1, 2. მუ ჯგირ შედეგეფ მოჸუნს ნათუას?

 ᲛᲐᲜᲒᲐᲠ დიდ ხიოლ მოუღ ნათუას დო იეჰოვაშ ოჯახიშ ნაწილო გინორთას. არძა, მიდგას თე პატი მიღუნა, ფსალმუნმაბირე დავითცალო ფიფქრენთ: „ბედნერ რე თინა, მიდგას სი გიშეგორუნქ დო ხოლოშა მიჸუნანქ სქან ოზეეფს დამკვიდრებელო“ (ფსალმ. 65:4).

² იეჰოვას ირკოჩ ვემნოჸუნს მუშ ოზეეფშა — მუშ ოჯახშა. მუჭოთ წოხოლენ სტატიას გუარჩით, თინა თიცალეფს ეახლოვებ, მით ოძირანს, ნამდა ღორონთწკუმა ხოლოშიან ურთიერთობა ოკო (იაკ. 4:8). მუჟამსით დუდ მეუძღვინ იეჰოვას დო დინათ, უმოს ხოლოშიან ურთიერთობა გავითარ თიწკუმა. ათეშენ, შეილებ რჯერდას, ნამდა იეჰოვა ხვამათ ეგოფშანს (მალ. 3:10; იერ. 17:​7, 8).

3. მუ სერიოზულ პასუხიშმგებლობას ეჭოფუნს ქრისტიან მუშ დუდშა მეძღვინუათ დო ნათუათ? (ეკლ. 5:​4, 5).

³ მუშო ოკო რაგად, ნათუათ ირფელ ვათებე, გვალო ანწ იჭყაფ. სი ირნერო ეცადებუქ, შხვადოშხვა ცდუნებაშ დოვარ რწმენაშ გამოცდეფიშ უმკუჯინუო, იცხოვრე მეძღვინუაშ აღთქმაშ თანახმას (წეკითხით ეკლესიასტეშ 5:​4, 5). ასე ქრისტეშ მოწაფე რექჷ, ათეშენ მუთ შილებენ კილ-კილშა მიაჸუნ იესოშ მაგალითის დო ვეგნურთა თიშ მითითებეფს (მათ. 28:​19, 20; 1 პეტ. 2:21). ზუსტას თეშ კეთებას მიგეხვარებ თე სტატია.

 ᲛᲘᲐᲧᲣᲜᲘᲗ ᲘᲔᲡᲝᲡ ᲡᲘᲠᲗᲣᲚᲔᲔᲤᲘᲨ ᲓᲝ ᲪᲓᲣᲜᲔᲑᲔᲤᲘᲨ ᲣᲛᲙᲣᲯᲘᲜᲣᲝ

4. მუ გაგებათ გილუღუნა ქრისტეშ მოწაფეეფს „წამებაშ ძელ“? (ლუკ. 9:23).

⁴ ვეფიქრა, ნამდა ნათუაშ უკულ მუთუნნერ პრობლემას ვეშეხვადუქ. მუჭოთ ფშუნა, იესოქ თქუ, ნამდა თიშ მოწაფეეფს „ირდღას“ აჸიდეს „წამებაშ ძელ“ გილაღალარ (წეკითხით ლუკაშ 9:23). თინა თქუო იესოქ, ნამდა მუშ მიმაჸუნალეფს ირიათო ოტანჯებელ აჸიდეს? შუროთ ვარ. უბრალოთ იესოს თიშ რაგად ოკოდ, ნამდა მუშ მოწაფეეფს ქიანაშ კურთხევაწკუმა ართო, მუდგარენ სირთულეეფ ხოლო აღვენუდეს დო თე სირთულეეფშე ნამთინე ძნელ გარზებელ იჸიდ (2 ტიმ. 3:12).

5. მუ კურთხევეფს ოპირ იესო თინეფს, მით მსხვერპლშა მეულა?

