1, 2. მუშენ რე გონივრულ ურჩქილათ ჩქინ გუმაჭყაფალს მნიშვნელოვან გადაწყვეტილებეფიშ მეღებაშ დროს? (ქოძირით სურათ თე გვერდის).

მუჭოთ ახალგაზრდას ალბათ ბრელ რჩევას გარზენა, ნამუთ თქვან მომავალს ოხუ. მასწავლებელეფ დო შხვეფ შილებე ელაიჩანდან მიღათ უმაღლეს განათლება დო ქიშუათ მაღალ ხელფასიან სამუშა. მარა იეჰოვა განსხვავებულ რჩევას გარზენა. მუშო ოკო რაგად, თის ოკო ჯგირო იგურუათ, ნამდა სკოლაშ თებაშ უკულ შეგალებუან დუდიშ ეჯუმალაქ (კოლ. 3:23). მარა მნიშვნელოვან გადაწყვეტილებეფიშ მეღებაშ დროს იეჰოვა გარზენა პრინციპეფს, ნამუთ მიგეხვარებნა ირიათო თიშ ნებაშ შესაბამისო იცხოვრათ (მათ. 24:14).

² დღას ვაგგოჭყორდან, ნამდა იეჰოვა მთლიან სურათის ორწყე; თის უჩქჷ მუ მოხვადუ მომავალს დო თინა ხოლო, მუსხით ხოლოს რე თე უბადო ქიანაშ განადგურება (ეს. 46:10; მათ. 24:3, 36). თეს გეძინელ, უჩქჷ, მუ მომღანა კმაყოფილება დო ბედნერობას დო მუქ შილებე გურ გომტახან ვარდა უბედურო გინმოშკვან. ვა უღჷ მნიშვნელობა, მუდგა ჯგირ რჩევა ვამჩან კოჩიქ, ღორონთიშ სიტყვაშა ვა რე გერსხილ-და, თინა გონივრულ ვეჸი (იგავ. 19:21).

3, 4. მუჭო იმოქმედ გლახა რჩევაშ მორჩქილაფაქ პირველ წყვილ დო თინეფიშ გამნარყწკუმა?

³ კაცობრიობაშ ისტორიას სატანა რდუ პირველ, მიდგაქ გლახა რჩევეფ მეჩჷ ადამიანეფს. თიქ ევას უწუ, ნამდა ბედნერეფ იჸუაფდეს, მუჟამსით მუნეფიშით გეგნოჭყვიდუნდეს, მუჭო იცხოვრესკო (დაბ. 3:1—6). სინამდვილეს თის ეგოისტურ მიზნეფ უღუდ. სატანას ოკოდ ადამ დო ევაქ დო თინეფიშ გამნარყიქ მუს ემსახურესკო დო ვართ ხოლო იეჰოვას. მარა სატანას მუთუნ ვა უკეთებ თინეფშო. იეჰოვაქ მეჩჷ ირფელ მუთ ქუღდეს — სქვამ ბაღი ოცხოვრებელო დო სრულყოფილ ჯამრთელობა.

⁴ სანარღოთ, ადამ დო ევაქ ვედემორჩილეს ღორონც დო დეშორეს მუნეფიშ გუმაჭყაფალს. თეს გლახა შედეგეფქ ქუმაჸუნ. მუჭოთ ყვავილ ხუმუ მიკოწილუაშ უკულ, თეშ თინეფქ ხოლო ჭიჭე-ჭიჭეთ დირჩინეს დო დოღურეს. თინეფიშ გამნარყშა ხოლო გევრცელ ცოდაქ დო შედეგო არძა იპტანჯებუთ (რომ. 5:12). თეშ უმკუჯინუო, ხალხიშ უმენტაშის იშენით ვაკო დემორჩილას ღორონც. თინეფს მუნეფიშ გემოშა ოკონა იცხოვრან (ეფეს. 2:1—3). შედეგეფშე არგამათ იძირე, ნამდა „ვა არსებენს სიბრძნე . . . ნამუთ იეჰოვას დეპირისპირებ“ (იგავ. 21:30).

5. მუშა რდუ ღორონთ დარწმუნებულ დო ქუმოხვადუო თაშ?

