მოციქულ პავლექ წმინდა შურიშ ძალათ ჭარ ჩხორო ძვირფას თვისებაშენ, ნამუთ წმინდა შურიშ მოქმედებაშ შედეგო ივითარებ (გალ. 5:22, 23). თე ძვირფას თვისებეფ „წმინდა შურიშ ნაყოფ“ რე. * თენა „ახალ პიროვნებაშ თვისებეფ“ რე (კოლ. 3:10). მუჭოთ ჯას ჯგირ მიკოლუაფათ მიკმუღ ნაყოფინ, თეშ კოც ხოლო აღვენუ ჯგირ თვისებეფ წმინდა შურს მუწკუმა მოქმედებაშ საშვალებას ქარზენს-და (ფსალმ. 1:1—3).

შურიშ ნაყოფიშ პირველ ძვირფას თვისება, ნამუთ პავლექ მიშინუნ, ჸოროფა რე. მუსხით ძვირფას რე თინა? პავლექ თქუ, ნამდა ჸოროფაშ უმშო „მუთუნიშ მოღე“ ვეჸიდ (1 კორ. 13:2). მარა მუ რე ჸოროფა, მუჭო შემლებნა თიშ გავითარება დო გიმორჩქინა ჩქინ ცხოვრებას?

შილებე სიტყვეფით ეფ ვა რდას ჸოროფაშ ეჭარუა, მარა ბიბლია იჩიებ მუჭო შემლებნა თიშ გიმოხანტუა. მაგალთო, თექ პკითხულენთ, ნამდა ჸოროფა „ითვინენს დო ჯგირს აკეთენს“. თეწკუმა ართო, თის „ჭეშმარიტება ახარენს, ირფელ გინმუღ, ირფელ წანს, ირფელიშ იმენდ უღ დო ირფელს ურზ“. თეს გეძინელ, ჸოროფაშა მიშურს შხვეფწკუმა მანგარ ხოლოშიან ურთიერთობა, თინეფშო ხანდება დო ართგურ მეგობრობა. მარა მაჟია კუნთხუთ, ჸოროფაშ ნარკულობას ოძირანს მენჯარიშობა, სიამაყე, უწესო საქციელ, ეგოისტობა, გურიშ მოულა დო თინა, მუჟამსით მიჭირა პატიება. თე გლახა თვისებეფიშ მანგიორო ოკო გუვავითარათ ნამდვილ ჸოროფა, ნამუთ „მუშის ვა გორუნს“ (1 კორ. 13:4—8).

„ღორონთი ჸოროფა რე“. დასურო, იეჰოვა ჸოროფაშ განსახიერება რე (1 იოან. 4:8). თიშ არძა საქმეშე ჸოროფა იძირე. არძაშ უმოს დიდ ჸოროფა თიმ დროს გიმირჩქინ, მუჟამსით იესო დედამიწაშა ქუმაშქვ, ნამდა დატანჯებედკო დო დოღურედკო ჩქინო. მოციქულ იოანექ ჭარ: „ღორონთიშ ჸოროფაქ თით ქიძირ, ნამდა მუშ ხვალეგუნაჭყეფ სქუა ქუმაშქვ დედამიწაშა, იესოშ ჭყოლოფათ ჩქინდა სიცოცხლე ქუმუჩამუდკონ. ჸოროფა თინა ვა რე, ჩქი ქიპჸოროფეთ ღორონთინ, თინა რე, ნამდა თიქ ქომჸოროფეს დო ქუმაშქვ მუშ სქუა აკმარიგებელ მსხვერპლო ჩქინ ცოდეფიშ გურშენ“ (1 იოან. 4:9, 10). ღორონც ვუჸორთ, ათეშენ შემლებნა მიბღათ თიშე პატიება, იმენდ დო სიცოცხლე.

იესოქ ხალხიშ ჸოროფა ქაძირუ, მუჟამსით მუშ სიცოცხლე დათმ დო შეასრულ იეჰოვაშ ნება. პავლექ ჭარ: «[იესოქ] თქუ: „ქუმოფრთ სკან ნებაშ შეიოსრულებელო . . . თე ნებათ ვორეთ გასუფთებულ იესო ქრისტეშ სხეულიშ ხვალე ართშა შეწირუათ“» (ებრ. 10:9, 10). ნამთინ კოც ვეშულებ თეშე უმოს ჸოროფაშ გიმორჩქინა. იესოქ თქუ: „ვა არსებენს თიშე უმოს დიდ ჸოროფა, მუჟამსით მეგობრეფშო მითინ მუშ დუც დოდვანს ოჸვილარო“ (იოან. 15:13). ქეშემლებნანო არასრულყოფილ კათას მივაჸუნათ  იეჰოვაშ დო იესოშ მაგალითის ჸოროფაშ გიმორჩქინას? ქო! გუვარჩუათ, მუჭო რე თენა შეიოლებერი.

