1, 2. მუს ურაგად ანგელოზ ოსურკათას დო მუ მითითებას არზენს იესო თინეფს?

გოთანდჷ ახ. წ. 33 წანაშ 16 ნისანქ. ღორონთიშ მოშიშ მუსხირენ ოსურკოჩ გურდამონკებულო მეურს თი ადგილშა, სოდეთ ჟირ დღაშ წოხოლე იესო დასვანჯეს. მუჟამსით თექ მერთეს, ნამდა იესოშ სხეულს ჯგირ შურ უღუნ ფერ ზეთ ქუსვესკო, გაკვირებულეფქ ქუდოსქიდეს, მუშენდა თი ადგილ ცარიელ რდუ! ანგელოზიქ თე ოსურკათას უწუ, ნამდა იესოქ გეთელ დო გეუძინ: „თინა თქვან უმოს ადრე გენურს გალილეაშა დო თექ ქოძირუნთ თის“ (მათ. 28:1—7; ლუკ. 23:56; 24:10).

² მუჟამსით თე ოსურკათაქ უკახალე დირთეს, იესოქ ქიმერთჷ თინეფშა დო თეცალ მითითება მეჩჷ: „მეუთ დო ქუწით ჩქიმ ჯიმალეფს, ნამდა გალილეაშა მიდართან დო თექ ქობძირნა“ (მათ. 28:10). პირველ, მუდგას იესო გათელებაშ უკულ ორთჷ თინა რე, ნამდა მუშ მოწაფეეფწკუმა შეხვალამას ანიშნენს, მუ დროსით მუსხირენ მნიშვნელოვან მითითებას არზენს თინეფს!

3, 4. მუშენ შემლებნა თიშ რაგად ნამდა, მათეშ 28:19,20-ის ინოჭარილ მითითება იესოს ხვალე მოციქულეფშა ვემუჩამ? (ქოძირით სურათ გალენ გვერდის).

³ წეკითხით მათე 28:16—20. თი შეხვალამაშ დროს, ნამუთ იესოქ დაგეგმჷ, მუშ მოწაფეეფს უწუ, ნამდა პირველ საუკუნეს თინეფ მნიშვნელოვან საქმეს გაკეთენდეს; ამდღა თე საქმეს ჩქი ხოლო ვორთუთ. იესოქ თქუ: „ათეშენ მეუთ დო მოწაფეეფო მამზადით ხალხ არძა ერშე . . . ქუდაგურეთ თინეფს ირფელიშ დაცვება, მუთ ჩქიმდე დიგურეთ“.

⁴ იესოს ოკო, ნამდა არძა მუშ მიმაჸუნალქ იქადაგას. თის თე მითითება ხვალე მუშ 11 ართგურ მოციქულშა ვემუჩამ. მოწაფეეფიშ მომზადებაშ გურშენ მითითებაშ მეჩამაშ დროს, გალილეაშ გვალას ხვალე მოციქულეფ ვა რდეს. სოვრეშე მიჩქნა თენა? ქიგიფშინათ  მუ უწუ ანგელოზიქ ოსურკათას: „ქოძირუნთ თის [გალილეას]“. მუჭოთ იძირენ, თე ართგურ ოსურკოჩეფ ხოლო თე შეხვალამას იჸუაფდეს. თეს გეძინელ, მოციქულ პავლე იჩიებ ნამდა, იესოქ „გეგმეცხად ხუთოშშე მეტ ჯიმას ართათ“ (1 კორ. 15:6). სო მოხვად თექ?

5. სოვრეშე მიჩქნა, ნამდა 1 კორინთელეფიშ 15:6-ის იგულისხმებ გალილეას რდუნ თი შეხვალამა, ნამუთ მათეშ 28-ო დუდის რე ეჭარილ?

