1. მუჭო იძირე იეჰოვაშ ქმნილებეფშე, ნამდა თინა ხეგოფაჩილ ღორონთ რე?

მართალ რე სოიშა შემოქმედებით საქმიანობას დიჭყანდკო იეჰოვა ხვალე რდუ, მარა თინა ხვალე მუშ დუდშო ვა ფიქრენდჷ. თიქ სიცოცხლე აჩუქ გონიერ ქმნილებეფს, მუჭოთ ზეცას თეშ დედამიწას ხოლო. იეჰოვას, ბედნერ ღორონც უჸორს შხვეფშა ჯგირიშ კეთება (1 ტიმ. 1:11; იაკ. 1:17). თის ოკო ჩქი ხოლო ბედნერეფ ვორდათ დო ათეშენ, მოგურუანა ხეგოფაჩილობას (რომ. 1:20).

2, 3. ა) მუშენ მოუღ ჯგირიშ კეთებას ბედნერობა? ბ) მუს გუვარჩიენთ თე სტატიას?

² ღორონთიქ კოჩ მუშ ამნახანტო გარჩქინ (დაბ. 1:27). თენა თის ნიშნენს, ნამდა ჩქი შემლებნა მიღდან თიცალ თვისებეფ, მუნერით იეჰოვას უღჷ. ნამდვილო ბედნერეფ დო კმაყოფილეფ ქუვორდათინ, საჭირო რე იეჰოვაშ მაგალითის მივაჸუნათ თით, ნამდა შხვეფით დებინტერესათ დო ხეგოფაჩილობა გეგმიფრჩქინათ თინეფწკუმა (ფილ. 2:3, 4; იაკ. 1:5). მუშენ შემლებნა თეშ რაგად? შხვანერო ქოფთქუათინ, იეჰოვაქ ადამიანეფ თაშ შეფქმნეს. ჩქინ არასრულყოფილებაშ უმკუჯინუო, იშენით შემლებნა მივაჸუნათ ჩქინ გუმაჭყაფალიშ ხეგოფაჩილობაშ მაგალითის.

³ ბიბლია მოგურუანა, მუჭო შემლებნა ხეგოფაჩილობაშ გიმორჩქინა.  მორთ, გუვარჩუათ ნამთინე ბიბლიურ მაგალით, სოვრეშეთ თე საკითხიშ გურშენ ბრელ მუთუნს დიბგურუანთ. ქობძირუნთ, მუჭო მომღანა ხეგოფაჩილობაშ გიმორჩქინა ღორონთიშ მოწონებას. თეს გეძინელ, ქიგებგენთ, მუჭო მიმეხვარებნა თე თვისებაშ გავითარება, ღორონთშე დაკისრებულ პასუხიშმგებლობაშ შესრულებას. თეწკუმა ართო გუვარჩიენთ, მუ საერთო უღჷ ხეგოფაჩილობას ბედნერობაწკუმა დო მუშენ რე საჭირო ირიათო ვავითარენდათ თე თვისებას.

4, 5. ხეგოფაჩილობაშ მუ მაგალითის მარზენა იეჰოვა დო იესო ქრისტე?

⁴ იეჰოვას ოკო, ნამდა ადამიანეფქ მიაჸუნან თიშ მაგალითის, მუშენდა ხეგოფაჩილობაშ გიმორჩქინას ჩქინო ბედნერობა მოუღ (ეფეს. 5:1). მუშო ოკო რაგად, იეჰოვას ოკო ჩქი ბედნერეფ ვორდათ. თენა არგამათ იძირე, მუშენდა თიქ გასაკვირო გუმორჩქინეს, სქვამ პლანეტა ქუმაჩუქეს დო ირფელ ქომჩეს, ნამდა ცხოვრება ჩქინო სასიამოვნო რდას (ფსალმ. 104:24; 139:13—16). თაშ ნამდა, ჩქი პატის ფცენთ თის, მუჟამსით ვოცადუთ შხვეფს ჯგირ ვუკეთათ.

