1, 2. ნამ საკითხეფ რე იეჰოვაშ მოწმეეფშო მნიშვნელოვან?

ამდღა გივორეთ მნიშვნელოვან საკითხიშ წოხლე, ნამუთ ოხუ იეჰოვაშ უზენაესობას დო თიშ სახელიშ განწმენდას. ჩქი, იეჰოვაშ მოწმეეფს მოსიამოვნუნა თეცალ საკითხეფიშ გარჩიება. მარა დეფიფქრათ, ქორენო ღორონთიშ უზენაესობა დო თიშ სახელიშ განწმენდა ართიანშე გიშართილ საკითხ? მუშო ოკო რაგად, ვარ.

² ჩქი ვორწყეთ, ნამდა ღორონთიშ სახელქ ოკო გენიწმინდას. თეს გეძინელ, მიჩქნა, ნამდა იეჰოვა უზენაეს მართველ რე, შხვა სიტყვეფით ქოფთქუათინ, თიშ მართველობა არძაშ უჯგუშ მართველობა რე. თე ჟირ საკითხის ჩქინო დიდ მნიშვნელობა უღჷ.

3. მუს გულისხმენს სახელ იეჰოვა?

³ სახელ იეჰოვა გულისხმენს ირფელს ღორონთიშ გურშენ, თინეფ შქას თიშ მართველობაშ ფორმას. ათეშენ, მუჟამსით იფჩიებუთ, ნამდა იეჰოვაშ სახელიშ განწმენდა არძაშ უმოს მნიშვნელოვან საკითხ რე, თენა თის ხოლო ნიშნენს, ნამდა იეჰოვაშ უზენაესობაქ ოკო დემტკიცას. იეჰოვაშ სახელ დო თიშ უზენაესობა მანგარო რე ართიანწკუმა დაკავშირებულ (ქოძირით ჩარჩო  „მუ მიშურს საკამათო საკითხშა?“).

4. მუჭო რე ეჭარილ ღორონთიშ სახელ ფსალმუნიშ 135:13-ს დო მუ კითხვეფს ვუპასუხენთ?

⁴ სახელ იეჰოვა განსაკუთრებულ რე (წეკითხით ფსალმუნიშ 135:13). მუშენ რე თინა განსაკუთრებულ? პირველო მუჟამ მიორინეს თის შეურაცხყოფა? მუჭო განწმინდენს ღორონთ მუშ სახელს? ჩქი მუჭო შემლებნა ხე შევუნწყუათ თიშ სახელიშ განწმენდას? მორთ ქიგებგათ თე კითხვეფიშ პასუხეფ.

5. მუ კითხვაქ შილებე გურჩქინდას ნამთინეს, მუჟამსით ღორონთიშ სახელიშ განწმენდაშე მეურს ჩიება?

⁵ „გენიწმინდას სქან სახელქ“ (მათ. 6:9). იესოქ თქუ, ნამდა თენა ართ-ართ არძაშ უმოს მნიშვნელოვან საკითხ რე, ნამდგაშეთ  ოკო იბლოცათ. მუს ნიშნენს იესოშ სიტყვეფ? განწმენდა ნიშნენს, მუდგარენიშ გასუფთება დო გასპეტაკებას. ნამთინექ შილებე იკითხას: იეჰოვაშ სახელ თეშით ხოლო წმინდა, სუფთა დო სპეტაკ ვა რენო? პასუხიშ მიოღებელო საჭირო რე, დეფიფქრათ იეჰოვაშ სახელიშ მნიშვნელობაშე.

6. მუშენ რე სახელ მნიშვნელოვან?

⁶ სახელ ბრელით უმოს მეტის ნიშნენს, ვინემ ართო აკოშაყარელ ჭარილ ასოეფს ვარდა რაგადებულ ბგერეფს. ქიდვეკვირათ, მუს იჩიებ ბიბლია: „ჯგირ სახელ უჯგჷ ბრელ ქონებას“ (იგავ. 22:1; ეკლ. 7:1). მუშენ რე სახელ თეცალ მნიშვნელოვან? მუშენდა თიშა მიშურს პიროვნებაშ რეპუტაცია, შხვა სიტყვეფით ქოფთქუათინ თინა, მუს ფიქრენა შხვეფ თი პიროვნებაშე, მიდგას თე სახელ ჯოხო. თაშ ნამდა, მნიშვნელოვან თინა ვა რე მუჭო ირაგადუაფ თე სახელ, მნიშვნელოვან რე, მუ გაშინენა შხვეფს, მუჟამსით კითხულენა ვარდა ირჩქილუაფნა თე სახელს.

