1. მუშენ შეადარ იეჰოვაქ მუშ დუდ დიდას?

„დღას გიჭყოლიდუანსო ოსურ მუშ ბაღანას?“ იეჰოვაქ თე კითხვა წინასწარმეტყველ ესაიაშ დროს დასვჷ. ღორონთიქ მუშ ხალხის უწუ: „თინეფქ გიჭყოლიდუანინ ხოლო, მა ვა გოიჭყოლიდუანქ“ (ეს. 49:15). იეჰოვა მუშ დუდის ხშირას ვა უდარენს დიდას. მარა თე შემთხვევას თაშ მიქცუ. იეჰოვაქ დიდა დო სქუა შქას რენ თი ძალიერ კავშირ გიმირინუ თიშ ოძირაფალო, მუნერ ძალიერო უჸორს მუშ მსახურეფ. დიდალეფიშ უმენტაშ ოთანხმ ართ დაშ, ჟასმინიშ სიტყვეფს. თიქ თქუ, ნამდა, მუჟამსით ბაღანა გაში, „თიწკუმა განსაკუთრებულ კავშირ რჩქინდუ, ნამუთ მთელ ცხოვრებას იგრძელებ“.

2. მუს გინაფლენს იეჰოვა, მუჟამსით მუშ ართ-ართ სქუა მაჩირთუ თიშ მსახურებას?

² იეჰოვაშ თოლს ვამკაკორდუ მუშ ართ სქუა ხოლო, ნამუთ კრებაწკუმა ურთიერთობას დო ქადაგებას მითმიოტალენს. დეფიქრით, მუშმადიდა ჭუას მიორინუანს თიშ ძირაფა, ნამდა ირ წანას ანთასობით მუშ მსახურ არააქტიურ * მაუწყებელო გინირთუ.

3. მუ რე იეჰოვაშ სურვილ?

³ ბრელ და დო ჯიმა, მიდგაქ არააქტიურო გინირთჷ, კინ ართუ კრებას, მუთ მანგარო მოხიოლნა! იეჰოვას მთელ გურით ოკო, ნამდა თინეფქ დართან კრებას დო თენა ჩქი ხოლო მანგარო მოკონა (1 პეტ. 2:25). მუჭო შემლებნა მივეხვარათ თინეფს? სოიშახ თე კითხვას ვუპასუხენდათ, ჯგირ იჸუაფ, ქიგებგათ, მუშენ  მითმიოტენს ნამთინე კრებაშ შეხვალამეფიშ დასწრებას დო ქადაგებას.

4. მუჭო მოქმედენს სამუშა ნამთინეწკუმა?

⁴ ნამთინეშო სამუშაქ გინირთჷ არძაშ უმოს მნიშვნელოვანო. აზიას მახორუ ართ ჯიმა, ჰანგ *, იჩიებ: „ჩქიმ სამუშას დიდ დრო დო ენერგიას ვუთმენდჷ. ჩქიმ დუდის ვაღორენდჷ, ითამ მეტ ფარა ქუმაღვენუდ-და, უჯგუშო ვემსახურებუდ იეჰოვას. ათეშენ უმოს მეტ საათის მუფშენდჷ. ჭიე-ჭიეთ კრებეფიშ გოჩილითაფა ქიდიბჭყჷ დო საბოლათ გვალო გამკვოჩირთჷ კრებას. სატანას თე ქვეყნიერება თეშ აფჷ მონწყილ, ნამდა ჭიე-ჭიეთ გემკმოჸოთან ღორონთიშ მსახურებას“.

5. მუჭო იმოქმედ ართ დაწკუმა სირთულეეფქ?

⁵ ნამთინე და დო ჯიმას ქიანაშ პრობლემა უღჷ, მუთ გურს უტახუნს თინეფს. ანა, ნამუთ ბრიტანეთის ცხოვრენს დო ხუთ სქუაშ დიდა რე, იჩიებ: „ჩქიმ უკლაშ სქუაქ შეზღუდულ შესაძლებლობეფით დებად. უმოს გვიანო, ჩქიმ ართ-ართ ძღაბიქ გერიცხჷ დო ჩქიმ უნჩაშ ბოშის ფსიქიკურ პრობლემეფქ ქაშუ. თიცალ გურგოტახილ ვორდჷ, ნამდა კრებაშ შეხვალამეფშა გილულა დო მსახურება მივოტე. საბოლათ, არააქტიურო გინიფრთჷ“. მანგარო მოწუხნა ანა დო თიშ ოჯახიშ დო არძაშ მდგომარეობა, მით თეცალ სირთულეეფს შეხვადნა!

