1. მუშ ჯერდ მართას? (ქოძირით სურათ თე გვერდის).

იესოშ ხოლოშიან მეგობარ დო მოწაფე მართა გურაკოჭირებულ რდუ, მუშენდა ჯიმა ღურელ გეუძუდ. შეულებუდუო მითინს თიშა გურიშ ექექაფა? იესოქ დარწმუნ მართა: „გეთელებუ სქან ჯიმა!“. მუშო ოკო რაგად, თის ჯერდ იესოშ სიტყვეფიშ, მარა თენა ბოლოშა ვა გაჭყოლიდუანდ მუშ გაჭირებას. თიქ უპასუხ: „მიჩქ, ნამდა გეთელებუ, გათელებაშ დროს, ბოლო დღას“ (იოან. 11:20—24). მართას ჯერდ, ნამდა თენა მომავალს მოხვადუდ. მარა იესოქ თიმ დღას დურთინუ ლაზარეს სიცოცხლე.

2. მუშენ გოკონა გიღდან მართაცალ რწმენა?

² ჩქი ხოლო ვეველუთ, ნამდა იესო დო იეჰოვა თეცალ სასწაულს ამდღა გაკეთენა. მართაცალო თქვა ხოლო ქორჯერანო, ნამდა მომავალს თქვან საჸოროფო კათა გეთელებუ? შილებე თენა რდას თქვან მეუღლე, დიდა, მუმა, ბებ დო ბაბუ ვარდა ბაღანა, მუშ გურშენით მანგარო გაფნა გურაკოჭირებული. ალბეთ ართ შურ გოლნა, მუჟამ იხუტოლუანთ თინეფს გურშა, დურაგადუანთ დო გეხარებუთ თინეფწკუმა ურთიერთობათ. საბედნეროთ, მართაცალო თქვა ხოლო გიღნა თიშ მიზეზ, თქუათ: „მიჩქ, ნამდა ჩქიმ საჸოროფო პიროვნება დასურო გეთელებუ“. მარა, იშენით ჯგირ იჸუაფ დეფიფქრათ, მუშენ ბჯერა თეშ.

3, 4. მუჭო გუმანგარენდ მართას რწმენას თიშ რჩქინა, ნამდა იესოქ ღურელეფ გათელ?

 ³ მართა იერუსალიმიშ გოხოლუას ცხოვრენდ. ათეშენ, შილებედ, მუშ თოლო ვაფუდკო ნაძირეფ, მუჭო გათელ იესოქ ქომონჯღურელ ოსურიშ სქუა, გალილეაშ მხარეს, ქალაქ ნაინს. მარა თის ალბეთ, გაგებულ აჸიდ თეშ გურშენ. მუშ რაგად შემლებნა იაიროსიშ ოსურსქუაშენ? არძას უჩქუდ, ნამდა თინა ღურელ რდუ, მარა იესოქ ბაღანაშ გოჸინილ ხეს ქუმოკიდ დო უწუ: „ბაღანა, გედირთ!“. თიქ ხეთეშე გემწოდირთ (ლუკ. 7:11—17; 8:41, 42, 49—55). მართას დო მარიამს, ჟირ ხოლოს უჩქუდ, ნამდა იესოს შეულებუდ ლეხეფიშ სქილადა. ათეშენ, ფიქრენდეს, ნამდა იესო ლაზარეშ ღურაშახ თექ ქორდუკონ, დასქილიდუანდ თის, მარა უკვე გვიან რდუ. მუშ იმენდ უღდეს თინეფს? ყურადღება ქიმიაქცით მართაშ სიტყვეფს, ნამდა ლაზარე მომავალს, „ბოლო დღას“ გეთელებუდ. მუშენ ჯერდ თენა? მუშენ შეილებნა თქვა ხოლო რჯერდან, ნამდა მომავალს თქვან საჸოროფო პიროვნება გეთელებუ?

⁴ თეშ ბრელ მიზეზ არსებენს. მორთ გუვარჩუათ ნამთინე შემთხვევა, ნამუთ გამანგარენს თქვან რწმენას. შილებე დღას ვაიფიქრებნა, ნამდა თე შემთხვევეფ ღურელეფიშ გათელებაწკუმა რე კავშირს.

5. მუშენ ჯერდ მართას, ნამდა ლაზარე გეთელებუდ?