⁵ იეჰოვა დარწმუნებულ რდუ, ნამდა ნამთინე ადამიან, თინეფ შკას ახალგაზრდეფ ხოლო, დოგორუნდეს დო ემსახურებდეს თის (ფსალმ. 103:17, 18; 110:3). თე ახალგაზრდეფ ძვირფასეფ რენა ღორონთიშ თოლს. სი ხოლო რექო თინეფ შკას? თაშ ქორენ-და, ვედგეეჭვას, ღორონთ სი ხოლო გარზენს „ირფელ ჯგირს“, ნამდა ბედნერ რდე (წეკითხით ფსალმუნი 103:5; * იგავ. 10:22). მორთ, გუვარჩუათ ოთხ მუდგარენ, მუთ მიშმურს „ირფელ ჯგირშა“, თენა რე სულიერ საზრდო, ჯგირ მეგობრეფ, სწორ მიზნეფ დო ნამდვილ თავისუფლება.

6. მუშენ ოკო იბზრუნათ ჩქინ სულიერ მოთხოვნილებეფშე დო მუჭო ზრუნენს იეჰოვა თე მხარეთ ჩქინო?

⁶ ცხოველეფიშ გინაწონს ჩქი მიღნა სულიერ მოთხოვნილებეფ, ნამუშ დაკმაყოფილება ხვალე ჩქინ გუმაჭყაფალს შეულებ (მათ. 4:4). მუჟამსით ქუმურჩქილუანთ ღორონც, თინა ქომჩანა გამჭრიახობას, სიბრძნეს დო ბედნერობას. იესოქ თქუ: „ბედნერეფ რენა სულიერს მოჸუმენაფილეფი“ (მათ. 5:3). იეჰოვა მუშ სიტყვაშ საშვალებათ აკმაყოფილენს ჩქინ სულიერ მოთხოვნილებეფს დო გიმირინუანს „ართგურ დო გონიერ მონას“, ნამდა ხვეიანო მიღდან სულიერ საზრდო (მათ. 24:45). ნამდვილო, მოხიოლნა, ნამდა მიღნა შხვადოშხვანერ სულიერ საზრდო (ეს. 65:13, 14).

7. მუ ჯგირობუა მოუღ სულიერ საზრდოშ მეღებას, ნამუსით ღორონთ მარზენა?

⁷ სულიერ საზრდო, ნამუთ ღორონთშე მოურს, მერჩანა სიბრძნეს დო სწორ აზროვნებას, ნამუთ ირნერო დაიცვენა (წეკითხით იგავები 2:10—14). * მაგალთო, თენა მიგეხვარებნა ვედეჯერათ, ნამდა ითამ გუმაჭყაფალ ვა არსებენს დო ნამდვილ ბედნერობა ფარას დო მატერიალურ ნივთეფს მოუღ. თეს გეძინელ, თქვა შეგალებენა ქეწინააღმდეგათ თიცალ სურვილეფს დო ჩვევეფს, ნამუთ გლახათ იმოქმედენს თქვანწკუმა. თაშ ნამდა, გაგრძელით ღორონთიშ სიბრძნეშ მეღება დო სწორ აზროვნებაშ გავითარება. თაშ ქიმიქციებუთ-და, თქვა პირადო დერწმუნებუთ,  ნამდა იეჰოვას უჸორთ დო არძაშ უჯგუშ ოკო თქვანო (ფსალმ. 34:8; ეს. 48:17, 18).

8. მუშენ ოკო დეახლოვე იეჰოვას ამდღარშე დო მუ ჯგირობუას მოიღანს თენა მომავალს?

⁸ მალას, სატანაშ ქვეყნიერება გენადგურებ დო ხვალე იეჰოვა იჸუაფ ჩქინ დამცველ. სინამდვილეს, მოურს დრო, მუჟამსით მთლიანო თიშა იპჸით დამოკიდებულ (აბაკ. 3:2, 12—19). ასე რე დრო დევეახლოვათ ჩქინ ზეციერ მუმას დო გემამნგარათ თიშ ნდობა (2 პეტ. 2:9). თაშ ქიმიფქციებუთ-და, მუდგაქ ვა მოხვადასინ, ფსალმუნმაბირე დავითცალო იბგინანთ დუც, ნამუქით ჭარჷ: „ირიათო თოლშა აწომრე იეჰოვა. მუთუნს ვეკვახაბარკუქ, მუშენდა თინა ჩქიმ მარძგვანშე რე“ (ფსალმ. 16:8).

9. ა) მუს გაკეთენს იეჰოვა იოანეშ 6:44-იშ თანახმათ? ბ) მუთ გენესხვავებ თანამორწმუნეეფიშ გაჩინებაფა შხვეფიშ გაჩინებაფაშე?

