1. მუშენ რე ნათუა მნიშვნელოვან ნაბიჯი? (ქოძირით სურათი თე გვერდის).

ირ წანას ანთასობით ბიბლიაშ მაგურაფალ ინათუ. თინეფ შქას ახალგაზრდეფ დო ბაღანეფ ხოლო რენა. შილებე თინეფქ ჭეშმარიტებას მირდეს. თქვა ხოლო ხომ ვარეთ თინეფ შქას? თაშ ქორენ-და, ცქვაფაშ ღირს რეთ. ნათუა აუცილებერ მოთხოვნა რე არძა ქრისტიანშო დო მნიშვნელოვან რე რსხებაშო (მათ. 28:19, 20; 1 პეტ. 3:21).

2. მუშენ ოკო ვა მოშკურდან ნათუაშ დო მუშენ ოკო ვეუჩილითუათ თის დუდი?

² მუშო ოკო რაგად ნათუას ბრელ კურთხევა მაჸუნუ, მარა თინა დიდ პასუხიშმგებლობა ხოლო რე. მუშენ შილებე თეშ რაგადი? ნათუაშ დღას თქვა დადებითო უპასუხით კითხვას: „იესო ქრისტეშ გიშაჸიდირალიშ საფუძველშა მინანიო ცოდეფ დო მეუძღვინიო დუდ იეჰოვას, ნამდა შეასრულე თიშ ნება?“. ნათუა დუდიშ მეძღვინუაშ სიმბოლო რე. თქვა თიშ პირობა დოდვით, ნამდა ირიათო გეგმირჩქინანდით იეჰოვაშ ჸოროფას დო თიშ მსახურებას პირველ ადგილს ქიგიორინუანდით. თენა სერიოზულ ნაბიჯ რე. დღას დენარღენთო თე ნაბიჯიშ გინოდგუმას? მუშო ოკო რაგად, ვარ. თქვა  დღას ვედენარღენთ თის, ნამდა დუდ მეუძღვინით იეჰოვას. დეფიქრით: არძა მით იეჰოვას ვეჩინენსინ, სატანაშ გავლენაშ თუდო რე, ნამუსით შუროთ ვაინტერეს თქვან გინოსკილადა. თინა ბედნერ იჸუაფ, მუჟამსით იეჰოვაშე ვარიას ქოთქუანთ დო თეგვარო, მუწკუმა ართო მიოდინუანთ მარადიულ სიცოცხლეშ იმენდის.

3. მუ კურთხევეფ მოუღ იეჰოვაშა დუდიშ მეძღვინუას?

³ დეფიქრით, მუჭო გაკურთხეს იეჰოვაქ, მუჟამსით თის დუდ მეუძღვინით დო დინათით. ასე თამამას შეილებნა თქუათ: „იეჰოვა ელამრე, ვა მაშკურნე. მუ აღოლნე კოც ჩქიმდა?“ (ფსალმ. 118:6). დიდ პატი რე ღორონთიშ მხარეს გერინა დო თიშ რჩქინა, ნამდა იეჰოვა ჯგირ თოლით გიჯინე.

4, 5. ა) მუშენ რე დუდიშ მეძღვინუა პირად პასუხიშმგებლობა? ბ) ხანიშ უმკუჯინუო მუ სირთულეეფს შითმოხვადნა ქრისტიანეფ?

⁴ შილებე მშობლეფიშ ჸუდექ მემკვირდეობათ თქვანდა გეგნორთას, მარა იეჰოვაწკუმა ურთიერთობა თეშა ვეშიდარებე. თქვა ვა გაღვენუნა ხოლოშიან ურთიერთობა ღორონთწკუმა, ხვალე თიშენ, ნამდა მშობლეფს უღნა ჯგირ ურთიერთობა თიწკუმა. თეცალ ურთიერთობაშ გავითარებელო თქვან ხანდა რე საჭირო. თიშ უმკუჯინუო, მშობლეფწკუმა ცხოვრენთინ, თქვა რეთ პასუხიშმგებელ თქვან რსხებაშე. მუშენ რე მნიშვნელოვან თექ დღას ვაგმოჭყორდან? მუშენდა, მითინს ვამჩქუნა მომავალს რწმენაშ მუნერ გამოცდეფს შეფხვადუთ. მაგალთო, შილებე ბაღანობას ინათით, მარა ასე უკვე დიდ რეთ დო შხვანერ გრძნობეფქ დო პრობლემეფქ ქირჩქინ დუდი. ართ 18 წანერ ძღაბ იჩიებ: „ბაღანა შილებე ადვილო იჩიებდას ვარიას დაბადებაშ დღაშ ტორტიშ ჭკუმუაშე თიშენ, ნამდა თენა იეჰოვას ვა მოწონს დო თეშ გურშენ შუროთ ვა გინაფლენდას დუც უხერხულო. მარა, მუჟამსით წანეფ აძინუნ, სქესობრივ ურთიერთობაშ დიდ სურვილ ურჩქინდუ. თეს ვეიაჸუნასინ, ბოლოშა ოკო რდას დარწმუნებულ, ნამდა იეჰოვაშ კანონეფიშ მეჸუნა სწორ არჩევან რე“.