⁵ ყურადღება ქიმიაქცით, ნამდა მართას ვა უთქუალ: „იმენდ მიღ, ჩქიმ ჯიმა გეთელებუ“. თიქ თქუ: „მიჩქ, ნამდა გეთელებუ“. მართა დარწმუნებულ რდუ, მუშენდა გაგებულ აფუდ თი სასწაულეფიშ გურშენ, ნამუქით დიო ხოლო თეიშახ მოხვად, სოიშახ იესო მსახურებას დიჭყანდკონ. ალბეთ, მართა თეს ჭიჭენობაშე, მუშ ჸუდეს ვარდა სინაგოგას მირჩქილუანდ. შილებე თის წმინდა წერილეფს მოჩამილ გათელებაშ შემთხვევეფქ ქუგაშინკო.

6. ნამ სასწაულიშ გურშენ აფუდ გაგებულ მართას?

⁶ ღურელეფიშ გათელებაქ პირველო თიმწკუმა მოხვად, მუჟამსით ღორონთიქ ელიას მეჩ სასწაულეფიშ კეთებაშ ძალა. ართ ქომონჯღურელ ოსურქ, ნამუთ ფინიკიაშ ზღვაპიჯ ქალაქ სარეფთას ცხოვრენდუნ, ელია ჸუდეშა ქუდაპეჯ დო თიშ პატიცემა გეგმირჩქინ. ათეშენ ღორონთიქ დოხვამ თინა დო ქვირ დო ზეთ ვემურკებ თიშ ოჯახშა, ნამდა შქირენაშ დროს ცოცხალეფ ქუდოსკიდესკო თე ოსურქ დო მუშ ბაღანაქ (1 მეფ. 17:8—16). დრო ხანიშ უკულ თიშ ბოშიქ დელახ დო დოღურ, მარა ელიას ვემუტებ თინა. თიქ ღურელ ბაღანაშ გურშენ ღორონც ლოცვათ თხუ: „ღორონთი, დურთინე ბაღანას სიცოცხლე!“. დასურო თაშ ქუმოხვად! იეჰოვაქ ქუმურჩქილუ ელიას დო ბაღანას სიცოცხლექ დართ. თენა ბიბლიას მოშინაფილ ღურელეფიშ გათელებაშ პირველ შემთხვევა რე (წეკითხით 1 მეფეები 17:17—24). * მუშო ოკო რაგად, მართას არჩქვენუდ თე შემთხვევაშ გურშენ.

7, 8. ა) მუ აკეთ ელისექ შუნამელ ოსურშო? ბ) მუს ბგებულენთ იეჰოვაშ გურშენ ელისეშ ნაკეთებ სასწაულშე?

⁷ ბიბლიას მოშინაფილ ღურელიშ გათელებაშ მაჟია შემთხვევაქ წინასწარმეტყველ ელისეშ დროს მოხვად. ქალაქ შუნემს ართ  ისრაელ ოსურ ცხოვრენდ, ნამუსით სქუა ვა ჸუნდ. თიქ ელისეშ განსაკუთრებულ პატიცემა გიმირჩქინ, ათეშენ ღორონთიქ აკურთხ თინა მუშ ხანშა მიშულირ ქომონჯწკუმა ართო დო ქომოლსქუა ქაჩუქ. მარა მუსხირენ წანაშ უკულ თინეფს თე ბაღანაქ დუღურეს. წერმიდგინით, მუჭო იტანჯებუდკონ იჸიდ თიშ დიდა. თიქ 30 კილომეტრ მიდართ, ელისეშა ქიმურთუმუდკო, ნამუთ ქარმელიშ გვალას რდუ. წინასწარმეტყველქ მსახურ გეხაზი მუშ წოხოლე მიდაშკვ შუნემშა, ნამდა ბაღანა გუთელებუდკო. მარა თის ვეშიალებუ თეშ კეთებაქ. ჭიჭე ხანშა გურაკოჭირებულ დიდაქ დო ელისექ ხოლო ქუმორთეს (2 მეფ. 4:8—31).