⁹ მუჟამსით პირველო შეხვადუთ პიროვნებას, ნამუთ ვა რე იეჰოვაშ მოწმე, მუსხით ჯგირო შეგალებენა თიშ გაჩინებაფა? შილებე ხვალე თიშ სახელ ქიგეგათ დო თინა, მუნერ მეჯინა უღჷ. მარა, მუჟამსით იეჰოვაშ მოწმეს იჩინებაფუანთ, ბრელ მუთუნ გიჩქნა თიშ გურშენ. მაგალთო თინა, ნამდა თის უჸორს იეჰოვა. თეს გეძინელ, თინა ხოლო გიჩქნა, ნამდა იეჰოვაქ მუდგარენ ჯგირ ძირჷ თიშ გურს დო თიშენ მეჩჷ საშვალება, გინირთუკო მუშ სულიერ ოჯახიშ წევრო (წეკითხით იოანე 6:44). * ვა უღჷ მნიშვნელობა, მუ ეროვნებაშ რე დო მუნერ წარსულ უღუდ თე პიროვნებას, თქვა ბრელ მუდგარენ გიჩქნა ართიანშენ.

10, 11. მუ საერთო უღჷ იეჰოვაშ ხალხის დო მუ ჯგირობუა მოუღჷ თინეფშო თეს?

¹⁰ მუჟამსით იეჰოვაშ მოწმეს შეხვადუთ, გიჩქნა, ნამდა გაერთიანენა თინა, მუთ არძაშ უმოს მნიშვნელოვან რე. შხვადოშხვა ეროვნებაშ რდათინ ხოლო, ართიანიშ გარჩქილენა, მუშენდა ჭეშმარიტებაშ „სუფთა ნინაშა“ რაგადანთ (სოფ. 3:9). თენა თის ნიშნენს, ნამდა გიღნა ღორონთიშ რწმენა, მომავალიშ იმენდ დო ცხოვრენთ თიშ ნორმეფით. თე ირფელ გოხვარნა გიღდან ართიანიშ ნდობა დო გავითარათ მეგობრობა, ნამუთ მარადიულო გეგრძელებ.

¹¹ თეგვარო, მუჟამსით იეჰოვას ომსახურუთ, შეილებნა ნამდვილო თქუათ, ნამდა  არძაშ უჯგუშ მეგობრეფ რჸუნა მთელ მსოფლიოს. მართალ რე, უმენტაშის ვეჩინენთ, მარა თინეფ იშენით თქვან მეგობრეფ რენა. იეჰოვაშ ხალხიშ გარდა, მის უღჷ თეცალ ძვირფას შესაძლებლობა?!

12. მუნერ მიზნეფიშ მეჭირნაფას ოცადუთ?

¹² წეკითხით ეკლესიასტე 11:9—12:1. * ქოიღუნანო მიზნეფ დო ქაცადუთო თინეფიშ მეჭირნაფას? შილებე მიზანო გიღდან იკითხათ ბიბლია ირ დღას, ოცადუდათ უჯგუშო მემზადათ კრებაშ შეხვალამეფშო ვარდა შხვეფს გეგნოჩათ ბიბლიურ ცნობა. მუჭო გინაფლენთ დუც, მუჟამსით თეს ჯგირ შედეგეფ მოჸუნს დო შხვეფ ხოლო გოცქვანა? მუშო ოკო რაგად, კმაყოფილ რეთ დო გოხიოლნა. თენა თაშ ოკო რდას, მუშენდა იესოცალო თქვა ხოლო თქვან სურვილიშ წოხოლე ღორონთიშ ნებაშ შესრულება გიორინეთ (ფსალმ. 40:8; იგავ. 27:11).

13. მუშენ მოუღ ღორონთიშ მსახურებას ბედნერობა?

¹³ იეჰოვაშ მსახურებაშ პირველ ადგილშა გერნაფა ბედნერობას მოიღანა დო თქვან ცხოვრებას უმოს აზრიანს გინაშკვანს. პავლე მოციქულქ ჭარჷ: „მტკიცას რდათ, ირო ბრელ იხანდით უფალიშ საქმეს, მუშენდა გიჩქნა, ნამდა ტყურელო ვა ხანდენთ უფალშო“ (1 კორ. 15:58). თინეფ, მიდგას მთელ ყურადღება ქვეყნიურ საქმეეფშა აფნა გინოღალირ, მუდგა წარმატებულო ვეძირედან, ბედნერეფ ვა რენა (ლუკ. 9:25). თენა ჯგირო იძირე მეფე სოლომონიშ მაგალითშე (რომ. 15:4).

14. მუშ გურაფა შეილებნა სოლომონიშ მაგალითშე?