7. მუჟამ მიორინეს პირველო ღორონთიშ სახელს შეურაცხყოფა?

⁷ მუჟამსით ადამიანეფ იეჰოვაშ სახელიშ გურშენ ტყურეფს იჩიებნა, თინეფ რეპუტაციას უფუჭენა იეჰოვას. შედეგო, თიშ სახელს შეურაცხყოფას მიორინუანა. პირველო ღორონთიშ სახელს დო თიშ რეპუტაციას კაცობრიობაშ ისტორიაშ დაჭყაფუს მიორინეს შეურაცხყოფა. გუვარჩუათ მუშ გურაფა შემლებნა თავრეშე.

8. მუ უჩქუდეს ადამ დო ევას დო მუ კითხვეფ წიმიჭკირუ?

⁸ ადამ დო ევას ხვალე ღორონთიშ სახელ ვარინ, თინა ხოლო უჩქუდეს, მუნერ პიროვნება გერდჷ თე სახელიშ უკახალე. თინეფშო ღორონთ გუმაჭყაფალ რდუ, ნამდგაქ უძღვინ სიცოცხლე, დიდებულ ოცხოვრებელ ადგილ დო სრულყოფილ მეუღლე (დაბ. 1:26—28; 2:18). მარა გეგმირინუანდესო მუნეფიშ სრულყოფილ გონებას თი ირფელშე ოფიქრებელო, მუთ იეჰოვაქ აკეთ თინეფშო? გევითარენდესო იეჰოვაშ ჸოროფას დო მარდულობას? თე კითხვეფშე პასუხიქ თიმწკუმა გეგმიარგამ, მუჟამსით ღორონთიშ ნტერქ გეგმოცად თინეფ.

9. მუჭოთ დაბადებაშ 2:16, 17 დო 3:1—5-ის ჭარჷ, მუ უწუ იეჰოვაქ პირველ წყვილს დო მუჭო დამახინჯჷ სატანაქ სიმართლე?

⁹ წეკითხით დაბადებაშ 2:16, 17; 3:1—5. სატანაქ  გვერიშ საშვალებათ ევას კითხჷ: „მართალო გიწუესო ღორონთიქ, ბაღიშ ნამთინ ჯაშე ვა ჭკუმათია?“. თე კითხვათ სატანაქ ევა დაღორ, ითამ ღორონთ მუდგარენ ჯგირს უფულუნდჷ. სინამდვილეს ღორონთიქ თინეფს უწუ, ნამდა ართ ჯაშ მიკნაღელიშ გარდა, არძა შეულებდეს ჭკუმესკო. ადამ დო ევას ანდანერ ჯაშ მიკნაღელიშ ჭკუმუა შეულებდეს (დაბ. 2:9). თავრეშე იძირე, მუნერ გურხვე ღორონთ რე იეჰოვა, მარა თიქ ადამ დო ევას ართ ჯაშ მიკნაღელიშ ჭკუმუაშე ვარია უწუ. თაშ ნამდა, სატანაშ კითხვა, ნამუთ ევას დუსვჷ, სიმართლეს ამახინჯენდჷ. სატანაქ თიცალ სურათ შექმნჷ, ითამ ღორონთ გურხვე ვარდჷ. ევაქ შილებე იფიქრჷ: „მართალო ხომ ვამფულუნს ღორონთ მუდგარენ ჯგირს?“.

10. მუჭო მიორინუ სატანაქ იეჰოვაშ სახელს შეურაცხყოფა არგამათ დო მუქ მაჸუნ თეს?

¹⁰ მუჟამსით სატანაქ თე კითხვა დუსვჷ, ევა დიო ხოლო იეჰოვაშ მორჩილ რდუ. თიქ სატანას პასუხო იეჰოვაშ სიტყვეფ უწუ. თიქ თინა ხოლო უწუ, ნამდა თი ჯას ოკო ვემკანჭესკო. ევას ჯგირო შუდჷ ღორონთიშ გაფრთხილება, ნამდა დაუმორჩილებლობას ღურა ქუმაჸუნუდ. მარა სატანაქ ევას უწუ: „ვარ, ვა ღურუთ“ (დაბ. 3:2—4). სატანაქ ასე უკვე მიშატყურაფილო ვარინ, არგამათ მიორინუ შეურაცხყოფა იეჰოვაშ სახელს დო ტყურაშ რაგად ქეკაწამ თის. თეშნერო სატანაქ გინირთჷ ეშმაკო, შხვა სიტყვეფით ქოფთქუათინ ტყურაშ ეკმაწამებელო. მუშმანწარას დეღორ ევაქ სატანას დუჯერუნ (1 ტიმ. 2:14). თიქ იეჰოვაშ უმოსო სატანას ენდჷ. თე ირფელქ ევას, უფრაშ გადაწყვეტილება მიოღებაფუ. თიქ იეჰოვას ვედემორჩილ დო ვარიებულ ჯაშ მიკნაღელ ოჭკუმ. თეშ უკულ, ადამს ხოლო ქიმეჩ თე ჯაშ მიკნაღელ ოჭკუმალო (დაბ. 3:6).