⁸ ელისექ გემნორთ ჸუდეშა, სოდეთ ღურელ ბაღანა გილასვანჯუდ დო ქილოც. თეშ უკულ ბაღანას სიცოცხლექ დართ დო თიქ კინ მუშ ოჯახწკუმა გაგრძელ ცხოვრება (წეკითხით 2 მეფეები 4:32—37). * შუნამელ ოსურს შილებედ ქუგაშინკო ხანაშ ლოცვაქ, მუჟამსით თიქ სამუელ კარავშა მიჸონ: „იეჰოვას . . . ენმოჸუნს სამარეშა დო ეშმაჸუნს თევრეშე“ (1 სამ. 2:6). არგამა რე, ღორონთიქ გათელ შუნამელ ოსურიშ სქუა დო თეთ ქაძირუ, ნამდა შეულებ ღურელეფიშ გათელება.

9. ქიმიჸონით ბიბლიას მოშინაფილ ღურელიშ გათელებაშ მასმა შემთხვევა.

⁹ ხოლო ართ სასწაულქ ელისეშ ღურაშ უკულ მოხვად. თინა 50 წანაშე მეტ ხანს რდუ წინასწარმეტყველი. უკულ მანგარო დელახ დო დოღურ. ართშა, მუჟამსით ისრაელეფს მიდგარენ კოჩი ონთხორშა მეუსვანჯუაფდესინ, თინეფს ნტერეფქ ქეიაზადეს. ღურელ თექ ქინაჸათეს, სოდეთ ელისეშ ძვალეფ სვანჯუდ დო ინტეს. ბიბლიას პკითხულენთ: „მუჟამსით ელისეშ ძვალეფს ქიმკადუნ, ღურელქ ხეთეშე გეთელ დო გემწოდირთ“ (2 მეფ. 13:14, 20, 21). დეფიქრით, მუჭო გუმანგარენდ მართას რწმენას ღურელეფიშ გათელებაშ თე შემთხვევეფი! მუშო ოკო რაგად, ღორონც შეულებ გიორჯგინას ღურას. დეფიქრით, მუს ნიშნენს თენა თქვანო. თე ირფელ მოძირანა, ნამდა ღორონთიშ ძალაშა წოხოლე მუთუნს ვეწარნე.

10. მუჭო გათელ პეტრექ ართ ქრისტიან და?

¹⁰ ქრისტიანულ ბერძნულ წერილეფშე იძირე, ნამდა ღურელეფიშ გათელება პირველ საუკუნეს ხოლო ხვადუდ. მაგალთო, იესოქ ართ ღურელ ქალაქ ნაინიშ გოხოლუას გათელ, მაჟია — იაიროსიშ ჸუდეს. თეს გეძინელ, მოშინაფილ რე ხოლო ართ შემთხვევა, მუჟამსით პეტრექ ართ ქრისტიან ოსურ, ქურციკ (ტაბითა) გათელ. თიქ ქიმერთ ღურელ სვანჯუდუნ თი ადგილშა, ქილოც დო უკულ თქუ: „ტაბითა, გედირთ!“. თის ხეთეშე დართ სიცოცხლექ დო თექ შაყარელ ხალხიქ ქოძირ თინა. თე შემთხვევაშ უკულ ბრელქ ქირწმუნ ღორონთი. მუშო ოკო რაგადი თე ხალხი შხვეფწკუმა ხოლო ქოთქუანდეს, ნამდა იესოს დო განსაკუთრებულო იეჰოვას შეულებნა ღურელეფიშ გათელება (საქ. 9:36—42).

11. მუქ აღოლ ართ ბოშის დო მუჭო ელუკინ გურშა თიშ შემთხვევაქ შხვეფს?

¹¹ ღურელეფიშ გათელებაშ ხოლო ართ შემთხვევა მუნეფიშ თოლო ქოძირ პირველ საუკუნეშ მუსხირენ ქრისტიანქ. ართშა მოციქულ პავლე ქალაქ ტროას (ჩრდილო-დასავლეთ თურქეთი) ართ ჸუდეშ ჟინ ოთახის შეხვალამას ატარენდ. პავლეს შქა სერშა გეგრძელ რაგადიქ. ართ ახალგაზრდა ბოში ევტიქე აკოშკას გილახედ დო ურჩქილედ. ჭიჭე ხანშა თოლქ გეგთუღ დო მასმა სართულშე ქექთანთხ. შილებედ თიშა პირველო  ექიმ ლუკაქ მერთუკო დო ქოძირკო, ნამდა ცოცხალ ვა რდუ. თეშ უკულ პავლექ გიმილ თუდო, გურშა ქიხუტოლუ ღურელ დო თქუ: „ცოცხალ რე“. თე შემთხვევა მანგარო იმოქმედენდ დო გურშა ელუკინანდ არძას, მით მუშ თოლო ძირ თენა (საქ. 20:7—12).