⁵ ქრისტიანეფ მეჸუნა იესოშ მაგალითის, ნამუთიქ სრულყოფილო მოძირეს, მუჭო შეულებ კოჩის ხეგოფაჩილობაშ გიმორჩქინა. თიქ თქუ: „კოჩიშ სქუაქ თიშენ მორთჷ, ნამდა შხვას მემსახურას დო ვართ ხოლო თიშენ, ნამდა მუს მემსახურან, დო შეწირას მუშ სიცოცხლე ბრელიშ გიშაჸიდირალო“ (მათ. 20:28). თეს გეძინელ, პავლე მოციქულქ ხოლო ელუჩ ქრისტიანეფს: „თიცალ აზროვნება გიღდან, მუნერით ქრისტე იესოს უღუდ . . . ირფელშე ვარია თქუ, მონაცალო გინირთ“ (ფილ. 2:5, 7). ჯგირ იჸუაფ, თითოულქ ჩქინ დუც ქოპკითხათ: შემლებუნო უმოს უჯგუშო მივაჸუნე იესოშ მაგალითის? (წეკითხით 1 პეტრე 2:21). *

6. მუ დიბგურეთ სამარიელიშ გურშენ იგავშე? (ქოძირით სურათ მა-18 გვერდის).

⁶ იეჰოვაშ მოწონას თიწკუმა მიბღენთ, მუჟამსით მივაჸუნუთ ქრისტეშ სრულყოფილ მაგალითის თით, ნამდა დებინტერესებუთ შხვეფიშ ჯგირობუათ დო თინეფიშ საჭიროებეფშე ქიბზრუნენთ. სამარიელიშ გურშენ იესოშ იგავშე ქიძირ, მუს ელჷ ქრისტე მუშ მიმაჸუნალეფშე. თის ოკო, ნამდა ქრისტიანეფქ შხვეფს მეხვარან დო ვემიაქცუან ყურადღება თინეფიშ ულირ ცხოვრებას ვარდა ეროვნებას (წეკითხით ლუკა 10:29—37). * ართ იუდეველ კოჩიქ იესოს კითხ: „მი რე ჩქიმ მოყვას?“. თეშ პასუხო ქრისტექ თის სამარიელიშ გურშენ იგავ ქუმუჸონ. იესოშ პასუხშე გეგმორჩქინდჷ, ნამდა ღორონთიშ მოწონაშ მეღება ქუმოკონან-და, იგავს მოშინაფილ სამარიელცალო ხეგოფაჩილობა ოკო გეგმიფრჩქინათ.

7. მუ კავშირ უღჷ ეგოიზმის დო ხეგოფაჩილობას საკამათო საკითხწკუმა?

⁷ ქრისტიანეფს ხეგოფაჩილობაშ გიმორჩქინაშ ბრელ მიზეზ უღნა. თე თვისება დაკავშირებულ რე საკამათო საკითხწკუმა, ნამუთ სატანაქ ედემიშ ბაღის წუმოჭკირ. მუშენ შემლებნა თეშ რაგად? სატანაქ თქუ, ნამდა ადამ დო ევა დო თინეფწკუმა ართო მთელ კაცობრიობა, უჯგუშო იცხოვრებუდ, მუჟამსით მთელ ყურადღებას მუნეფიშ დუდშა  გეგნიღანდეს დო ღორონთიშ მორჩილებაშ წოხოლე პირად ინტერესეფს ქიგიორნუანდეს. ევაქ ეგოიზმ გეგმირჩქინ დო მიკორინუ ღორონთცალო ჸოფედკო. ადამქ ხოლო თე თვისება ქაძირუ დო გინოჭყვიდ, ევაშ გურ მუგებუდკო (დაბ. 3:4—6). თინეფიშ საქციელიშ შედეგეფს ამდღა ხოლო ვორწყეთ. ეგოიზმის ბედნერობა ვა მოუღ. ხეგოფაჩილობაშ გიმორჩქინათ ვოძირანთ, ნამდა ვონდუთ ღორონც დო თიშ კანონეფ არძაშ უჯგუშ რე.

8. მუშენ ოკო უფიქრებუდკო პირველ წყვილს შხვეფიშ გურშენ?

⁸ ადამ დო ევა ედემიშ ბაღის ხვალე რდეს, მარა თინეფს იშენით ოკო უფიქრებდესკო შხვეფიშ გურშენ. მუშენ იფჩიებუთ თეს? იეჰოვაქ თინეფს დავალ, ეუფშაფდესკო დედამიწა დო სამოთხეთ გინურთინუაფდესკო თინა (დაბ. 1:28). ადამ დო ევა ოკო დაინტერესებედესკო თინეფიშ დიო დაბადებულ ვა რდუნ ფერ ბაღანეფიშ ჯგირობუათ თეშ, მუჭოთ იეჰოვა რდუ დაინტერესებულ მუშ გუნაჭყეფუშ ბედნერობათ. სამოთხექ მთელ დედამიწას ოკო იჸუკო დო ადამიშ გამნარყის ბედნრობა ოკო მოუღუკო. თე საქმეშო საჭირო იჸუაფუდ ადამიშ გამნარყიქ ართიანწკუმა ქითანამშრომლუკო.

