1, 2. მუს გუვარჩიენთ თე სტატიას?

მინშა შილებე ფიფქრენდათ, ნამდა ცხოვრება ნაბეტან ჭიჭე დო გაჭირებათ ეფშა რე (იობ. 14:1). ათეშენ გასაკვირ ვა რე, ნამდა კანკალეშა გურგოტახილეფ ვორეთ. ჯვეშო იეჰოვაშ ბრელ მსახურ გინაფლენდჷ თაშ დუდის. ნამთინე ღურას ხოლო ნატრენდჷ (1 მეფ. 19:2—4; იობ. 3:1—3, 11; 7:15, 16). მარა იეჰოვა, მიდგას თინეფ ონდუდეს, ირიათო გურშა ელუკინანდჷ დო ამანგარენდჷ მუშ მსახურეფს. თინეფიშ მაგალითეფქ თიშ გურშენ იჭარ, ნამდა ჩქი ემქექუესკო გურშა დო ქუდმოგურუესკო (რომ. 15:4).

² თე სტატიას ჩქი გუვარჩიენთ იეჰოვაშ მუსხირენ მსახურიშ მაგალითის, ნამდგაქ გიორჯგინ გურიშგუმატახალ სიტუაციეფს. თენეფ რენა იაკობიშ სქუა იოსები, ქომონჯღურელ ნაომი დო თიშ ნოსა რუთი, ლევიან, ნამდგაქ 73-ა ფსალმუნ ჭარჷ დო მოციქულ პეტრე. მუჭო გამანგარ იეჰოვაქ თინეფ? დო მუშ გურაფა შემლებნა პირადო ჩქი თინეფიშ მაგალითეფშე? თე კითხვეფიშ პასუხეფ დუმარწმუნენა, ნამდა „იეჰოვა ხოლოს რე გურგოტახილეფწკუმა“ დო „თინა ირსხენს შურაკოჭირებულეფს“ (ფსალმ. 34:18).

3, 4. მუქ გიოტირხჷ იოსების დუდის, ახალგაზრდა რდუნ თეშ?

³ სოდგარენ 17 წანერ იოსებიქ, ჟირ სიზმარ ძირჷ, ნამუთ იეჰოვაშე რდუ. თე სიზმარეფშე იძირედჷ, ნამდა იოსებ მიღენდჷ განსაკუთრებულ მდგომარეობას დო ოჯახიშ წევრეფ პატის ცენდესდკონ იჸიდ თის (დაბ. 37:5—10). მარა თეშ უკულ ხეთეშე, იოსებიშ ცხოვრებაქ გლახაშა დითირ. პატიცემაშ გიმორჩქინა ვარინ, ჯიმალეფქ თინა მონათ გეგმოჩეს. იოსებიქ ეგვიპტელიშ, სახელო ფოტიფარიშ, მსახურო გინირთჷ (დაბ. 37:21—28). თინა მუამუშიშ საჸოროფო სქუა რდუ, მარა ასე  თი კოჩიშ უბრალო მონათ გინირთჷ, მით იეჰოვას ვეჩინენდჷ (დაბ. 39:1).

⁴ თეშ უკულ იოსებიშ მდგომარეობაქ ხოლო უმოსო გეუფრაშ. ფოტიფარიშ ოსურქ თის გაუპატიურებაშ მცდელობა ქეკაბრალ. ფოტიფარქ, მუთუნ ვაგმურკვიებუნ თეშ, ქიმთახუნუ თინა ციხეს დო ჯაჭვიშ ბორკილეფ ქიგედვჷ (დაბ. 39:14—20; ფსალმ. 105:17, 18). წერმიდგინით, მუჭო იგინანდჷ დუდის ახალგაზრდა იოსები, მუჟამსით თის გაუპატიურებაშ მცდელობა ქეკაბრალეს. დო დეფიქრით, მუ გლახა მუდგარენეფს თქუანდჷ ხალხ თიშ ღორონთ იეჰოვაშ გურშენ. მუშო ოკო რაგად, იოსების უღუდ მიზეზ, ნამდა შურაკოჭირებულ ჸოფედკო!

5. მუჭო გიორჯგინ იოსებიქ გურიშგოტახუას?

⁵ მონობაშ დო ციხეს რინაშ დროს იოსებიშ არჩევან დო თავისუფლება შეზღუდულ რდუ. მუქ მეხვარ თის, ვადინუკო წონასწორობა? თინა თიშე ფიქრენდჷ, მუჭო აკეთკო თი საქმე ჯგირო, მუდგაქ დევალ, დო ვართ ხოლო თიშე, მუდგაშ კეთება ვეშულებუდ. მუთ მთავარინ, იოსებშო მუშ ცხოვრებას არძაშე უმოს მნიშვნელოვან პიროვნება იეჰოვა რდუ. ათეშენ, იეჰოვაქ აკურთხ არძა საქმე, მუთ იოსებიქ აკეთ (დაბ. 39:21—23).

