშ ცხოვრებაშე დო თიშ გურშენ, მუშენ ღურჷ თიქ, გურ მარდულობათ ემაფშაფნა. დედამიწას ცხოვრენდუნ, თინა ხალხის ოგებაფუანდჷ თი კურთხევეფშე, ნამდგას ღორონთიშ სამეფო მუღანდჷ კაცობრიობას. ჩქი მანგარო ვაფასენთ თი ირფელს, მუთ გიშაჸიდირალიშ  გურშენ ბიბლიაშე გებგით დო მარდულეფ ვორეთ, ნამდა თიშ ჭყოლოფათ შემლებნა, ხოლოშიან ურთიერთობა მიღდან იეჰოვა დო იესოწკუმა. გიშაჸიდირალიშ მიმართ რწმენას გიმირჩქინანსინ თინეფს იმენდ უღნა, ნამდა დედამიწას მარადიულო იცხოვრენა დო ქეშეხვადნა თინეფს, მით ღურაქ მიდუღ (იოან. 5:28, 29; რომ. 6:23). თეშმადიდა კურთხევეფ ვადამსახურებნა დო ვართ დღას გინმაგინენა იეჰოვა დო იესოშა თი ირფელიშ გურშენ, მუთ თინეფქ ჩქინო აკეთეს! (რომ. 5:8, 20, 21). მარა მუჭო შემლებნა მარდულობაშ გიმოხანტუა?

4. მუჭო გიმირჩქინ მარიამ მაგდალელქ მარდულობა თი ირფელშო, მუთ იესოქ უკეთ? (ქოძირით სურათ).

⁴ გუვარჩუათ ართ იუდეველ ოსურკოჩიშ, მარიამ მაგდალელიშ შემთხვევა, ნამდგას შქვით დემონ ატანჯენდჷ დო ფიქრენდჷ, ნამდა თიშ დარსხება მითინს ვეშიალებედ. წერმიდგინით, მუნერ მარდულ იჸიდ თინა იესოშ, მუჟამსით თიქ დემონეფშე გათავისფალ. ზუსტას მარდულობაქ გინაჭყვიდირაფუ, გინირთკო იესოშ მიმაჸუნალო დო მთელ მუშ დრო, ენერგია დო შესაძლებლობეფ თიშა ხუჯიშდაკინებელო გეგმირინუკო (ლუკ. 8:1—3). მართალ რე, მარიამ მანგარო აფასენდჷ თის, მუთ იესოქ პირადო თიშო აკეთ, მარა შილებე შუროთ ვა უჩქუდკო, ნამდა მომავალს იესო ბრელით უმოსის გაკეთენდჷ — სიცოცხლეს დათმენდჷ არძა ადამიანშო, დო მით თიშ მიმართ რწმენას გეგმირჩქინანდჷ, აღვენუდ მარადიულ სიცოცხლეშ საშვალება (იოან. 3:16). მარიამქ მარდულობა თით ხოლო გიმირჩქინ, ნამდა იესოშ ართგურქ დოსქიდ. მუჟამსით თინა ძელს ქიმკაჭკადეს, მარიამ თექ რდჷ დო თეშნერო, ემოციურო ელურდჷ იესოს დო არძას, მით წუხენდჷ იესოშენ (იოან. 19:25). იესოშ ღურაშ უკულ, მარიამქ დო ჟირ ოსურკოჩიქ „ჯგირ შურ უღუდუნ ფერ ნაზავ ქიჸიდეს“ დო თიშ სამარხშა ქიმიღეს (მარ. 16:1, 2). მარიამქ მუშ ართგურობაშენ კურთხევეფ მიღჷ. თის უღუდ პატი, დურაგადუკო გათელებურ იესოს, მუდგაშ შესაძლებლობა მოწაფეეფიშ უმენტაშის ვა შიბჷ (იოან. 20:11—18).

5. მუჭო შემლებნა გიმოფხანტათ მარდულობა იეჰოვა დო იესოშ მიმართ?

 ⁵ ჩქი ხოლო, ჩქინ დროთ, ენერგიათ დო ფინანსეფით შემლებნა ხუჯ დუკინათ სამეფოშ საქმეს დო თეშნერო, მარდულობა გიმოფხანტათ იეჰოვა დო იესოშ მიმართ თი ირფელშო, მუთ ჩქინო აკეთეს. მაგალთო, შემლებნა მონაწილება მიბღათ თი შენობეფიშ შენებაშ დო მიკოლუაფაშ საქმეს, ნამდგას იეჰოვაშ თაყვანიშცემაშო იბრინუანთ.