6. მუშენ შილებე ნამთინექ ღორონთიშ ხალხწკუმა ურთიერთობა მიოტუას, კოლოსელეფიშ 3:13-ს ვა გეთვალისწინენს-და?

⁶ წეკითხით კოლოსელეფიშ 3:13. ნამთინეს თანაქრისტიანქ ოწყინებაფუ. პავლე მოციქულს უჩქუდ, ნამდა მინშა, შილებე და ვარდა ჯიმაშ „წინააღმდეგ ჩიულიშ მიზეზ“ მიღდან. ხვალე თენა ვარინ, შილებე უსამართლოთ ხოლო მიმექცუან. ფრთხილას ვეპჸით-და, შილებე გურს ჟღამ ქელებტუათ დო თექ თიშა ქიმემჸონან, ნამდა იეჰოვაშ ხალხწკუმა ურთიერთობა მივოტუათ. გუვარჩუათ ართ ჯიმაშ, პაბლოშ მაგალით, ნამუთ სამხრეთ ამერიკას ცხოვრენს. ართ პიროვნებაქ თის ტყურა ქეკაბრალ, უხუცესეფქ თენა ქიდეჯერეს დო შედეგო პაბლოქ კრებას პასუხიშმგებლობეფ მიოდინუ. მუჭო მიქცუ თიქ? პაბლო იჩიებ: „გებრისხჷ დო ჭიე-ჭიეთ კრება მივოტე“.

7. პიროვნებას სინდის ქაწუხენს-და, მუჭო შილებე თექ იმოქმედას თიწკუმა?

⁷ შილებე პიროვნებას მანგარო აწუხენდას სინდის ულირს დაშებულიშ გურშენ დო დუდის ვა თვალუნდას ღორონთიშ ჸოროფაშ ღირსო. თიმწკუმა ხოლო, მუჟამსით მინანუ დაშებულ, შილებე ფიქრენდას, ნამდა ვა რე ღირს ღორონთიშ ხალხ შქას რდას. ართ ჯიმა, ფრანცისკო ზუსტას თეშნერო ფიქრენდჷ. თინა იჩიებ: „სექსუალურ უზნეობაშ გურშენ შეგონება მიბღჷ. მართალ რე, დუდშე გილეფშჷ კრებაშა, მარა უკულ იფიფქრჷ, ნამდა ვა ვორდჷ ღირს ღორონთიშ ხალხ შქას პჸოფედკო. სინდის მაწუხენდჷ დო ჩქიმ დუდის ვარწმუნენდჷ, ნამდა იეჰოვას ჩქიმდა ვა უპატიებ. დროშ მიკულაწკუმა ართო, მივოტე კრებაშა გილულა დო მსახურება“. მუჭო უჯინეთ თი და დო ჯიმალეფს, მით ჟიშე გარჩიებულ სიტუაციეფს რენა? გურშა მეიღნანო თინეფიშ გაჭირება? მუთ არძაშ უმოს მნიშვნელოვან რე, მუჭო უჯინე იეჰოვა თინეფს?

8. იჭყოლიდუანსო იეჰოვა თინეფს, მით ართ დროს ომსახურუდ თის? გენწყით.

⁸ იეჰოვას ვაჭყორდუ თინეფ, მით ართ დროს ომსახურუდ თის, მარა უკულ დროებით მიოტუეს თიშ მსახურება; ღორონთის ვართ თინეფიშ ჯგირ საქმეეფ ოჭყორდუ, ნამუთ მუშ მსახურებას უკეთებნა (ებრ. 6:10). წინასწარმეტყველ ესაიაქ ჯგირ მაგალით მიჸუნ თიშ ოძირაფალო, მუჭო ზრუნენს იეჰოვა მუშ ხალხშე. თიქ ჭარჷ: „ჭყიშცალო  დოჭყიშანს მუშ შხურს. მუშ კილეთ აკოშაყარანს ჭიჭე შხურეფს დო ლუბათ გილეჸონანს თინეფს“ (ეს. 40:11). მუს გინაფლენს დიდ ჭყიშ, იეჰოვა, მუჟამსით მუშ ართ შხურ ოჭყიშალს მაჩირთუ? იესოქ იეჰოვაშ გრძნობეფ ჯგირო ეჭარ, მუჟამსით მუშ მოწაფეეფს კითხჷ: „მუჭო ფიქრენთ, კოჩის ოშ შხურ ქოჸუნდას დო ართიქ შარას ეჩირთასინ, ვემიოტენსო ოთხონეჩდოვითოჩხოროს გვალას დო ვა ურსო თი ართ შარასეჩილათირიშ ოგორშა? დო ქოძირ-და, ჭეშმარიტებას გირაგადუთ, თიშ გურშენ უმოს ხიოლ უღჷ, ვინემ თი ოთხონეჩდოვითოჩხოროშ გურშენ, ნამუთ შარას ვეჩილათე“ (მათ. 18:12, 13).