11. მუჭო შეულებდეს ადამ დო ევას მიქცისკო, მარა მუ ვაკეთეს თინეფქ?

¹¹ ართ წუთით დეფიქრით, მუჭო ოკო უპასუხკო ევაქ სატანას. წერმიდგინით, ნამდა ევაქ სატანას უწუ: „ვა მიჩქჷ სი მი რექ, მარა იფჩინენქ მუაჩქიმს, იეჰოვას, მიჸორს დო ვონდუქ თის. მა დო ადამს ირფელ თიქ მუჩეს. მუჭო ბედუქ თიშე გლახაშ რაგადის? ჩემეთხი!“. მუჭო ახიოლედ იეჰოვას თეცალ სიტყვეფიშ მორჩქილაფა მუშ საჸოროფო ოსურსქუაშე! (იგავ. 27:11). მარა ვართ ადამს დო ვართ ევას, მთელ გურით ვა უჸორდეს იეჰოვა. ათეშენ, თინეფქ მუთუნ ვაკეთეს იეჰოვაშ სახელიშ დაცვებელო.

12. მუჭო ინათას სატანაქ ევაშ გონებას ეჭვეფ დო მუ ვაკეთეს ადამ დო ევაქ?

¹² მუჭოთ ბძირით, დუდშე სატანაქ იეჰოვაშ სახელიშ წინააღმდეგ თით მიდართჷ, ნამდა ევაშ გონებას ეჭვეფ დოთას. თიქ თიცალ კითხვა დუსვჷ ევას, მუდგათ ეჭვიშ თუდო გიორინუ, ქორდჷ დო ვარ იეჰოვა ჯგირ მუმა. თეშ უკულ ადამ დო ევაქ მუთუნ ვაკეთეს იეჰოვაშ სახელ დო რეპუტაციაშ დაცვებელო. თინეფქ სატანას ქურჩქილეს დო მუნეფიშ მუმაშ წინააღმდეგ მიდართეს. სატანა ამდღა ხოლო თეცალ მეთოდეფს გიმირინუანს. თინა იეჰოვაშ გურშენ ტყურეფს ოსიმუანს. თინეფ, მით იჯერენა სატანაშ ტყურეფს, ადვილო იჩიებნა ვარიას ღორონთიშ მორჩილებაშე.

13. მუჭო იძირე ეზეკიელიშ 36:23-შე, მუ რე ბიბლიაშ მთავარ თემა?

¹³ გაკეთუო იეჰოვაქ მუთუნ თე ტყურაშე დუდიშ დაცვებელო? მუშო ოკო რაგად, ქო! მთელ ბიბლია ყურადღებას ამახვილენს, მუს ორთჷ იეჰოვა, ედემიშ ბაღის მოხვალამირიშ უკულ, ნამდა განწმინდას მუშ სახელ (დაბ. 3:15). ბიბლიას ართ მთავარ თემა რე მოჩამილ: იეჰოვა განწმინდენს მუშ სახელს სამეფოშ საშვალებათ, ნამუშ მეფე იესო რე დო დედამიწას აღადგინენს სამართლიანობას დო მშვიდობას. ბიბლია მოხვარნა თიშ გაგებას, მუჭო განწმინდენს იეჰოვა მუშ სახელს (წეკითხით ეზეკიელიშ 36:23).

14. მუჭო მოქმედენდჷ იეჰოვა, ნამდა მუშ სახელ განწმინდკო?