⁵ შილებე უკვე შეხვად წინააღმდეგობას ოჯახიშ წევრეფშე ვარდა მუდგარენეფქ გაჸუ დათმებელქ, ნამდა სამეფოშ ინტერესეფ პირველ ადგილს გიორინეკო (მათ. 6:33). თაშ ქორდჷ-და, რჯერდას, იეჰოვაშ თოლს ვემკოჩილათ თინა, მუთ თიშო აკეთ (ებრ. 6:10). ალბათ სქან დუდშა გიმოცად, მუჭო ისრულებ იესოშ დუნაპირებ: „მიდგაქ ჩქიმ დო სახიოლო ამბეშ გურშენ დიტუ ჸუდე, ვარდა ჯიმალეფ, ვარდა დალეფ, ვარდა დიდა, ვარდა მუმა, ვარდა სქუალეფ, ვარდა ჸვანეფ, ამდღა, თხოზინიშ დროს, ოშწილო მიღენს ჸუდეეფს, ჯიმალეფს, დალეფს, დიდალეფს, სქუალეფს, ჸვანეფს, დო მომავალს — ულიებ სიცოცხლეს“ (მარ. 10:​29, 30). იეჰოვაშო მუდგა მსხვერპლ ვა მაფუდან კეთებულინ, დღას ვეგნაფორე თი კურთხევეფ, ნამუთ თიშე მაფუნა მეღებულ (ფსალმ. 37:4).

6. მუშენ გაჸი ობრძოლებერ ნათუაშ უკულ ხოლო „ხორციშ სურვილეფშა“?

⁶ მართალ რე დინათ, მარა „ხორციშ სურვილეფშა“ ანწ ხოლო გაჸი ობრძოლებერ (1 იოან. 2:16). მუშო ოკო რაგად, ნათუა სრულყოფილო ვეგნმოშქვანა; ჩქი იშენით ადამიშ არასრულყოფილ გამნარყ ვორეთ. ათეშენ მინშა შილებე დუდის პავლე მოციქულცალო ბგინაფლენდათ, ნამდგაქ თქუ: „გურს მართალო მოჰამ ღორონთიშ კანონ, მარა ჩქიმ სხეულს შხვა კანონს ვორწყექ, ნამუთ ორკინ ჩქიმ გონებაშ კანონს დო აშმოჸოთანს ცოდაშ კანონიშ ხეს, ნამუთ ჩქიმ სხეულს რე“ (რომ. 7:​22, 23). მინშა შილებე არასწორ სურვილეფშა გაფუდას ობრძოლებერ დო თექ გურ გოიტახას, მარა მეძღვინუაშ დროს იეჰოვაშა მეჩამილ პირობას ქიგიშინანქ-და, თენა მიგეხვარებ, ებრძოლე თეცალ სურვილეფს. მუჭო შეულებ მეძღვინუაშ დროს დოდვალირ აღთქმას მიგეხვარას, გაურზე ცდუნებეფს?

7. მუჭო მოხვარუნა იეჰოვაშა დუდ მეძღვინელ მაფუნან თენა, თიშ ართგურქ ქუდოფსქიდათ?

⁷ მუჟამსით დუდის უძღვინენთ იეჰოვას, ვარიას იფჩიებუთ ჩქინ დუდშე, მუთ ნიშნენს, ვარია თქუე სქან სურვილეფშე დო მიზნეფშე, ნამუთ ვა მოწონს იეჰოვას (მათ. 16:24). თაშ ნამდა, მუჟამსით გამოცდაშ წოხოლე გერექ, ოფიქრებელ ვა გაფჷ, მუჭო მიქცუე; სი უკვე გინოჭყვიდ, ირნერ სიტუაციას იეჰოვას გუხარე გურ დო თინა აკეთე, მუთ თიშ ართგურო დოსქილადას მიგეხვარებ. თეშნერო, იობცალო, ნამდგაქ მანგარ დიდ განსაცდელეფ გინიღ, სი ხოლო იჩიებუქ: „ვა უღალატენქ ღორონთის!“ (იობ. 27:5).

