1, 2. მუს იჩიებნა შხვეფ იეჰოვაშ მოწმეეფიშ გურშენ?

იეჰოვაშ ხალხის მით ოკვირუნ, ორწყენა მუნერ თვისებეფით გიშეგორნა თინეფ შხვეფშე. მაგალთო, ნაცისტურ გერმანიას იეჰოვაშ მოწმეეფიშ გურშენ ანტონ გილ მუშ წიგნის ჭარუნს: „ნაცისტეფ ონტერდეს იეჰოვაშ მოწმეეფს . . . 1939 წანაშო [საკონცენტრაციო ბანაკეფს] 6 000 მოწმე რდუ“. მუჭოთ თინა იჩიებუნ, მანგარ თხოზინიშ დო სტრესიშ უმკუჯინუო მოწმეეფქ ვადინუეს სიმშვიდე, ღორონთიშ ართგურობა, ართობა დო ქაძირეს, ნამდა სანდო რდეს.

² სამხრეთ აფრიკას ხოლო ბრელს თოლშა ქუმუოლ ღორონთიშ ხალხიშ ჯგირ თვისებეფქ. ართ დროს თე ქიანას შხვადოშხვა კანიშ ფერიშ მოწმეეფს ართო შაყარუაშ უფლებას ვარზენდეს. მარა 2011 წანაშ 18 დეკემბერს, ჟეშხა დღას სარკო ოძირაფალ რდუ სამხრეთ აფრიკაშე დო მეზობელ ქიანეფშე მოულირ 78 000 შხვადოშხვა რჯულიშ და დო ჯიმაშ ართო აკოშაყარუა. თინეფ სულიერ პროგრამაშ მარჩქილაფარო ქალაქ იოჰანესბურგის, არძაშ უდიდაშ სტადიონს რდეს შაყარელი. თე სტადიონიშ ართ-ართ მენეჯერქ თქუ: „იეჰოვაშ მოწმეეფ არძაშ უჯგუშო იქციებდეს, მით თე სტადიონს მიძირუნ. თინეფს კოხტას მიკაქუნდეს. თქვა სტადიონ სუფთას დიტეთ. მარა არძაშ უმოს გასაკვირ თინა რე, ნამდა შხვადოშხვა რჯულიშ კათას თეცალ ართობა გიღნა“.

3. მუშენ გიშეგორუ ჩქინ მსოფლიო საჯიმალო შხვეფშე?

 ³ თინეფს ხოლო, მით იეჰოვაშ მოწმეეფ ვა რენან, შეულებნა არგამათ ძირან, ნამდა ჩქინ მსოფლიო საჯიმალო გიშეგორუ შხვა ორგანიზაციეფშე (1 პეტ. 5:9). თეშ მიზეზ თინა რე, ნამდა ბიბლიაშ დო წმინდა შურიშ მოხვარათ ვოცადუთ ქიდიპტუათ „ჯვეშ პიროვნება“ დო დოფთირუათ თინა „ახალ პიროვნებათ“ (კოლ. 3:9, 10).

4. მუს გუვარჩიენთ თე სტატიას დო მუშენ?

⁴ ართ რე მიოტუე ჯვეშ პიროვნება, მარა მაჟია რე ვა დართე თის. თე სტატიას გუვარჩიენთ, მუჭო შემლებნა ჯვეშ პიროვნებაშ დოტება, მუშენ რე თენა მნიშვნელოვან დო მუჭო რე შეიოლებერ, მუდგა გლახა წესი ვა მიღდანინ, დოფთირუათ ჩქინ პიროვნება. თის ხოლო გუვარჩიენთ, მუშ კეთება შეულებნა თინეფს, მით ბრელ ხან რე ჭეშმარიტებას რენან, ვა დართან ჯვეშ პიროვნებას. მუშენ მოსაჭირნა თე ირფელიშ გოშინა? სანარღოთ, იეჰოვაშ ნამთინე მსახურქ კურცხას ვა რდუნ თიშენ, კინ ჯვეშ საქმეეფს დართ. ათეშენ, ირიათო ოკო ფშუდან ბიბლიას მოჩამილ გაფრთხილება: „მით ფიქრენს, ნამდა გერენ, კურცხას რდას, ვა დანთხასინ“ (1 კორ. 10:12).

