„მამა“, „ბიძია“, ბეთელს ახალგაზრდეფ ხშირას თაშ მიძახნა. მა 89 წანერ ვორექ დო მანგარო მოსიამოვნჷ თენა. თე ირფელ თი კურთხევაშ ნაწილ რე, ნამუთ იეჰოვაქ 72 წანას სრულ დროთ მსახურებაშ გურშენ მუჩჷ. ღორონთიშ მსახურებას მეღებულ გამოცდილებათ ახალგაზრდეფს მთელ გურით შემლებ ვუწუე, ნამდა კურთხევეფს თი შემთხვევას მიღენა, მუჟამსით იმენდის ვადინუანა (2 მატ. 15:7).

ჩქიმ მშობლეფქ უკრაინაშე კანადაშა გინორთეს ოცხოვრებშა. თინეფქ მანიტობაშ პროვინციას, ქალაქ როსბერნის ქიდიხორეს. ჩქიმ მშობლეფს 8 ძღაბ დო 8 ბოშ ჸუნდეს; მა, მა-14 ვორდჷ. მუაჩქიმს ბიბლიაშ კითხირ უჸორდ დო ირ ჟეშხა ოჭმარეს მიკითხანდეს, მარა თინა ფიქრენდჷ, ნამდა რელიგიურ ლიდერეფს ხალხიშ ჯგირობუაშ უმოსო, ფარაშ კეთება ოინტერესდეს. ათეშენ ხშირას ციგანენდჷ: „მოინტერეს აკა, მუსხის უგანდეს იესოს ქადაქებაშე?“.

ჩქიმ ოთხ ჯიმაქ დო ოთხ დაქ ხეთეშე მიღეს ჭეშმარიტება. ჩქიმ და როუზი მთელ ცხოვრებას პიონერო მსახურენდჷ. მუშ სიცოცხლეშ ბოლო დღალეფს თინა გურშა ელუკინანდჷ არძას, მიდგას ღორონთიშ სიტყვა ოინტერესუდ დო ურაგადუდ: „მოკო ახალ ქვეყნიერებას ქორძირე“. ჩქიმ უნჩაშ ჯიმა ტედი ჯოჯოხეთიშ გურშენ ქადაქენდჷ. ირ ჟეშხა ოჭმარეს თინა რადიოთ გიშმეშ დო მარჩქილეფს ურაგადუდ, ნამდა არძა მით ცოდენსინ, ჯოჯოხეთიშ დაჩხირს მარადიულო დიჭუდ. მარა უმოს გვიანო, თიქ ქიგეგ ჭეშმარიტება დო ართგურო ომსახურუდ იეჰოვას.

1944 წანაშ ივანობას, ართ დღას სკოლაშე ჸუჩა ქუმოფრთინ, სტოლს ბუკლეტ ქობძირ სათაურით „ქვეყნიერებაშ გაუჯგუშება ხოლოს რე“. * დიო პირველ გვერდ წეპკითხ, უკულ მაჟია, მასმა დო კითხირქ ვემმატებუ. მუჟამსით ბუკლეტიშ კითხირ გუვათენ, გეგნოპჭყვიდ, იეჰოვას თეშ ვემსახურკო, მუჭოთ იესო ომსახურუდ.

მუჭო მოხვად ჩქიმ სტოლს თე ბუკლეტიქ? ჩქიმ უნჩაშ ჯიმა სტივქ მიწუ, ნამდა ჩქინ ჸუდეწკუმა ჟირ კოჩ წიგნეფს დო ბუკლეტეფს გიმოჩანდჷ. თიქ თქუ: „ხუთ ცენტ ღირუდ, ათეშენ ართ ცალ ქიპჸიდ“. წიგნეფიშ გიმმაჩამალეფქ მაჟია ჟეშხას დირთეს. თინეფქ მიწუეს, ნამდა იეჰოვაშ მოწმეეფ რდეს დო ბიბლიაშე პასუხენდეს თი კითხვეფს,  ნამუთ ხალხის აწუხენდჷ. ჩქი მანგარო ვაფასენდით თეს, მუშენდა მშობლეფქ მოგურუეს, დამფასებდესკო ღორონთიშ სიტყვა. თეს გეძინელ, თინეფქ მიწუეს, ნამდა უინპენგის, სოდეთ ჩქიმ და ელსი ცხოვრენდუნ, მალას იეჰოვაშ მოწმეეფიშ კონგრეს იჸუაფუდ დო გეგნოპჭყვიდ თე კონგრესის დევესწრიკო.

