1, 2. მუს გულისხმენდჷ იესო თი სიტყვეფს, ნამუთ იოანეშ 4:35, 36-ის ჭარჷ?

გალილეაშა მიშუნ, იესოქ მიკორთჷ ჸვანეფ, სოდეთ ქობალიშ კაკალ ახალ ეფალირ რდუ (იოან. 4:3—6). თე მოსავალ, სოდგარენ ოთხ თუთაშა იჸუაფუდ მზათ ეიოჭოფალო. ათეშენ, შილებე უცნაურ ჸოფედკო იესოშ ნათქუელ: „ქიგნაჯინით ჸვანეფს დო ქოძირით, მუჭო რე გინორჩიალებურ ეიოჭოფალო!“ (წეკითხით იოანე 4:35, 36). მუს გულისხმენდჷ იესო?

² მუჭოთ იძირენ, იესო პირდაპირ გაგებათ მოსავალიშ ეჭოფუას ვარინ, ხალხიშ შაყარუას გულისხმენდჷ. გუვარჩუათ, მუქ მოხვად თეიშახ. მართალ რე, იუდეველეფს მუთუნნერ ურთიერთობა ვა უღდეს სამარიელეფწკუმა, მარა იესოქ უქადაგ სამარიელ ოსურს დო თიქ ქუმურჩქილუ იესოს! მუჟამსით იესო ჸვანეფიშ გურშენ იჩიებუდ, ნამუთ „გინორჩიალებურ [რდუ] ეიოჭოფალო“, გულისხმენდჷ თი სამარიელეფს, მიდგაქ იესოშ გურშენ თე ოსურშე მირჩქილუეს დო უმოს მეტიშ გაგებელო იესოშა მიშეს (იოან. 4:9, 39—42). თე შემთხვევაშ გურშენ ართ ბიბლეისტიქ თქუ: „თე ხალხიშ მონდომა . . . ოძირანდჷ, ნამდა თინეფ მოგენდეს ქობალიშ კაკალს, ნამუთ მზათ რე ეიოჭოფალო“.

3. მუჭო გინირთუთ უჯგუშ მაქადაგებელო, ხალხის იესოცალო ქუჯინეთ-და?

³ თქვა მუჭო უჯინეთ თი ხალხის, მიდგას სახიოლო ამბეს უქადაგუთ? ქუჯინეთო თინეფს ქობალიშ კაკალცალო, ნამუთ მზათ რე ეიოჭოფალო? თაშ ქორენ-და, თეს დადებით შედეგეფ მაჸუნუ. პირველ, უმოს მონდომათ იქადაგენთ. მოსავალიშ ეჭოფუაშ დრო შეზღუდულ რე, ათეშენ ჯინაშ დრო ვა რე. მაჟია, ბედნერ იჸუაფუთ, მუჟამსით ქოძირუნთ, მუჭო ირჩქილუაფ ხალხ სახიოლო ამბეს. ბიბლია იჩიებ, ნამდა ღორონთიშ მსახურეფს „ხიოლ უღნა, . . .  მოსავალიშ ეჭოფუაშ დროს“ (ეს. 9:3). დო მასმა, თითოულ პიროვნებას თეშ უჯინედათ იჸი, მუჭოთ ქრისტეშ მომავალ მოწაფეს, ათეშენ რაგადიშ დოჭყაფაშ დროს, გეთვალისწინენთ მუ ოინტერესნა თინეფს.

4. მუს დიბგურუანთ თე სტატიას მოციქულ პავლეშ მაგალითშე?

⁴ იესოშ ნამთინე მიმაჸუნალიშ აზრით, სამარიელეფ დღას ვეგნირთუდეს იესოშ მოწაფეეფო. მარა იესო გვალო შხვანერო ფიქრენდჷ, თინა სამარიელეფს უჯინედ, მუჭოთ მუშ მომავალ მოწაფეეფს. ჩქი ხოლო ჩქინ ტერიტორიას მახორუ ხალხის ოკო ვუჯინათ, მუჭოთ ქრისტეშ მომავალ მოწაფეეფს. მოციქულ პავლექ თეშ ჯგირ მაგალით დომტუეს. მუშ გურაფა შემლებნა თიშ მაგალითშე? თე სტატიას გუვარჩიენთ, 1) მუჭო გებულენდჷ პავლე ინფორმაციას თინეფიშ რწმენაშ გურშენ, მიდგას უქადაგუდ, 2) მუჭო გებულენდჷ მუ ოინტერესდეს მარჩქილეეფს დო 3) მუჭო ოძირანდჷ, ნამდა თინეფს თეშ უჯინედ, მუჭოთ იესოშ მომავალ მოწაფეეფს.