9. მუჭო ოქცუ ჯგირ ჭყიშ მუშ შხურს? (ქოძირით სურათ გალენ გვერდის)

⁹ მუშენ რე იეჰოვა შედარებულ ჭყიშშა? თიშენ, ნამდა ჯგირ ჭყიშ ირნერო ზრუნენს მუშ შხურშე. მაგალთო, მეფე დავით მუშ შხურიშ დაცვებელო ლომ დო თუნთის ხოლო ობრძოლუდ (1 სამ. 17:34, 35). ოჭყიშალს ართ შხურქ მაჩირთასინ ხოლო, თენა ჯგირ ჭყიშიშ თოლს ვამკაკორდუ (იოან. 10:3, 14). თეცალ ჭყიშ 99 შხურს უსაფრთხოთ ქიდიტენს ოშხურეს ვარდა შხვა ჭყიშის ჩაბარენს დო მიდურს თი ართიშ ოგორშა. იესოქ თე მაგალით თიშენ გიმირინუ, ნამდა ჩქინდა მნიშვნელოვან ჭეშმარიტება ქუდუგურუაფუდკო: „თეშნერო, ჩქიმ ზეციერ მუმას ვაკო, ნამდა თე ჭიჭე ჯგუფშე ართიქ ხოლო დოღურას“ (მათ. 18:14).

10. მუჭოთ ეზეკიელიშ 34:11—16-ის ჭარჷ, მუ პირობა მეჩჷ იეჰოვაქ ოჭყიშალშე მოჩილათირ შხურს?

¹⁰ იეჰოვას თითოულ ვუჸორთ, თინეფ ხოლო, მიდგაქ გამაჩირთჷ თიშ ოჭყიშალს. იეჰოვაქ წინასწარმეტყველ ეზეკიელიშ პიჯით პირობა დოდვჷ, ნამდა თინა დოგორუნდჷ თეცალ შხურეფს დო მეხვარებუდ თინეფს, მუწკუმა ჯგირ ურთიერთობაშ დორთინაფას. ეზეკიელქ მიშინუ კონკრეტულ ნაბიჯეფ, ნამდგას ღორონთ გეგნოდგუნდჷ თინეფიშ დარსხებელო. თინა იგივეს გაკეთენდჷ, მუდგას ისრაელ ჭყიშ გაკეთენდჷ შხურქ მეუდინკონ (წეკითხით ეზეკიელიშ 34:11—16). პირველ, ჭყიშ შხურს დოგორუნდჷ, მუდგაშოთ დიდ დრო დო მონდომა  რდუ საჭირო. მუჟამსით ქოძირუნდჷ, თის შხვა შხურეფწკუმა დართინუანდჷ. ხვალე თენა ვარინ, თინა ჸოროფათ ქიზრუნენდჷ შქირენულ დო ძალაგიშალიებურ შხურშე, ოჭკუმალს ქოჩანდჷ დო ჭრილობას გოუკირუნდჷ. უხუცესეფქ, მით „ღორონთიშ ოჭყიშალს“ ულუანა, თეცალ ნაბიჯეფ ოკო გეგნოდგან, ნამდა ქიმეხვარან თინეფს, მიდგაქ გამაჩირთჷ კრებას (1 პეტ. 5:2, 3). უხუცესეფ გორნა თინეფს, ოხვარნა დართან კრებას დო ჸოროფას ოძირანა თით, ნამდა ოხვარნა იეჰოვაწკუმა მეგობრულ ურთიერთობაშ დორთინაფას. *

11. მუ არჩქილე ჯგირ ჭყიშის?