უინპენგშა, ნამუთ 320 კილომეტრიშ მაშორას რდუ, ჩქიმ ველისპეტით მიდაფრთ. მარა შარას კელვუდის გაფჩენდჷ, სოდეთ თი იეჰოვაშ მოწმეეფ ცხოვრენდეს, მიდგაქ ჸუდეშა მუმაკითხუ. მუჟამსით თინეფწკუმა ვორდინ, კრებაშ შეხვალამეფს დევესწრჷ დო ქობძირ, მუჭო იტარებუდ თინა. თეს გეძინელ, ქიგებგ, ნამდა არძაქ იესოცალო კარდოკარ ოკო იმსახურკო.

უინპენგის ჩქიმ უნჩაშ ჯიმას, ჯეკის ქეშეფხვად, ნამუთიქ კონგრესიშ დასწრებშა ჩრდილოეთ ონტარიოშე მორთ. კონგრესიშ პირველ დღას ჯიმაქ გეგმაცხად, ნამდა ნათლობა იჸუაფუდ. ჯეკიქ დო მა გეგნოპჭყვიდით თე კონგრესის დიმნათითკო. ჟირხოლოს გინოჭყვიდილ მაფდეს, ნათუაშ უკულ ხეთეშე პიონერო მსახურება ქიდიბჭყითკო. ჯეკიქ კონგრესიშ თებაშ უკულ, ხეთეშე ქიდიჭყ სრულ დროთ მსახურება. მა 16 წანერ ვორდ, ათეშენ სკოლას გურაფა ოკო გუვაგრძელკო, მარა უკულიან წანას ქიდიბჭყჷ პიონერო მსახურება.

სტენ ნიკოლსონწკუმა ართო სოურისის, მანიტობაშ პროვინციას ქიდიპჭყჷ პიონერო მსახურება. ჭიჭე ხანშა ქიმეფხვად, ნამდა პიონერო მსახურება გვალო ადვილ ვა რდუ. ფარა ჭიჭე-ჭიჭეთ მეთებდეს, მარა ქადაქება ვემემტებნა. ართ დღას მსახურებაშე ჸუჩა შქირენულეფქ დიფრთით დო ფარა ხოლო ვა მიღუდეს. მანგარო მახიოლეს, მუჟამსით ჩქინ ჸუდეშ კარწკუმა ოჭკუმალით ეფშა ჩანთა ქობძირით. ვამქუდეს მიქ დოდვჷ თინა, მარა თიმ სერს მეფურ ოჭკუმალს ბჭკომუნდით. დასურო ჯგირ შედეგიქ მაჸუნ თის, ნამდა ვემემტებნა ქადაქება. თუთაშ ბოლოს მანგარო მიბძინ; თეშ მაფშხვა დღას ვა პჸოფექ.

მუსხირენ თუთაშ უკულ ქალაქ გილბერტ პლაინსის დუმანიშნეს, ნამუთ სოურისიშ ჩრდილოეთით 240 კილომეტრიშ მაშორას რდუ. თი პერიოდის კრებას ირ თუთაშ მსახურებაშ გეგმა მაფდეს გიმოჭარილ. მუჟამსით მაქადაქებელეფს ართ თუთაშ მსახურებაქ ქინუოლესინ, მოხსენებაშ დროს ხაზ გუსვი, ნამდა და დო ჯიმალეფს უმოს მეტ ყურადღება ქიმუქციებდესკო თეშა. კრებაშ შეხვალამაშ უკულ ართ ხანშა მიშულირ დაქ, ნამუშ ქომონჯ იეჰოვაშ მოწმე ვა რდუნ, ინგარდუნ თეშ ქუმორთ ჩქიმდა დო მიწუ: „ქივეცად, მარა თეშ მეტიქ ვა მაკეთებუ“. ასე მა მიღუდ ონგარალო საქმე, ათეშენ თის ბოდიშ ვუწი.