9. მუშენ მოუღანდჷ ადამ დო ევას ბედნერობას დედამიწაშ სამოთხეთ გინორთინაფა?

⁹ სრულყოფილ კოჩ დო ოსურს იეჰოვაწკუმა ოკო უთანამშრომლებუდკო დო თეგვარო მთელ დედამიწა სამოთხეთ გინურთინუაფდესკო. თეშ კეთებათ თინეფ ღორონთიშ მოსვანჯაშა გემშიშეს (ებრ. 4:11). წერმიდგინით, მუჭომ დიდებულ საქმე იჸუაფუდ თენა! შხვეფიშ ჯგირობუათ დაინტერესება დიდ კურთხევას დო კმაყოფილებას მოუღანდჷ თინეფს.

10, 11. მუჭო შემლებნა შევასრულათ ქადაქებაშ დო მოწაფეეფიშ მომზადებაშ საქმე?

¹⁰ ამდღა იეჰოვა მუშ ხალხის ქადაქებაშ დო მოწაფეეფიშ მომზადებაშ საქმეს ავალენს. თე დავალება შევასრულათინ, შურდოგურით ოკო ვორდათ დაინტერესებულ შხვეფიშ ჯგირობუათ. ქადაქებაშ საქმეს ხვალე თი შემთხვევას გუვაგრძელენთ, მუჟამსით ღორონთიშ დო მოყვასიშ ჸოროფას გეგმიფრჩქინანთ.

¹¹ პირველ საუკუნეს პავლექ მუშ დუც დო ნამთინე ქრისტიანს „ღორონთიშ თანამშრომელეფ“ უწოდ თიშენ, ნამდა ჭეშმარიტებაშ თასუაშ დო მორწყუალაშ საქმეს ღებულენდეს მონაწილებას (1 კორ. 3:6, 9). ამდღა ხოლო შემლებნა ვორდათ „ღორონთიშ თანამშრომელეფ“ თით, ნამდა გურხვეთ მევუძღვინათ ჩქინ დრო, რესურსეფ დო ენერგია იეჰოვაშ დავალებურ ქადაქებაშ საქმეს. თენა დასურო დიდ პატი რე!

12, 13. მუ კურთხევეფ მოჸუნს მოწაფეეფიშ მომზადებაშ საქმეს?

¹² ქადაქებაშ საქმეშა დროშ დო ენერგიაშ მეძღვინებას დიდ ხიოლ მოუღ. ბრელს, მით შხვეფს ბიბლიას ოგურუანდუნ, მუშ დუდშა გიმუცადებ ხიოლ, მუთ ბიბლიაშ მაგურაფალეფიშ სულიერო წიმი ულას მოჸუნს. დიდ ბედნერობა მოჸუნს თიშ ძირაფას ხოლო, მუჟამსით ბიბლიაშ მაგურაფალეფ გებულენა ჭეშმარიტებას, უმოს რწმენას ავითარენა, თირანა  მუნეფიშ ცხოვრებას დო შხვეფს ურაგადნა, მუდგა დიგურეს. იესოს ხოლო მანგარო ახიოლ, მუჟამსით 70 მოწაფექ თიშა გახარებულქ დირთჷ, მუშენდა მსახურებას ჯგირ შედეგეფ უღდეს (ლუკ. 10:17—21).

¹³ მთელ მსოფლიოს მაქადაქებელეფს ოხიოლნა, მუჟამსით ორწყენა, მუჭო თირანს სახიოლო ამბე ხალხიშ ცხოვრებას. გუვარჩუათ ართ გათხილ ვარენ ფერ დაშ, ანაშ მაგალით, ნამუთიქ აღმოსავლეთ ევროპაშა გინორთ ოქადაქებშა, სოდეთ მაქადაქებელეფიშ საჭიროება რე. * თინა ჭარუნს: «თაქ ბიბლიაშ გურაფაშ დოჭყაფაშ ბრელ შესაძლებლობეფ რე დო თენა მანგარო მოპწონს. მსახურებას ჩქიმდა დიდ ხიოლ მოუღ. მუჟამსით ჸუჩა მეულინ, ჩქიმ დუდშე ქიფიფქრენ თიშ დრო ვა მიღჷ. თინეფიშ პრობლემეფიშ დო გაჭირებაშ გურშენ ფიფქრენქ, მიდგას ბიბლიას ვოგურუანქ. ვოცადუქ, ნამდა გურშა ელვუკინე თინეფს დო პრაქტიკულო მივეხვარე. მა დასურო ბჯერს, ნამდა „შხვაშა ჯგირიშ კეთებას უმოს მეტ ბედნერობა მოუღ, ვინემ მეღებას“» (საქ. 20:35).