5. მუშენ შეულებუდ პავლეს გაუგუკო სინაგოგას შაყარელ ხალხის?

⁵ პავლე ხშირას იუდეველეფიშ სინაგოგას ქადაგენდჷ. მაგალთო, თესალონიკეშ სინაგოგას „სუმ საბატონს თინეფწკუმა ართო მსჯელენდჷ წმინდა წერილეფიშ საფუძველშა“ (საქ. 17:1, 2). პავლე იუდეველ რდუ დო ათეშენ, დუდის კომფორტულო გინაფლენდჷ სინაგოგას (საქ. 26:4, 5). თის ბრელ საერთო უღუდ იუდეველეფწკუმა დო შეულებუდ თინეფს თამამას უქადაგკო (ფილ. 3:4, 5).

6. მუჭო გენესხვავებუდ მოედანს რდუნ თი ხალხ თინეფშე, მიდგას პავლე სინაგოგას უქადაგუდ?

⁶ თიშ უკულ, მუთ მოწინააღმდეგეეფქ პავლე აძულეს, ნამდა თესალონიკეშე დო უკულ ბერეაშე უნტებუდკო, თიქ ათენშა მიდართჷ. ართშა „თინა სინაგოგას იუდეველეფწკუმა დო ღორონთიშ თაყვანიშმცემელ უცხოტომელეფწკუმა მსჯელენდჷ“ (საქ. 17:17). მარა, მოედანს ქადაგებაშ დროს პავლეს შხვა აუდიტორია ჸუნდჷ. პავლეშ მარჩქილეეფ შქას რდეს ფილოსოფოსეფ დო უცხოტომელეფ, მით პავლეშ ცნობას „ახალ გურაფას“ უძახდეს. თინეფქ პავლეს უწუეს: „თიცალ უცნაურ მუდგარენეფს მირაგადუთ, მუთ დღას ვა გამგონებნა“ (საქ. 17:18—20).

7. მუჭოთ საქმეეფიშ 17:22, 23-ს ჭარჷ, მუჭო თირუ პავლექ ქადაგებაშ მეთოდ?

⁷ წეკითხით საქმეები 17:22, 23. პავლე ათენს მახორუ უცხოტომელეფს თიცალ მეთოდეფით ვა უქადაგუდ, მუჭოთ სინაგოგას რდესინ თი იუდეველეფს. პავლე შილებე მუშ დუდის ოკითხუდკო, მუ წანს ათენს მახორუ ხალხის? თინა ოკვირუდ თექიან გარემოს დო ხალხიშ რელიგიურ ჩვეულებეფს. უკულ პავლექ საერთო დოგორ თინეფიშ თაყვანიშცემა დო ბიბლიურ ჭეშმარიტება შქას. ართ ბიბლეისტ იჩიებ: „მუჭოთ იუდეველ ქრისტიანს, პავლეს უჩქუდ, ნამდა  ბერძნეფ თაყვანს ვა ცენდეს თი ღორონთის, ნამდგაშენ იუდეველეფ დო ქრისტიანეფ იჩიებდეს, ნამდა ჭეშმარიტ ღორონთ რდუ. მარა თინა ოცადუდ, ქაძირუკო ათენელეფს, ნამდა ღორონთ, ნამდგაშ გურშენ თინა აცხადენდჷ შურო ვა რდუ უჩინებ თინეფშო“. თაშ ნამდა, პავლე მზათ რდუ დოთირუკო ქადაგებაშ მეთოდ. თიქ უწუ ათენელეფს, ნამდა თიშ ცნობა თი „უჩინებ ღორონთშე“ რდუ, ნამდგაშ თაყვანიშცემას ოცადდეს. მართალ რე, უცხოტომელეფს ვა უჩქუდეს წმინდა წერილეფ, მარა პავლეს ვა უფიქრებ, ნამდა თინეფ დღას ვეგნირთუდეს ქრისტიანეფო. თეშ გინაწონს, თინა თეშ უჯინედ ათენელეფს, მუჭოთ ქობალიშ კაკალს, ნამუთ მზათ რე ეიოჭოფალო დო თინეფწკუმა ქადაგებაშ მეთოდ დოთირუ.

