თეს გეძინელ, თე ხელშეკრულებათ ჩემეყალიბ ახალ ორგანიზაციაქ, ნამდგას „ერთა ლიგა“ ჯოხოდ. თე ორგანიზაციაშ მიზან რდუ მთელ მსოფლიოს ქიმიოჭირინუესკო მუჭოთ ართობას თეშ, მშვიდობა დო უსაფრთხოებას ხოლო. ქრისტიანულ სამყაროშ ბრელ რელიგია ხუჯის უკინენდჷ თე ორგანიზაციას. ართ- ართ ორგანიზაციაქ, „ქრისტეშ ეკლესიეფიშ ფედერალურ საბჭოქ ამერიკას“, ხუჯ ქუდუკინ „ერთა ლიგას“ დო თეცალ განცხადება აკეთ: „თენა პოლიტიკურ ორგანიზაცია რე, ნამუთ ღორონთიშ სამეფოშ წარმოადგინენს დედამიწას“. თინეფქ მუნეფიშ წარმომადგენლეფ მიდაშქვეს „პარიზიშ მშვიდობაშ კონფერენციაშა“. ართ-ართ წარმომადგენელქ თქუ, ნამდა თე კონფერენციათ მსოფლიოს ახალ ეტაპი ქიდიჭყაფუდ.

ახალ ეტაპი მართალო ქიდიჭყაფუდ, მარა თენა ვაკეთებედეს თი პიროვნებეფს, მით მშვიდობაშ კონფერენციას მონაწილენდეს. 1919 წანას, ახალ ეტაპიქ ქიდიჭყჷ ქადაგებაშ საქმეს, მუჟამსით იეჰოვაქ მუშ მსახურეფს ქიმეჩ ძალეფ, ნამდა თიშე ბრელით უმოს იქადაგესკო ვინემ ულირს ქადაგენდეს. მარა სოიშახ ბიბლიაშ მარკვიებელეფ თეს აკეთენდესკო, დიდ ცვლილებეფქ ოკო მოხვადკო.

ბიბლიაშ დო ტრაქტატეფიშ საზოგადოება „გინაჯინალ კოშკიშ“ დირექტორეფიშ საბჭოშ არჩევნეფ დაგეგმილ რდუ 1919 წანაშ 4 იანარს. თე დროს, ჯიმა ჯოზეფ რუტერფორდ, ნამუთ იეჰოვაშ ხალხის ხემძღვანელენდჷ, უსამართლოთ ოჭოფეს დო შქვით ჯიმაწკუმა ართო ატლანტაშ (ჯორჯიაშ შტატი, შეერთებულ შტატეფ) ციხეს ქუდახუნეს. თეცალ კითხვაქ გორჩქინდჷ: ხემძღვანელეფო კინ თი ჯიმალეფ ოკო გიშუგორდესკოვო, მით ციხეს ხედჷ დო ვარ თინეფიშ ადგილს შხვეფ ოკო გეირჩუესკო?

მუჟამსით ციხეს ხედჷ, ჯიმა რუტერფორდ ორგანიზაციაშ მომავალშე წუხენდჷ. თის უჩქუდ, ნამდა ჯიმალეფ ფიქრენდეს უჯგუშ იჸუაფუდ შხვა გეირჩუესკო ორგანიზაციაშ პრეზიდენტო. ათეშგურშენ, თიქ წერილ ქიმეჭარ თი ჯიმალეფს, მით თე არჩევნეფს მიღენდეს მონაწილებას. თე წერილს თიქ ელუჩ ჯიმალეფს ორგანიზაციაშ პრეზიდენტო ევანდერ ქოვარდ დანიშნესკო. რუტერფორდ თე ჯიმას მიშინუანდჷ, მუჭოთ მშვიდ, წესიერ დო უფალიშ ართგურ პიროვნებათ. მარა, ჯიმალეფიშ უმენტაშიქ თე არჩევნეფიშ ამშვ თუთათ გინოდვალა ისხუნუ. თი ადვოკატეფქ, მით ჭოფილ ჯიმალეფს  იცვენდეს, დეთანხმეს თე გადაწყვეტილებას. თე გადაწყვეტილებაშ მეღებაშ პროცესის, ნამთინე ჯიმაქ ემოციეფს გეიაჸუნ.