5. ა) ქიმიჸონით მაგალით თიშ ოძირაფალო, მუსხით აუცილებერ რე ჯვეშ პიროვნებაშ დოტება (ქოძირით სურათ მა-17 გვერდის). ბ) მუჭოთ კოლოსელებიშ 3:5—9 მუხლეფშე იძირენ, ნამ საქმეეფ მიშურს ჯვეშ პიროვნებაშა?

⁵ მუს აკეთენდით ბარგიქ დეგეწიმდარეს დო გლახა შურქ ქაშუ-და? ალბათ ხეთეშე გემკიჸოთანდით. თეგვარო, აუცილებერ რე ქუგუგონუათ ბიბლიურ მითითებას დო სასწრაფოთ დეფთხინუათ თი გლახა წესეფ, მუთ ოწინააღმდეგ იეჰოვაშ ნორმეფს. ჩქი ოკო მივაჸუნათ პავლე მოციქულიშ არგამა გაფრთხილებას, ნამუთ პირველ საუკუნეშ ქრისტიანეფს მეჩ: „დეთხინეთ თე ირფელ“. მორთ გუვარჩუათ პავლეშ მოშინაფილ ცოდეფშე ჟირ, ნამუთ ოკო დეფთხინუათ — სიძვა დო უწუნდურობა (წეკითხით კოლოსელები 3:5—9). *

6, 7. ა) მუჭო იძირე პავლეშ სიტყვეფშე, ნამდა დიდ მონდომა რე საჭირო ჯვეშ პიროვნებაშ დატებელო? ბ) მუნერო ცხოვრენდ საკურა დო მუქ მეჩ ძალა დოთირედკო?

⁶ სიძვა. ბიბლიას მოშინაფილ სიტყვა „სიძვა“ ნიშნენს სექსუალურ ურთიერთობას თინეფ შქას, მიდგა დაქორწინებულ ვა რენა დო ჰომოსექსუალიზმ ხოლო. მოციქულ პავლექ თანაქრისტიანეფს უწუ: „ქენაჸვილით თქვან სხეულიშ მიწიერ ნაწილეფ“. თენა ნიშნენდ, ნამდა დეთხინესკო არძანერ კორნება, მუთ თინეფს სიძვაშა მიჸონანდ. მუჭოთ პავლეშ სიტყვეფშე იძირენ, მანგარ მონდომა რე საჭირო, დეფთხინუათ სწორ ვა რენ ფერ კორნებეფ. შილებე ეფი ვა რდას, მარა თენა შეიოლებერ რე.

⁷ გუვარჩუათ საკურაშ * შემთხვევა, ნამუთ იაპონიაშე რე. მუჟამს მარდუ რდუნ, თინა ხვალახეთ გინაფლენდ დუც, ათეშგურშენ 15 წანერ რდუნ თეშ შხვადოშხვა კოჩწკუმა ქიდიჭყ სექსუალურ ურთიერთობა. შედეგო თიქ სუმშა მიშორ ბაღანა. თიქ თქუ: „დუდშე თხილერო ბგინაფლენდ დუც, მუშენდა ფიფქრენდ მიდგარენს ვუჸორდ დო ვოსაჭირუდ. მარა თეცალ ურთიერთობეფ მუთ უმოსო მიღუდუნ, თით უმოსო ხვალახეთ ბგინაფლენდ დუც“. თინა თაშ 23 წანაშახ ცხოვრენდ, სოიშახ იეჰოვაშ  მოწმეეფწკუმა ვედიჭყ ბიბლიაშ გურაფა. საკურაქ დაფას ნაგურეფ, იეჰოვაშ მოხვარათ მიოტუ ჯვეშ ცხოვრებაშ წეს დო მერუ დანაშაულიშ დო ონჯღორეშ გრძნობას. საკურა ასე პიონერო მსახურენს დო უკვე ხვალახეთ ვა გინაფლენს დუც. თინა იჩიებ: „ასე დასურო ბედნერ ვორექ თიშენ, ნამდა ირ დღას ბგინაფლენქ იეჰოვაშ ჸოროფას“.

8. მუქ შილებე უწუნდურო გინმოშქვან იეჰოვაშ თოლს?