8. მუჭო მიგეხვარებ მეძღვინუაშ ლოცვაშე ფიქრ, ვეიაჸუნე ცდუნებას?

⁸ მეძღვინუაშ ლოცვაშე ფიქრ ქიმერჩანს ძალას, გიორჯგინე ირნერ ცდუნებას. მაგალთო, შილებე გოირჩქინდას ცდუნებაქ, ფლირტ ქიდიჭყე თიცალ პიროვნებაწკუმა, მით დაქორწინებულ რე. ეიაჸუნუქო ცდუნებას? მუთუნით ვარ, მუშენდა სი უკვე პირობა გაფჷ იეჰოვაშა მეჩამილ, ნამდა მუთუნ თეცალს ვა ქიმინუნქ. უკვე გავითარებულ არასწორ სურვილეფწკუმა ბრძოლა უმოს ძნელ  რე. ათეშენ, თინეფს ხეთეშე ჩეთხინუანქ-და, უკულ ვა გაჸი ოწვალებერ. თეშნერო, თაშ ქოფთქუათინ, ელულუანქ „უბადოეფიშ შარას“ (იგავ. 4:​14, 15).

9. მუჭო მიგეხვარებ მეძღვინუაშ ლოცვაშე ფიქრ, იეჰოვაშ თაყვანიშცემა პირველ ადგილშა გეირდას?

⁹ მაგალთო, მუჭო მიქციებუქ, კრებაშ შეხვალამეფშა დასწრებას გეცილებუნ ფერ სამუშაქ გამკოირჩქინდ-და? გასაგებ რე, მუჭო გინოჭყვიდუნქ თე ამბეს, მუშენდა მეძღვინუაშ დროს, ფაქტიურო, სი უკვე გინოჭყვიდ, ვედიჭყე თიცალ სამუშა, ნამუთ გეცილებ შეხვალამეფშა გილულას. თაშ ქიმიქციებუქ-და, უკულ ვა გაჸი ოფიქრებელ, მუჭო გიშართე მდგომარეობაშე, ნამდა იეჰოვა კინ პირველ ადგილს გერდას სქან ცხოვრებას. დეფიქრ იესოშ მაგალითშე დო თიცალო გინოჭყვიდილ გაფუდას, ხეთეშე დო მტკიცას ქოთქუე ვარია ირფელშე, მუდგას ვემიწონუანს სქან ზეციერ მუმა, ნამდგაშა დუდ გაფჷ მეძღვინელ (მათ. 4:10; იოან. 8:29).

10. მუჭო მიგეხვარებ იეჰოვა ნათუაშ უკულ, მიაჸუნე იესოს?

¹⁰ თეცალ სირთულეეფ დო ცდუნებეფ თიშ დამტკიცებაშ საშვალებას გარზენს, ნამდა გოკო, ეკაჸუნე იესოს. თეს მთელ გურით ქიმინდომენქ-და, იეჰოვა ხოლო სქანწკუმა იჸუაფ. ბიბლიას ჭარჷ: „ღორონთ ართგურ რე დო თინა ეგოჩილითუანა თიცალ გამოცდას, ნამდგაშ გარზება ვეშქალებენა, დო შარას ხოლო ქუგოძირანა, ნამდა ბოლოშახ მოთვენაქ შეგალებუან“ (1 კორ. 10:13).

ᲛᲣᲭᲝ ᲨᲔᲘᲚᲔᲑᲣᲜᲐ ᲛᲘᲐᲧᲣᲜᲐᲗ ᲘᲔᲡᲝᲡ?

11. მუ რე არძაშ უჯგუშ საშვალება, მუთ მიმეხვარებუნა, მივაჸუნათ იესოს? (ქოძირით სურათ).