უკულ ართ ჯიმა, სახელო რიჩარდ ბარბერ იშინანდჷ, მუჭო დეწყნარ თე სიტუაციაქ. შეხვალამას ოსწრუდესინ თი ჯიმალეფშე ართ-ართიქ გედირთჷ დო თქუ: „ადვოკატ ვა ვორექ დო კანონეფიშ ბრელ მუთუნ ვა მიჩქჷ, მარა მუჟამსით საქმე ოხუ კანონიერებას, მარჩქილე მუს ნიშნენს ართგურობაშ კანონ. ღორონთ ართგურობას ითხინს. ღორონთიშ მიმართ ართგურობაშ გიმორჩქინაშ არძაშ უჯგუშ შარათ თინა მიმორჩქჷ, ნამდა კინ ჯიმა რუტერფორდ გეგშაბგორათ პრეზიდენტო“ (ფსალმ. 18:25).

ჯიმა ალექსანდრე მაკმილან, ნამუთ რუტერფორდწკუმა ართო ხედჷ ციხეს, იშინანდჷ, ნამდა არჩევნეფიშ მაჟია დღას რუტერფორდიქ თიშ საკანიშ კიდალას ქიმკუხაკუ დო უწუ: „ხე გექთაჭოფე“. რუტერფორდიქ თის ჭიჭე წერილ ქუდაკინუ, ნამუთ ჯიმალეფიშ მოჯღონილ რდუ დო თექ არჩევნეფიშ შედეგეფ ჭარუდ. მაკმილანქ ქოძირ წერილ დო ხეთე ქიმეხვად მუს ნიშნენდჷ თინა. წერილს ჭარუდ, ნამდა არძა ჯიმა (რუტერფორდ, ვაიზი, ვან ამბერგი, ბარბერი, ანდერსონი, ბული დო სპილი) კინ დირექტორეფო გეგშაგორეს. თეს გეძინელ, ჯოზეფ რუტერფორდ დო უილიამ ვან ამბერგ გეგშაგორეს პრეზიდენტო, ვიცე-პრეზიდენტო დო ხაზინადარო. თეშნერო, ჯიმა რუტერფორდ კინ ორგანიზაციაშ პრეზიდენტ იჸუაფუდ.

სოიშახ ბრუო ჯიმა დაპატიმრებულ რდუ, ბიბლიაშ ართგურ მარკვიებელეფ პეტიციაშო ხეშმოჭარუეფს შაყარანდეს, სოდეთ მთავრობას ჯიმალეფიშ ციხეშე გათავისუფლებას თხინდეს. თე გაბედულ ჯიმალეფქ 700 000-შე მეტ ხეშმოჭარუა დოშაყარეს. 1919 წანაშ 26 მარტის, ჯუმაშხას პეტიციაშ მიშაღალაშახ, ჯიმა რუტერფორდ შხვა პასუხიშმგებელ ჯიმალეფწკუმა ართო გათავისუფალეს.

თიშ დახვამლაფშა მეულირ და დო ჯიმალეფს ჯიმა რუტერფორდიქ თეცალ სიტყვეფ უწუ: „დარწმუნებულ ვორექ, ნამდა თი ირფელ, მუთ არძაქ გინიბღით, უმოს რთულ პერიოდშო მამზადენა . . . თქვან ბრძოლაშ მთავარ მიზან ხვალე ჯიმალეფიშ გათავისუფლება ვა რდუ . . . თქვან ბრძოლაშ მთავარ მიზან იეჰოვაშ განდიდება რდუ დო არძაქ, მით თე ბრძოლას მონაწილენდით, სარკო კურთხევეფ მიღით“.