⁸ უწუნდურობა. ბიბლიას მოშინაფილ სიტყვა „უწუნდურობა“ ხვალე სექსუალურ უზნეობას ვა ნიშნენს. თიშა მიშურს თუთუმიშ შუმა დო უზრდელურ ციგანობა (2 კორ. 7:1; ეფეს. 5:3, 4). თეს გეძინელ, თიშა თიცალ უწუნდურ წესეფ ხოლო მიშურს, ნამუთ შილებე კოჩიქ ხვალე რენ თეშ აკეთას. მაგალთო, თიცალ წიგნეფიშ კითხირ, ნამუთ სექსუალურ სურვილეფს ოკურცხინუანს ვარდა პორნოგრაფიაშ ჯინა, ნამუქით შილებე უწუნდურ წესშა, მასტურბაციაშა მიჸონას კოჩი (კოლ. 3:5). *

9. მუქ შილებე მაჸუნას გლახა კორნებეფიშ გავითარებას?

⁹ თინეფ, მიდგას პორნოგრაფიაშ ჯინა წესო უღნან, „გლახა კორნებეფ“ ურჩქინდუნა დო შილებე სექსშა დამოკიდებულო გინართან. ნამთინე მკვლევარ იჩიებ, ნამდა პორნოგრაფიაშ ჯინაშა მერჩქვანა გუ ალკოჰოლიშ დო ნარკოტიკეფიშ მერჩქვანას. პორნოგრაფიაშ ჯინას გლახა შედეგეფ მოუღ, მაგალთო მუნერით რე ონჯღორე, სამუშას უხარისხოთ მუშება, პრობლემეფ ოჯახის ვარდა ოჯახიშ აკორღვაფა დო შილებე დუდიშ ჸვილუა ხოლო. ართ კოჩიქ პორნოგრაფიაშ ჯინა მიოტუნ თიშ უკულ თქუ: „ბოლო ბოლო დიფრთინე დუდიშ პატიცემა“.

10. მუქ მეხვარ რიბეიროს მეუტებუდკო პორნოგრაფიაშ ჯინა?

¹⁰ ნამთინეშო პორნოგრაფიაშ ჯინაშ მეტება ეფ ვა რე. მარა ბრაზილიელ რიბეიროშ მაგალით ოძირანს, ნამდა თენა შეიოლებერ რე. რიბეიროქ ჸუდე ქიდიტუ მარდუ რდუნ თეშ დო მუშობა ქიდიჭყ ქარღადიშ გინამუშებელ ქარხანას, სოდეთ ხშირას ორწყედ პორნოგრაფიულ ჟურნალეფს. თინა იჩიებ: „ჭიჭე-ჭიჭეთ ქიმვარჩქვან თინეფიშ გოჯინას. ართ შურ მიღუდ, მუჟამ იშუ ჸუდეშე ოსურ, მიდგაწკუმა ართო ფცხოვრენდ, ნამდა ხვალე ქუდოფსკიდკო დო ქუჯინკო პორნოგრაფიულ ვიდეოეფს“. მარა ართშა სამუშას გეშაყარელ წიგნეფ შქას ქოძირ წიგნ „ოჯახურ ბედნერობა“, ნამუთ გეჭოფ დო წეკითხ. თეშ უკულ თიქ იეჰოვაშ მოწმეეფწკუმა ქიდიჭყ ბიბლიაშ გურაფა, მარა გლახა წესეფიშ მიოტებელო დიდ დროქ დესაჭირ. მუქ მეხვარ თის? თინა იჩიებ: „ლოცვა, ბიბლიაშ გურაფა დო ნაგურეფშე ფიქრიქ მიმეხვარ, ქიგებგიკო იეჰოვაშ თვისებეფშე დო ქიპჸოროფეკო თინა. თექ მიმოტებაფუ პორნოგრაფიაშ ჯინა“. ბიბლიაშ დო ღორონთიშ წმინდა შურიშ მოხვარათ რიბეიროქ ქიდიტუ ჯვეშ პიროვნება, დინათ დო ასე უხუცესო მსახურენს.

11. მუ რე საჭირო პორნოგრაფიაშ ჯინაშ მიოტებელო?

¹¹ გლახა წესეფიშ მიოტებელო რიბეიროს ბიბლიაშ გურაფაშე მეტ აფუდ ოკეთებელ. თინა ბრელს ფიქრენდ ნაგურეფშე დო იეჰოვას მოხვარას თხინდ. თე ირფელქ რობეიროს იეჰოვაშ ჸოროფა გუმანგარ დო შედეგო მიოტუ პორნოგრაფიაშ ჯინა. თაშ ნამდა, ღორონთიშ ჸოროფაშ გავითარება დო თიშ გოჯოგაფა მუთ გლახა რენ, არძაშ უჯგუშ საშვალება რე მიოტუე პორნოგრაფიაშ ჯინა (წეკითხით ფსალმუნი 97:10). *

12. მუქ მეხვარ სტივენს, მეუტებუდკო გურიშმოულა დო ლანძღუა?