⁵ ჩქი მიღნა თიშ საფუძვლიან მიზეზეფ იფიფქრათ, ნამდა 1 კორინთელეფიშ 15:6-ის პავლე გულისხმენდჷ გალილეას რდუნ თი შეხვალამას, ნამუთ მათეშ 28-ო დუდის რე ეჭარილ. ნამ რე თე მიზეზეფ? პირველ, იესოშ მოწაფეეფიშ უმენტაშ გალილეაშე რდეს. ათეშენ, უმოს ადვილ იჸუაფუდ, თესხი ხალხის გალილეაშ გვალას შეხვადკო ვინემ იერუსალიმს მიდგაინიშ ჸუდეს. მაჟია, გათელებაშ უკულ იესოქ უკვე შეხვად მუშ 11 ართგურ მოციქულს იერუსალიმს, ართ-ართ ჸუდეს. თის ხვალე მუშ მოციქულეფშა ქაკოდკო ქადაგება დო მოწაფეეფიშ მომზადებაშ გურშენ მითითებეფიშ მეჩამან, თეს იერუსალიმს გაკეთენდჷ დო ვა თხინდჷ მოციქულეფს, ვართ თი ოსურკათას დო ვართ შხვეფს, გალილეას ქეშეხვადესკო (ლუკ. 24:33, 36).

6. მუჭო იძირე მათეშ 28:20-შე, ნამდა მითითება მოწაფეეფიშ მომზადებაშ გურშენ ამდღანერ დროს ოხუ დო მუჭო ომორჩილ ბრელ თე მითითებას?

⁶ ქიდვეკვირათ მასმა მნიშვნელოვან მიზეზის, სოვრეშეთ იძირე, ნამდა იესოს ხვალე პირველ საუკუნეს მახორუ ქრისტიანეფშა ვემუჩამ ქადაგება დო მოწაფეეფიშ მომზადებაშ გურშენ მითითება. სოვრეშე მიჩქნა თენა? იესოქ თე მითითება თეცალ სიტყვეფით ათუ: „მა ირდღას თქვანწკუმა ვორექ თე ქიანაშ მოსპუალაშახ!“ (მათ. 28:20). ამდღა მოწაფეეფიშ მომზადებაშ საქმეს ბრელ ღებულენს მონაწილებას, მუჭოთ თენა იესოქ თქუ. დეფიქრით, ირ წანას სოდგარენ 300 000 პიროვნება ინათუ დო გინირთუ იეჰოვაშ მოწმეთ დო იესოშ მოწაფეთ!

7. მუს გუვარჩიენთ თე სტატიას დო მუშენ?

⁷ ბრელ პიროვნება, მით ბიბლიას გურაფლენს, სულიერო წიმი მეურს დო ინათუ. მარა ნამთინეს, მით რეგულარულო გურაფლენს ბიბლიას, ოშქურ ნაბიჯიშ გინოდგუმაშა დო იესოშ მოწაფეთ გინორთაშა. თინეფს ოსიამოვნუნა ბიბლიაშ გურაფა, მარა ნათუაშა ნაბიჯის ვეგნოდგუნა. ბიბლიაშ გურაფას ქატარენთ-და, მუშო ოკო რაგად, გოკონა ქიმეხვარათ ბიბლიაშ მაგურაფალს, გეგმირინუას ნაგურეფ დო გინირთას იესოშ მოწაფეთ. თე სტატიას გარჩიებულ იჸუაფ, მუჭო შემლებნა ქინვანჭათ ბიბლიაშ მაგურაფალიშ გურს დო მივეხვარათ, სულიერო წიმი იდას. მუშენ ოკო მოინტერესდან თე საკითხ? მუშენდა, მინშა შილებე გინაჭყვიდირალ მაფდან, გავუგრძელენთ დო ვარ თის ბიბლიაშ გურაფას.

8. მუშენ რე მინშა რთულ მივეხვარათ ბიბლიაშ მაგურაფალეფს ქიჸოროფუან იეჰოვა?