12, 13. ნამ კითხვეფშე ოკო დეფიფქრათ?

¹² თაქ მოშინაფილ შემთხვევეფქ მართაცალო თქვა ხოლო მერჩან ოკო იმენდი, ნამდა სიცოცხლეშ მუმაჩამალ ღორონც შეულებ გათელას ღურელეფი. ღორონთიშ ართგურ მსახურეფქ ელიაქ, იესოქ დო პეტრექ მუნეფიშ თოლო ქოძირეს, მუჭო ათელენდ იეჰოვა ღურელეფს. მარა მუშ რაგად შილებე თინეფშე, მით თი დროს ცხოვრენდ, მუჟამსით თეცალ სასწაულეფ ვა მოხვალამე? ქოწანდესო თინეფს, ნამდა ღორონთ მომავალს გათელენდ ღურელეფს? ქოფიქრენდესო თინეფ მართაცალო, ნამუთიქ თქუ: „მიჩქ, ნამდა [ჩქიმ ჯიმა] გეთელებუ, გათელებაშ დროს, ბოლო დღას“? მუშენ უღუდ თის მომავალიშ იმენდი დო თქვა მუ გარზენა იმენდის?

¹³ მუჭოთ ბიბლიაშე იძირენ, ღორონთიშ ართგურ მსახურეფს წანდეს, ნამდა ღურელეფიშ გათელება დასურო იჸუაფუდ. ქობძირათ მუსხირენ მაგალითი.

14. მუს ბგურაფლენთ ღურელეფიშ გათელებაშ გურშენ აბრაამიშ შემთხვევაშე?

¹⁴ დეფიქრით, მუ უწუ ღორონთიქ აბრაამს მუშ ნანატრ სქუა, ისაკიშ გურშენ. იეჰოვაქ თქუ: „მიდეჸონ სქან ართკაკალ სქუა ისაკი, ნამუთ მანგარო გიჸორს . . . დო შეწირ თინა ოჭვალ მსხვერპლო“ (დაბ. 22:2). წერმიდგინით, მუს იგინანდ აბრაამი. იეჰოვაქ პირობა დოდვ, ნამდა აბრაამიშ შთამომავალით იკურთხებუდ არძა ხალხი (დაბ. 13:14—16; 18:18; რომ. 4:17, 18). იეჰოვაქ თინა ხოლო თქუ, ნამდა თინეფ ისაკშე იკურთხებდეს (დაბ. 21:12). მარა აბრაამი ისაკის მსხვერპლო შეწირენდ-და, მუჭო შისრულებუდ თენა? მუჭოთ ღორონთიშ შთაგონებათ პავლექ ჭარუნ, აბრაამს წანდ, ნამდა ღორონც შეულებუდ ისაკიშ გათელება (წეკითხით ებრაელები 11:17—19). * მარა ბიბლიაშე სოთინ ვეძირე, ნამდა აბრაამი მუსხირენ საათშა, დღაშა ვარდა მარაშა ელუდ ისაკიშ გათელებას. აბრაამს ვა უჩქუდ, მუჟამ მოხვადუდ თენა, მარა ჯერდ იეჰოვა თეს გაკეთენდუნ.

15. მუშ იმენდ უღუდ იობის?

¹⁵ პატრიარქ იობის ხოლო უღუდ ღურელეფიშ გათელებაშ იმენდი. თის უჩქუდ, ნამდა მოკვათილ ჯას შეულებუდ კინ ახალცალო გეუფალუდკო, მარა ჩქინ გურშენ თენა  ვერაგადე (იობ. 14:7—12; 19:25—27). მუჟამსით კოჩი დოღურუნ, თის ვეშულებ მუშ დუდიშ გათელება (2 სამ. 12:23; ფსალმ. 89:48). მუშო ოკო რაგად, თენა თის ვა ნიშნენს, ღორონც ვეშულებ კოჩიშ გათელება. იობის წანდ, ნამდა იეჰოვა მუშ დროს ქიგიშინანდ თის (წეკითხით იობი 14:13—15). * იობის ზუსტას ვა უჩქუდ, მუჟამ მოხვადუდ თენა. თის ჯერდ, ნამდა კოჩიშ გუმაჭყაფალს შეულებუდ დო ქოთ ოკოდ ღურელეფიშ გათელება.