¹⁴ არძაშ უმოს ქონებიერ დო ძალაუფლება უღუდუნ ფერ მეფე სოლომონქ მუშ დუდ გეგმოცად. თიქ გურს თქუ: „მორთ, გეგმობცადუნქ ხიოლს. ქობძირუნქ ირფელს, მუთ ჯგირ რე“ (ეკლ. 2:1—10). თიქ აშენ ჸუდეეფ, გაშენ ბაღეფ დო პარკეფ; თეს გეძინელ, მუთ ოკოდუნ, ირფელს ორთუდ. ქორდუო კმაყოფილ თე ირფელიშ უკულ? თეშ პასუხის კინ სოლომონი მარზენა. თიქ ჭარჷ: „დევეკვირ ირნერ საქმეს, მუთ ჩქიმ ხეთ მიკეთებ . . . პოტიკ ჸოფე ირფელ . . . მუთუნს ვა მუღჷ სარგებელ“ (ეკლ. 2:11). თენა დასურო ჯგირ გაკვეთილ რე, ნამდგაშე ღირჷ დაფიქრება.

15. მუჭოთ ფსალმუნიშ 32:8-ს რე მოშინაფილ, მუშენ რე რწმენა მნიშვნელოვან დო მუ ჯგირობუა მოუღ თის?

¹⁵ იეჰოვას ვაკო საკუთარ შეცდომეფშე დო გლახა შედეგეფშე დიგურუათ ჭკუა. რწმენა რე საჭირო, ნამდა დემორჩილათ ღორონც დო პირველ ადგილს თიშ ნებაშ შესრულება ქიგიორინუათ. თეშ კეთება დღას ვა გოიტახნა გურს, მუშენდა იეჰოვა დღას ვეგიჭყოლიდუანს „ჸოროფას, ნამუთ თიშ სახელიშ გურშენ გიმირჩქინით“ (ებრ. 6:10). თაშ ნამდა, ეცადით გემანგარათ რწმენა დო დერწმუნებუთ, ნამდა თქვან ზეციერ მუმას არძაშ უჯგუშ ოკო თქვანო (წეკითხით ფსალმუნი 32:8). *

16. მუშენ ოკო დუვაფასათ თავისუფლება დო მუჭო გიმიბრინუათ თინა გონივრულო?

¹⁶ „სოდეთ იეჰოვაშ შურ რენ თექ, თავისუფლება რე“ (2 კორ. 3:17). იეჰოვას უჸორს თავისუფლება, ათეშენ ჩქი ხოლო ნებაშ თავისუფლება მუჩეს. მარა თის ოკო გონივრულო გეგმიბრინუათ თინა, მუთ დამცვენა ზიანშე. შილებე იჩინენდათ თიცალ ახალგაზრდეფს, მით პორნოგრაფიას უჯინე ვარდა  უზნეოთ ცხოვრენს, ექსტრემალურ სპორტის მეჸუნს, ნარკოტიკეფს გიმირინუანს ვარდა უზომეთ შუნს. მართალ რე, თე ირფელშე დროებით სიამოვნებას ღებულენა, მარა ხშირას თიცალ გლახა შედეგეფით ათენა, მუნერით რე ლახალა, წამალ დო ოშუმალშა დამოკიდებულება, დო მინშა ღურა ხოლო (გალ. 6:7, 8). არგამა რე, თინეფ ფიქრენა, ნამდა თავისუფლება უღნა, მარა სინამდვილეს დუც იღორენა (ტიტ. 3:3).

17, 18. ა) მუჭო მარზენა თავისუფლებას ღორონთიშ მორჩილება? ბ) მუ გაგებათ რდეს ადამ დო ევა უმოს თავისუფალ ვინემ ამდღანერ კათა?

¹⁷ დღას ქუგაიგებნანო მითინქ დელახ ბიბლიურ პრინციპეფ გიმირინუნ თიშენ? მუშო ოკო რაგად, იეჰოვაშ მორჩილება ირნერო მიცვენა დო თავისუფლებას ხოლო მარზენა (ფსალმ. 19:7—11). მუჟამსით თავისუფლებას გონივრულო, ღორონთიშ სრულყოფილ კანონეფ დო პრინციპეფიშ შესაბამისო გიმირინუანთ, იეჰოვაშ დო მშობლეფიშ ნდობას უმოსო იმსახურენთ. შედეგო შილებე მშობლეფქ მეტ თავისუფლება ქიმერჩან. სინამდვილეს, იეჰოვაშ განზრახვა რე მუშ ართგურ მსახურეფს სრულყოფილ თავისუფლება ქიმეჩას, ნამდგას ბიბლია „ღორონთიშ სქუალეფიშ დიდებულ თავისუფლებას“ უძახ (რომ. 8:21).

