სანარღოთ, მოზარდობაშ ასაკის იეჰოვაწკუმა ჩქიმ ურთიერთობაქ დესუსტჷ. თეშ იძირედ, ნამდა ჩქიმ თანაკლასელეფს სრულ თავისუფლება უღდეს დო მა ხოლო მოკოდ თენა. ფიფქრენდჷ, მშობლეფიშ წესეფიშ დო ქრისტიანულ ნორმეფიშ მეჸუნა ნაბეტან მონკა ოღალ რდუ დო სულიერ საქმეეფიშ კეთება მანგარ ძნელო მაძირედ. მართალ რე, ირო ბჯერდჷ იეჰოვაშ არსებობაშ, მარა თიწკუმა ხოლოს ვა ბგინაფლენდჷ დუდის.

მსახურებას მონაწილება გვალო ვემემტებ, მარა იეჰოვაშო მუთ შილებენ ჭიჭეს ვორთუდ. მსახურებაშა ულაშახ დღას ვევემზადებუდ, ათეშენ ჩქიმო მანგარ ძნელ რდუ ჩიებაშ დოჭყაფა დო გაგრძელება. ათეშ გურშენ, თე საქმე უშედეგო რდუ დო თის ხიოლ ვა მოუღუდ ჩქიმდა, მუდგაქ უმოსო გემიჸოთ გურ მსახურებაშა. ჩქიმ დუდის ვოკითხუდ: „მუჭო ახერხენა შხვეფ თეშ კეთებას მარაშე მარაშა დო თუთაშე თუთაშა?“.

17 წანერო გინიფრთინ, დამოუკიდებელო ცხოვრება გინობჭყვიდ. ათეშენ ქენვონწყი ჩანთა, ქიდიბტე ჸუდე დო ავსტრალიაშა გეგნოფრთჷ. ჩქიმ გინულაქ მშობლეფშო მანგარ ძნელქ იჸუ. თინეფ წუხენდეს თეშენ, მარა  ფიქრენდეს, ნამდა ვემვოტენდჷ იეჰოვაშ მსახურებას.

ავსტრალიას ჩქიმ სულიერობაქ ხოლო უმოსო დესუსტჷ. მიჩირთუდ შეხვალამეფ. თიცალ ახალგაზრდეფწკუმა ქიდიბჭყჷ მეგობრობა, მით ჩქიმცალო დიო შეხვალამას ოსწრუდეს დო უკულ ოშუმშა დო ოსხაპშა სერიშ კლუბეფშა გილეშეს. ულირს იფშინანქინ, მეფხვადუქ, ნამდა ცალ კუჩხით ჭეშმარიტებას ვორდჷ დო ცალით ქვეყნიერებას, მარა სინამდვილეს ნამთინს ვა ვოკუთვნუდ.

სოდგარენ ჟირ წანაშ უკულ ქეშეფხვად ართ დას, ნამდგაქ შურო ვა უჩქუდუნ თეშ, დუმაფიქრჷ ჩქიმ ცხოვრებაშ წესის გურშენ. ხუთ დაუქორწინებელ დაწკუმა ართო ფცხოვრენდჷ. ჩქი სარაიონო ზედამხედველ დო თიშ ოსურ, თამარა, ქუდვაპატიჟით ჸუდეშა ართ მარათ. ონდო მუშ ქომონჯ შეხვალამაშო მუდგარენეფს ამზადენდჷ, თამარა ჩქინწკუმა ართო იძიცანდჷ დო ატარენდჷ დროს. თენა მანგარო მობწონდჷ. თე და თანდაბალ დო უშუალო ადამიან რდუ. მანგარო გამკვირდჷ თიშ ძირაფაქ, ნამდა ადამიან, მიდგას იეჰოვაწკუმა ხოლოშიან ურთიერთობა უღუდ, შილებედ მხიარულ ხოლო ჸოფედკო.

თამარა ენთუზიაზმით ეფშა ადამიან რდუ. ჭეშმარიტებაშ დო მსახურებაშ მიმართ თიშ ჸოროფა შხვეფს ხოლო გინადვალუდ. თინა ბედნერ რდუ თით, ნამდა მუთ შეულებუდუნ ირფელს ორთუდ იეჰოვაშო, მუჟამსით მა უბედურ ვორდჷ, მუშენდა იეჰოვაშო ხვალე აკაბცხას ვორთუთ. თიშ დადებით დამოკიდებულებაქ დო ბედნერობაქ მანგარო იმოქმედ ჩქიმ ცხოვრებაშა. თამარაშ მაგალითიქ ყურადღება ძირითად ბიბლიურ ჭეშმარიტებაშა გეგნმოღალაფუ: იეჰოვას ოკო, ნამდა არძაქ ხიოლით ვემსახურათ თის (ფსალმ. 100:2).