მუჭოთ ჩქიმ შემთხვევას რდუნ, ახალგაზრდა ენერგიულ ჯიმალეფ ადვილო უშვენა თეცალ შეცდომეფს დო ხშირას გურ უტირხნა თეშ გურშენ. მარა ჩქიმ დუდშა გიმოფცად, ნამდა საქმეშა დუდიშ დანებებას უჯგჷ, ჩქიმ შეცდომაშე დიბგურუე დო დღას ვეგიპჭყოლიდუე თე გაკვეთილ. ართგურო მსახურებას აუცილებერო მაჸუნუ კურთხევეფი.

მა მიღუდ თიშ პატი, ნამდა 1950 წანაშ ფრევალიშ თუთას გალაადიშ სკოლაშ მა-14 კლასი გემკომრთუმუდკო. თიმწკუმა 21 წანერ ვორდჷ. კლასიშ სტუდენტეფიშ უმენტაშ კანადაშა, კვებეკიშ პროვინციაშა გუტეს, სოდეთ ფრანგულო იჩიებდეს. თექ იეჰოვაშ მოწმეეფს თხოზუდეს. მა ქალაქ ვალდორს დაბნიშნეს, ნამუთ ოქროშ მოპოვებათ რდუ ჩინებულ. ართ დღას ჯგუფურო მიდაფრთით ოქადაქეფშა სოფელ ვალ-სენვილშა, ნამუთ გოხოლუას რდუ. ადგილობრივ მღვდელქ დუმორცქინეს, ნამდა სოფელს ვედიპტენდით-და, გობლახუნდეს. საქმექ თეშ მიდართ, ნამდა თე მღვდელიშ ნათქუელ სასამართლოშა გემშებღჷ დო თინა დაჯარიმეს. *

თეცალ შემთხვევეფ ხშირას მოხვადუდ კვებეკის. კვებეკიშ პროვინციას 300 წანაშე მეტ ხანს რომიშ კათოლიკურ ეკლესია აკონტროლენდჷ. მღვდელეფ დო პოლიტიკოსეფ თხოზუდეს იეჰოვაშ მოწმეეფს. დასურო რთულ დრო რდუ დო ბრელ ხოლო ვა ვორდით, მარა იშენით ვაგრძელენდით  მსახურებას. საბედნეროთ, რდეს თიცალ კათა, მიდგას შურდოგურით ოინტერესუდ ჭეშმარიტება. მიღუდ თიშ პატი, მუსხირენ პიროვნებას ვოგურეკო ბიბლია, მიდგაქ საბოლათ იეჰოვაშ მოწმეეფო გინირთეს. ართ-ართ ბიბლიაშ გურაფას ვატარენდ ართ ოჯახწკუმა, ნამუთ 10 წევრშე შითმოდირთუდ. მთელ ოჯახიქ იეჰოვაშ მსახურება ქიდიჭყჷ. თინეფიშ გაბედულ საქციელქ შხვეფს ხოლო ქიმეჩ გამბედაობა, ქიდიტესკო კათოლიკურ ეკლესია. ჩქი ვემემტებნა ქადაქება დო საბოლათ მიბგით თე საქმე!

