1. მუს ელამჩანა ფილიპელეფიშ 2:3 დო მუ კურთხევეფს მომღანა თიშ გათვალისწინება?

ჩქი თანდაბლურო ფცენთ თაყვანს იეჰოვას, მუშენდა ბჯერა, ნამდა თის არძაშ უჯგუშო უჩქჷ, მუ იჸუაფ ჩქინო ჯგირ (ეფეს. 4:22—24). თანდაბლობა მოხვარნა, ნამდა ჩქინ სურვილეფშე უმოს წოხლე იეჰოვაშ ნება გივორინუათ დო შხვეფ ჩქინ უჯგუშეფო მიფრჩქინათ. შედეგო, ჩქი ფხარენთ იეჰოვაწკუმა დო შხვეფწკუმა ჯგირ ურთიერთობათ (წეკითხით ფილიპელეფიშ 2:3).

2. მუ არჩქილედ მოციქულ პავლეს დო მუს გუვარჩიენთ თე სტატიას?

² ფრთხილას ვეპჸით-და, ჩქი ხოლო შილებე ქუვაგურათ სატანაშ ქვეყნიერებას მახორუ ამაყ დო ეგოისტ ადამიანეფს. * მუჭოთ იძირე, თე პრობლემა უღუდ პირველ საუკუნეს მახორუ ნამთინე ქრისტიანს, მუშენდა მოციქულ პავლექ რომაელ ქრისტიანეფს მეჭარ: „გირაგადუთ არძას: თქვან დუდშე თიშე მეტ ვეფიქრათ, ვინემ ოკო ფიქრენდათ; თეშ იფიქრით, ნამდა საღ აზროვნება გიღდან“ (რომ. 12:3). პავლეს არჩქილედ, ნამდა საჭირო რე, ჩქინ დუდშე ხოლო იფიფქრათ. მარა თანდაბლობა მიმეხვარებნა, გაწონასწორებულ თვალსაზრის მიღდან ჩქინ დუდშე. თე სტატიას გუვარჩიენთ სუმ მხარეს, სოდეთ თანდაბლობა მიმეხვარებნა, ზედმეტო ვეფიფქრათ ჩქინ დუდშე. თე სუმ მხარე რე: 1) ქორწინება, 2) პასუხიშმგებლობეფ იეჰოვაშ ორგანიზაციას დო 3) სოციალურ ქსელეფიშ გიმორნაფა.

3. მუშენ შილებე დაქორწინებულეფს პრობლემეფქ ქაშუან დო მუჭო ოცად ნამთინე თე პრობლემეფიშ გინოჭკირუას?

³ იეჰოვას ოკო, ჩილ დო ქომონჯის ბედნერ ოჯახურ ცხოვრება უღდან. ნამთინ ვა რე სრულყოფილ, ათეშენ, შილებე უთანხმოებეფქ წიმიჭკირას. მუჭოთ პავლექ თქუ, დაქორწინებულეფს გარკვეულ პრობლემეფ ქაშიდეს (1 კორ. 7:28). ნამთინე ორწყე, ნამდა ირო უთანხმოება უღჷ მეუღლეწკუმა დო შილებე იფიქრას, ნამდა მუნეფიშ ქორწინება შეცდომა რდუ. წყვილშა ქვეყნიერებაშ აზროვნებაქ ქიმოქმედ-და, პრობლემაშ გინოჭკირუას ხეთეშე განქორწინებათ ეცადებნა. თინეფ იფიქრენა, ნამდა პირად ჯგირობუა რე მთავარ დო ბედნერეფ ხვალე განქორწინებაშ შემთხვევას იჸუაფნა.

4. მუ ოკო ვეფიფქრათ ხეთეშე?