6. მუშენ შემლებნა ფთქუათ, ნამდა გიშაჸიდირალ პირადო ჩქინო კეთებულ ძღვინ რე?

⁶ მუჟამსით ფიფქრენთ, მუჭო ვუჸორთ იეჰოვას დო იესოს, სურვილ მირჩქინდუნა, იშო ხოლო გეგმოფხანტათ ჸოროფა (1 იოან. 4:10, 19). თე ჸოროფა ხოლო უმოსო მემანგარებნა, მუჟამსით ინვანჭუთ, ნამდა იესოქ პირადო ჩქინო ღურ. მოციქულ პავლეს ხოლო ჯგირო არჩქილედ თენა დო გალატელეფშა მეჭარილ წერილს მარდულობა თეცალ სიტყვეფით გიმოხანტჷ: „ღორონთიშ სქუაქ ქომჸოროფუ დო დუდ გაწირ ჩქიმო“ (გალ. 2:20). გიშაჸიდირალიშ ჭყოლოფათ იეჰოვაქ შეიოლებერო გინაშქვჷ, დევეახლოვათ თის დო გინიფრთათ თიშ მეგობარო (იოან. 6:44). გურს ვაიტიბუანანო თიშ რჩქინა, ნამდა ღორონთიქ მუდგარენ ჯგირ ქოძირ თქვან პიროვნებას დო არძაშ უმოს დიდ ფას გინიგ, ნამდა შეგალებესკო, გინირთითკო თიშ მეგობარო?! თეშ რჩქინა, მიმანგარენა იეჰოვაშ დო იესოშ მიმართ ჸოროფას. თითოულქ შემლებნა ჩქინ დუდის ბკითხათ: „მუშ კეთებას გინმოჭყვიდრაფუანს თე ჸოროფა?“.

7. მუჭოთ სურათშე ვორწყეთ, მუჭო შემლებნა გიმიფრჩქინათ იეჰოვაშ დო იესოშ ჸოროფა? (2 კორ. 5:14, 15; 6:1, 2)

⁷ ღორონთიშ დო ქრისტეშ მიმართ ჸოროფა გინმოჭყვიდრაფუანა, მიჸორდან შხვეფ (წეკითხით 2 კორინთელეფიშ 5:14, 15; 6:1, 2). თეშ ართ-ართ საშვალება ქადაგებაშ საქმეს მონაწილებაშ მეღება რე. ჩქი სახიოლო ამბეს გინოფჩანთ არძანერ ხალხის, თინეფიშ ეროვნებაშ, წარმომავლობაშ დო სოციალურ მდგომარეობაშ უმკუჯინუო.  თეშნერ მოქმედებათ ხუჯის ვუკინენთ იეჰოვაშ განზრახვაშ შესრულებას, ნამდა „არძანერ ადამიანქ გეგნოსქიდას დო ჭეშმარიტებაშ საფუძვლიან რჩქინა მიღას“ (1 ტიმ. 2:4).

8. მუჭო შემლებნა ვოძირათ, ნამდა მიჸორა და დო ჯიმალეფ?

⁸ მუჟამსით და დო ჯიმალეფიშ მიმართ ჸოროფას გიმიფრჩქინანთ, თეთ ხოლო ვოძირანთ, ნამდა მიჸორა იეჰოვა დო იესო (1 იოან. 4:21). სირთულეეფიშ დო პრობლემეფიშ დროს თინეფიშ მიმართ პირად ინტერესის გიმიფრჩქინანთ დო ირნერო ვოცადუთ, მივეხვარათ. საჸოროფო ადამიან უღურნან, გურშა ეუქექუანთ, გლახათ ქორენან-და, იბძირუანთ დო მუთ შემლებნან ირფელს ვორთუთ, ნამდა გურშა ელუკინათ, მუჟამსით გურგოტახილ რენა (2 კორ. 1:3—7; 1 თეს. 5:11, 14). ხვალე თენა ვარინ, ბლოცულენთ თინეფშო, მუშენდა მიჩქნა „მართალ კოჩიშ ხვეწებას დიდ ძალა უღჷ“ (იაკ. 5:16).

9. ხოლო მუ საშვალებათ შემლებნა ვოძირათ, ნამდა მიჸორა და დო ჯიმალეფ?