1956 წანას ჰაიტის ქუდმანიშნეს. ბრელ ახალ მისიონერს უჭირდ ფრანგულო ჩიება, მარა ხალხი იშენით ირჩქილუაფუდ. ართ მისიონერი სტენლი ბოგესიქ თქუ: „გაკვირვებულ ვორდით, მუშენდა ხალხი ირნერო ოცადუდ, ქიმმეხვარესკო მუნეფწკუმა ჩიებას“. კვებეკის თიშ საშვალება მიღუდ, ქიდიბგურეკო ფრანგული. მარა ჭიჭე ხანშა ქიმეფხვად, ნამდა ადგილობრივ ჯიმალეფიშ უმენტაშ ხვალე ჰაიტიშ კრეოლი ნინაშა რაგადანდჷ. თაშ ნამდა, ჩქინ დავალება უმოს ეფექტურო შევასრულითკონ, ადგილობრივ ნინა მაფდეს დაგურაფალ. ჩქი თაშ ქიმიფქცით დო ჩქინ მონდომას კურთხევეფქ ქუმაჸუნ.

ჯიმალეფს ქიმვეხვარითკონ თიშენ, ხემძღვანელ საბჭოქ ქომჩეს ნება, გეგნოფთარგმნითკო „გინაჯინალ კოშკი“ დო შხვა პუბლიკაციეფ ჰაიტიშ კრეოლი ნინაშა. მთელ ქიანას კრებაშ დამწსრეეფიშ რიცხვი იძინანდჷ. 1950 წანაშო ჰაიტის 99 მაუწყებელ რდუ, მარა 1960 წანას მაუწყებელეფიშ რიცხვიქ 800-ის მიკაჩირთ. თე დროშო, მა ბეთელს დუმანიშნეს. 1961 წანას მიღუდ თიშ პატი, ჩამტარებუდკო სამეფო მსახურებაშ სკოლა, ნამუთ 40 კრებაშ უხუცესიქ დო სპეციალურ პიონერქ მიკორთ. 1962 წანაშ იანარს ჩატარებულ კონგრესის ჩქი ადგილობრვ ჯიმალეფს ელვუჩით, გაფართოესკო მუნეფიშ მსახურება დო მუსხირენ ჯიმაქ სპეციალურ პიონერო დენიშნჷ. თენა დასურო დროულ რდუ, მუშენდა ბრელ ხანს ვემკურთუმუნ თეშ, წინააღმდეგობაქ ქიდიჭყჷ.

1962 წანაშ 23 იანარს კონგრესიშ უკულ, მა დო ენდრიუ დამეკო ფილიალს ვორდითინ თეშ ოპჭოფეს დო 1962 წანაშ 8 იანარიშ ჟურნალიშ  „გეგშაკურცხით!“ (ფრანგულ ნინაშა) მარაგ მიდამღეს. ჟურნალს „გეგშაკურცხით“ მოჸუნაფილ რდუ ფრანგულ გაზეთეფშე ციტატა, ნამდა ჰაიტის გავრცელებურ რდუ სპირიტიზმი (ვუდუიზმი). თექ ვემეწონ ნამთინე პიროვნებას დო თინეფ ამტკიცენდეს, ნამდა თე სტატია ჩქი ბჭარით ფილიალს. მუსხირენ მარაშა მისიონერეფს დეპორტაცია გაუკეთეს. * მარა სკოლა მიკნაულა ადგილობრივ ჯიმალეფ საქმეს ჯგირო ასრულენდეს. ამდღა თინეფწკუმა ართო მა ხოლო ბედნერ ვორექ, თინეფიშ გიმორჩქინელ მოთვინებაშ დო სულიერ წიმიულაშ გურშენ. თინეფს ასე ჰაიტი კრეოლი ნინაშა „ახალ ქიანაშ თარგმანი“ უღნა, ნამუთ ართ დროს არძაშო ოცნება რდუ.

ჰაიტიშ უკულ, მისიონერო დაბნიშნეს ცენტრალურ აფრიკას. უმოს გვიანო თაქ გილმალ ზედამხედველო ვმსახურენდჷ დო უკულ ფილიალიშ ზედამხედველო.