¹² თინეფს, მიდგას ფიცხე ხასიათ უღნან, გურიშ მულას ხშირას ოლანძღარ სიტყვეფით გიმოხანტნა. მუშო ოკო რაგად, თენა ოჯახიშ ბედნერობას ხეს ვეშუნწყუნს. სტივენ, ნამუთ ავსტრიაშე რენ, იჩიებ: „ხშირას აკაბურცხა მუდგარენშე ებტახუნდ ჩხუპის. მა დო ჩქიმ ოსურქ სუმშა დევეთხით ართიანს დო დახე ოჯახიქ ხოლო აკომცუეს“. თე დროს თინეფქ იეჰოვაშ მოწმეეფწკუმა ქიდიჭყეს ბიბლიაშ გურაფა. მუქ მაჸუნ შედეგო, მუჟამსით სტივენქ ბიბლიურ რჩევეფს ქიმიაჸუნ? თინა იჩიებ: „ჩქინ ოჯახურ ცხოვრებაქ გეუჯგუშ. ასე იეჰოვაშ მოხვარათ მშვიდ დო წყნარ ვორექ, მუჟამსით ადრე ბომბცალ ვორდ დო ჭიჭე მუდგარენშე იფეფთქებუდ‘‘. ამდღა სტეფან კრებას მომსახურე რე; მუშ მეუღლე ხოლო წანეფ რე პიონერო მსახურენს. თი კრებაშ უხუცესეფ, სოდეთ სტივენ მსახურენსინ იჩიებნა: „სტივენ წყნარ, მოხანდე დო თანდაბალ ჯიმა რე“. თინეფ თის ხოლო იჩიებნა, ნამდა სტივენ გურმოულირო დღას ვა უძირნა. მუშით მიოჭირინუო სტივენქ თე ირფელს? თინა იჩიებ: „იეჰოვაშ მოხვარაშ უმშო ჩქიმ პიროვნება ვა მათირედ დო ნამთინ კურთხევა ვა მაღვენუდ, მუთ ამდღა მიღ ცხოვრებას“.

13. მუშენ რე გურიშმოულა ოშკურანჯ დო მუჭო მაფრთხილენა ბიბლია?

¹³ ბიბლია არგამათ მაფრთხილენა დუდ ეუჩილითუათ გურიშმოულას, ლანძღუას დო ღვარაფის (ეფეს. 4:31). სანარღოთ, თეცალ გლახა წესეფს ხშირას კოჩი ჩხუპშა დო ძალაშ გიმორნაფაშა მეჸუნს. ამდღა თე ქიანას ბრელ ფიქრენს, ნამდა გურიშმოულა დო ძალაშ გიმორნაფა ნორმალურ რე. მარა თეცალ მოქმედებეფს დიდება ვა მოუღ ღორონთშა, ათეშენ ბრელქ მიოტუ ჯვეშ ცხოვრებაშ წეს დო დოთირუ თინა ახალ პიროვნებათ (წეკითხით ფსალმუნი 37:8—11). *

14. ქორენო შეიოლებერ აგრესიულ კოჩიქ დითირას? ქიმიჸონით მაგალითი.

¹⁴ გენიფხილათ ჰანსიშ მაგალით, ნამუთ ავსტრიაშ ართ-ართ კრებას უხუცესო მსახურენს. „თინა არძაშ უმოს თანდაბალ ჯიმა რე, მიდგაწკუმა გაკორნედეს ურთიერთობა — იჩიებ უხუცესეფიშ საბჭოშ კოორდინატორ, ნამუთ ჰანსიწკუმა ართო მსახურენს კრებას. მარა ჰანს ირო თეცალ ვა რდუ. ახალობას თიქ უზომე შუმა ქიდიჭყ დო აგრესიულ პიროვნებათ გინირთ. ართშა, მუჟამსით მანგარ შუმილ რდუნ, მუშ მეგობარ ძღაბ დოჸვილ. თინა 20 წანათ ქუდახუნეს ციხეს, მარა იშენით ვათირე. დრო ხანიშ უკულ ჰანსიშ დიდაქ უხუცესის ქოთხუ ქეშეხვადკო თის ციხეს. თიქ ბიბლიაშ გურაფა ქიდიჭყ. ჰანსი იჩიებ: «მანგარ ძალეფქ დემესაჭირ ქიდიპტეკო ჯვეშ პიროვნება. მანგარო მიმეხვარ ესაიაშ 55:7-ის ინოჭარილ სიტყვეფქ: „მიოტუას უბადოქ მუშ შარა“ დო 1 კორინთელებიშ 6:11-იქ, სოდეთ ინოჭარ თინეფშე, მიდგაქ მიოტუ უბადობაშ კეთება: „თეშნერ რდუ თქვანდე ნამთინე“. იეჰოვა მოთვინებათ მოხვარუდ წანეფიშ დინახალე მუშ წმინდა შურით, ნამდა დიფთირკო ახალ პიროვნებათ». ჰანსიქ ციხეს დინათ დო 17 წანა დო გვერდიშ უკულ გეგთორთ ციხეშე. თინა იჩიებ: „იეჰოვაშ მანგარ მარდულ ვორექ თიშ დიდ ჭყოლოფაშ დო პატიებაშ გიმორჩქინაშე“.