⁹ და დო ჯიმალეფიშ ჸოროფას თიმწკუმა ხოლო გიმიფრჩქინანთ, მუჟამსით მონდომას ვა ვარკენთ, ნამდა ართიანშქას მშვიდობა მიღდან დო ირნერო ვოცადუთ, მივაჸუნათ იეჰოვაშ მაგალითის, ნამუთ მთელ გურით პატიენს შხვეფს. დეფიქრით, ჩქინ ცოდვეფიშ ოპატიებელო იეჰოვა მზათ ქორდჷ, მუშ სქუაშ სიცოცხლე დათმუკო-და, ჩქი ოკო ვა ვორდათო მზათ, ქუვაპატუათ და დო ჯიმალეფს, მუჟამსით მუდგაინს დამშენა?! მუშო ოკო რაგად, ნამთინს ვამკონა, ვაგურათ იესოშ იგავს მოშინაფილ უბადო მონას, ნამდგას ბატონქ ქიანაშმადიდა ვალ აპატუ, მარა თე მონაქ ვეგმირჩქინ თეცალ ჭყოლოფა დო აკაბცხა ვალ ვატუ კინ მუცალ მონას (მათ. 18:23—35). კრებას მითინწკუმა უთანხმოება ქოიღნან-და, ჯგირ იჸუაფუდ, გოშინაშ ონჯუაშახ თქვა გეგნოდგითკო პირველ ნაბიჯ, ნამდა კინ დირთინეთკო მშვიდობა (მათ. 5:23, 24). თეშნერო ხოლო ართშა ქაძირანთ, ნამდა გიჸორა იეჰოვა დო იესო.

10, 11. მუჭო შეულებნა უხუცესეფს, ჸოროფა დუმტკიცან იეჰოვა დო იესოს? (1 პეტ. 5:1, 2)

¹⁰ უხუცესეფს იესოშ ჭყიშშე ზრუნვათ შეულებნა ოძირან, ნამდა უჸორა იეჰოვა დო იესო (წეკითხით 1 პეტრეშ 5:1, 2). იესოქ თენა არგამათ ოძირუ პეტრეშა რაგადებულ სიტყვეფით. თიშ უკულ, მუთ პეტრექ სუმშა გინივარუ, ნამდა იჩინენდჷ იესოს, გურგოტახილ რდჷ დო მანგარო ოკოდ, ქაძირუკო მუშ მოძღვარს, ნამდა უჸორდჷ თინა. გათელებაშ უკულ იესოქ პეტრეს კითხჷ: „სიმონ, იოანეშ სქუა, გიჸორქო?“. მუშო ოკო რაგად, დარწმუნებულ ვორეთ, პეტრე ირფელს გაკეთენდჷ, ქაძირუკო მუშ მოძღვარს, ნამდა უჸორდჷ თინა. იესოქ თის უწუ: „დადიარე ჩქიმ კირიბეფ!“ (იოან. 21:15—17). პეტრექ ქოთ მიქცუ თაშ დო ღურაშახ ირფელს ორთუდ, ნამდა იზრუნკო იესოშ შხურშე, მუდგათ თის ჸოროფა დუმტკიც.

¹¹ უხუცესეფ, გოშინაშ ონჯუაშ პერიოდის მუჭო შეილებნა ოძირათ, ნამდა გარჩქილენა, მუსხით მნიშვნელოვან რე პეტრეშა რაგადებულ იესოშ სიტყვეფ? იეჰოვას დო იესოს დიდ ჸოროფას ოძირანთ, მუჟამსით დროს გეგმურთუნთ, ნამდა გურშა ელუკინათ და დო ჯიმალეფს დო ირფელს გაკეთენთ, ნამდა ქიმეხვარათ არააქტიურეფს, დართან იეჰოვას (ეზეკ. 34:11, 12). თეს გეძინელ, შეილებნა ყურადღება გეგმირჩქინათ ბიბლიაშ მაგურაფალეფიშ დო თი ახალ დაინტერესებულეფიშ მიმართ, მით გოშინაშ ონჯუაშა ქუმულა. მოკონა, თე შეხვალამას თინეფქ თავისფალო იგინან დუდ, მუშენდა იმენდ მიღნა, ართ დღას თინეფ ხოლო ქრისტეშ მიმაჸუნალეფო გინირთუნა.