თიმ დროს ბრელ სამეფო დარბაზ ორემონტებელ რდუ. ქიდიბგურე ნაცალაშ შაყარუა და თით ორთვალიშ გინორთუალა. მიკმალ-მუკმალშო ჩქიმ წვალებაშ ძირაფა მანგარ ოძიცე რდუ. თექ შხვა ჯიმალეფს ხოლო გინაჭყიდრაფუ, ნამდა უმოსო მეუღებდესკო მონაწილება მუნეფიშ სამეფო დარბაზეფიშ შენებაშ დო გინოკეთებას. რელიგიურ წინამძღოლეფ გიმაძიცანდეს, მუშენდა მუნეფიშ ეკლესიეფს ჟეშტიშ ორთვალეფ უღუდ, ჩქინ სამეფო დარბაზეფს — ნაცალაშ. მარა ჩქი იშენით ვაგრძელენდით სამეფო დარბაზეფიშ ნაცალათ გინორთუალას. გეძიცაქ მეჭყორდჷ, მუჟამსით დედაქალაქ ბანგუის ქარ-ბორიაქ გინულუ. თიქ ჟეშტიშ ორთვალეფ გეგნოწყჷ ეკლესიეფს დო მთავარ ქუჩას დუდგიმე ქიდაფორჩჷ. ჩქინ სამეფო დარბაზეფს ნაცალაშ ორთვალეფს მუთუნ ვაღოლამ. სამეფოშ საქმეს უჯგუშო ქუხემძღვანელითკონ, ხუთ თუთაშა ახალ ფილიალიშ ოფის დო მისიონერეფიშ ჸუდე ავაშენით. *

1976 წანას ცენტრალურ აფრიკას ქადაქება აკრძალეს დო მა ჩადიშ დედაქალაქ ნჯამენას დაბნიშნეს. ართნერო ჯგირ იჸუ, მეშენდა გეფჩინებაფე ართ გურგედვალირ სპეციალურ პიონერ, ნამუთ კამერუნშე რდუ. მა დო ჰეფიქ 1978 წანაშ 1 აპრილს დეფქორწინით. თიმ თუთას სამოქალაქო ჩხუპიქ გეტირხჷ დო ჩქი ხოლო შხვეფწკუმა ართო ჩადიშ სამხრეთშა იმტით. ჩხუპიშ თებაშ უკულ კინ დიბრთით, მარა ჩქინ ჸუდე შეიარაღებულ ჯგუფიშ მთავარ შტაბო გინურთინუაფნა. ლიტერატურაწკუმა ართო ჩქიმ მეუღლეშ ქორწილიშ კაბა დო საჩუქრეფი ხოლო მიდუღალნა. ჩქი გურ ვეგიბტახით დო კინ გუვაგრძელით მსახურება.

ჟირ წანაშ უკულ ცენტრალურ აფრიკაშ რესპუბლიკას იეჰოვაშ მოწმეეფიშ თხოზინქ მეჭყორდჷ. ჩქი დიფრთით დო გილმალ მსახურება გუვაგრძელით. მონახულებეფშა ფურგონით გილეფშით, ნამდგას ოცხოვრებელო ხოლო გიმიბრინუანდით; თექ მიღდეს ეიოკიჩალ კრაოტ, 200 ლიტრიან წყარიშ ბაკი, მაცივარ დო გაზიშ ბალონი. მოგზაურობა ადვილ ვარ რდუ. ართშა არძაშ უნაკლებაშ პოლიციაშ 117 საკონტროლო პუნქტის გუმაჩერეს.

ტემპერატურა ხშირას 50 გრადუსშახ ეკიშ. კონგრესეფს მინშა მიჭირდეს ნათუაშო დასაბაღ წყარიშ შიბა. ათეშენ ჭიმალეფ გესქირაფილ მალწყარს დიხას ეშანთხორუნდეს დო თევრეშე ჭიჭე-ჭიჭე ბოჭკას ენაშაყარანდეს წყარს.