¹¹ ჯგირ ჭყიშის არჩქილე, ნამდა შხურქ შილებე მედინას. შხურქ ოჭყიშალს გამაჩირთ-და, ჭყიშ ვასაჯენს თის თეშ გურშენ. გუვარჩუათ თიშ მუსხირენ მაგალით, მუჭო მეხვარ იეჰოვაქ ჯვეშ დროს მუშ ნამთინე მსახურს, მიდგაქ გამაჩირთეს იეჰოვას.

12. მუჭო მექცუ იეჰოვაქ იონას?

¹² წინასწარმეტყველ იონაქ დუდ არიდ იეჰოვაშ დავალებაშ შესრულებას. თეშ უმკუჯინუო, იეჰოვას ხეთეშე ვა უთქუალ ვარია იონაშე. ჯგირ ჭყიშცალო, იეჰოვაქ ირსხჷ თინა დო მეხვარ ძალაშ დორთინაფას, მუთ დავალებაშ შეიოსრულებერო ოსაჭირუდ (იონ. 2:7; 3:1, 2). უმოს გვიანო, იეჰოვაქ აყიროშ ჯაშ მაგალით გიმირინუ, ნამდა ქიმეხვარკო იონას თიშ ინონჭაფას, მუზმათ მნიშვნელოვან რე თითოულ ადამიანიშ სიცოცხლე (იონ. 4:10, 11). მუშ გურაფა შილებე თავრეშე? უხუცესეფქ ხეთეშე ოკო ვადინუან თინეფიშ დორთაშ იმენდ, მიდგაქ არააქტიურო გინირთჷ. თეშ გინაწონს, უხუცესეფქ ირნერო ოკო ეცადან, ქიგეგან მუშენ მუ მიზეზიშ გურშენ მაჩირთჷ შხურქ ოჭყიშალს. მუჟამსით თე შხურ იეჰოვას ართუ, უხუცესეფქ ჸოროფა ოკო გიმირჩქინან დო ქიზრუნან თიშე.

13. მუ რეაქცია უღუდ იეჰოვას 73-მა ფსალმუნიშ მაჭარალიშ სიტყვეფშე დო მუშ გურაფა შილებე თავრეშე?

¹³ სუმენეჩდომავითოსუმა ფსალმუნიშ მაჭარალს გურქ გუტირხჷ, მუჟამსით ქოძირ, ნამდა უბადოეფ ართ მეჯინათ წარმატებულეფ რდეს. თის ოეჭვუდ, ქოღირუდ დო  ვარ იეჰოვაშ მორჩილ ჸოფედკო (ფსალმ. 73:12, 13, 16). მუ რეაქცია უღუდ იეჰოვას? თის ვა გუდღანებ თე კოჩშა. თეშ მანგიორო ღორონთიქ თიშ სიტყვეფ ბიბლიას ქინაჭარ. საბოლათ, ფსალმუნმაბირექ ქიმეხვად, ნამდა თე ცხოვრებას მუთუნ ვა რე იეჰოვაწკუმა ხოლოშიან ურთიერთობაშე უმოს ძვირფას (ფსალმ. 73:23, 24, 26, 28). მუშ გურაფა შილებე თავრეშე? უხუცესეფქ ხეთეშე ოკო ვა განსაჯან თინეფ, მით ფიქრენს ქოღირ დო ვარ იეჰოვაშ მსახურება. თეშ გინაწონს, უხუცესეფქ ოკო ეცადან, ქიგეგან მუ გერე თინეფიშ სიტყვეფ დო საქციელიშ უკახლე. ხვალე თეშ უკულ შეიალებენა უხუცესეფს, ბიბლიაშ მოხვარათ გურშა ელუკინან თინეფს.

14. მუშენ ოსაჭირუდ ელიას მოხვარა დო მუჭო მეხვარ იეჰოვაქ თის?