⁵ მუშო ოკო რაგად, ახალ სირთულეეფ უცხო ვა რე ახალგაზრდეფშო. თინეფ ხოლო, მით უმოს დიდობას ინათესინ, თიშნერ პრობლემეფს შითმოხვადნა, ნამუსით შურო ველდეს. თე სირთულეეფიშ მიზეზ შილებე რდას დაოჯახება, ჯამრთელობაშ პრობლემეფ ვარდა სამუშა. ხანიშ უმკუჯინუო, არძა გედირთუ თიცალ სიტუაციეფიშ წოხოლე, მუჟამსით იეჰოვაშ ართგურობაშ გიმორჩქინა რე საჭირო (იაკ. 1:12—14).

6. ა) მუს ნიშნენს, იეჰოვაშა მეჩამილ პირობაშ შესრულება? ბ) მუშ გურაფა შემლებნა ფილიპელეფიშ 4:11—13-ს ინოჭარილ სიტყვეფშე?

⁶ იეჰოვაშ ართგურო დოსქილადას მიგეხვარებნა თიშე ფიქრი, ნამდა ღორონთშა მეჩამილ პირობა აუცილებერო ოკო შეასრულათ. შხვანერო ქოფთქუათინ, თენა ნიშნენს, მუდგაქ ვა მოხვადასინ, ირიათო ემსახურებუთ უზენაეს ღორონც, თიმწკუმა ხოლო, მუჟამსით თქვან მშობლეფ ვარდა მეგობრეფ მითმიოტენა ღორონთიშ თაყვანიშცემას (ფსალმ. 27:10). იეჰოვაშ მოხვარათ, არძანერ სიტუაციას შეილებნა საჭირო ძალაშ გორუა დო მეძღვინუაშ აღთქმაშ შესრულება (წეკითხით ფილიპელები 4:11—13). *

7. მუს ნიშნენს იხანდათ „თქვან გინასკილიდარო შიშით დო კანკალით“?

⁷ იეჰოვას ოკო, თქვა თიშ მეგობარქ ქიჸუათ. მარა, დიდ მონდომა რე საჭირო, გავითარე თეცალ ურთიერთობა დო იხანდე რსხებაშო. ფილიპელეფიშ 2:12-ს ინოჭარ: „კინ იხანდით თქვან გინასკილადარო შიშით  დო კანკალით“. თე სიტყვეფშე იძირე, ნამდა დიდ ყურადღება ოკო მივაქცუათ იეჰოვაწკუმა ხოლოშიან ურთიერთობას დო პრობლემეფიშ უმკუჯინუო ქუდოფსკიდათ თიშ ართგურეფქ. ზედმეტო ვა რდათ თქვან დუდშა დაიმენდებულ, მუშენდა თინეფ ხოლო ეჩილათენა შარას, მით წანეფს ომსახურუდ იეჰოვას. თაშ ნამდა, მუ ნაბიჯეფ შეილებნა გინოდგათ თქვან რსხებაშო?

8. მუ მიშურს პირად გურაფაშა დო მუშენ რე თენა მნიშვნელოვანი?

⁸ იეჰოვაწკუმა მეგობრობაშო საჭირო რე ჟირ მუდგარენ — მორჩქილაფა დო რაგადი. ღორონთიშ მორჩქილაფაშ მთავარ საშვალება რე პირად გურაფა. თეშა მიშურს ბიბლიაშ დო თიშა გერსხილ პუბლიკაციეფიშ კითხირ დო ნაკითხირშე ფიქრი. მარა ბიბლიაშ გურაფა ხვალე ინფორმაციაშ დამახსოვრებას ვა ნიშნენს, მუჭოთ თეს გამოცდეფშო მომზადებაშ დროს ორთუთ. ბიბლიაშ გურაფა შემლებნა შევადარათ ექსპედიციაშა ულას, სოდეთ შეილებნა იეჰოვაშ თვისებეფიშ გურშენ ახალ-ახალ მუდგარენეფ გეგათ. თენა მიგეხვარებნა ხოლოს რდათ იეჰოვაწკუმა დო თინა ხოლო თქვანწკუმა ხოლოს იჸუაფ (იაკ. 4:8).