¹⁴ სატანაქ მუთ შეულებუდუნ ირფელ გაკეთ, ნამდა იეჰოვას მუშ განზრახვაქ ვეშიასრულებუკო. მარა სატანაშ თე მცდელობას დღას ვა უღჷ შედეგ. ბიბლიაშე ვორწყეთ, მუჭო მოქმედენდჷ იეჰოვა, მუთ ამტკიცენს, ნამდა თინა მოჸოროფე მუმა დო არძაშ უჯგუშ მართველ რე. სატანა დო თიშ მომხრეეფიშ საქციელქ მანგარო უწყუნუ გურ ღორონთის (ფსალმ. 78:40). თე ირფელიშ უმკუჯინუო, თიქ სიბრძნე, მოთვინება დო სამართლიანობა გიმირჩქინ. თეს გეძინელ, ბრელნერო ოძირუ, ნამდა ირფელიშშემალებე რე. მუთ არძაშ უმოს მთავარ რე, თიშ თითოულ მოქმედებაშე ჸოროფა იძირე (1 იოან. 4:8). იეჰოვა ირიათო მოქმედენს, ნამდა განწმინდას მუშ სახელ.

15. მუჭო ეკაწამენს სატანა ამდღა ტყურას იეჰოვას დო მუ რე თეშ შედეგ?

¹⁵ სატანა ამდღა ხოლო ტყურას ეკაწამენს იეჰოვას. თინა ოცად, ადამიანეფიშ გურს ეჭვი დოთასას, ითამ ღორონთ ვა რე ძალიერ, სამართლიან, ბრძენ დო მოჸოროფე. მაგალთო, თინა ოცად, ადამიანეფ დარწმუნას, ნამდა იეჰოვა ვა რე გუმაჭყაფალ. მარა ხალხის ღორონთიშ არსებობა ქოჯერს-და, სატანა ოცად, თინეფ დარწმუნას, ნამდა ღორონთ დო თიშ მოთხოვნეფ ნაბეტან მკაცრ დო უსამართლო რე. ხვალე თენა ვარინ, სატანა ადამიანეფს ოგურუანს, ნამდა იეჰოვა უგურე დო უბადო ღორონთ რე, ნამუთ ადამიანეფს ჯოჯოხეთიშ დაჩხირს აწამენს. მუჟამსით ადამიანეფ თეცალ ტყურეფს იჯერენა, თინეფ ადვილო იჩიებნა ვარიას იეჰოვაშ სამართლიან მართველობაშე. სოიშახ სატანა საბოლათ გენადგურებ,  თინა კინ ეცადებ, თეცალ ტყურეფ გასიმუას დო თქვა ხოლო გემგკოჸოთან იეჰოვას. ქიმიოჭირინუანსო თე მიზანს?

16. მუშ კეთება შეილებნა თიშ გინაწონს, მუთ ადამ დო ევაქ ვაკეთეს?

¹⁶ იეჰოვა არასრულყოფილ ადამიანეფს საშვალებას არზენს, მონაწილება მიღან თიშ სახელიშ განწმენდას. შედეგო, თქვა შეილებნა თინა გაკეთათ, მუთ ადამ დო ევაქ ვაკეთეს. მართალ რე, თე ქვეყნიერება ეფშა რე თიცალ ხალხით, მით ტყურეფს იჩიებნა იეჰოვაშ გურშენ დო შეურაცხყოფას მიორინუანა თიშ სახელს, მარა თქვა შეილებნა იმოქმედათ დო თქუათ სიმართლე — ნამდა იეჰოვა რე წმინდა, სამართლიან, ჯგირ დო მოჸოროფე (ეს. 29:23). თქვა შეილებნა ხუჯ დუკინათ თიშ მართველობას. თეს გეძინელ, ხალხის თიშ გაგებას მეხვარათ, ნამდა ხვალე იეჰოვაშ მართველობა რე სამართლიან დო ხვალე თის შეულებ მშვიდობა დო ბედნერობა მოუღას თითოულს (ფსალმ. 37:9, 37; 146:5, 6, 10).

17. მუჭო გაგებაფუ იესოქ არძას მუამუშიშ სახელ?

¹⁷ მუჟამსით ღორონთიშ სახელიშ განწმენდას ბღებულენთ მონაწილებას, იესოშ მაგალითის მეპჸუნთ (იოან. 17:26). იესოქ მუამუშიშ სახელ ხვალე თიშ მოშინაფათ ვარინ, თით ხოლო ქუგაგებაფუ არძას, ნამდა ოგურუანდჷ, სინამდვილეს მუნერ რე იეჰოვა. მაგალთო, ფარისეველეფ იეჰოვას მკაცრ, მომთხოვნ, უგურე დო უდუნდებელ ღორონთო ოჩინებაფუანდეს ხალხის. მარა თინეფიშ გინაწონს, იესო ოხვარუდ ხალხის თიშ ძირაფას, მუნერ გამგებიან, მომთმენ, მოჸოროფე დო მპატიებელ ღორონთ რე იეჰოვა. თეს გეძინელ, იესო ირდღაშიან ცხოვრებას სრულყოფილო გიმირჩქინანდჷ მუმაშ თვისებეფს დო თეშნერო ხოლო ოძირანდჷ, მუნერ რდუ იეჰოვა (იოან. 14:9).