6. მუჭო შილებე იოსების გურშა ელუკინკო მუშ სიზმარეფქ?

⁶ იოსების შილებე თი წინასწარმეტყველურ სიზმარეფშე ფიქრ ხოლო ელუკინანდკო გურშა, ნამუთ წანეფიშ წოხოლე ძირჷ. თე სიზმარეფშე რჩქუდ, ნამდა კინ ქოძირუნდჷ ოჯახიშ წევრეფს დო მუშ მდგომარეობა გეუჯგუშებუდ. თექ ქოთ თაშ ქუმოხვად. მუჟამსით იოსებ სოდგარენ 37 წანერ რდუ, ქიდიჭყჷ თიშ წინასწარმეტყველურ სიზმარეფიშ სარკოთ შესრულებაქ (დაბ. 37:7, 9, 10; 42:6, 9).

7. მუჭოთ პირველ პეტრეშ 5:10-ის ჭარჷ, მუ მიმეხვარებნა, გავურზათ განსაცდელეფს?

⁷ ჩქი მუს ბგურაფლენთ? იოსებიშ ისტორია გუმოშინანა, ნამდა თე ქვეყნიერება სასტიკ რე დო ხალხშე უსამართლოთ მოქციებას ოკო ველდათ. შილებე თანამორწმუნექ  ხოლო ალმოჭუან გურ. მარა, მუჟამსით იეჰოვას ჩქინ კირდეთ ვარდა დუდიშ გითაფორაფალო მიფრჩქინანთ, გურ მანგარო ვა გომტირხუნა დო ვემვოტენთ თიშ მსახურებას (ფსალმ. 62:6, 7; წეკითხით 1 პეტრეშ 5:10). ქიგიშინით, ნამდა იოსებ სოდგარენ 17 წანერ რდუ, მუჟამსით იეჰოვაქ თის განსაკუთრებულ შარათ დოუდვჷ შეთანხმება. არგამა რე, ნამდა იეჰოვა ონდჷ მუშ ახალგაზრდა მსახურეფს. ამდღა ბრელ ახალგაზრდა გჷ იოსების. თინეფს ხოლო იოსებცალ რწმენა უღნა. თინეფშე ნამთინე უსამართლოთ ხე ციხეს, მუშენდა ვა დათმეს ღორონთიშ ართგურობა (ფსალმ. 110:3).

8. მუქ გიოტირხეს დუდის ნაომის დო რუთის?

⁸ მანგარ შქირენაშ გურშენ ნაომიქ დო თიშ ოჯახიქ ქიდიტუ იუდა დო ხიზანო ცხოვრენდეს მოაბის. თექ ნაომიშ ქომონჯიქ, ელიმელექიქ, დოღურ დო თე ოსურქ ჟირ ქომოლსქუაწკუმა ხვალე ქუდოსქიდ. ჭიჭე ხანშა ჟირხოლო სქუაქ მოაბელ ოსურეფშა, რუთი დო ორფაშა, დექორწინეს. სოდგარენ ვით წანაშ უკულ ნაომიშ ქომოლსქუალეფქ ხოლო დოღურეს, თინეფს სქუალეფ ვა ჸუნდეს დო თე ოსურეფქ ხოლო ხვალახეთ ქუდოსქიდეს (რუთ. 1:1—5). წერმიდგინით, მუ დამწუხრებულ იჸუაფუდ თე სუმ ოსურ! მუშო ოკო რაგად, რუთი დო ორფას შეულებდეს კინ დექორწინესკო, მარა მი მიკაჯინედ ნაომის, ნამუთ ხანშა მიშეშ? ნაომის მანგარო აფუდ შურ აკოჭირებულ, ათეშენ თქუ: „მეტო ვადომძახათ ნაომი. მარა ქუდომძახით, მუშენდა ირფელიშშემალებექ ცხოვრება გამინწარ!“. გურგოტახილ ნაომიქ ბეთლემშა დორთა გეგნოჭყვიდ დო რუთიქ ხოლო თიწკუმა ართო მიდართჷ (რუთ. 1:7, 18—20).

9. მუჭოთ რუთიშ 1:16, 17, 22-შე იძირე, მუჭო ელუკინ გურშა რუთიქ ნაომის?