8. ა) მუჭო შეილებნა მეხვადათ მუ წანს თქვან ტერიტორიას მახორუ ხალხის? ბ) მუჭო ვუპასუხათ, მუჟამსით მირაგადნა, ნამდა მუნეფიშ რელიგია უღნა?

⁸ რდათ პავლეცალო დაკვირვებულეფ. ქიდეკვირით თი ნიშნეფს, სოვრეშეთ იძირე, მუ წანს თქვან ტერიტორიას მახორუ ხალხის. მუს ბგებულენთ მობინადრეშ გურშენ თიშ ჸუდე დო მანქანაშე დაკვირებათ? შემლებნანო თიშ სახელშე, მიკაქუნალშე, გარეგნობაშე ვარდა თიშ ჩიებაშე ქიგებგათ ნამ რელიგიაშ მიმაჸუნალ რე? შილებე პირდაპირ მიწუან, ნამდა მუშ რელიგია უღჷ. თეცალ სიტუაციაშ დროს ართ და, ნამუთ სპეციალურ პიონერო მსახურენს, მობინადრეეფს თაშ ურაგად: „თაქ თიშენ ვა მომრთუმ, ნამდა ჩქიმ რწმენაშ მეღება დუგანძალათ, მოკო ართ საკითხიშ გურშენ გეჩუათ . . .“.

9. მუ საერთო შილებე დოგორათ რელიგიურ პიროვნებაწკუმა?

⁹ მუშ გურშენ შეილებნა იჩუათ რელიგიურ პიროვნებაწკუმა? ეცადით საერთო ნინა დოგორათ. შილებე თინა ხვალე ართ ღორონთის ცენდას თაყვანს, შილებე იესო მიორჩქუდას კაცობრიობაშ მარსხებელო ვარდა წანდას, ნამდა თიცალ დროს ფცხოვრენთ, მუჟამსით უბადობას მალას ბოლო მეღებუ. ბიბლიურ ცნობაქ თიშ გურს ქეშეხასინ, ჩიება თი თემეფით ქიდიჭყით, მუდგაშე ჟირხოლოს ართ აზრ გიღნა.

10. მუშ კეთებას ოკო ვეცადათ დო მუშენ?

¹⁰ რშუდან, ნამდა ხალხის შილებე ვა ჯერდას ირფელ, მუდგას მუნეფიშ რელიგია ოგურუანს. ათეშენ, თიშ უკულ, მუთ ქიგეგენთ, ნამ რელიგიას ოკუთვნ პიროვნება, ქეცადით, ქიგეგათ მუს პირადო მუ წანს. დეივიდ, ნამუთ ავსტრალიას სპეციალურ პიონერო მსახურენს, იჩიებ: „ამდღა ბრელს ფილოსოფია დო რელიგიურ გურაფეფ ართიანშა ეშმაჩირთუ“. ალბანეთის მახორუ დონალტა რაგადანს: „ნამთინე, მიდგას შეფხვადუთ იჩიებ, ნამდა მუშ რელიგია უღჷ, მარა უკულ აღიარენა, ნამდა სინამდვილეს ვა წანა ღორონთიშ“. მუჭოთ არგენტინას მახორუ ართ მისიონერ ჯიმა აღნიშნენს, ნამთინე იჩიებ, ნამდა წანს სამებაშ, მარა სინამდვილეს შილებე ვა წანდას, ნამდა მუმა, სქუა დო წმინდა შურ ართ ღორონთ რენა. თე მისიონერ იჩიებ: „თეშ რჩქინა უმოსო აადვილენს საერთო ნინაშ გორუას თე პიროვნებაწკუმა“. თაშ ნამდა, ქიგეგით სინამდვილეს მუ წანს ხალხის. თაშ  ქიმიქციებუთ-და, პავლეცალო თქვა ხოლო შეგალებენა „არძაშო ირფელქ“ გინირთათ (1 კორ. 9:19—23).

11. მუჭოთ საქმეეფიშ 14:14—17-ს ჭარჷ, მუჭო უქადაგუდ პავლე ლისტრას მახორუ ხალხის?