პავლექ ჭარ: „მიაჸუნით ღორონთიშ მაგალითის, მუჭოთ საჸოროფო სქუალეფქ დო გილართით ჸოროფათ, მუჭოთ ქრისტექ გიჸოროფეს დო თქვანო მუშ დუდ გინოჩ ღორონც“ (ეფეს. 5:1, 2). ყოროფათ თიმწკუმა გილურთ, მუჟამსით თე თვისებას ჩქინ ცხოვრებას ირიათო გიმიფრჩქინანთ. ჩქი თეცალ ჸოროფას ხვალე სიტყვეფით ვარინ, საქმეეფით ხოლო ვოძირანთ. იოანექ ჭარ: „სქუალეფ, მიჸორდან ართიან სიტყვათ დო ნინათ ვარინ, საქმეთ დო ჭეშმარიტებათ“ (1 იოან. 3:18). მაგალთო, „სახიოლო ამბეს სამეფოშ გურშენ“ ფქადაქენთ თიშენ, ნამდა მიჸორა იეჰოვა დო ადამიანეფი (მათ. 24:14; ლუკ. 10:27). ჸოროფათ თიმ დროს ხოლო გილურთ, მუჟამსით იფთვინენთ, ჯგირს უკეთენთ შხვეფს დო ვპატიენთ. ათეშენ ბიბლია ელამჩანა: „მუჭოთ იეჰოვაქ გაპატის მთელ გურითინ, თეშ თქვა ხოლო ქაპატით ართიანს“ (კოლ. 3:13).

ნამდვილ ჸოროფა გურმეჭვიობას ვა ნიშნენს. მაგალთო, მუჟამსით ბაღანა ინგარსინ, დარჩქალებერო გურმეჭვია მშობელქ შილებე თის არძა კაპრიზ გოუჸონას. მარა მშობელს, ნამუსით სქუ ნამდვილო უჸორსინ, საჭირო დროს პრინციპულობას გიმირჩქინანს. თეგვარო, მართალ რე ღორონთ ჸოროფა რე, მარა იეჰოვა, მით უჸორს თინეფს ასაჯენს (ებრ. 12:6). ჸოროფათ გილულა თის ხოლო ნიშნენს, ნამდა საჭირო დროს დასაჯებაშე ხოლო დუდ ვეშებკინათ (იგავ. 3:11, 12). ოკო ფშუდან, ნამდა ცოდვილეფ ვორეთინ თიშენ, ხშირას ვეგმმახანტენა ჸოროფა. ათეშენ მოსაჭირნა შხვადოშხვა კუნთხუთ ჸოროფაშ გაუჯგუშება. მუჭო შემლებნა თეშ კეთება? მორთ, გუვარჩუათ თეშ სუმ საშვალება.

პირველი: ღორონც ქოფთხუათ ოკო წმინდა შური, ნამუთ ავითარენს ჸოროფას. იესოქ თქუ, ნამდა იეჰოვა „ქიმეჩანს წმინდა შურს თინეფს, მიდგა ითხინს“ (ლუკ. 11:13). ქობლოცულენთ წმინდა შურიშ მიოღებელო დო ირფელს ქუვორთუთ, თიქ ჩქინწკუმა ქიმოქმედას-და, ჩქინ საქმეეფს ჸოროფა ხოლო უმოსო იძირედას იჸი (გალ. 5:16). მაგალთო, უხუცესო ქომსახურენთ-და, შეილებნა წმინდა შურ ქოთხუათ ღორონც, ნამდა შხვეფს ჸოროფათ ქიმეჩათ ბიბლიურ რჩევეფი. მშობელ ქორეთ-და, ქოთხით ღორონც წმინდა შურ, ნამდა ქიმგეხვარან ჸოროფათ მორდათ ბაღანეფი.