სასამართლო პროცესშახ დო უკულ მოხვალამირ მოვლენეფ ოძირანდჷ, ნამდა იეჰოვა აკონტროლენდჷ სიტუაციას. 1919 წანაშ 14 მესის სააპელაციო სასამართლოქ დადგინ, ნამდა ბრალგედვალირეფს უღდეს კანონიერ უფლება, სასამართლოქ სამართლიანო ჩეტარკო, მარა „თე საქმეს ბრალგედვალირეფწკუმა სასამართლო ვა რდუ . . . სამართლიან . . . ათეშენ მეღებულ სასამართლო გადაწყვეტილებაქ დითირ“. სასამართლოშ დუდშეიან გადაწყვეტილებაშ თირუა სწორ რდუ, მუშენდა ჯიმალეფშა სერიოზულ ბრალდებეფ აფუდეს წიმორნაფილ დო ვა უღუდ მნიშვნელობა, შეწყალენდეს დო ვარ მესაჯებულ წანეფს მოურკენდეს, ნასამართლეობაშ სტატუს იშენით აღვენუდეს. საბოლათ, ჯიმალეფ გამართლეს დო ნასამართლეობაშ სტატუს მოუნწყეს. შედეგო, რუტერფორდის შეულებუდ გაგრძელკო იურიდიულ საქმიანობა დო შეერთებულ შტატეფიშ უზენაეს  სასამართლოს დეცვუკო იეჰოვაშ ხალხი, მუთ ციხეშე გათავისუფლებაშ უკულ ბრელშა აკეთ.

ჯიმა მაკმილან იშინანს: „ვამლამდეს უსაქმურო დოხუნა დო თიშ ჯინა, მუჟამ მიჸუნანდეს უფალ ზეცაშა. ქიმეფხვადით, საჭირო რდუ მუდგაინიშ კეთება, ნამდა ქინვანჭითკო ღორონთიშ ნებას“.

მარა მთავარ სამმართველოს რდესინ თი  ჯიმალეფს ვეშულებდეს ხეთეშე გაგრძელესკო წანეფიშ წოხოლე დოჭყაფილ საქმე. მუ რდუ თეშ მიზეზ? ობეშტალ ტექნიკა, ნამდგას ლიტერატურაშ ობეშტალო გიმირინუანდეს, განადგურეს. თექ თი დროს მოხვად, მუჟამსით ჯიმალეფ ციხეს ხედეს. თენა არძაშო გურიშგუმატახალ სიტუაცია რდუ დო ნამთინე ჯიმა თის ხოლო ფიქრენდჷ, ნამდა ქადაგებაშ საქმექ თეთ გეთუ.

ქორდუო დოსკილადირ მითინ, მიდგას სამეფოშ გურშენ სახიოლო ამბეშ მორჩქილაფა ოკოდ? თე კითხვაშა პასუხიშ მიოჩამალო, ჯიმა რუტერფორდიქ მოხსენებაშ კითხირ გეგნოჭყვიდ. თე მოხსენებაშ მარჩქილაფშა ბრელ ხალხიშ დაპეჯება ულამდეს. ჯიმა მაკმილანქ თქუ: „თე შეხვალამაშა მითინქ ვამორთ-და, თენა თიშ ნიშან იჸუაფ, ნამდა ქადაგებაშ საქმე თებულ რე“.

1919 წანაშ 4 მესის, საბატონს სერიოზულ ლახალაშ უმკუჯინუო, ჯიმა რუტერფორდიქ ლოს-ანჯელესის (კალიფორნია) წეკითხჷ მოხსენება, ნამუშ სათაურ რდუ „იმენდ გასაჭირს რენ ფერ ხალხშო“. თე მოხსენებას სოდგარენ 3 500 პიროვნებაქ დესწრჷ, მარა ოშობით კოჩის უკახალე აჸუ დართინალქ, მუშენდა დარბაზის ადგილეფ ვა რდუ. მაჟია დღას ხოლო 1 500 პიროვნებაქ ქიმირჩქილუ თე მოხსენება. ჯიმალეფქ მიღეს მუნეფიშ კითხვაშა პასუხ — ხალხის ოინტერესუდ სახიოლო ამბე!