¹¹ იესო შურ დო გურით ომსახურუდ იეჰოვას დო ირიათო უღუდ თიწკუმა ურთიერთობა ლოცვათ (ლუკ. 6:12). თაშ ნამდა, ნათუაშ უკულ იესოშ მეჸუნაშ არძაშ უჯგუშ საშვალება რე, ირიათო აკეთე თინა,  მუთ იეჰოვაწკუმა დაახლოებას მიგეხვარებ. ბიბლიას ბკითხულენთ: „მუჭოდგა ვა რდასინ, კინ გუაგრძელათ გივორეთინ თი შარაშ გეჸუნა, თიშ უმკუჯინუო, მის მუშა აფჷ მენჭირნაფილ“ (ფილ. 3:16). მინშა შილებე გეგე, ნამდა ნამდგაინ დაქ ვარდა ჯიმაქ გინოჭყვიდ, მსახურებას უმოს გაკეთუკო. შილებე თინეფქ მახარობელეფიშ სკოლა მიკორთეს ვარდა გინორთეს თექ, სოდეთ უმოს საჭიროება რე. თეცალ მიზანიშ მენჭირნაფა სი ხოლო ქეშეილებუნ-და, ეს მუ უჯგჷ; იეჰოვაშ ხალხ ირიათო ოცად, უმოს გაკეთას თიშო (საქ. 16:9). მარა თე მომენტის სიტუაცია ხეს ვაინწყუნს-და, ვეფიქრა, ნამდა მუთუნიშ მოღე ვა რექჷ. ირფელიშ უმოს მნიშვნელოვან თინა ვა რე, მუსხის ვაკეთენთ; მთავარ რე, ვემვოტუათ „რულა“ დო ბოლოშა ქიმიფთვინათ (მათ. 10:22). იეჰოვას მანგარო ოხიოლ, მუჟამსით ორწყე, ნამდა ნამ შეილებუნ, ირფელს ორთუქ თიშო. ათეშენ ფას ვაუდინუა იეჰოვაშო კეთებულ საქმეეფს, მუშენდა თინა მანგარო აფასენს თინეფს (ფსალმ. 26:1).

12, 13. მუ ოკო აკეთე, მუჟამსით ორწყექ, ნამდა მსახურებას მონდომა ჭიე-ჭიეთ გიდინუ? (1 კორ. 9:​16, 17; ქოძირით ჩარჩო  «ვემიოტუა „რულა“»).

¹² მუ ოკო აკეთე, მუჟამსით ატყუაფუქ, ნამდა სქან ლოცვეფ გურშე ვა მურსჷ დო ირიათო ართ დო იგივეს იმეორენქ, მსახურებას ჯვეშობურო ხიოლ ვა მუღჷ სქანდა ვარდა ბიბლიაშ კითხირშა იშენ დო იშენ ვეგეიძ გურ? ნათუაშ უკულ სქან დუდის თეცალ მუდგარენს ქახვილუანქ-და, ვეფიქრა, ნამდა იეჰოვაშ წმინდა შურ ვა რე სქანწკუმა. მუს ღოლანქ, არასრულყოფილ ადამიან მინ თეშ რე, მინ თაშ. მუ მიგეხვარებ თეცალ დროს? მსახურებას მონდომა ჭიე-ჭიეთ ქოიდინუნ-და, დეფიქრ პავლე მოციქულიშ მაგალითშე. მართალ რე, თინა ირნერო ოცადუდ, იესოს მიაჸუნუკო, მარა თინა ხოლო არჩქილედ, ნამდა  საქმეშ ოკეთებელო ირო ართნერ მონდომა ვაღვენუდ (წეკითხით 1 კორინთელეფიშ 9:​16, 17). თიქ თქუ: „თეს ვალდებულებაშ გურშენ ვორთუდენ ხოლო, თენა იშენ ჩქიმდა მენდებულ პასუხიშმგებლობა რე“. შხვანერო ქოფთქუათინ, პავლეს გინოჭყვიდილ აფუდ, ბოლოშა ქიმიჸუნუკო მუშა მენდებულ საქმე, თიშ უმკუჯინუო, ნამდა მინშა შილებე შუროთ ვა აფუდუკო გურ თეშ კეთებაშა.