16. მუჭო ელუკინ გურშა ანგელოზიქ დანიელს?

¹⁶ მორთ, დეფიფქრათ წინასწარმეტყველ დანიელიშ გურშენ, ნამუთ ებრაულ წერილეფს რე მოშინაფილი. თინა წანეფიშ დინახალე ართგურო მსახურენდ დო ღორონთ ხოლო ირიათო ელურდ თის. ართშა ანგელოზიქ დანიელს უწუ: „ძვირფას კოჩი, მშვიდობა გიღდას, გემანგარი!“ (დან. 9:22, 23; 10:11, 18, 19).

17, 18. მომავალიშ მუ იმენდი მეჩ ანგელოზიქ დანიელს?

¹⁷ დანიელი 100 წანას რდუ მეჭირნაფილ დო ბრელ ხანიშ სიცოცხლე ვაფუდ დოსკილადირი. თინა შილებე ფიქრენდკო, მუ ელუდ წოხლე. დღას გეთელებუდუო დანიელი? მუშო ოკო რაგად, ქო! დანიელიშ წიგნი ითებუ სიტყვეფით, ნამუთ ღორონთიქ თის უწუ: „ქიმერთ ღურა დღაშა; მისვანჯუქ“ (დან. 12:13). მოხუცებულ დანიელს უჩქუდ, ნამდა ღურელ კოჩშო ვა არსებენდ „ვართ გეგმა, ვართ რჩქინა, ვართ სიბრძნე სამარეს“. თინა მალას თე შარას გიაჸუნუდ (ეკლ. 9:10). მარა დანიელშო თეთ ვეთებუდ ირფელ.

¹⁸ იეჰოვაშ ანგელოზიქ დანიელს უწუ, ნამდა გეთელებუდ „მუშ წილიშ მიოღებელო დღალეფიშ ბოლოს“. დანიელს ვა უჩქუდ, ზუსტას მუჟამ მოხვადუდ თენა. თის არჩქილედ, ნამდა მალას დოღურუდ დო მისვანჯუდ. მარა დანიელს თინა ხოლო უჩქუდ, ნამდა „მუშ წილიშ მიოღებელო“ გეთელებუდ დო თენა მოხვადუდ თიშ ღურაშე ბრელ ხანიშ უკულ „დღალეფიშ ბოლოს“. „იერუსალიმიშ ბიბლიას“ დანიელშა მეჩამილ დაპირება თაშ ინოჭარ: „გეთელებუქ გოკუთნუნ თიშ მიოღებელო დროშ ბოლოს“.

19, 20. ა) მუშა მარწმუნენა მართაშ გიმორჩქინელ რწმენა დო თე სტატიას გარჩიებულ შხვა შემთხვევეფი? ბ) მუს გუვარჩიენთ ანწიან სტატიას?

¹⁹ მართას უღუდ თიშ მიზეზი დეჯერკო, ნამდა თიშ ართგურ ჯიმა, ლაზარე გეთელებუდ, „გათელებაშ დროს, ბოლო დღას“. დანიელშა მეჩამილ დაპირება დო მართაშ მანგარ რწმენა ქრისტიანეფს თიშ იმენდის მარზენა, ნამდა იჸუაფ ღურელეფიშ გათელება.

²⁰ ჯვეშ დროს მოხვალამირ ღურელეფიშ გათელებაშ შემთხვევეფ მოძირანა, ნამდა თენა მომავალს ხოლო მოხვადუ. ღორონთიშ ართგურ მსახურეფს, მით ბიბლიურ დროს ცხოვრენდესინ, ჯერდეს, ღურელეფ გეთელებდესინ. არსებენსო მუთუნნერ მტკიცებულება, ნამდა ღურელეფიშ გათელებაშ გურშენ წინასწარმეტყველება საუკუნეეფიშ უკულ შისრულებ? თაშ ქორენ-და, მეტ მიზეზ მაღვენუნა, ბჯერდან, მომავალს ღურელეფ გეთელებნა. მარა მუჟამ მოურს თე დღა? თე კითხვეფს ანწიან სტატიას გუვარჩიენთ.