9. მუ საშვალებეფქ იჸუ თქვანო მოხუჯურქ პირად გურაფაშ დროს?

⁹ იეჰოვაშ ორგანიზაცია ბრელ მუთუნს ორთ, ქიმმეხვარან, მიღდან ჯგირ პირად გურაფა. მაგალთო, ვებ-გვერდის მოჩამილ რე შხვადოშხვა განყოფილება, ნამუთ მიგეხვარებნა ქოძირათ, მუჭო გიმირინუათ ცხოვრებას ბიბლიურ რჩევეფ დო გემანგარათ რწმენა (ახალგაზრდები / ბიბლიის შესასწავლი სავარჯიშოები). თეს გეძინელ, თექ მოჩამილ რე რჩევეფ, მუჭო ეუნწყათ შხვეფს თქვან რწმენაშ გურშენ (ახალგაზრდები / რას გვასწავლის ბიბლია სინამდვილეში? შესწავლაში დამხმარე კითხვები). პირად გურაფაშ გურშენ ჯგირ რჩევეფ რე მოჩამილ 2009 წანაშ აპრილიშ ჟურნალს „გეგშაკურცხით!“, 23—26 გვერდეფს. ბიბლიაშ გურაფა დო ნაკითხირშე ფიქრ მნიშვნელოვან რე თქვან რსხებაშო (წეკითხით ფსალმუნი 119:105). *

10. მუშენ რე ლოცვა მნიშვნელოვან ქრისტიანშო?

¹⁰ მუჟამსით ბიბლიას ბგურაფლენთინ, ვურჩქილეთ ღორონც, მარა ლოცვაშ  საშვალებათ იფჩიებუთ თიწკუმა. თინა ქრისტიანეფშო ხვალე რიტუალ ოკო ვა რდას, ნამუსით ინსტიქტურო იმეორენა. ლოცვა წარმატებაშ მუმაღალარ „თილისმაცალო“ ოკო ვემიფრჩქინათ. თინა ღორონთწკუმა ურთიერთობაშ საშვალება რე დო თის ოკო ჩქინ მორჩქილაფა (წეკითხით ფილიპელები 4:6). * მუჟამსით ოწუხებელ გიღნან, ბიბლია მირაგადნა: „იეჰოვას მიანდ სქან ოღალი“ (ფსალმ. 55:22). მილიონობით და დო ჯიმას მუშ დუდშა გიმუცადებ თენა. თე მუხლის მოჩამილ რჩევა თქვა ხოლო გიმგოდირთნა!

11. მუშენ ოკო ვორდათ ირიათო იეჰოვაშ მარდულეფი?

¹¹ მუშო ოკო რაგად, ხვალე თიმწკუმა ოკო ვებლოცათ, მუჟამსით პრობლემეფ მიღნა. ბიბლიას ინოჭარ: „მარდულეფ რდათ“ (კოლ. 3:15). მინშა შილებე პრობლემეფშე ფიქრის თეშ ქუვაჸუნათ, ნამდა ყურადღება ვემვაქცუათ თი კურთხევეფს, ნამუთ მიღნა. თაშ ვეჸუასინ, მორთ გამორსით თეშნერ მუდგარენ: ირდღას ქიფიქრით თი სუმ საკითხშე, მუთ იეჰოვაქ ბოლოს თქვანო აკეთ დო ლოცვას გეგმოხანტით თეშ მარდულობა. ართ 18 წანერ ძღაბ, აბიგაილი, ნამუთიქ 12 წანერ რდუნ თეშ ინათუნ, იჩიებ: «მიჩქ, ნამდა მთელ სამყაროს იეჰოვაშე უმოსო მითინ ვემსახურენს მარდულობას. ჩქი ირნერ საშვალება ოკო გეგმიბრინუათ, ნამდა სიმარდულ გეგმოფხანტათ ღორონთშე მოჩამილ არძა ძღვინიშ გურშენ. ართ მაგალით გუმაშინე: „წერმედგინით ნამდა, გოკურცხით დო ხეს ხვალე თი მუდგარენეფქ ქაგოსკიდეს, მუშ გურშენით იეჰოვას გოღა მადლობა უწით. შხვა მუდგარენეფქ, მუშ გურშენით მადლობა ვაითქუალნან მეიდინეს. მუ აგოსკიდუდეს ხეს?“» *.

12, 13. მუჭო გიმოცადით თქვან დუდშა იეჰოვაშ სიჯგირა დო მუშენ რე მნიშვნელოვან თეშე ფიქრი?