¹¹ წეკითხით საქმეები 14:14—17. პავლე არკვიენდჷ მუ ოინტერესუდ თიშ მარჩქილეეფს დო თეშ მიხედვით იჭყანდჷ რაგადის. მაგალთო, თინეფს, მიდგას პავლე ლისტრას უქადაგუდ, წმინდა წერილეფშე ჭიჭე მუდგარენ ვარდა შურო მუთუნ ვა უჩქუდეს. ათეშენ, პავლე თიცალ მსჯელენდჷ, ნამუთ თინეფშო ადვილ გაგებელ იჸუაფუდ. თინა იჩიებუდ მოსავალიშ ეჭოფუაშ დო ბედნერ ცხოვრებაშ გურშენ. პავლე თიცალ სიტყვეფ დო მაგალითეფს გიმირინუანდჷ, ნამუთ თიშ მარჩქილეეფს ადვილო გაგებედეს.

12. მუჭო შეილებნა გეგათ მუ ოინტერეს პიროვნებას დო შესაბამისო დიჭყათ რაგად?

¹² გეგმირჩქინით გურგოჩამილობა, ნამდა ქინანჭათ, მუ ოინტერეს თქვან ტერიტორიას მახორუ ხალხის დო შესაბამისო ქიდიჭყით რაგად. მუჭო შეილებნა რაგადიშ დოჭყაფაშახ გეგათ, მუ ოინტერეს პიროვნებას? რდათ დაკვირებულეფ. შილებე თინა ეზოს მუშენს, წიგნის კითხულენს, მანქანას რემონტანს ვარდა შხვა საქმეთ რე დაკავებულ. მოხუჯურ ქორენ-და, ჩიებაშ დაჭყაფალო შეილებდეს გიმირინეთკო თე პიროვნებაშ საქმიანობა (იოან. 4:7). პიროვნებაშ მიკოქუნაშე ხოლო შილებე მუდგარენიშ გაგება, შილებე თიშ მიკაქუნალშე მეხვადათ ნამ ეროვნებაშ რე, მუ პროფესია უღჷ ვარდა ნამ სპორტულ გუნდ მოწონს. გუსტავო იჩიებ: „ართ 19 წანერ ბოშწკუმა დიბჭყჷ ჩიება, ნამდგას მაიკაშა არძაშო ჩინებულ მაბირეშ სურათ მიკუხანტუდ. მუჟამსით თე მაიკაშენ ქობკითხჷ, თიქ მიწუ, მუშენ მოწონდჷ თე მაბირე. თე ჩიებაშ უკულ, ბიბლიაშ გურაფა ქიდიჭყჷ დო ასე თინა ჩქინ ჯიმა რე“.

13. მუჭო შეილებნა ბიბლიაშ გურაფაშ გურშენ თეშ დიჭყათ რაგად, ნამდა პიროვნებაქ დეინტერესას?

¹³ მუჟამსით მიდგარენს ბიბლიაშ გურაფაშ დოჭყაფაშენ ურაგადუთ, თენა თეშ გაკეთით, ნამდა დეინტერესას. ქაძირეთ, პირადო მუს მუჭო მეხვარებ ბიბლიაშ გურაფა (იოან. 4:13—15). მაგალთო, ართ ოსურკოჩიქ, მიდგაქ ბიბლიათ დეინტერეს, ჩქინ და ჸუდეშა გემნიპატიჟ. თე დაქ ქოძირ სერთიფიკატ, სოვრეშეთ იძირედ, ნამდა თე ოსურკოჩ პროფესორ რდუ,  განათლებაშ დარგის. თე დაქ უწუ, ნამდა ჩქი ხოლო ვარზენთ ხალხის განათლებას ბიბლიაშ გურაფაშ პროგრამაშ დო შეხვალამეფიშ საშვალებათ. თიქ ქიდიჭყჷ ბიბლიაშ გურაფა, მაჟია დღას კრებაშ შეხვალამაშა ქუმორთჷ დო თეშ უკულ რაიონულ კონგრესის ხოლო ქიდესწრჷ. ართ წანაშ უკულ თიქ დინათ. ქოკითხით თქვან დუდის: „მუ ოინტერეს თი ხალხის, მიდგას კინ ოკო მივაკითხუე? შემლებნო ბიბლიაშ გურაფაშ გურშენ თეშ ქიფჩუე, ნამდა პიროვნებაქ გეგნოჭყვიდას თიშ დოჭყაფა?“.

14. მუჭო შეილებნა მეუდირთათ ბიბლიაშ მაგურაფალს?