მაჟია: დეფიფქრათ, მუჭო ოძირანდ იესო ჸოროფას თი დროს ხოლო, მუჟამსით გლახათ ოქცუდეს (1 პეტ. 2:21, 23). არძაშ უმოსო შილებე ქრისტეშ მაგალითშე დაფიქრებაქ თი დროს დემესაჭირან, მუჟამსით მოწყინებაფუანა ვარდა უსამართოთ მოქცუნა. თე დროს ჯგირ იჸუაფ ქოპკითხათ ჩქინ დუც: „მუჭო მიქციებუდ იესო თეცალ სიტუაციას?“. ართ დას თე კითხვაშე ფიქრიქ მეხვარ, სწორაშე მიქცუკო. თინა იჩიებ: «ართშა ართ თანამშრომელქ შხვა თანამშრომლეფს ჩქიმ გურშენ გლახა მუდგარენ ქიმეჭარ იმეილით. თექ მანგარო მეწყინ. მარა ჩქიმ დუც პკითხი: „მუჭო შემლებ მივაჸუნე იესოშ მაგალითის თეცალ დროს?“. თეშ უკულ გეგნობჭყვიდ ყურადღება ვემვაქციკო დო თეშ ქუდომტებუდკო ირფელ. უმოს გვიანო ქიგებგ, ნამდა თის ჯანმრთელობაშ სერიოზულ პრობლემა ნოღვე დო მანგარ სტრესიშ თუდო ჸოფე. საბოლათ თი აზრიშა ქიმეფრთ, ნამდა თინა სინამდვილეს შილებე შურო ვა ფიქრენდკო თეშ, მუჭოთ თი წერილს ჭარუნდ. თიშე დაფიქრება, მუჭო გიმირჩქინანდ იესო ჸოროფას თი დროს ხოლო, მუჟამსით გლახათ ოქცუდესინ, მიმეხვარ მა ხოლო ჸოროფათ მივექციკო ჩქიმ თანამშრომელს». თაშ ნამდა, იესოშ მაგალითის ქიმვაჸუნუთ-და, ჩქინ საქმეეფშე ირიათო ჸოროფა იძირედას იჸი.

მასმა: გავითარით დუდგინოდვალირ ჸოროფა, ნამდგათ ჭეშმარიტ ქრისტიანეფ გიშეგორნა შხვეფშე (იოან. 13:34, 35). ბიბლია მირაგადნა მიღდან თიცალ აზროვნება, მუნერით იესოს უღუდ. ჩქინ გურშენ თიქ ზეცა ქიდიტუ, „ირფელშე ვარია ქოთქუ“ დო სიცოცხლე  ხოლო დათმ (ფილ. 2:5—8). მუჟამსით თიშ მაგალითის მეპჸუნთინ, ჩქინ აზროვნება უმოსო აგურუ ქრისტეშ აზროვნებას დო შემალებედან იჸი შხვეფ გივორინუათ ჩქინ დუდიშ ოწოხლე. ხოლო მუ ჯგირობუა მოუღ თეცალ ჸოროფაშ გავითარებას?

ჸოროფაშ გიმორჩქინას ბრელ ჯგირობუა მოუღ. მორთ დეფიფქრათ ჟირ მაგალითშე:

• მსოფლიო საჯიმალო: ჩქი ართმაჟიაშ ჸოროფა მიღნა, თეშ გურშენ მიჩქნა, ნამდა მსოფლიოშ ნამდგა კრებაშა ვემეფრთათინ, და დო ჯიმალეფ ჯგირო მემღენა. მართალო, მუშმადიდა ხვამა რე, ნამდა მსოფლიო საჯიმალოს ვუჸორთ! (1 პეტ. 5:9). შხვადო სო ძირუნთ თეცალ ჸოროფას?

• მშვიდობა: ჸოროფას დო მოთვინებას გეგმიფრჩქინანთ-და, მაღვენუნა მშვიდობა დო ართობა (ეფეს. 4:2, 3). თეცალ მშვიდობა მიღნა კრებაშ შეხვალამეფს დო კონგრესეფს. ვათანხმუთო, ნამდა თე გორთილ ქიანას თეცალ მშვიდობა ხვალე ღორონთიშ ხალხის უღუ?! (ფსალმ. 119:165; ეს. 54:13). შხვეფწკუმა მშვიდობაშ გორუათ ვოძირანთ, ნამდა მიჸორა თინეფ, მით მოწონს ჩქინ ზეციერ მუმას (ფსალმ. 133:1—3; მათ. 5:9).

პავლექ ჭარ: „ჸოროფა აშენენს“ (1 კორ. 8:1). მუჭო რე თენა შეიოლებერ? 1 კორინთელეფიშ მა-13 დუც, ნამუსით „ჸოროფაშ ფსალმუნს“ უძახნან, მოციქულ ენწყუნს, მუჭო აშენენს ჸოროფა. ჸოროფა მუშ დუდიშ წოხოლე შხვეფს გიორინუანს დო ჯგირიშ კეთებაშ საშვალებეფს გორუნს (1 კორ. 10:24; 13:5). თეს გეძინელ ჸოროფა ყურადღებიან დო მომთმენ რე, შხვაშე ფიქრენს დო ჯგირს უკეთენს, ათეშგურშენ თინა ოჯახეფს აშენენს დო კრებეფს აართენს (კოლ. 3:14).

არძაშე უმოს მნიშვნელოვან თინა რე, ნამდა მიჸორა ღორონთი. თეცალ ჸოროფა აკმოშაყარანს არძა რჯულიშ დო ნინაშ ხალხის დო ოხვარ „ართიანიშ ხუჯიშ ელარნელო ემსახურან“ იეჰოვას (სოფ. 3:9). მორთ, გინოჭყვიდილ მაფდან ირდღას გეგმიფრჩქინათ ღორონთიშ წმინდა შურიშ თე ძვირფას ნაყოფი.