14. მუჭო შეილებნა მიღათ ხიოლ თიშ უმკუჯინუო, ნამდა სახიოლო ამბეს შილებე ბრელქ ვა მურჩქილუას?

¹⁴ ბედნერობა თის ხოლო მოუღ, მუჟამსით ხალხის სახიოლო ამბეშ გაგებაშ საშვალებას ვარზენთ, თიშ უმკუჯინუო, ნამდა შილებე ვემირჩქილუან. თეს გეძინელ, ამდღა ჩქი ხოლო თიცალ დავალება მიღნა, მუნერით წინასწარმეტყველ ეზეკიელს უღუდ. იეჰოვაქ თის უწუ: „გეგნოჩ თინეფს ჩქიმ სიტყვეფ, ვა უღჷ მნიშვნელობა, ქიმირჩქილუანან დო ვარ“ (ეზეკ. 2:7; ეს. 43:10). თაშ ნამდა, თიმწკუმა ხოლო მუჟამსით ნამთინე კოჩ ჩქინ ქადაქებას ვა ურჩქილენ, იეჰოვა აფასენს ჩქინ შრომას (წეკითხით ებრაელები 6:10). * ართ მაუწყებელ თე საკითხის ჯგირ მაგალითის ირზენს. მუშ მსახურებაშ გურშენ თიქ ჭარ: „ჩქი დოფთასით, ქიბზრუნით დო ქიბლოცით თიშ იმენდით, ნამდა იეჰოვა მორდუნს“ (1 კორ. 3:6).

15. ქაფასენს დო ვარ ბრელ ხეგოფაჩილობაშ გიმორჩქინას დო მუშენ ოკო ვემოქმედას თექ ჩქინწკუმა?

¹⁵ იესოს ოკო ხეგოფაჩილობა გეგმიფრჩქინათ, მუშენდა თენა ბედნერობას მომღანა. ბრელ კოჩ აფასენს ხეგოფაჩილობას. თიქ ელამჩეს: „ხეშე გეგწიშკვით დო ქუმგაჩამნა. ლუბაშა ქენოირღვანა ჯგირ საწყაოს,  ინოტაბაკელს დო ბოლოშა გოფშას. მუსხის მეჩანთინ თისხი მუგაჩამნა“ (ლუკ. 6:38). მუშო ოკო რაგად, ხეგოფაჩილობაშ გურშენ არძა ვეგმოხანტუნს მარდულობას. მარა მუჟამსით თინეფ მარდულეფ რენან, შხვეფწკუმა ხოლო გიმირჩქინანა თე თვისებეფს. თაშ ნამდა, გაგრძელით შხვეფშა ჯგირიშ კეთება, ვა უღჷ მნიშვნელობა დაფასენან დო ვარ თეს. დღას ვამჩქუნა მუ ჯგირობუა მაჸუნუ აკაბცხა ხეგოფაჩილობაშ გიმორჩქინას ხოლო.

16. მუშენ ოკო ვუკეთათ შხვეფს ჯგირ?

¹⁶ ხეგოფაჩილ კათა შხვეფს ჯგირობუას მანგიორშა ვაურთნა. იესოქ თქუ: „მუჟამსით სუფრას გაკეთენქინ, ქუდაპატიჟ ღარიბეფ, დახუნკებულეფ, ქულეფ, თოლს ვარწყენან ფერეფ დო ბედნერ იჸუაფუქ, მუშენდა თინეფს მუთუნ ვა უღნა, ნამდა გეგნოიგან“ (ლუკ. 14:13, 14). ბიბლია იჩიებ: „კეთილ თოლიშ კოჩი კურთხეულ იჸუაფ“. ბიბლიას თეცალ სიტყვეფ ხოლო ჭარ: „ბედნერ რე თინა, მით ყურადღებას აქციენს გაჭირებულს“ (იგავ. 22:9; ფსალმ. 41:1). ნამდვილო, ჩქი თაშ ოკო მიფქცუათ, მუშენდა შხვეფიშ მოხვარა ბედნერობას მომღანა.

17. მუჭო შემლებნა ხეგოფაჩილობაშ გიმორჩქინა?