¹⁴ თიშ უკულ, მუთ პიროვნებაწკუმა ბიბლიაშ გურაფას ქიდიჭყანთ, თითოულ გურაფაშ წოხოლე ჯგირო მემზადით. მომზადებაშ დროს დეფიქრით, მუნერ ოჯახშე მოურს თე პიროვნება, მუ განათლება უღჷ, მუ აფჷ ცხოვრებას მიკნაულა დო მუ ოინტერეს. თეს გეძინელ, დეფიქრით, ნამ ბიბლიურ მუხლეფს ეშეკითხენთ, ნამ ვიდეოეფს ოძირანთ დო მუ მაგალითეფს გიმირინუანთ ბიბლიურ ჭეშმარიტებაშ ეიონწყუმალო. ქოკითხით თქვან დუდის: „არძაშ უმოსო, მუთ დეინტერესებ ბიბლიაშ მაგურაფალ დო მუ შეხებ თიშ გურს?“ (იგავ. 16:23). ალბანეთის, ართ ოსურკოჩიქ, ნამდგაქ პიონერ დაწკუმა, ფლორაწკუმა დიჭყჷ ბიბლიაშ გურაფა, მტკიცაშე თქუ: „მუთუნით ვადმაჯერებე ღურელეფიშ გათელება“. თე დას ვა დუნძალებ თიშა თე ბიბლიურ გურაფა ქირწმუნკო. ფლორა იჩიებ: „ქიმეფხვად, ნამდა თენა ქიდეჯერკონ, დიო ჯგირო ოკო გეჩინებაფუკო ღორონთ“. თავრეშე მოჸუნაფილ, ირ ბიბლიაშ გურაფაშ დროს, ფლორა ხაზის უსვენდჷ იეჰოვაშ ჸოროფას, სიბრძნეს დო ძალას. უმოს გვიანო, თე ოსურკოჩიქ ქირწმუნ ბიბლიურ გურაფა ღურელეფიშ გათელებაშ გურშენ. ასე თინა ართგურო ომსახურ იეჰოვას.

15. მუჭოთ საქმეეფიშ 17:16—18-ს ჭარჷ, მუ ოცილუდ პავლეს, მარა მუშენ ვემიოტუ თიქ ქადაგება ათენელეფწკუმა?

¹⁵ წეკითხით საქმეები 17:16—18. მართალ რე, ათენ კერპეფით, სექსუალურ უზნეობათ დო წარმართულ ფილოსოფიათ რდუ ეფშა, მარა პავლეს ვა უფიქრებ, ნამდა თინეფ დღას ვეჸუაფდეს იესოშ მოწაფეეფ დო ლანძღუაშ უმკუჯინუო ხოლო ვემუტებ თინეფწკუმა ქადაგება. მართალ რე, ულირს, პავლე ღორონთიშ ხალხის თხოზუდ დო ლანძღუნდჷ, მარა უკულ ქრისტიანო გინირთჷ (1 ტიმ. 1:13). იესო პავლეს უჯინედ, მუჭოთ მომავალ მოწაფეს, თეშნერო, პავლეს ხოლო ჯერდჷ, ნამდა ათენელეფ მოწაფეეფო გინირთუდეს დო თექ მართალო თაშ ქუმოხვად (საქ. 9:13—15; 17:34).

16, 17. მუ ოძირანს, ნამდა არძანერ პიროვნებაქ შილებე გინირთას ქრისტეშ მოწაფეთ? ქიმიჸუნით მაგალით.

¹⁶ პირველ საუკუნეს არძანერ პიროვნებაქ გინირთჷ ქრისტეშ მოწაფეთ. მუჟამსით პავლექ საბერძნეთიშ ქალაქ კორინთის მახორუ ქრისტიანეფს მეჭარ, თიქ თქუ, ნამდა კორინთიშ კრებას ნამთინე თეიშახ უბადობას ორთუდ ვარდა უზნეო ცხოვრებას მეჸუნდჷ. პავლექ გეუძინ: „მარა გესუფთით“ (1 კორ. 6:9—11). თქვა ქიფიქრენდითო, ნამდა თე ხალხ დითირუდ დო ქრისტეშ მოწაფეთ გინირთუდ?