1980 წანას ჩქი ნიგერიაშა გომტეს. თექ ჟირ წანა დო გვერდის ახალ ფილიალიშ შენებას ვოხვარუდით. ჯიმალეფქ ქიჸიდეს ჟირსართულიან საწყობ, ნამუთ დოხუეს დო უკულ ფილიალიშ ოშენებელო გეგმირინუეს. ართ ოჭმარეს თე მაღალ შენობაშა გეშაფრთ, ნამდა ქიმვეხვარკო თიშ ხუალას. ონდღეშოთ, შენობაშე გიმიფშინ თეშ, ქექთვანთხჷ. ჩქიმ მდგომარეობა სერიოზულო იძირედ, მარა რენტდგენიშ გინოღალაშ დო გასინჯებაშ უკულ ექიმქ ჰეფის უწუ: „ვა გაშქურნას. ჯერღვეფ აფუ გინოზინდილ დო მუსხირენ მარაშა ჯგირო იჸუაფ“.

 1986 წანას კოტ-დ’ივუარს გუვაგრძელით გილმალ მსახურება. ჩქი მეზობელ ქიანას, ბურკინა ფასოს ხოლო ვმსახურენდით. თიმწკუმა დღას ვეფიფქრენდჷ, ნამდა წანეფიშ უკულ ბურკინა დროებით ჩქინ ჸუდეთ გინირთუდ.

კანადაშე 1956 წანას იბდჷ, მარა 2003 წანას, 47 წანაშ უკულ, კანადაშ ბეთელშა, ასე უკვე მეუღლეწკუმა ართო დიფრთჷ. საბუთეფით კანადელეფ ვორდით, მარა შურდოგურით — აფრიკელეფ.

2007 წანას, 79 წანერ ვორდინ თეშ, კინ აფრიკაშა დიფრთით. მა ბურკინა ფასოს კომიტეტიშ წევრო დაბნიშნეს. უმოს გვიანო თაქიან ოფის დაშორებულ მთარგმნელობით ოფისო გეგნაკეთეს, ნამდგას ბენინიშ ფილიალი ხემძღვანელენდჷ. 2013 წანაშ არგუსოს, ჩქი ბენინიშ ბეთელს დაბნიშნეს.

სუსტ ჯამრთელობაშ უმკუჯინუო, მსახურებას ამდღა ხოლო მთავარ ადგილ უკინებ ჩქიმ გურს. ულირ სუმ წანაშ დინახალე, უხუცესეფიშ დო ჩქიმ მოჸოროფე მეუღლეშ მოხვარათ მიღუდ თიშ ბედნერობა, ქობძირკო ჩქიმ დაინტერესებულეფიშ, გედეონიშ დო ფრეგისიშ ნათუა. ამდღა თინეფ მთელ მონდომათ ომსახურნა იეჰოვას.

დრო ხანიშ უკულ, მა დო ჩქიმ მეუღლე სამხრეთ აფრიკაშ ბეთელშა გომტუეს, სოდეთ ბეთელიშ ოჯახი ზრუნენს ჩქიმ ჯამრთელობაშე. სამხრეთ აფრიკა მაშკვითა ქიანა რე აფრიკას, სოდეთ მსახურებაშ პატი მიღუდ. 2017 წანაშ ოქტომბერს უორიკის (ნიუ-იორკი) მთავარ სამართველოშ მეძღვინუას დევესწრით, ნამუთ დიდ კურთხევა რდუ ჩქინო. თენა დასურო დღას ვაგმოჭყორდუნან ფერ მოვლენა რდუ!

1994 წანაშ „წელიწდეულს“ 255-ა გვერდის ჭარ: «არძას, მით წანეფ რე მსახურენსინ, მოვუწოდენთ: „გამბედაობა გეგმირჩქინით დო ხელეფს ვეგმუკუნათ, მუშენდა კურთხეულ იჸუაფ თქვან საქმე“» (2 მატ. 15:7). მა დო ჰეფის გინოჭყვიდილ მაფნა მივაჸუნათ თე სიტყვეფს დო შხვეფს ხოლო მივეხვარათ თეშ კეთებას.