⁸ იეჰოვას ოკო ხალხიქ ჸოროფათ ემსახურას თის. ათეშენ, ჩქინ მიზან რე, მივეხვარათ ბიბლიაშ მაგურაფალეფს თიშ გაგებას, ნამდა იეჰოვა ზრუნენს თითოულშე დო მანგარო უჸორს თინეფ. ჩქი მოკონა მივეხვარათ თინეფს ქოძირან, ნამდა იეჰოვა „მუმა ვა ჸუნსინ ფერ ბაღანეფიშ მუმა დო ქომონჯღურელ ოსურკათაშ მოსამართლე რე“ (ფსალმ. 68:5). მუჟამსით ბიბლიაშ მაგურაფალეფ დაფასენა თინეფწკუმა გიმორჩქინელ ღორონთიშ ჸოროფას, თენა თინეფიშ გურს ქეშეხებ დო უმოსო ქეჸოროფებნა ღორონთ. მარა, ბიბლიაშ ნამთინე მაგურაფალშო შილებე რთულ რდას, მოჸოროფე მუმათ მირჩქინან იეჰოვა, მუშენდა, მუნეფიშ ხორციელ მუმალეფ თინეფწკუმა ჸოროფას ვეგმირჩქინანდეს (2 ტიმ. 3:1, 3). ათეშენ, ბიბლიაშ გურაფაშ ჩატარებაშ დროს, ხაზ გუსვით იეჰოვაშ ძვირფას თვისებეფს. ქიმეხვარით ბიბლიაშ მაგურაფალს თიშ გაგებას, ნამდა ჩქინ მოჸოროფე ღორონთის ოკო თინეფქ მარადიულ  სიცოცხლე მიღან დო მზათ რე ქიმეხვარას თე მიზანიშ მეჭირნაფას. ხოლო მუშ კეთება შემლებნა?

9, 10. ნამ პუბლიკაციეფ ოკო გიმიბრინუათ ბიბლიაშ გურაფაშ დროს დო მუშენ იშენდოიშენ თე წიგნეფ?

⁹ გეგმირინეთ წიგნეფ „მუს მოგურუანა ბიბლია სინამდვილეს?“ დო „ვადინუათ ღორონთიშ ჸოროფა“. თე პუბლიკაციეფ თეშ რე შედგენილ, ნამდა მოხვარნა ქინვანჭათ ბიბლიაშ მაგურაფალიშ გურს. მაგალთო, წიგნიშ, „მუს მოგურუანა ბიბლია სინამდვილეს?“ პირველ დუდ, პასუხენს კითხვეფს: ქოზრუნენსო ღორონთ ჩქინდე ვარდა უბადო პიროვნება რენო თინა? ქაწუხენსო ღორონთის ხალხიშ ტანჯება? დო შეილებნო გინირთე ღორონთიშ მეგობარო? მუშ რაგად შემლებნა წიგნიშე „ვადინუათ ღორონთიშ ჸოროფა“? თე პუბლიკაცია მეხვარებ ბიბლიაშ მაგურაფალს თიშ გაგებას, მუჭო აუჯგუშენს მუშ ცხოვრებას ბიბლიურ პრინციპეფიშ გიმორნაფა დო მუჭო აახლოვენს თენა იეჰოვაწკუმა. შილებე შხვეფს უკვე ოგურუანდით თე პუბლიკაციეფით, მარა ბიბლიაშ გურაფაშ დოჭყაფაშახ იშენით ჯგირო მემზადით დო  ირიათო რშუდან, მუ ოსაჭირ ბიბლიაშ მაგურაფალს.

¹⁰ მაგალთო, ბიბლიაშ მაგურაფალქ თიცალ საკითხით დეინტერეს, ნამუთ მოჩამილ ვა რე თე პუბლიკაციეფს. შეილებდეს, ქელუჩითკო თის, მუშით წუკითხირუდკო თი პუბლიკაცია, სოდეთ თე საკითხ რე გარჩიებულ დო გაიგრძელებდესკო ბიბლიაშ გურაფა, თი პუბლიკაციეფით, ნამუთ ჟიშე მიფშინეთ.