¹² მეფე დავითი, ნამუთიქ ბრელ გაჭირება გინიღუნ, ჭარუნდ: „გამორსით დო ქოძირუნთ, ნამდა ჯგირ რე იეჰოვა! ბედნერ რე კოჩ, მით თის დუც გითუფორუანს“ (ფსალმ. 34:8). თე მუხლშე იძირე, მუშმადიდა მნიშვნელობა უღუ პირად გამოცდილებას. მუჟამსით ბიბლიას დო თიშა გერსხილ პუბლიკაციეფს კითხულენქ დო კრებაშ შეხვალამეფს ოსწრუქინ, გებულენქ, შხვეფს მუჭო მეხვარ ღორონთიქ ართგურო დოსკილადას. თენა დასურო გურიშ ემაკინალ რე. მარა სულიერ რდუალაშო, საჭირო რე თქვან თოლო ქოძირათ იეჰოვაშ ხე თქვან ცხოვრებას. მუჭო გიმოცადით პირადო, „ნამდა ჯგირ რე იეჰოვა“?

¹³ არძა ქრისტიანქ მუშ დუდშა გიმოცად, იეჰოვაშ სიჯგირა, მუჟამსით ღორონთიქ თინეფს მუწკუმა დაახლოებაშ საშვალება ქიმეჩ. იესოქ თქუ: „მითინს ვამართე ჩქიმდა, მუმაქ, ჩქიმ მუმაშქუმალარქ, თეშ საშვალება ვემეჩ-და“ (იოან. 6:44). ქორჯერანო, ნამდა თე სიტყვეფ თქვა ხოლო გოხუნა? თაშ ხომ ვა ფიქრენთ: „იეჰოვაქ მუწკუმა დაახლოებაშ საშვალება ჩქიმ მშობლეფს მეჩ, მა უბრალოთ თინეფს ეკოპჸუნქ“. მარა იეჰოვაშა დუდიშ მეძღვინუა დო ნათუათ, ქაძირეთ, ნამდა უკვე გიღდეს იეჰოვაწკუმა განსაკუთრებულ ურთიერთობა. ბიბლიას ინოჭარ: „მიდგას ღორონთ უჸორს, თის ღორონთ იჩინენს“ (1 კორ. 8:3). თქვა ნამდვილო გიჩინენა იეჰოვა. თაშ ნამდა, ეცადით ირიათო დაფასათ თი ადგილ, ნამუთ ღორონთიქ მერჩეს მუშ ორგანიზაციას.

14, 15. მუჭო მიგეხვარებნა მსახურება რწმენაშ გამანგარებას?

¹⁴ თეს გეძინელ, იეჰოვაშ სიჯგირას თიმწკუმა ხოლო ორწყეთ, მუჟამსით მსახურებას ვარდა სკოლას შხვეფს თქვან რწმენაშ გურშენ ეჩიებუთ. ნამთინეს ოძნელ მუშ თანაკლასელეფწკუმა ქადაქება, მუშენდა ვა უჩქ,  მუნერ რეაქცია აღვენუნა თინეფს. შილებე ართ კოჩწკუმა რაგად უმოს ეფ რდას, ვინემ ბრელწკუმა ართო. მუ მიგეხვარებნა თე დროს?

¹⁵ პირველ, დეფიქრით მუშენ რჯერა, ნამდა მუდგაშ რწანან თინა ჭეშმარიტება რე. ჩქინ ვებ-გვერდის jw.org მოჩამილ რე შხვადოშხვა თემა, ნამუთ მიგეხვარებნა დეფიქრათ, მუ რწანა, მუშენ რწანა დო მუჭო ეჩუათ შხვეფს თეშ გურშენ (ქოძირით ახალგაზრდები / შესწავლაში დამხმარე კითხვები). მუჟამსით ჯგირო რეთ მომზადებულ დო ჭეშმარიტებას ბოლოშა რეთ დარწმუნებულინ, გოკოდან იჸი იეჰოვაშ გურშენ შხვეფს ქეჩუათ (იერ. 20:8, 9).

16. მუ მიგეხვარებნა გიორჯგინათ უხერხულობას დო შხვეფს თქვან რწმენაშე ეჩუათ?