15. ხოლო მუ რე ჯვეშ პიროვნებაშ ნაწილ, მარა მუს იჩიებ ბიბლია თეშ გურშენ?

¹⁵ ლანძღუაწკუმა ართო ტყურაშ რაგად ხოლო ჯვეშ პიროვნებაშ ნაწილ რე. მაგალთო, ნამთინე ტყურას იჩიებ, ნამდა ოგაფალეფ ვეგნიგას ვარდა შეცთომეფიშ  გურშენ ვედესაჯას. მარა იეჰოვა „ჭეშმარიტებაშ ღორონთი“ რე (ფსალმ. 31:5). ათეშენ თინა ითხინს, ნამდა თითოულ მუშ მსახურქ ჭეშმარიტება იჩუას დო ვა ღორას მითინ (ეფეს. 4:25; კოლ. 3:9). თაშ ნამდა, სიმართლე თი დროს ხოლო ოკო ბრაგადუათ, მუჟამსით შილებე თეშ გურშენ უხერხულ მდგომარეობას ქინობლათ (იგავ. 6:16—19).

16. მუ მიმეხვარებნა ქიდიპტუათ ჯვეშ პიროვნება?

¹⁶ ჯვეშ პიროვნებაშ დოტება ხვალე ჩქინ ძალეფით ვეშმალებენა. თე სტატიას მოშინაფილ პიროვნებეფს — საკურას, რიბეიროს, სტივენს დო ჰანსის მანგარ ძალეფქ დესაჭირეს, მიოტესკო გლახა წესეფი. თინეფქ ღორონთიშ სიტყვას დო წმინდა შურს ქიმეჩეს მუნეფშა მოქმედებაშ საშვალება (ლუკ. 11:13; ებრ. 4:12). ღორონთიშ სიტყვაშ დო წმინდა შურიშ ძალაქ ჩქინდა ხოლო ქიმოქმედასინ, ირ დღას ოკო იპკითხათ ბიბლია დო იფიფქრათ თიშე. თეს გეძინელ, ოკო იბლოცათ, ღორონთიქ ქომჩან სიბრძნე დო ძალა, ნამდა ქეშმალებუან ბიბლიას მოჩამილ რჩევეფიშ გიმორნაფაქ (იეს. 1:8; ფსალმ. 119:97; 1 თეს. 5:17). ღორონთიშ სიტყვაშ დო წმინდა შურიშ მოხვარას თი დროს ხოლო ბღებულენთ, მუჟამსით ვემზადებუთ კრებაშ შეხვალამეფშო დო ვოსწრუთ თის (ებრ. 10:24, 25). თეწკუმა ართო, შემლებნა გიმიბრინუათ თი საშვალებეფ, ნამუშ ჭყოლოფათ ამდღა მთელ მსოფლიოს ღორონთიშ ხალხ სულიერ საზრდოს ღებულენს (ლუკ. 12:42).

17. მუს გუვარჩიენთ ანწიან სტატიას?

¹⁷ თე სტატიას გუვარჩით მუსხირენ გლახა წესი, ნამუთ ოკო ქიდიპტუათ დო ვადვართათ. მარა ხვალე თენა ბაღუნო ღორონთიშ მოწონაშ მიოღებელო? ვარ. თეწკუმა ართო ჩქი ახალ პიროვნებათ ოკო დიფთირათ. ანწიან სტატიას გუვარჩიენთ მუსხირენ მხარეს, მუ ოკო ვაკეთათ თიშო ნამდა, ახალ პიროვნებათ დიფთირათ.