11. მუჟამ შეილებნა ბიბლიაშ გურაფა დიჭყათ დო ათუათ ლოცვათ დო მუჭო შეილებნა ლოცვაშ გურშენ რაგადიშ წუმოჭყაფა?

¹¹ ბიბლიაშ გურაფა ლოცვათ ქიდიჭყით. პირდაპირ ქოფთქუათინ, უჯგუშ იჸუაფ, მუჟამსით ბიბლიაშ გურაფას რეგულარულო ქიდიბჭყანთ, მუთ შილებენ მალას ვეცადათ, თინა ლოცვათ ქიდიბჭყათ დო გუვათუათ. თეშ კეთება ჯგირ იჸუაფ, ბიბლიაშ გურაფაშ დოჭყაფაშ პირველ მარეფშე. ჩქი ოკო მივეხვარათ ბიბლიაშ მაგურაფალეფს თიშ გაგებას, ნამდა ხვალე ღორონთიშ წმინდა შურიშ მოხვარათ შემლებნა ინვანჭათ თიშ სიტყვას. ნამთინე მაუწყებელ ლოცვაშ გურშენ რაგადის იჭყანს იაკობიშ 1:5-ის მოშინაფილ სიტყვეფით, სოდეთ ჭარჷ: „თქვანდე მითინს სიბრძნე ქარკუნ-და, ირიათო თხუას ღორონთის“. უკულ თინა ოკითხ ბიბლიაშ მაგურაფალს: „მუჭო შეილებ ღორონთის თხუე სიბრძნე?“. საეგებიოთ, ბიბლიაშ მაგურაფალ ქიმეხვადუ, ნამდა თეშო აუცილებერ რე ლოცვა.

12. მუჭო შეილებნა ფსალმუნიშ 139:2—4-იშ გიმორნაფა, ნამდა ქიმეხვარათ ბიბლიაშ მაგურაფალს ლოცვას გურ გეგნუფაჩას იეჰოვას?

¹² ქუდაგურეთ ბიბლიაშ მაგურაფალს მუჭო ილოცას. გეუნწყით თის, ნამდა იეჰოვას ოკო ქიმირჩქილუას თიშ მთელ გურით ნათქუელ ლოცვეფ. თეს გეძინელ, გეუნწყით, ნამდა პირად ლოცვეფს შემლებნა გურ გეგნუფაჩათ იეჰოვას, ქივეჩუათ თის, მუს ბგინაფლენთ დო ქუწუათ თიცალ მუდგარენეფ, მუდგაშ რაგად შილებე შხვეფშა ვა მოკოდან. ვაგმოჭყორდან, ნამდა იეჰოვას უკვე უჩქჷ ჩქინ ფიქრეფ (წეკითხით ფსალმუნი 139:2—4). თეს გეძინელ, შემლებნა ბიბლიაშ მაგურაფალს ელუჩათ, ქოთხუას ღორონთის მოხვარა, ნამდა დოთირუას არასწორ აზროვნება დო მიოტუას გლახა ჩვევეფ. მაგალთო, ბიბლიაშ მაგურაფალს შილებე უჸორდას თიცალ დღესასწაულ, ნამუთ ქრისტიანეფშო მიუღებელ რე. თის უჩქჷ, ნამდა თეშ აღნიშნება ვა რე სწორ, მარა იშენით მოწონს თე დღესასწაულიშ ნამთინე მხარეეფ. ქელუჩ თის, ალალას ქეჩუას იეჰოვას მუს გინაფლენს დო ქოთხუას მოხვარა, ნამდა ხვალე თინა უჸორდას მუთ იეჰოვას უჸორს (ფსალმ. 97:10).

13. ა) მუშენ ოკო ელუჩათ ბიბლიაშ მაგურაფალს მუთ შილებე მალას ქიდესწრას კრებაშ შეხვალამას? ბ) მუშ კეთება შემლებნა, ნამდა ბიბლიაშ მაგურაფალქ კრებაშ შეხვალამეფს დუდ თავისუფალო იგინას?