12. მუშენ მარზენა გაბედულებას ღურაშ წოხოლენ სერს რაგადებულ იესოშ სიტყვეფ? (იოან. 16:32, 33)

¹² ღურაშ წოხოლენ სერს იესოქ მუშ მოწაფეეფს თეცალ სიტყვეფ უწუ: „ქვეყნიერებას გაჭირებას ქეშეხვადუთ, მარა გემანგარით! მა გივორჯგინ ქვეყნიერებას“ (წეკითხით იოანეშ 16:32, 33). მუქ მეხვარ  იესოს, რდუკო გაბედულ, ვა შქურნებუდკო ნტერეფშა დო ღურაშახ ართგურქ ქუდოსქიდკო? თინა იეჰოვას ონდუდ! იესოს უჩქუდ, ნამდა მუშ მიმაჸუნალეფ ხოლო ქეშეხვადუდეს რწმენაშ გამოცდეფს, ათეშენ თხუ ღორონთის, ნამდა დეცვუკო თინეფ (იოან. 17:11). თეშ რჩქინა გაბედულებას მარზენა, მუშენდა მიჩქნა, ნამდა იეჰოვა ჩქინ არძა ნტერშე ძალიერ რე! (1 იოან. 4:4). თიშ თოლს მუთუნ ვამკაკორდუ. ჩქი ბოლოშა ვორეთ დარწმუნებულ, ნამდა იეჰოვას ქიმვენდებუთ-და, შემალებენა გივორჯგინათ შიშის დო გიმიფრჩქინათ გაბედულება.

13. მუჭო გიმირჩქინ იოსებ არიმათეელქ გაბედულება?

¹³ გუვარჩუათ იოსებ არიმათეელიშ შემთხვევა, ნამდგას თიმ დროს იუდეველეფ მანგარო აფასენდეს, მუშენდა უზენაეს სასამართლოშ — სინედრიონიშ წევრ რდჷ. იესოშ დედამიწას მსახურებაშ დროს თის გაბედულება ორკუდ. თიშ გურშენ იოანექ ჭარჷ, ნამდა „იესოშ მოწაფე რდჷ, ოღონდ ტყობაშე, მუშენდა იუდეველეფშა ოშქურუდ“ (იოან. 19:38). მართალ რე, თის ოინტერესუდ სამეფოშ ცნობა დო იესოშ ხოლო წანდჷ, მარა თეს შხვეფს უფულუნდჷ, მუშენდა მუჭოთ იძირე, ოშქურუდ, ნამდა ხალხიშ თოლს პატიცემას მიოდინუანდჷ, მუჟამსით ქიგეგენდეს, ნამდა იესოშ მოწაფე რდჷ. მარა ბიბლიაშე ბგებულენთ, ნამდა იესოშ ღურაშ უკულ თიქ „გამბედაობა გეგმირჩქინ, ქიმერთჷ პილატეშა დო ღურელ იესოშ სხეულ მითხუ“ (მარ. 15:42, 43). თეშ უკულ, იუდეველეფშო არგამა რდჷ, ნამდა იოსებ ხოლო იესოშ ართ-ართ მიმაჸუნალ რდჷ.

14. კოჩიშ შიშ ქოიღნან-და, მუ ოკო აკეთათ?

¹⁴ შილებე თქვა ხოლო ნორღვენა იოსებ არიმათეელცალ გრძნობეფ. სკოლას ვარდა სამუშას ქუნორღვენანო თიცალ შემთხვევა, მუჟამსით ონჯღორექ დუგაგურეს თიშ რაგადშა, ნამდა იეჰოვაშ მოწმე რდით? ვარდა ხომ ვეგნოდვანთ მაუწყებელო გინორთას დო ნათუას თიშ შიშით, მუს იფიქრენა შხვეფ თქვანდე? ვემეჩათ თეცალ გრძნობეფს თიშ უფლება, ვა გოკეთებაფუან თინა, მუთ სწორ რე! ირიათო ილოცით დო ქოთხით იეჰოვას, ქიმგეხვარან, ქიმერჩან გაბედულება თიშ ნებაშ შეიოსრულებერო. მუჟამსით ქოძირუნთ, ნამდა იეჰოვა პასუხენს თქვან ლოცვეფს, გემანგარებუთ დო უმოს გაბედულო გინირთუთ (ეს. 41:10, 13).

15. თიშ უკულ, მუთ იესოქ მოწაფეეფს გეგმეცხად, მუშ კეთება გინაჭყვიდირაფუ თინეფს ხიოლქ? (ლუკ. 24:52, 53)