⁹ მუქ მეხვარ ნაომის გეგნიღკო თე მდგომარეობა? თენა რდუ ართგურ ჸოროფა, ნამუთ რუთიქ თიმწკუმა გიმირჩქინ, მუჟამსით თიწკუმა ქუდოსქიდ (წეკითხით რუთიშ 1:16, 17, 22). ბეთლემს რუთ მანგარო ხანდენდჷ, ნამდა დოშაყარუკო მარცვლეულ მუშო დო ნაომიშო. შედეგო თე ახალგაზრდა ოსურკოჩის ჯგირ სახელ უღუდ (რუთ. 3:11; 4:15).

10. მუჭო ოძირუ იეჰოვაქ ჸოროფა ღარიბეფს, მუნერით ნაომი დო რუთი რდეს?

¹⁰ ისრაელეფშა მეჩამილ იეჰოვაშ კანონშე იძირედ, ნამდა თინა მიშეშ ღარიბეფიშ მდგომარეობაშა, მუნერით ნაომი დო რუთი რდეს. თიქ უწუ მუშ ხალხის, ნამდა, მუჟამსით მოსავალს გეჭოფუნდეს, ჸვანაშ ძგალეფ ღარიბეფშო ქუდუტებდესკო (ლევ. 19:9, 10). ათეშენ ნაომი დო რუთი ოჭკუმალს თხუალაშ უმშო ქიშინდეს.

11, 12. მუჭო გახარ ბოაზიქ ნაომი დო რუთი?

¹¹ რუთი მარცვლეულს შაყარანდუნ თი ჸვანაშ მინჯე, მდიდარ კოჩ, ბოაზი, რდუ. თის მანგარო შეხუ რუთიშ ართგურობაქ დო ჸოროფაქ, ნამდგას დიანთილიშ მიმართ გიმირჩქინანდჷ. ჭიჭე ხანშა ბოაზიქ რუთშა დექორწინ, გეგშეჸიდ თინეფიშ დიხეფ, ნამდა რუთიშ სქუალეფს მემკვიდრეობა დურთინუკო (რუთ. 4:9—13). თინეფს გეურჩქინდეს სქუაქ დო ობედი ქიგიოდვეს. თინა მეფე დავითიშ ბაბუ რდუ (რუთ. 4:17).

¹² წერმიდგინით, მუ ბედნერ იჸუაფუდ ნაომი, მუჟამსით ჭიჭე ობედის ქიდეკინენდჷ დო მარდულობაშ სიტყვეფს ქუწინდჷ იეჰოვას! მარა არძაშ უჯგუშ მუდგარენ ნაომი დო რუთის ანწ ელნა. გათელებაშ დროს თინეფ ქიგეგენა, ნამდა ობედი დუნაპირებ მესიაშ, იესო ქრისტეშ, წინაპარ რდუ!

13. მუ მნიშვნელოვან მუდგარენ შემლებნა დიბგურუათ ნაომი დო რუთიშ შემთხვევაშე?

¹³ ჩქი მუს ბგურაფლენთ? მუჟამსით განსაცდელეფს ფხვადუთ, შილებე შურაკოჭირებულეფ დო გურგოტახილეფ ვორდათ. შილებე ფიფქრენდათ, ნამდა ჩქინ პრობლემეფშე გამოსავალ ვა არსებენს. თეჯგურა  დროს მთლიანო ოკო მივენდათ ჩქინ ზეციერ მუმას დო ხოლოშიან ურთიერთობა მიღდან და დო ჯიმალეფწკუმა. მუშო ოკო რაგად, იეჰოვაქ შილებე ჩქინ პრობლემა ვა ჩამთხინუან. ვართ ნაომიშა დურთინუაფ მუშ ღურელ ქომონჯ დო სქუალეფ. მარა თინა მინშა ჩქინ და დო ჯიმალეფიშ ჸოროფათ ნაკეთებ ჯგირ საქმეეფით მოხვარნა, ნამდა ქუგურზათ (იგავ. 17:17).

14. მუქ უტახ გურ ართ ლევიანს?