¹³ ქელუჩით ბიბლიაშ მაგურაფალს მუთ შილებე მალას ქიდესწრას კრებაშ შეხვალამას. მუდგას ბიბლიაშ მაგურაფალ კრებაშ შეხვალამეფს მირჩქილუანს დო ძირუნს, შილებე აღძრას თინა ემსახურას იეჰოვას. ქაძირეთ თის ვიდეო „მუს ომსახურუ იეჰოვაშ მოწმეეფიშ სამეფო დარბაზი?“ დო ქუწით, ნამდა შეულებ თქვანწკუმა ართო მიდართას კრებაშ შეხვალამეფშა. შეიოლებერ ქორენ-და, ქუწით, ნამდა მანქანათ მიდეჸონანთ. ჯგირ იჸუაფ ბიბლიაშ გურაფაშა შხვადოშხვა მაუწყებელს მიდეჸონანთ-და. თეშნერო, ბიბლიაშ მაგურაფალ გეჩინებაფუანს და დო ჯიმალეფს კრებას დო შეხვალამეფს ხოლო უმოს თავისუფალო იგინანს დუდის.

14. მუჟამ დიჭყანს ბიბლიაშ მაგურაფალ სულიერო წიმი ულას?

¹⁴ ჩქინ მიზან რე ქიმვეხვარათ ბიბლიაშ მაგურაფალს სულიერო წიმი იდას (ეფეს. 4:13). მუჟამსით პიროვნება თქვანწკუმა ბიბლიაშ გურაფას იჭყანს, შილებე პირველ რიგის თინა ოინტერესდას, მუჭო მეხვარებ ბიბლიაშ გურაფა პირადო მუს. მარა, მუჟამსით თინა იეჰოვაშ ჸოროფას ავითარენს, შედეგო ქიდიჭყანს თიშე ფიქრის, მუჭო შეულებ  მეხვარას შხვეფს, თინეფ შქას თი და დო ჯიმალეფს, მით კრებას რენა (მათ. 22:37—39). მუჟამსით დრო ქუმურს, მორდებაქ ვაგაშუან, ქუწუათ ბიბლიაშ მაგურაფალს, თი პატიშ გურშენ, ნამდა ფინანსურო ხუჯ ქუდუკინათ სამეფოშ საქმეს.

15. მუჭო შემლებნა მივეხვარათ ბიბლიაშ მაგურაფალს, ნამდა სწორას მიქცუას პრობლემეფიშ დროს?

¹⁵ ქუდაგურეთ ბიბლიაშ მაგურაფალს მუ ოკო აკეთას პრობლემეფიშ დროს. მაგალთო, ბიბლიაშ მაგურაფალ, ნამუთ მოუნათლავ მაუწყებელ რე, გირაგადნა, ნამდა კრებას მიდგარენქ ოწყინებაფუ. თიშ მანგიორო, ნამდა უწუე მი რე მართალ დო მი მტყუან, გეუნწყ მუნერ მოქციებას ითხინს ბიბლია თეცალ დროს. თის შეულებ ქაპატუას ჯიმას, მარა თეშ კეთება ვეშულებ-და, ქიმერთას თი პიროვნებაშა, მიდგაქ ოწყინებაფუ დო გემუანო ქუდურაგადუას თი მიზანით, ნამდა მშვიდობა აღადგინას (ქეშადარით მათე 18:15). ქიმეხვარით ბიბლიაშ მაგურაფალს წინასწარ მამზადას ორაგადე. ქაძირე თის, მუჭო შეულებ გიმირინუას „JW ბიბლიოთეკა“, „იეჰოვაშ მოწმეეფიშ ორკვიებელ სახელმძღვანელო“ დო ვებგვერდ jw.org^®, ნამდა ქიდიგურუას მუსხირენ პრაქტიკულ შარა პრობლემაშ მაგვარებელო. ბიბლიაშ მაგურაფალ შხვეფწკუმა პრობლემეფიშ მოგვარებას ნათუაშახ ქიდიგურუანს-და, ნათუაშ უკულ ხოლო ვა გუჭირდუ, ნამდა და დო ჯიმალეფწკუმა ჯგირ ურთიერთობა უღდას.