¹³ თაშ ნამდა, თი გლახა გრძნობეფს, ნამუთ არასრულყოფილ ადამიანს ურჩქინდუ, ვემეჩა საშვალება, არასწორ გადაწყვეტილებეფ მიგოღებაფუას. გინოჭყვიდილ გაფუდას, გურით ვა გოკოდასინ ხოლო, ირო გაკეთე თინა, მუთ გიჩქჷ, ნამდა სწორ რე. დუდის ჭიჭეს ქუდუნძალქ დო სწორიშ კეთებას ვემიოტენქ-და, თე გლახა გრძნობეფქ შილებე მედინას. მუჭოდგა ვა რდასინ, ჯგირ სულიერ განრიგ — პირად გურაფა, ლოცვა, შეხვალამეფშა გილულა დო ქადაგება — მიგეხვარებ, ეკაჸუნე იესოს. სქან თეცალ მონდომა მაგალით იჸუაფ თანაქრისტიანეფშო ხოლო (1 თეს. 5:11).

„ᲘᲠᲘᲐᲗᲝ ᲨᲔᲐᲛᲝᲬᲛᲘᲗ . . . ᲒᲔᲒᲛᲘᲠᲙᲕᲘᲗ ᲗᲥᲕᲐᲜ ᲓᲣᲓ“

14. მუ ოკო შეამოწმე ირიათო დო მუშენ? (2 კორ. 13:5).

¹⁴ ნათუაშ უკულ მანგარ მნიშვნელოვან რე, ირიათო შეამოწმე სქან დუდ (წეკითხით 2 კორინთელეფიშ 13:5). მინშა დეფიქრ, ქოლოცულენქ დო ვარ ირდღას, ქოკითხულენქ დო ქირკვიენქო ბიბლიას, ქასწრუქო შეხვალამეფს დო ქომსახურენქო. თიშე ხოლო დეფიქრ, მუშ კეთება შეილებ, ნამდა თე ირფელ უმოს ხარისხიანო გაკეთე დო სასიამოვნოქ ქიჸუას სქანო. მაგალთო, ქოკითხ სქან დუდის: ქეშემლებუნო მთავარ ბიბლიურ გურაფეფიშ შხვეფშა ენწყუმა? მუ ვაკეთა, ნამდა მსახურებაქ უმოს ხიოლ ქუმომღას? ქორენო ჩქიმ ლოცვეფ კონკრეტულ დო ქიძირენო თინეფშე, ნამდა ბოლოშა ვონდუქ იეჰოვას? ირიათო ქუოსწრუქო შეხვალამეფს? მუ მაფჷ ოკეთებელ, ნამდა უმოს ყურადღებათ ქუორდე შეხვალამეფს დო უმოსო მიბღე მონაწილება?

15, 16. მუ დუგოგურუეს რობერტიშ შემთხვევაქ?

¹⁵ საჭირო რე, ხვალე ჯგირ ჩვევეფ ვარინ, სქან სისუსტეეფ ხოლო შეამოწმე. ართ ჯიმაშ, რობერტიშ, შემთხვევაშე ქიძირ, მუსხით მნიშვნელოვან რე თეშ კეთება. თინა იჩიებ: „20 წანერ ვორდინ თეშ, სამუშას ართ თანამშრომელ ძღაბიქ ჸუდეშა ქუდმაპატიჟ. მიწუ, ჸუდეს ხვალე იპჸითია დო მოხუჯურო სექს შემოფთავაზ. დუდშე პირდაპირ ვა მარაგადუ ვარიაქ დო მუდგარენეფს იფსამანჯელუანდჷ. მარა ბოლოს იშენით ქოუწი ვარ-მაქ დო მიზეზ ხოლო გეუნწყჷ“. რობერტიქ  ვეიაჸუნ ცდუნებას დო, მუშო ოკო რაგად, თეშო ოცქვაფალ რე. მარა უკულ თე სიტუაციაშე დეფიქრუნ, ქიმეხვად, ნამდა შეულებუდ უჯგუშო მიქცუკო. რობერტ ალალას იჩიებ: „იოსებცალო მტკიცას დო უცფას ვა მარაგადუ ვარიაქ თე ძღაბშა (დაბ. 39:​7—9). ვეველუდ, თაშ გამჭირდუდ ვარიაშ რაგადინ. თე შემთხვევაქ ქუმოძირ, ნამდა იეჰოვაწკუმა მეგობრობა გამანგარებელ ბჸოფჷ“.