¹⁴73-ა ფსალმუნიშ მაჭარალ ლევიან რდუ. თის უღუდ პატი, იეჰოვაშ თაყვანიშცემაშ ადგილს უმსახურებუდკო. მარა თიშ ცხოვრებას რდუ მომენტ, მუჟამსით გურქ გუტირხჷ. მუშენ აღოლ თექ? თის ენჯარ უბადო დო ამაყ კათაშ, თიშ გურშენ ვარ, ნამდა მუს ხოლო გლახა საქმეეფიშ კეთება ოკოდ, თიშენ, ნამდა თინეფიშ ცხოვრება უჯგუშ რდუკონ, თეშ იძირედ (ფსალმ. 73:2—9, 11—14). თეშ რჩქუდ, ნამდა ირფელ უღდეს — სიმდიდრე დო ჯგირ ცხოვრება ოწუხებელიშ უმშო. უბადოეფიშ წარმატებაშ ძირაფაქ ლევიანს გურ გოუტახ დო თიქ თქუ: „დო მა ტყურათ იფთხილანდჷ გურს დო ტყურათ იბომნჷ უდანაშაულობაშ ნიშანო ხე“. არგამა რე, თინა სულიერ საფრთხეშ წოხოლე გერდჷ.

15. მუჭოთ ფსალმუნიშ 73:16—19, 22—25-ის იძირე, მუჭო გიორჯგინ თე ფსალმუნიშ მაჭარალ ლევიანქ გურიშგოტახუას?

¹⁵ წეკითხით ფსალმუნიშ 73:16—19, 22—25. ლევიანქ „ღორონთიშ დიდებულ, წმინდა ადგილშა“ ქიმერთჷ. თექ თინეფ შქას, მით იეჰოვას ომსახურუდ, თის შეულებუდ მუშ სიტუაციაშე მშვიდას, გურგოჩამილო უფიქრებუდკო დო ულოცებუდკო. შედეგო თიქ ქიმეხვად, ნამდა თეჯგურა აზროვნება ვა რდუ ჭკვერულ დო თიცალ ოშქურანჯ შარას გერდჷ, ნამდგას შეულებუდ იეჰოვაწკუმა ჯგირ ურთიერთობა მეუდინუკო. თე ლევიანქ თის ხოლო ქიმეხვად, ნამდა უბადოეფ „მოჸინილ შარას“ გერენა დო „საშინელ ბოლო“ ელნა. მენჯარიშობა დო გურიშგოტახუა ჩეთხინუკონ, ლევიან ფსალმუნმაბირექ საკითხეფს იეჰოვაშ თოლით ოკო უჯინკო. თაშ მოქციებათ თიქ კინ დირთინუ სიმშვიდე დო ბედნერ რდუ. თე ლევიან იჩიებ: „სქან მეტ [იეჰოვა] მითინ ვა მოკო დედამიწას“.

16. მუშ გურაფა შემლებნა ართ ლევიანშე?

 ¹⁶ ჩქი მუს ბგურაფლენთ? დღას ვემენჯარან უბადო კათაშ, მით თეშ იძირენა, ნამდა ბედნერეფ რენა. თინეფ ხვალე გალეშე რჩქუნა ბედნერეფო დო მომავალ ვა უღნა (ეკლ. 8:12, 13). თინეფიშ ქუმონჯარნან-და, გურ გომტირხუნა დო შილებე იეჰოვაწკუმა ურთიერთობა ხოლო მივოდინუათ. გურს ქუჩანთ, ნამდა უბადოეფიშ ითამ წარმატებაშ გონჯარუნან-და, თქვა ხოლო თინა გაკეთით, მუთ ლევიანქ ღოლუ. დემორჩილით ღორონთიშ ჸოროფათ მოჩამილ რჩევას, დო თინეფწკუმა გიღდან ურთიერთობა, მით იეჰოვაშ ნებას ასრულენს. მუჟამსით იეჰოვა არძაშ უმოსო გიჸორდან იჸი, ნამდვილ ბედნერობას ქიგინანთ დო ქუდოსქიდუთ „ჭეშმარიტ სიცოცხლეშ“ შარას (1 ტიმ. 6:19).

17. მუ გურიშ გუმატახალ მიზეზეფ უღუდ პეტრეს?

¹⁷ მოციქულ პეტრე ენთუზიაზმით ეფშა კოჩ რდუ; მარა მინშა უდუფიქრებუო თიცალ მუდგარენს ქოთქუანდჷ ვარდა გაკეთენდჷ, ნამდგას უკულ ნარღენდჷ. მაგალთო, მუჟამსით იესოქ მუშ მოციქულეფს უწუ, ნამდა დეტანჯებუდ დო დოღურუდ, პეტრექ გუდღან თის დო უწუ: „ვაუკეთა თენა სქან დუდის“ (მათ. 16:21—23). თეშ გურშენ იესოქ შენიშვნა მეჩჷ პეტრეს. მუჟამსით იესოშ ოჭოფშა მორთეს, პეტრექ ნაჩქარევო მიქცუ დო მღვდელმთავარიშ მონას ჸუჯ ქელაჭკირ (იოან. 18:10, 11). იესოქ კინ შენიშვნა ქიმეჩ თის. თეს გეძინელ, პეტრე თით იცქვანდჷ, ნამდა შილებე შხვა მოციქულეფქ მიოტუესკო იესო, მარა მუ დღას ვემიოტენდჷ (მათ. 26:33). პეტრე ზედმეტო რდუ დუდშა დაჯერებულინ თიქ, კოჩიშ შიშშა ქიმიჸონ დო თიმ სერს სუმშა გინივარუ, იესოს იჩინენდუნ. შურაკოჭირებულ პეტრექ „გალე გეგმორთჷ დო ნგარაქ გეუოლ“ (მათ. 26:69—75). თის აწუხენდკონ იჸიდ, დღას ქაპატიენდჷ დო ვარ იესო.