მა ხოლო მოკოდ, მიღუდკო თიცალ ხიოლ, მუნერით თამარას უღუდ, მარა თეშო საჭირო რდუ, დიდ ცვლილებეფ მიკეთებუდკონ. მართალ რე, დიდ დროქ დემესაჭირ, მარა საბოლათ ქიდიბჭყჷ ჭიჭე ნაბიჯეფიშ გინოდგუმა. მსახურებაშო მომზადება ქიდიბჭყჷ დო მინშა დამხმარე პიონერო ხოლო ვმსახურენდჷ. თექ მიმეხვარ, ნაკლებო იბნერვიანკო დო ჩქიმ  დუდშა დარწმუნებულ პჸოფედკო. მსახურებას ბიბლიას უმოს ხშირას იბრინუანდინ თიქ, ნამდვილ კმაყოფილება ქუმომიღ. ჭიჭე ხანშა ირთუთას ქიდიბჭჷ დამხმარე პიონერო მსახურება.

არძანერ ასაკიშ ადამიანეფწკუმა ქიდიბჭჷ მეგობრობა, მით ბრელს ხანდენდეს იეჰოვაშო დო თეს ხიოლ მოუღუდ თინეფშა. თინეფიშ ჯგირ მაგალითიქ მიმეხვარ, ქიგნვოჯინკო, მუ რდუ ჩქიმ ცხოვრებას მთავარ დო გუვავითარკო ჯგირ სულიერ ჩვევეფ. მსახურებას უმოს მეტ ხიოლ მოუღუდ ჩქიმდა დო საბოლათ სრულ დროთ პიონერობა ქიდიბჭყჷ. წანეფიშ უკულ კრებას პირველო იბგინ დუდ ბედნერო დო სასიამოვნოთ, თეშ მუჭოთ ჩქიმ ჸუდეს.

ართ წანაშ უკულ ქეშეფხვად ალექსის, კეთილ, ალალ ადამიანს, მიდგას უჸორდჷ იეჰოვა დო მსახურება. თინა მომსახურეთ მსახურენდჷ დო პიონერობაშ ამშვ წანიან გამოცდილება უღუდ. ალექსი მუსხირენ ხანს მსახურენდჷ მალავის, თიცალ ტერიტორიას, სოდეთ მაუწყებელეფიშ საჭიროება რდუ. თექ თის ურთიერთობა უღუდ მისიონერეფწკუმა, მიდგაქ მართალო ჯგირ მაგალით დუტეს დო ელუჩეს, ვემიოტუკო სამეფოშ ინტერესეფიშ პირველ ადგილს გერინაფა.

2003 წანას მა დო ალექსიქ დებქორწინით დო გუვაგრძელით სრულ დროთ მსახურება. ჩქი ბრელ ჯგირ მუდგარენ დიბგურეთ დო იეჰოვაქ ხოლო კურთხევეფ ვემმარკეს.

2009 წანას ინდონეზიაშ არქიპელაგიშ ჭიჭე ქიანას, აღმოსავლეთ ტიმორს, მისიონერეფო დაბნიშნეს. ჩქი გაკვირვებულ დო გახარებულ ვორდით, თეწკუმა ართო, ბნერვიანენდით. ხუთ თუთაშ უკულ გენოფრთით თე ქიანაშ დედაქალაქ დილიშა.

თექიან გინულაქ ჩქინ ცხოვრება მანგარო დოთირუ. ჩქი ოკო ქიმვარჩქვანითკო ახალ კულტურას, ნინას, ოჭკუმალს დო ოცხოვრებელ გარემოს. მსახურებაშ დროს ხშირას შეფხვადუდით მანგარ ღარიბ, ჭარუა დო კითხირ ვა უჩქუდუნ ფერ დო დაჩაგრულ ხალხის. თეს გეძინელ, თიცალ ხალხის  ვორწყედით, მიდგას ომიშ დო ძალადობაშ გურშენ ფიზიკურ დო ემოციურ პრობლემეფ უღუდ. *