16. მუშენ რე ჯგირ შხვა მაუწყებელეფიშ ჸუნაფა ბიბლიაშ გურაფაშა?

¹⁶ ბიბლიაშ გურაფაშა ქუდაპეჯით თი და დო ჯიმალეფ, მით კრებას რენა დო რაიონულ ზედამხედველ, მუჟამსით კრებას მონახულება უღჷ. მუშენ რე თენა ჯგირ? ჟიშე მოშინაფილ მიზეზეფიშ გარდა, შილებე შხვა მაუწყებელეფქ თიცალ მხარეთ ქიმეხვარან, ნამუთ თქვა ვეშგალებედეს. მაგალთო, წერმიდგინით, ნამდა ბიბლიაშ მაგურაფალ ოცად, მიოტუას სიგარეტიშ შუმა; თენა მუსხირენშა მინდომ, მარა ვეგშურთჷ. ბიბლიაშ გურაფაშა მიდეჸონით თიცალ მაუწყებელ, ნამდგას იგივე პრობლემა უღუდ. თენა ჯგირ რე, მუშენდა თე მაუწყებელქ შილებე თიცალ პრაქტიკულ რჩევა ქიმეჩას, ნამუთ ბიბლიაშ მაგურაფალს ოსაჭირ. გამოცდილ მაუწყებელწკუმა ართო ბიბლიაშ გურაფაშ ჩატარება ქუგორიდუნან-და, ქოთხით თე შემთხვევას თიქ ჩატარას ბიბლიაშ გურაფა. მუჟამსით ბიბლიაშ გურაფაშა შხვეფ მერჸუნა, ბიბლიაშ მაგურაფალს შეულებ ბრელ მუდგარენ დიგურუას თინეფშე. ირიათო რშუდან, ნამდა ჩქინ მიზან რე მივეხვარათ ბიბლიაშ მაგურაფალს სულიერო წიმი იდას.

17, 18. მუ ოკო გეთვალისწინათ, მუჟამსით გინოჭყვიდუნთ მიოტუათ დო ვარ ბიბლიაშ გურაფაშ ჩატარება?

¹⁷ ბიბლიაშ მაგურაფალ მუშ ცხოვრებას ვა თირანს-და, გარკვეულ დროშ უკულ თქვან დუდის ოკო ქოკითხათ: მივოტუაო ბიბლიაშ გურაფაშ ჩატარება? გადაწყვეტილებაშ მეღებაშახ ჯგირო ოკო დეფიქრათ ბიბლიაშ მაგურაფალიშ შესაძლებლობეფშე. ნამთინეს მეტ დრო ოსაჭირ, ნამდა დოთირუას ცხოვრება. ქოკითხით თქვან დუდის: ბიბლიაშ მაგურაფალ მუშ მდგომარეობაშ შესაბამისო  ქოთირანსო ცხოვრებას? ქიგმირინუანსო ნაგურეფუს? (მათ. 28:20). შილებე ბიბლიაშ მაგურაფალს დიდ დროქ დესაჭირას, ნამდა გინირთას ქრისტეშ მოწაფეთ, მარა თიქ ოკო გაგრძელას სულიერო წიმი ულა.