¹⁷ ამდღა ხოლო, ბრელ მზათ რე დოთირუას მუშ ცხოვრება, ნამდა გინირთას ქრისტეშ მოწაფეთ. მაგალთო, ავსტრალიას მახორუ ართ სპეციალურ პიონერ დაქ, სახელო იუკინაქ, ქიმეხვად, ნამდა არძანერ პიროვნებაქ შილებე მიღას ბიბლიურ ჭეშმარიტება. ართშა, მუჟამსით უძრავ ქონებაშ სააგენტოს რდუ, თიქ ქოძირ ართ ახალგაზრდა ძღაბ, მიდგას ტატუეფ უღუდ დო ნაბეტან თავისფალ დო ფართო ბარგ მიკაქუნდჷ. იუკინა იჩიებ: „დუდშე დუდ აურიდე თის, მარა უკულ ქიდიბჭჷ თიწკუმა რაგად. მუჭოთ გებგინ, თის თეშ ოინტერესუდ ბიბლია, ნამდა ფსალმუნეფშე მუსხირენ მუხლიშ ტატუ უღუდ!“. თე ახალგაზრდა ძღაბიქ ბიბლიაშ გურაფა დო შეხვალამეფშა გილულა ქიდიჭყჷ. *

18. მუშენ ოკო ვეგშებღათ წინასწარ დასკვნა ხალხიშ გურშენ?

 ¹⁸ იესოქ თქუ, ნამდა მოსავალ მზათ რდუ ეიოჭოფალო. მარა, თიშენ ხომ ვა უთქუალ თენა, ნამდა ელუდ ბრელ მიღენდჷ ჭეშმარიტებას? მუშო ოკო რაგად, ვარ. წმინდა წერილეფს ნაწინასწარმეტყველებ რდუ, ნამდა ბრელ ვერწმუნენდჷ იესოს (იოან. 12:37, 38). იესოს შეულებუდ ძირკო მუ უღუდ პიროვნებას გურს, ათეშენ უჩქუდ, ნამდა ბრელ ვერწმუნენდჷ თიშ ნარაგადის (მათ. 9:4). მართალ რე, იესო უმოს ყურადღებას თინეფს აქციენდჷ, მიდგაქ შილებე რწმენა გეგმირჩქინკო, მარა, იშენით არძას უქადაგუდ. ჩქი ვეშემლებნა, ქობძირათ მუ უღჷ პიროვნებას გურს, ათეშენ წინასწარ დასკვნა ოკო ვეგშებღათ ტერიტორია ვარდა პიროვნებაშ გურშენ! თეშ გინაწონს, ხალხის თეშ უჯინით, მუჭოთ მომავალ მოწაფეეფს. ართ მისიონერ, სახელო მარკი, ნამუთ ბურკინა-ფასოს მსახურენს, იჩიებ: „ხშირას, თი ხალხ, მიდგაშენ ფიფქრენქ, ნამდა სულიერო წიმი მიდულა, მითმიოტენა ბიბლიაშ გურაფას. მარა თი ხალხ, მიდგაშე ფიფქრენქ, ნამდა ნაბიჯეფს ვეგნოდგუნა, სულიერო წიმი მეულა. ქიმეფხვად, ნამდა უჯგუშ რე, იეჰოვაშ შურს ქიმეფჩათ საშვალება, ქომხემძღვანელან თინეფიშ გორუას, მიდგას მთელ გურით ოკო ჭეშმარიტებაშ გაგება“.

19. მუჭო ოკო ვუჯინედათ ჩქინ ტერიტორიას მახორუ ხალხის?

¹⁹ ართ მეჯინათ, შილებე თეშ იძირედას, ნამდა ჩქინ ტერიტორიას ბრელ ვა რე თიცალ, მით მოგენს მოსავალს, ნამუთ მზათ რე ეიოჭოფალო. მარა რშუდან, მუ უწუ იესოქ მუშ მოწაფეეფს. ჸვანეფ გინორჩიალებურ რე, შხვა სიტყვეფით ქოფთქუათინ, მოსავალ მზათ რე ეოჭოფალო. ხალხიქ შილებე დოთირუას ცხოვრება დო გინირთას ქრისტეშ მოწაფეთ. იეჰოვა თინეფს უჯინე, მუჭოთ „საუნჯეს“, ნამუთ ძვირფას რე თიშო (ანგ. 2:7). ხალხის ჩქი ხოლო იეჰოვა დო იესოცალო ქუჯინეთ-და, წინასწარ დასკვნას ვეგშებღანთ თინეფიშ გურშენ დო ქიგებგენთ, მუ ოინტერესნა. თეს გეძინელ, ხალხის უარყოფით თოლით ვა უჯინედათ იჸი დო მომავალ და დო ჯიმალეფო მიფრჩქინანთ.