18. მუჭო მეხვარ იესოქ პეტრეს, გიორჯგინკო გურიშგოტახუას?

¹⁸ მარა პეტრეს გურიშგოტახუაშა ვემუჩამ თიშ უფლება, ნამდა იეჰოვაშ მსახურება მიოტებაფუკო. დაშებაშ უკულ თინა კინ  იეჰოვას ომსახურუდ დო მუჭოთ ბიბლიაშე ვორწყეთ, შხვა მოციქულეფწკუმა ართო რდუ (იოან. 21:1—3; საქ. 1:15, 16). მუქ მეხვარ თის? პეტრეს შუდჷ, ნამდა იესოქ ჭიჭე ხანიშ წოხოლე თიშო ილოც, რწმენა ვაუდინუაფუდკონ დო უწუ, ნამდა, დირთკო დო გამანგარკო მუშ ჯიმალეფ. იეჰოვაქ უპასუხ იესოშ მთელ გურით რაგადებულ ლოცვას. ჭიჭე ხანშა იესოქ პირადო პეტრეს გეგმეცხად, მუჭოთ იძირენ თიშ გურშენ, ნამდა გურშა ელუკინკო (ლუკ. 22:32; 24:33, 34; 1 კორ. 15:5). იესოქ თიშ უკულ ხოლო გიმეცხად მოციქულეფს, მუთ თინეფ მთელ სერს უშედეგოთ ჩხომენდეს. თე დროს თიქ პეტრეს მეჩჷ საშვალება, ხოლო ართშა დუმტკიცკო, მუზმათ უჸორდჷ თინა. იესოქ აპატუ მუშ ძვირფას მეგობარს დო უმოს მეტ საქმე მიანდჷ (იოან. 21:15—17).

19. მუჭო მოხვარნა ფსალმუნიშ 103:13, 14, ნამდა ჩქინ შეცდომეფს იეჰოვაშ თოლით ვუჯინათ?

¹⁹ ჩქი მუს ბგურაფლენთ? იესოქ პეტრეს მუჭო მექცუნ, თევრეშე იძირე, მუჭო მეუღ თის გურშა შხვეფიშ გაჭირება დო სრულყოფილო მეჸუნს მუშ მუმაშ მაგალითის. ათეშენ, მუჟამსით მეფჩირთუთ დო დუვაშენთ, ვეფიფქრათ ოკო, ნამდა იეჰოვა ვა მაპატიენა. ფშუდან, სატანას ხოლო თინა ოკო, ნამდა თაშ იფიფქრათ. თეშ მანგიორო, ქივეცადათ ჩქინ დუდის დო თინეფს, მით ჩქინ წინააღმდეგ აშენა, იეჰოვაშ ჸოროფაშ დო გაგებაშ თოლით ვუჯინათ (წეკითხით ფსალმუნიშ 103:13, 14).

20. მუს გუვარჩიენთ უკულიან სტატიას?

²⁰ იოსებიშ, ნაომიშ დო რუთიშ, ართ ლევიანიშ დო პეტრეშ მაგალით მარწმუნენა, ნამდა „იეჰოვა ხოლოს რე გურგოტახილეფწკუმა“ (ფსალმ. 34:18). თინა უშვენს, მინშა სირთულეეფ მიღდან დო გურგოტახილეფ ვორდათ. მარა, მუჟამსით სირთულეეფს იეჰოვაშ მოხვარათ გივორჯგინანთ, ჩქინ რწმენა იმანგარებ (1 პეტ. 1:6, 7). თეშ უკულიან სტატიაშე ხოლო უმოსო ქობძირუნთ, მუჭო ალურე იეჰოვა მუშ ართგურეფს, მით გურგოტახილეფ რენა მუნეფიშ არასრულყოფილებაშ ვარდა რთულ მდგომარეობაშ გურშენ.