¹⁸ მუ ოკო ვაკეთათ, მუჟამსით გარკვეულ პერიოდიშ უკულ, პიროვნება ვაძირანს, ნამდა ბიბლიაშ გურაფა მნიშვნელოვან რე თიშო? წერმიდგინით თეცალ სიტუაცია: ბიბლიაშ მაგურაფალქ გათუ გურაფა წიგნით „მუს მოგურუანა ბიბლია სინამდვილეს?“ დო ქიდიჭყჷ გურაფა წიგნით „ვადინუათ ღორონთიშ ჸოროფა“, მარა დიო ნამთინ შეხვალამას ვა დასწრებ დო გოშინაშ ონჯუაშა ხოლო ვა მურთუმ! თეწკუმა ართო, ხშირას, უმნიშვნელო მიზეზეფიშ გურშენ ოჩილითუანს ბიბლიაშ გურაფას. თეცალ შემთხვევას ჯგირ იჸუაფ, ალალას ქუდურაგადუათ ბიბლიაშ მაგურაფალს. *

19. მუ შეილებნა უწუათ თის, მით ვაფასენს ბიბლიაშ გურაფას დო მუშე ოკო დეფიქრათ?

¹⁹ შილებე რაგად ქიდიჭყათ თეცალ კითხვათ: „მუ გოცილ არძაშ უმოსო, ნამდა იეჰოვაშ მოწმეთ გინირთე?“. ბიბლიაშ მაგურაფალქ შილებე გიპასუხან: „მობწონს ბიბლიაშ გურაფა, მარა იეჰოვაშ მოწმეთ დღას ვეგნიფრთუქ!“. გარკვეულ პერიოდიშ უკულ, ბიბლიაშ მაგურაფალ თაშ ქოფიქრენს-და, ქუღუნო აზრი ბიბლიაშ გურაფაშ გაგრძელებას? მარა, შხვა შემთხვევას, ბიბლიაშ მაგურაფალქ დუდშე შილებე ქოიწუან, მუშენ უჭირს ნაბიჯიშ გინოდგუმა. მაგალთო, შილებე თინა ფიქრენს, ნამდა დღას ვეშიალებე კარდოკარ ქადაგება. მუჟამსით, გიჩქნა მუს გინაფლენს ბიბლიაშ მაგურაფალ, უჯგუშო გარჩქვენუნა, მუჭო მეხვარათ თის.

20. მუჭო მიმეხვარებნა საქმეეფიშ 13:48-ს ინოჭარილ სიტყვეფ თიშ გაგებას, გუვაგრძელათ დო ვარ ბიბლიაშ გურაფა?

²⁰ სანარღოთ, ნამთინე ბიბლიაშ მაგურაფალ ეზეკიელიშ დროს მახორუ ისრაელეფს ქოგჷ. იეჰოვაქ თინეფიშ გურშენ ეზეკიელს უწუ: „თინეფშო ჸოროფაშ ობირეშეფიშ მაბირეცალო რექ, სქვამ ხონარამ მაბირეცალო დო სიმეფ უღუნ ფერ მიოგამალიშ ჯგირ მიმაგამალცალო. ქიმირჩქილუანა სქან სიტყვეფს, მარა ვეშიასრულენა“ (ეზეკ. 33:32). შილებე პიროვნებაშა გამჭირდან თიშ რაგადიქ, ნამდა თიწკუმა ბიბლიაშ გურაფას მივოტენთ. მარა, „დროქ გვალო ჭიჭექ დოსქიდ“ (1 კორ. 7:29). ათეშენ, თიშ მანგიორო, ნამდა დრო შედეგ ვა მოჸუნსინ ფერ ბიბლიაშ გურაფას დავუთმათ, საჭირო რე, დობგორათ თინეფ, მით ოძირანა, ნამდა მარადიულ ცხოვრებაშო რენა განწყობილ (წეკითხით საქმეები 13:48).

21. მუ რე 2020 წანაშ მუხლი დო მუშ კეთებას მიმეხვარებნა თინა?

²¹ თე წანაშ მუხლ, მიმეხვარებნა მთელ ყურადღება მოწაფეეფიშ მომზადებაშ საქმეშ გაუჯგუშებაშა გეგნიბღათ. თე მუხლშა მიშურს იესოშ ნარაგად სიტყვეფ, ნამუთ გალილეაშ გვალას თქუ: „ათეშენ მეუთ დო მოწაფეეფო მამზადით ხალხ . . . დონათით თინეფ“ (მათ. 28:19).