თექ მართალო სარკო მსახურება მიღდეს! მაგალთო, ართშა ქეშეფხვად 13 წანერ მარიას, * ნამუთ მანგარ მოწყინაფილ რდუ. თის დიდა მუსხირენ წანაშ ნაღურა აფუდ დო მუმას ხვალე კანკალეშა ორწყედ. მუშ მახანა ბრელ ბაღანაცალო, მარიას ხოლო ცხოვრებაშ მუთუნნერ მიზან ვა უღუდ. ფშუ ართ მომენტ, მუჟამსით მუშ გრძნობეფშე ჩიებაშ დროს თიქ ინგარ. მარა ვა მარჩქილედ, მუს მეჩიებუდ, მუშენდა ჯგირო ვა მიჩქუდ თიშ ნინა. მა ქიბლოც დო იეჰოვას ქოფთხი მოხვარა, ნამდა გურშა ელვუკინკო თის. უკულ გურიშემაკინალ მუხლეფ გეშვუკითხჷ. მუსხირენ წანაშ უკულ ქობძირ, ნამდა ჭეშმარიტებაქ დოთირუ თიშ დამოკიდებულება, გარეგნობა დო მთელ ცხოვრება. თიქ დინათ დო ასე შხვეფს ოგურუანს ბიბლიას. ამდღა მარიას დიდ სულიერ ოჯახ ჸუნს დო გინაფლენს, ნამდა უჸორა თინა.

აღმოსავლეთ ტიმორს სამქადაგებლო საქმე იეჰოვაშე რე კურთხეულ. მართალ რე, მაუწყებელეფიშ უმენტაშიქ ბოლო ვით წანაშ დინახალე ინათ, მარა ბრელ მსახურენს პიონერო, მომსახურეთ ვარდა უხუცესო. შხვეფ მთარგმნელობით ოფისის მსახურენა დო ხეს უნწყუნა თექიან ნინაშა სულიერ საზრდოშ მომზადებას. მანგარო გუმახარ შეხვალამას თინეფიშ ბირაშ მორჩქილაფაქ, თინეფიშ გოძიცელ სახეეფიშ დო სულიერო წიმი ულაშ ძირაფაქ.

აღმოსავლეთ ტიმორს ჩქინ დანიშნულება მანგარ განსხვავებულ რდუ ავსტრალიას ცხოვრებაშე, მარა ჩქიმო წარმოუდგენელ რდუ თეშე უმოს ბედნერ ცხოვრება. მინშა ხალხით გოფშა ჭიჭე ავტობუსით მიწიენდეს მგზავრობა, სოდეთ ბაზარს ჸიდირებულ სქირაფილ ჩხომეფ დო ბრელ ბოსტნეულ მითოძუდ. მინშა ბიბლიაშ გურაფას ვატარენდით ჭიჭე ჸუდეს, სოდეთ მანგარ სინჩხე, სირისტ დო წინდამ პროლ რდუ დო თექ ქოთომეფ გილერულედეს. მარა, თე სირთულეეფიშ უმკუჯინუო, ხშირას ფიფქრენდჷ, თენა მანგარ რე-მაქ!

ულირს იფშინანქინ, მანგარ მარდულ ვორექ ჩქიმ მშობლეფიშ თიშენ, ნამდა ირფელ გაკეთეს ჩქიმდა იეჰოვაშ შარეფიშ დაგურაფალო. თინეფ მოზარდობაშ რთულ წანეფს ხოლო ელამრდეს. იგავეფიშ 22:6-ის ენოჭარილ სიტყვეფიშ ჭეშმარიტებაქ ჩქიმ შემთხვევას დემტკიც. ჩქიმ დიდა დო მუმას მა დო ალექსი ვოამაყუთ; თინეფ ბედნერეფ რენა თით, ნამდა ორწყენა, იეჰოვას ვომსახურუთინ. ჩქი 2016 წანაშე ავსტრალიაშ ფილიალიშ ტერიტორიას რაიონულ მსახურებას ვორეთ.

მანგარ ძნელ რე თიშ დაჯერება, ნამდა ართ დროს ქადაგებას ჩქიმდა ხიოლ ვა მოუღუდ. ასე მიჸორს მსახურება! ქიმეფხვად, ნამდა ცხოვრებას მუდგა ვა ხვადუდასინ, ნამდვილ ხიოლ ღორონთშა მთელ გურით მსახურებას მოუღ. ბოლო 18 წანა, ნამუთ ალექსწკუმა ართო იეჰოვაშ საქმეშ კეთებას მევუძღვინ, ჩქიმ ცხოვრებაშ არძაშ უმოს ბედნერ წანეფ რე. ასე მა მარჩქილე ფსალმუნმაბირე დავითიშ სიტყვეფიშ ჭეშმარიტება, ნამუთ იეჰოვას უწუ: „არძა, მით დუდის გითოიფორუანს, გეხარენს; ირიათო ხიოლით ქიმიოძახანა . . . სქან სახელიშ მოჸოროფეეფ სქანით გეხარენა“ (ფსალმ. 5:11).