¹⁶ შილებე მომზადებულ რდათ, მარა იშენით გოუხერხულდან თქვან რწმენაშე ჩიება. ართ 18 წანერ და, ნამუთიქ 13 წანერ რდუნ თეშ ინათუნ, იჩიებ: „მიჩქ მუ ბწანს, მარა ჩქიმ სიტყვეფით თიშ გინოჩამა მიჭირს“. მუს ორთ თე ახალგაზრდა, ნამდა მუშ პრობლემას გიორჯგინას? თინა ოცად ჭეშმარიტებაშ გურშენ ბუნებრივო დო მშვიდას ქიჩუას: «ჩქიმ კლასელეფ თავისფალო რაგადანა, მუდგას ორთნა. მა ხოლო თაშ იფქციებუქ. მაგალთო, ჩიებას თაშ იბჭყანქ: „თიმ დღას ბიბლიაშ გურაფას ვატარენდ დო . . .“ უკულ მუდგაშ რაგადის ვაპირენქინ, თის იფჩიებუქ. შილებე ჩქიმ მოშინაფილ თემა კონკრეტულო ბიბლიას ვახუდას, მარა თინეფს ინტერეს ურჩქინდუნა, მუჭო ვოგურუანქ ბიბლიას დო თეშ გურშენ კითხვეფს მისვენა. თე მეთოდის მუთ უმოს ხშირას გიმიბრინუანქინ, თით უმოს ადვილ რე თინეფწკუმა ჩიებაშ დოჭყაფა. თეს მანგარ ხიოლ მოუღ ჩქიმდა».

17. ხოლო მუ მიგეხვარებნა თქვან რწმენაშ გურშენ ეჩუათ შხვეფს?

¹⁷ მუჟამსით შხვეფიშ პატიცემას გეგმირჩქინანთ დო თინეფით პირადო დეინტერესებუთინ, უჯგუშო ქუმოირჩქილუანა. 17 წანერ ოლივია, ნამუთიქ ბაღანობას ინათუნ, იჩიებ: „ირიათო ფიფქრენდ, ბიბლიაშე რაგადის ქიდიბჭყანდ-და, ხალხ ფანატიკოსო მემრჩქინანდ“. დრო ხანიშ უკულ ოლივიაქ თე საკითხის შხვანერო ქუდუჭყ ჯინა. თინა იჩიებ: „ბრელ ახალგაზრდას შურო მუთუნ ვა უჩქ იეჰოვაშ მოწმეეფიშ გურშენ. თინეფ მოწმეეფშე ხვალე ჩქი მიჩინენა, თაშ ნამდა, ჩქინ საქციელშა რე დამოკიდებულ, მუნერ წარმოდგენა აღვენუნა ჩქინ რწმენაშე. მარა მუშ რაგად შილებე, მუჟამსით მორდებუან ვორეთ, მოშქურნა დო მიჭირა ჩქინ რწმენაშ გურშენ რაგადი? თეცალ დროს, შილებე თინეფქ იფიქრან, მოონჯღორნა იეჰოვაშ მოწმეეფ ვორეთინ. თეს გეძინელ, შილებე ამირდან, მუჟამსით ქოძირნა, ნამდა ჩქინ დუდშა ვა ვორეთ დარწმუნებული. მარა თინეფ უმოსო დუმაფასენა, ჩქინ რწმენაშე მშვიდას დო დარწმუნებულო ქიფჩიებუთ-და“.

18. მუჭო ოკო იხანდათ თქვან რსხებაშო?

¹⁸ რწმენაშო ხანდება სერიოზულ პასუხიშმგებლობა რე. თეშო საჭირო რე ღორონთიშ სიტყვაშ კითხირი, თიშე ფიქრი, ლოცვა დო თი კურთხევეფშე დაფიქრება, მუდგას ღორონთ მარზენა. თე ირფელს გუვაკეთენთ-და, უმოსო დებრწმუნებუთ, ნამდა იეჰოვა ჩქინ მეგობარ რე. თეს გეძინელ, უმოსო მოკოდან იჸი ჩქინ რწმენაშ გურშენ შხვეფწკუმა ჩიება (წეკითხით ფსალმუნი 73:28). *

19. მუშენ ოკო ვაზოგათ დუდ თქვან რსხებაშო?

¹⁹ იესოქ თქუ: „მითინს ქაკო ჩქიმ მიმაჸუნალქ ქიჸუას-და, ვარია ქოთქუას მუშ დუდშე, გეჭოფას მუშ წამებაშ ბოძი დო ქეკმაჸუნას“ (მათ. 16:24). მუშო ოკო რაგადი, ქუმოკონა იესოშ მოწაფექ ქიპჸუათ-და, დუდ ოკო მეუძღვინათ იეჰოვას დო დიბნათათ. თაშ ქიმიქციებუთ-და, კურთხევეფ ვამგოკორდნა, მუჭოთ ამდღან თეშ, ახალ ქვეყნიერებას ხოლო. თაშ ნამდა, ბრელ მიზეზ გიღნა იხანდათ თქვან რსხებაშო!