¹⁷ პავლექ გემეორ იესოშ სიტყვეფ: „შხვაშა ჯგირიშ კეთებას უმოს მეტ ბედნერობა მოუღ, ვინემ მეღებას“. თინა შხვეფშა ჯგირიშ კეთებას ხვალე მატერიალურ მოხვარას ვარინ, გურშა ელაკინას, ხემძღვანელობას დო ელარნას ხოლო გულისხმენდჷ (საქ. 20:31—35). მოციქულქ სიტყვათ დო საქმეთ, ქუმოძირეს, მუხსხით მნიშვნელოვან რე ჩქინ დრო, ენერგია, ყურადღება დო ჸოროფა ვემვარკათ თინეფს, მიდგას ოსაჭირ მოხვარა.

18. მუ დასკვნაშა მერთ ბრელ მეცნიერქ ხეგოფაჩილობაშ გურშენ?

¹⁸ მეცნიერეფ, მით ხალხიშ ქცევეფს ირკვიენან, იჩიებნა, ნამდა შხვეფშა ჯგირიშ კეთებას ბედნერობა მოუღ. ართ სტატიას ჭარუდ, ნამდა თინეფ, მით შხვეფს ჯგირს უკეთენდესინ, დუც ბედნერო გინაფლენდეს. მეცნიერეფიშ აზრით, შხვეფშა ჯგირიშ კეთება ჩქინ ცხოვრებას უმოს აზრიანო გინმართინუანს. თაშ ნამდა, ნამთინე ექსპერტი ხალხის ელუჩანს, მოხალისეთ იმუშუან, მუშენდა თენა ჯგირ რე ჯანმრთელობაშო. თენა ვა რე ჩქინო გასაკვირ, მუშენდა ჩქინ მოჸოროფე გუმაჭყაფალ იეჰოვა, ირიათო მირაგადნა, ნამდა შხვეფშა ჯგირიშ კეთება ბედნერობას მომღანა (2 ტიმ. 3:16, 17).

19, 20. მუშენ გოკონა რდათ ხეგოფაჩილეფ?

¹⁹ ამდღა ადვილ ვა რე ხეგოფაჩილობაშ გიმორჩქინა, მუშენდა ჩქი თიცალ კათაწკუმა ფცხოვრენთ, მიდგას შხვეფიშ წოხოლე მუნეფიშ ინტერესეფ გეურე. მარა იესოქ ყურადღება გამახვილ ჟირ არძაშ უდიდაშ მცნებაშა — მიჸორდან იეჰოვა მთელ გურით, შურით, გონებათ დო ძალათ დო მიჸორდან მოყვასი ჩქინ დუდცალო (მარ. 12:28—31). თე სტატიაშე ქობძირით, ნამდა მიდგას იეჰოვა უჸორს, თიშ მაგალითის მეჸუნს. იეჰოვა დო იესო ხეგოფაჩილეფ რენა დო ოკონა, მივაჸუნათ თინეფიშ მაგალითის, მუშენდა თენა ნამდვილ ბედნერობას მომღანა. ჩქი ოკო ვეცადათ გეგმიფრჩქინათ ხეგოფაჩილობა ღორონთიშ საქმეს დო შხვეფწკუმა ხოლო. თეგვარო, განვადიდენთ იეჰოვას დო ჯგირობუას მუღანთ მუჭოთ ჩქინ დუც თეშ, შხვეფს ხოლო.

²⁰ მუშო ოკო რაგად, თქვა ირნერო ოცადუთ ქიმეხვარათ შხვეფს, განსაკუთრებულო თანაქრისტიანეფს (გალ. 6:10). თაშ გაგრძელენთ-და, ხალხი ჸოროფას დო მარდულობას გეგმირჩქინანს, მუთ ბედნერობას მოიღანა. იგავეფიშ 11:25-ის ჭარ: „ხეგოფაჩილ კოჩ გიმორძღელ იჸუაფ დო თის, მით შხვას წყარს ხვეიანო არზენსინ, მუს ხოლო ხვეიანო აღვენუ წყარ ოშუმალო“. მუშო ოკო რაგად, ჩქინ ცხოვრებას დო მსახურებას შურდოგურით ჯგირიშ კეთება შხვადოშხვანერ საშვალებათ შემლებნა. თეშ უკულიან სტატიას გუვარჩიენთ მუსხირენ საშვალებას დო მხარეს, სოდეთ შემლებნა ხეგოფაჩილობაშ გიმორჩქინა.