18. მუჭო ვოძირანთ, ნამდა სატანა მეტყურე რე?

¹⁸ იესოცალო ჩქი ხოლო შემლებნა, შხვეფს ქუგვოგებაფუათ, მუნერ მოჸოროფე დო ჯგირ ღორონთ რე იეჰოვა. თეშნერო ჩქი ვოძირანთ, ნამდა სატანა მეტყურე რე. ჩქი იეჰოვაშ სახელიშ განწმენდას ვუნწყუნთ ხეს, მუჟამსით ვოხვარუთ ხალხის იეჰოვა თინეფშო წმინდა რდას. თიშ უმკუჯინუო, ნამდა არასრულყოფილეფ ვორეთ, ჩქი ხოლო შემლებნა თი თვისებეფ გიმიფრჩქინათ, ნამუთ იეჰოვას უღჷ (ეფეს. 5:1, 2). მუჟამსით ჩქინ სიტყვეფით დო საქმეეფით ხალხის ვოძირანთ სინამდვილეს მუნერ რე იეჰოვა, მონაწილებას ბღებულენთ თიშ სახელიშ განწმენდას. ჩქი ვამართლენთ ღორონთიშ სახელს, მუჟამსით ვოხვარუთ ხალხის, გეთავისუფლან არასწორ წარმოდგენაშე,  ნამუთ შილებე ღორონთშენ უღდან. * თეს გეძინელ, თით ხოლო ბღებულენთ მონაწილებას ღორონთიშ სახელიშ განწმენდას, ნამდა არასრულყოფილებაშ უმკუჯინუო, ართგურეფ ფსქიდუთ (იობ. 27:5).

19. მუჭოთ ესაიაშ 63:7-შე ვორწყეთ, მუ ოკო რდას შხვეფშა ჭეშმარიტებაშ გურაფაშ დროს ჩქინ მთავარ მიზან?

¹⁹ ჩქი შხვა საშვალებათ ხოლო შემლებნა ღორონთიშ სახელიშ განწმენდას მიბღათ მონაწილება. მუჟამსით შხვეფს ბიბლიურ ჭეშმარიტებას ვოგურუანთ, ხშირას ყურადღებას ვამახვილენთ ღორონთიშ უზენაესობაშა, ნამდა იეჰოვას უღჷ უფლება, სამყაროშ მართველ რდას დო თენა მართალო თაშ რე. მუჟამსით შხვეფს ვოგურუანთ, მნიშვნელოვან რე, ნამდა თინეფს ღორონთიშ კანონეფშა გუმახვილათ ყურადღება, მარა ჩქინ მთავარ მიზან რე, მივეხვარათ შხვეფს, ქიჸოროფუან ჩქინ ზეციერ მუმა დო თიშ ართგურეფ რდან. ათეშენ, მნიშვნელოვან რე, ხშირას გუსვათ ხაზ იეჰოვაშ თვისებეფს დო ქუვოძირათ, მუნერ პიროვნება გერე თე სახელიშ უკახლე (წეკითხით ესაიაშ 63:7). შხვეფშა ჭეშმარიტებაშ გურაფაშ დროს თეცალ მეთოდეფიშ გიმორნაფათ მივეხვარებუთ თინეფს, ქიჸოროფუან იეჰოვა დო თე მიზეზიშ გურშენ დემორჩილან თის.

20. მუს გუვარჩიენთ უკულიან სტატიას?

²⁰ თე სტატიას გუვარჩით, მუშენ რე მნიშვნელოვან ღორონთიშ სახელიშ განწმენდა დო ჩქი მუჭო ბღებულენთ თის მონაწილებას. მარა, მუჭო შემლებნა დებრწმუნათ, ნამდა ჩქინ საქმეეფით დო გურაფაშ მეთოდეფით ვოხვარუთ შხვეფს, ჯგირ წარმოდგენა უღდან იეჰოვაშ გურშენ დო დეახლოვან თის? თე კითხვაშ პასუხის უკულიან სტატიას ქობძირუნთ.