¹⁴ წინასწარმეტყველ ელიაქ დედოფალ იზებელშე ინტჷ (1 მეფ. 19:1—3). თინა ფიქრენდჷ, ნამდა მუშ მეტ მითინ ვამსახურუდ იეჰოვას წინასწარმეტყველო დო თიშ მსახურებას აზრ ვა უღუდ. ელიას თეშ გუტირხჷ გურქ, ნამდა ღურა ოკოდ (1 მეფ. 19:4, 10). იეჰოვაქ ვა გუდღან ელიას დო დარწმუნ თინა, ნამდა ხვალე ვარდჷ დო შეულებუდ იეჰოვაშ ძალას მიენდკო. თეს გეძინელ უწუ, ნამდა თის ბრელ საქმეშ ოკეთებელო გეგმირინუანდჷ. იეჰოვაქ შურდოგურით მურჩქილუ ელიას, მუჟამსით მუშ გურჭუაშენ ეჩიებუდ დო ახალ დავალებეფ ქიმეჩ თის (1 მეფ. 19:11—16, 18). მუშ გურაფა შემლებნა თავრეშე? არძაქ, განსაკუთრებულო უხუცესეფქ, იეჰოვაშ შხურს შურდოგურით ოკო მურჩქილუათ. უხუცესეფქ ოკო ქურჩქილან პიროვნებას, მუჟამსით მუშ გრძნობეფიშ გურშენ იჩიებ; მაგალთო, მუჟამსით გურმულირ რე ვარდა  ფიქრენს, ნამდა იეჰოვა დღას ვაპატიენს. თეშ უკულ ოკო ეცადან, დარწმუნან ოჭყიშალს მოჩილათირ შხურ, ნამდა იეჰოვაშო ძვირფას რე.

15. მუჭოთ იოანეშ 6:39-ს ჭარჷ, მუჭო უჯინედ იესო მუამუშიშ შხურს?

¹⁵ მუნერ დამოკიდებულება ოკო მიღდან ოჭყიშალს მოჩილათირ შხურწკუმა? მუჭო უჯინე თე საკითხის იეჰოვა? თეშ გაგება იესოშ მაგალითშე შემლებნა. თის უჩქუდ, ნამდა იეჰოვაშ თოლს არძა შხურ ძვირფას რე, ათეშენ თინა ოხვარუდ „ისრაელიშ ჸუდეშ დინაფილ [შხურეფს]“ დართესკო იეჰოვას (მათ. 15:24; ლუკ. 19:9, 10). მუჭოთ ჯგირ ჭყიშ, იესო მუთ შეულებუდუნ ირფელს ორთუდ, ნამდა იეჰოვაშ შხურშე ნამთინ ვადინაფედკო (წეკითხით იოანეშ 6:39).

16, 17. მუჭო ოკო უჯინედან უხუცესეფ თინეფს, მიდგაქ გამაჩირთჷ ქრისტიანულ კრებას? (ქოძირით ჩარჩო  „მუს შილებე გინაფლენდას დინაფილ შხურ?“)

¹⁶ მოციქულ პავლექ ეფესოშ კრებაშ უხუცესეფს ელუჩ, ნამდა მიაჸუნესკო იესოშ მაგალითის. თიქ თქუ: „ოკო მეხვარათ ძალაგიშალიებურეფს დო რშუდან უფალ იესოშ სიტყვეფ: „შხვაშა ჯგირიშ კეთებას უმოს მეტ ბედნერობა მოუღ, ვინემ მეღებას“ (საქ. 20:17, 35). თე მუხლეფშე იძირე, ნამდა უხუცესეფს უღნა განსაკუთრებულ პასუხიშმგებლობა — ქიზრუნან იეჰოვაშ ხალხშე. ართ უხუცეს, სალვადორ, ნამუთ ესპანეთის ცხოვრენს, იჩიებ: „მუჟამსით ფიფქრენქ, მუჭო ზრუნენს იეჰოვა დინაფილ შხურშე, თენა აღბძრენს, მუთ შემლებუნ ირფელ გუვაკეთე თინეფიშ მახვარებელო. მუჭოთ სულიერ ჭყიშის, მიჩქ, ნამდა იეჰოვას ოკო, თინეფშე იბზრუნე“.

¹⁷ თე სტატიას მოშინაფილ პიროვნებეფქ, მიდგაქ მიოტუეს იეჰოვაშ მსახურება, მოხვარაშ ჭყოლოფათ კინ დართეს იეჰოვას. ამდღა, თინეფშე ბრელ, მიდგაქ გამაჩირთჷ ქრისტიანულ კრებას, მზათ რე, კინ დართას თის. უკულიან სტატიას უმოს დეტალურო გუვარჩიენთ, მუშ კეთება შემლებნა, ნამდა ქიმვეხვარათ თინეფს, დართან იეჰოვას.