თევრეშე მოჸუნაფილ, ჯიმალეფქ ქადაგებაშ საქმე ახალ მეთოდეფით გაგრძელეს დო იეჰოვაშ მოწმეეფ ამდღარშახ მეჸუნა თინეფიშ მაგალითის.

მუჭოთ 1919 წანაშ 1 არგუსოშ „გინაჯინალ კოშკის“ ჭარუდ, სექტემბერიშ დაჭყაფუს სიდარ-პოინტის (ოჰაიო)  ჩეტარებუდ კონგრესი. „არძა გინაფლენდჷ, ნამდა ოკო ქიდესწრუკო თე კონგრესის“, — იშინანს კლარენს ბიტი, ახალგაზრდა ბიბლიაშ მარკვიებელ, მისურიშე. 6 000-შე მეტ და დო ჯიმაქ დესწრჷ თე კონგრესის, თიშე ბრელით მეტიქ, ვინემ ელდეს. თე კონგრეს თით ხოლო რდუ განსაკუთრებულ, ნამდა 200-შე მეტ კოჩიქ დინათ ტობა ერის.

კონგრესიშ მახუთა დღას, 1919 წანაშ 5 სექტემბერს, ჯიმა რუტერფორდიქ გიშელ მოხსენებათ „თანამშრომლეფშა მიმართვა“, ნამუშ დროს გეგმაცხად ახალ ჟურნალიშ გიშულა, სათაურით „ოქროშ ხანა“. * თე ჟურნალს მოშინაფილ იჸუაფუდ თი დროს მოხვალამირ მნიშვნელოვან მოვლენეფ დო ბიბლიურ მუხლეფიშ საფუძველშა ენწყუმილ იჸუაფუდ, მუშენ ხვადუდ თე მოვლენეფ.

ბიბლიაშ მარკვიებელეფს ელუჩეს, ნამდა გაბედულო იქადაგესკო თე ახალ პუბლიკაციათ. წერილს, ნამუთ ქადაგებაშ საქმეს ოხუდ, ჭარუდ: „არძა მეძღვინელ [ნათილ] ქრისტიანს შუდას, მუშმადიდა პატი რე მსახურება, ათეშენ გეგმირინეთ თე შესაძლებლობა დო ირფელ გაკეთით, ნამდა იქადაგათ მთელ მსოფლიოს“. თე მოწოდება ანაყუ ხალხიქ გეთვალისწინ დო ქადაგება ქიდიჭყეს. დეკემბერიშ ბოლოშო გურგედვალირ ქადაგებაშ შედეგო ახალ ჟურნალს 50 000-შე მეტ გიშმაჭარალ ჸუნდჷ.

სოდგარენ 1919 წანაშ ბოლოშო იეჰოვაშ მოწმეეფქ ორგანიზაციულ ცვლილებეფ გაკეთეს დო ახალ ძალეფქ ქაშის. თეს გეძინელ, მუსხირენ მნიშვნელოვან წინასწარმეტყველებაქ ხოლო შესრულ, ნამუთ ბოლო დღალეფს ოხუდ. მალაქიაშ 3:1—4-ის მოჩამილ წინასწარმეტყველებაქ, ნამდა ღორონთიშ ხალხ გეგმიცადებუდ დო გესუფთებუდ, ბოლოშა შესრულ. იეჰოვაშ ხალხიქ გეთავისუფალ „დიდ ბაბილონიშ“ სიმბოლურ ტყვეობაშე დო იესოქ დანიშნჷ ართგურ დო გონიერ მონა * (მალ. 3:1—4; გამოცხ. 18:2, 4; მათ. 24:45). ბიბლიაშ მარკვიებელეფ უკვე მზათ რდეს თი საქმეშ ოკეთებელო, ნამუთ იეჰოვას ოკოდ თინეფს ოკეთებაფუკო.