¹⁶ რობერტცალო, დუდიშ ალალას გიმორკვიება სი ხოლო მიგეხვარებ. თიმწკუმა ხოლო, მუჟამსით ვეიაჸუნუქ ცდუნებას, იშენით ქოკითხ სქან დუდის: უცფას ქეშმალებუო ვარიაშ რაგადიქ? მუდგაინიშ გაუჯგუშებაშ საჭიროება ქოძირენ ხოლო, გურ ვეგიტახა; გოხიოლუდას, ნამდა ქოძირ, მუ რე სქან სისუსტე. ირიათო ქილოც თე საკითხშე დო გეგნოდგ ნაბიჯეფ, ნამუთ მიგეხვარებ, ხოლო უმოსო გაფუდას გინოჭყვიდილ, ირნერ სიტუაციას იეჰოვაშ ნორმეფ დეცვე (ფსალმ. 139:​23, 24).

17. მუჭო განადიდ რობერტიშ ართგურობაქ იეჰოვაშ სახელ?

¹⁷ რობერტ ხოლო ართ საინტერესო დეტალს მირაგადუნა მუშ შემთხვევაშე: «მუჟამსით ჩქიმ თანამშრომელს ვარია უწი, თიქ მიპასუხ: „გამოცდა ჩაბარებულ გაფჷ!“. გამკვირდჷ დო უწი, ეს მუჯოხო-მაქ. თე ძღაბის ნოჸვე მეგობარ, ნამუთ ულირს იეჰოვაშ მოწმე რდჷ. თის ნარაგად ჸოფჷ, ნამდა არძა იეჰოვაშ მოწმე ახალგაზრდა ხეთეშე მიკაბუნუ თეცალ შემოთავაზებას, მუშენდა ტყობაშე არძა ორთუნია თიცალ მუდგარენს, მუთ არასწორ რე. ჩქიმ თანამშრომელს უთქუალ, ნამდა მა გეგმოფცადუნდ დო ქოძირუნდ, მართალო თაშ რდჷ დო ვარ. თენა გებგინ, ჩქიმცალ ბედნერ მითინ ვა რდჷ, მუშენდა იეჰოვაშ სახელ განვადიდ».

18. მუ ოკო გაფუდას გინოჭყვიდილ ნათუაშ უკულ? (ქოძირით ჩარჩო  „ჟირ სტატია, ნამუთ ბჯერა, მიგეწონებ“).

¹⁸ მუჟამსით დუდის უძღვინენქ იეჰოვას დო ინათუქ, ოძირანქ, ნამდა სქანო თიშ სახელიშ განწმენდაშე უმოს მნიშვნელოვან მუთუნ ვეჸუაფ. რჯერდას, იეჰოვა ორწყე, მუ სირთულეეფ გინოიღ დო მუ ცდუნებეფს ურზუქ! სი ქიმინდომენქ-და, აუცილებერო მიგეხვარებ, თიშ ართგურქ ქუდოსქიდე დო მუშ წმინდა შურით ქიმერჩანს ძალას თეშ ოკეთებელო (ლუკ. 11:​11—13). იეჰოვაშ მოხვარათ შეგალებე ირიათო ეკაჸუნე იესოს ნათუაშ უკულ ხოლო!