¹⁸ ადამ დო ევას უღდეს თეცალ თავისუფლება. ბრელ შემზღუდველ მითითება მეჩუო ღორონთიქ თინეფს ედემიშ ბაღის? ვარ, ხვალე ართ — თინეფს ოკო ვა უჭკუმდესკო ართ-ართ ჯაშ ნაყოფი (დაბ. 2:9, 17). მანგარ შემზღუდველ დო ვედიცვებედუნ ფერ მითითება რდუო თენა? მუშო ოკო რაგად, ვარ! დეფიქრით, მუსხი კანონეფ რე ამდღა ქვეყნიერებას, ნამდგაშ მორჩილებას ანძალუაფნა ხალხის?

19. მუჭო მოგურუანა იეჰოვა დო იესო თავისუფლებაშ გიმორნაფას?

¹⁹ იეჰოვა ჯგირო ოქცუ მუშ მსახურეფს. თინა ვა მარზენა აუარებელ კანონეფს; პირიქით, მოთვინებათ მოგურუანა მივაჸუნათ ჸოროფაშ კანონს. თის ოკო იფცხოვრათ ბიბლიურ ნორმეფით დო ბჯოგდან თინა, მუთ გლახა რე (რომ. 12:9). გვალას ქადაქებაშ დროს იესოქ მიშინუ მიზეზეფ, მუშენ იქციებ ხალხ გლახათ (მათ. 5:27, 28). მუჭოთ ღორონთიშ სამეფოშ მეფე, ახალ ქიანას იესო გაგრძელენს ჩქინ გურაფას დო მიმეხვარებნა ჯგირ დო ფურიშ გარჩიებას (ებრ. 1:9). თინა ფიზიკურ დო გონებრივ სრულყოფილებას ხოლო დომრთინუანა. წერმიდგინით, მუშმაჯგირა იჸუაფ, მუჟამსით გლახაშ კეთებაშ ცდუნება ვა მაღვენუნა დო არასრულყოფილება ვეშმაწუხენა. საბოლათ, გებხარებუთ დიდებულ თავისუფლებათ, ნამუთ იეჰოვაქ დემეპირეს.

20. ა) მუჭო გიმირინუანს იეჰოვა მუშ თავისუფლებას? ა) მუ ჯგირობუას მომღანა ღორონთიშ მაგალითიშ მეჸუნა?

²⁰ მუშო ოკო რაგად, უსაზღვრო თავისუფლება დღას ვა მაღვენუნა. ჩქი ირიათო ღორონთიშ დო შხვეფიშ ჸოროფა ოკო მამოძრავენდან. იეჰოვას ოკო თიშ მაგალითის მივაჸუნათ. თის უსაზღვრო თავისუფლება უღჷ, მარა ჸოროფათ ხემძღვანელენს მუშ გუნაჭყეფუეფს (1 იოან. 4:7, 8). თაშ ნამდა, ნამდვილ თავისუფლება თიმწკუმა მაღვენუნა, მუჟამსით იეჰოვაცალო ჩქი ხოლო ჸოროფათ იფხემძღვანელენთ.

21. ა) მუჭო გიმოხანტჷ დავითიქ იეჰოვაშ მარდულობა? ბ) მუს გუვარჩიენთ თეშ უკულიან სტატიას?

²¹ ქორეთო მარდულ თი ირფელ ჯგირშენ მუდგას იეჰოვა გარზენა? თინა ვა გარკენა სულიერ საზრდოს, გოხვარნა რჸუნდან ჯგირ მეგობრეფ დო გიღდან სწორ მიზნეფ, გოპირნა სრულყოფილ თავისუფლებას დო ხოლო ბრელ მუთუნს (ფსალმ. 103:5). ალბათ თქვა ხოლო დავითცალო გინაფლენთ დუც, ნამდგაქ ლოცვას თეცალ სიტყვეფ უწუ ღორონც: „სი მოგურუანქ სიცოცხლეშ შარას. სქან სახე მანგარო მახარენს; ნეტარება რე სქან მარძგვან ხეს მარადიულო“ (ფსალმ. 16:11). თეშ უკულიან სტატიას გუვარჩიენთ მნიშვნელოვან აზრეფს მა-16 ფსალმუნშე, სოვრეშეთ ქობძირუნთ, მუ რე საჭირო თიშო, ნამდა ირიათო კმაყოფილეფ ვორდათ ცხოვრებას.