2 კორინთელეფიშ 12:2, 3-ს პავლე მიშინუანს კოჩის, ნამუთ „მასმა ცაშახ იჸუ ჸუნაფილქ“. მი რდუ თინა? კორინთელეფშა მეჭარილ წერილს პავლე მიშინუანს, ნამდა თე კოჩის ღორონთ მოციქულო ირინუანდჷ (2 კორ. 11:5, 23). თეშ უკულ თინა მიშინუანს „ხილუეფს დო გამოცხადებეფს“. პავლე თე კონტექსტის შხვა ჯიმალეფს ვემიშინუანს. ლოგიკურ რე იფიფქრათ, ნამდა თინა თი პიროვნებას, მიდგაქ მიღჷ „ხილუეფ დო გამოცხადებეფ“, მუშ დუც გულისხმენდჷ (2 კორ. 12:1, 5).

თაშ ნამდა, შემლებნა ფთქუათ, პავლე რდუ თი კოჩ, ნამუთ „მასმა ცაშახ“ დო „სამოთხეშა“ იჸუ ჸუნაფილქ (2 კორ. 12:2—4). თინა მიშინუანს „გამოცხადებეფს“, მუთ ნიშნენს თი მოვლენეფიშ გაცხადებას, ნამდგაქ მომავალს ოკო მოხვადას.

მუ რე თი „მასმა ცა“, ნამუთ პავლექ ძირჷ?

ბიბლიას „ცა“ შილებე პირდაპირ გაგებათ ცაშა მეუთითენდას (დაბ. 11:4; 27:28; მათ. 6:26). მარა „ცას“ შხვა მნიშვნელობეფ ხოლო უღჷ. მინშა თინა ადამიანურ მართველობას განასახიერენს (დან. 4:20—22). ვარდა შილებე ღორონთიშ მართველობაშა ხოლო მეუთითენდას (გამოცხ. 21:1).

მუ იგულისხმებ „მასმა ცას“, ნამუთ პავლექ ძირჷ? ბიბლია მინშა მუდგარენ საკითხის სუმშა იმეორენს, ნამდა ხაზ გუსვას აზრის ვარდა გამანგარას თიშ მნიშვნელობა (ეს. 6:3; ეზეკ. 21:27; გამოცხ. 4:8). თეგვარო, მუჟამსით პავლექ „მასმა ცა“ მიშინუ, თეთ ხაზ გუსვჷ აღმატებულ დო დიდებულ მესიანურ სამეფოს, ნამუსით იესო ხემძღვანელენს მუშ 144 000 თანამართველწკუმა ართო (ქოძირით „საკვლევი ცნობარი“, თემა: „ზეცა, ცა“). მუჭოთ პეტრე მოციქულქ ჭარჷ, „ჩქი თიშ დუნაპირებუთ ველუთ ახალ ცას დო ახალ დედამიწას“ (2 პეტ. 3:13).

მუს გულისხმენდჷ პავლე „სამოთხეს“?

„სამოთხეშა“ შილებე შხვადოშხვა მუდგარენ იგულისხმებდას: 1) დუდშე სამოთხე დედამიწას რდუ, ათეშენ ლოგიკურ რე იფიფქრათ, ნამდა თეს იგულისხმებ სამოთხე, ნამუთ მომავალს მელნა; 2) თინა შილებე მეუთითენდას თი სულიერ მდგომარეობაშა, ნამუთ ღორონთიშ ხალხის აღვენუ ახალ ქვეყნიერებას; 3) თის შილებე იგულისხმებდას დიდებულ მდგომარეობა ზეცას, „ღორონთიშ სამოთხეს“, მუჭოთ თენა გამოცხადებაშ 2:7-ის რე მოშინაფილ (ქოძირით 2015 წანაშ 15 კვირკვეშ „გინაჯინალ კოშკი“, გვ. 8; აბზ. 8).

შილებე პავლე 2 კორინთელეფიშ 12:4-ის ეჭარილ სიტუაციას თე სუმხოლოს ართო გულისხმენდკო.

მორთ, შევაჯამათ:

2 კორინთელეფიშ 12:2-ს მოშინაფილ „მასმა ცას“ იგულისხმებ „ახალ ცა“, მესიანურ სამეფო, ნამდგას ხემძღვანელენს იესო ქრისტე 144 000 თანამართველწკუმა ართო (2 პეტ. 3:13).

თინა „მასმა ცათ“ რე მოშინაფილ, თიშ ოძირაფალო, ნამდა ღორონთიშ სამეფო მართველობაშ აღმატებულ ფორმა რე.

„სამოთხეს“, სოდეთ პავლექ იჸუ „ჸუნაფილქ“, შილებე იგულისხმებდას: 1) სამოთხე, ნამუთ მალას დედამიწას იჸუაფ, 2) სულიერ სამოთხე, ნამუთ ბრელით აღმატებულ რე ამდღანერ სულიერ სამოთხეშე დო 3) „ღორონთიშ სამოთხე“, ნამუთ ზეცას დო დედამიწას ართდროულო იარსებენს.

თეგვარო, ახალ ქვეყნიერებას ახალ ცა დო ახალ დედამიწა იჸუაფ. თენა იჸუაფ ახალ შეთანხმება, ნამდგაშა მიშეშას იჸი ზეციურ სამეფო დო კაცობრიობა, ნამუთ ემსახურებუ იეჰოვას სამოთხეს, დედამიწას.