¹⁵ იესოშ ღურაშ უკულ თიშ მოწაფეეფ მანგარ მოწყინაფილეფ რდეს. ქიგიორინეთ თქვან დუდ თინეფიშ ადგილს დო წერმიდგინით, მუს გინაფლენდეს. თინეფქ ხვალე ძვირფას მეგობარ ვარინ იმენდ ხოლო მიოდინეს (ლუკ. 24:17—21). მარა უმოს გვიანო,  იესოქ გეგმეცხად თინეფს დო ქიმეხვარ, ქინანჭესკო, მუჭო შისრულ ბიბლიურ წინასწარმეტყველებაქ. თეს გეძინელ, მნიშვნელოვან დავალება ხოლო მეჩჷ (ლუკ. 24:26, 27, 45—48). იესოშ გათელებაშე მა-40 დღას, მუჟამსით თიქ ზეცაშა გეშართჷ, მოწაფეეფ მოწყინაფილ ვარინ, მანგარ გახარებულეფ რდეს, მუშენდა უჩქდეს, ნამდა მუნეფიშ მოძღვარ ცოცხალ რდჷ დო ირნერო ქიმეხვარებუდ, შეასრულესკო მუნეფშა მეჩამილ მნიშვნელოვან დავალება. ზუსტას თე ხიოლქ მეხვარ იესოშ მოწაფეეფს, ვა მიოტუესკო იეჰოვაშ მსახურება (წეკითხით ლუკაშ 24:52, 53; საქ. 5:42).

16. მუჭო შემლებნა მივაჸუნათ იესოშ მოწაფეეფიშ მაგალითის?

¹⁶ მუჭო შემლებნა მივაჸუნათ იესოშ მოწაფეეფიშ მაგალითის? იეჰოვას ხიოლით ხვალე გოშინაშ ონჯუაშ პერიოდის ვარინ, მთელ წანაშ დინახალე ოკო ვემსახურათ. თეშო საჭირო რე, ჩქინ ცხოვრებას პირველ ადგილს თიშ სამეფო გივორინუათ. მაგალთო, ბრელ ჩქინ და დო ჯიმაქ დოთირუ სამუშა გრაფიკ, ნამდა უმოსო მიღკო მონაწილება მსახურებას, დესწრუკო კრებაშ შეხვალამეფს დო უღუდკო რეგულარულ ოჯახურ თაყვანიშცემა. ნამთინექ ვარია თქუ თიცალ ნივთეფიშ ჸიდირშე, ნამუთ შილებე შხვეფს აუცილებერო მიორჩქუდან. თეშნერო, თინეფს შეულებნა უმოსო გიმადირთან კრებას დო გინილან თიცალ ტერიტორიაშა, სოდეთ მაქადაგებელეფიშ საჭიროება რე. ღორონთიშ მსახურება ვემვოტუათინ მოთვინება მოსაჭირნა, მარა იეჰოვა მოპირნა, ნამდა თიშ სამეფოს ჩქინ ცხოვრებას პირველ ადგილს ქიგვორინუანთ-და, კურთხევეფს ვამმარკენა (იგავ. 10:22; მათ. 6:32, 33).

17. მუშ კეთება გაფნა გინოჭყვიდილ გოშინაშ ონჯუაშ პერიოდის? (ქოძირით სურათ).

¹⁷ შურ მოლნა, მუჟამ აბღნიშნენთ გოშინაშ ონჯუას, ნამუთ თე წანას 4 აპრილს, თახაშხას, იჸუაფ. მარა მოკონა, გოშინაშ ონჯუაშ პერიოდის დო თეიშახ ხოლო, ირნერ საშვალება გეგმიბრინუათ, ნამდა დეფიფქრათ იესოშ ცხოვრებაშენ, ღურაშენ დო თი ჸოროფაშენ, ნამუთ თიქ დო იეჰოვაქ ჩქინ მიმართ გიმირჩქინეს. მაგალთო, შემლებნა დრო გიმურთათ იესოშ ღურაშახ მოხვალამირ მოვლენეფიშ კითხირს დო თიშე დაფიქრებას. შეილებნა ქოძირათ დიაგრამა, ნამუთ მოჩამილ რე 2019 წანაშ აპრილიშ „ჩქინ ქრისტიანულ ცხოვრება დო მსახურებაშ ომეცადინებელ ფურცელს“, გვ. 4, 5. მუჟამსით წეკითხენთ იესოშ ცხოვრებაშენ, ყურადღება განსაკუთრებულო თი მონაკვეთეფშა გეგნიღით, ნამუთ გაიმანგარენა მარდულობას, ჸოროფას, გაბედულებას დო ხიოლს. თეშ უკულ, დეფიქრით, კონკრეტულო მუშ კეთება შეილებნა, ნამდა გეგმოხანტათ მარდულობა იესოშ დო იეჰოვაშ მიმართ. დარწმუნებულ რდათ, ნამდა იესო დაფასენს თი ირფელს, მუდგას გოშინაშ ონჯუაშ პერიოდის თიშ გაშინალო გაკეთენთ (გამოცხ. 2:19).