⁴ ხეთეშე ოკო ვეფიფქრათ, ნამდა ჩქინ ქორწინებაქ ვა გამართლჷ. ჩქი მარჩქილენა, ნამდა განქორწინებაშ ბიბლიურ საფუძველ, ხვალე სექსუალურ უზნეობა რე (მათ. 5:32). ათეშენ, მუჟამსით ქორწინებას პრობლემეფ რჩქინდუ, ვა მოკონა, სიამაყექ გიმორჯგინან დო ფთქუათ: ჩქიმ მეუღლე ვა ზრუნენს ჩქიმდე. ვართ ჸოროფას ბგინაფლენქ თიშე. შხვაწკუმა უმოს ბედნერ ხომ ვეპჸიქ? თეშნერ აზროვნება ქომღუნან-და, ხვალე ჩქინ დუდშე ფიფქრენთ დო ვართ ხოლო მეუღლეშე. თეცალ დროს ქვეყნიურ სიბრძნე ელაიჩანა, გურს ქურჩქილათ დო თე ირფელს განქორწინებაქ მაჸუნასინ ხოლო თინა გაკეთათ, მუთ პირადო თქვა მოიღანა ბედნერობას. თეშ გინაწონს, ღორონთიშ სიბრძნე გირაგადნა, ნამდა „ხვალე თქვან ჯგირობუაშე ვარინ, შხვეფიშ ჯგირობუაშე ხოლო“ ოკო იფიქრათ (ფილ. 2:4). იეჰოვაშ სურვილ რე, დეცვათ ქორწინება დო ვეჩეთხუათ მეუღლეს (მათ. 19:6). თის ოკო, ნამდა გადაწყვეტილებეფიშ მეღებაშ დროს პირველ რიგის ღორონთიშ პრინციპეფ გეთვალისწინათ დო ვართ ხოლო თქვან სურვილეფ.

5. მუჭოთ ეფესოელეფიშ 5:33-ს ჭარჷ, მუჭო ოკო ოქცუდას ჩილ დო ქომონჯ ართმაჟიას?

⁵ ჩილ დო ქომონჯ ართმაჟიას ჸოროფათ დო პატიცემათ ოკო ოქცუდას (წეკითხით  ეფესოელეფიშ 5:33). მუჭოთ ბიბლია მოგურუანა, შხვაშა ჯგირიშ კეთებაშე უმოსო ოკო ფიფქრენდათ, ვინემ თიშე, ნამდა ირო აშო მიკეთან ჯგირ (საქ. 20:35). ნამ თვისება მეხვარებ დაქორწინებულ წყვილს ჸოროფა დო პატიცემაშ გიმორჩქინას? თე თვისება თანდაბლობა რე. თანდაბალ მეუღლე ხვალე მუშ დუდშე ვარინ, თიშე ფიქრენს, „მუთ შხვაშო რე მარგებელ“ (1 კორ. 10:24).

6. მუშ გურაფა შეილებნა სტივენ დო სტეფანიშ სიტყვეფშე?

⁶ თანდაბლობაქ მეხვარ ბრელ ქრისტიან წყვილს, უმოს ბედნერ ქორწინება ნოღვედესკო. მაგალთო, ართ დაქორწინებულ ჯიმა, სტივენ, იჩიებ: „მუჭოთ ართ გუნდ, ართიანწკუმა ოკო ითანამშრომლათ, განსაკუთრებულო პრობლემეფიშ დროს. თაშ ქიმიქციებუთ-და, ვეფიქრენთ: მუ რე ჯგირ ჩქიმო? თეშ მანგიორო, იფიქრენთ: მუ რე ჯგირ ჩქინო?“. სტივენიშ ოსურ, სტეფანი, ხოლო თეშნერო ფიქრენს. თინა იჩიებ: „მითინს ვაკო თიცალ პიროვნებაწკუმა ცხოვრება, ნამუთ ირო უთანხმოებას წუმოჭკირუნს. მუჟამსით უთანხმოება წიმიჭკირუ, ჩქი ვოცადუთ, ქიგებგათ, მუ რე პრობლემაშ მიზეზ. უკულ ბლოცულენთ, იბრკვიენთ თი ბიბლიურ პრინციპეფს, ნამუთ გიმმოდირთუნა დო ართო იფჩიებუთ, მუჭო შილებე პრობლემაშ გინოჭკირუა. ჩქი პრობლემას ვობრძოლუთ დო ვართ ხოლო ართიანს“. ჩილ დო ქომონჯ უმოს ბედნერ იჸუაფ, მუჟამსით მეუღლეეფ მუნეფიშ დუდშე თიშე უმოსის ვეფიქრენა, ვინემ ოკო ფიქრენდან.

7. მუნერ დამოკიდებულება ოკო უღდას ჯიმას, მუჟამსით იეჰოვაშ ორგანიზაციას პასუხიშმგებლობას ღებულენს?

⁷ ჩქინო დიდ პატი რე, მუთ შემლებნან ირფელ ვაკეთათ იეჰოვაშ მსახურებას (ფსალმ. 27:4; 84:10). ჯგირ რე, მუჟამსით ჯიმა მზათ რე, იეჰოვაშ ორგანიზაციას უმოს მეტ გაკეთას. ბიბლია იჩიებ: „მითინ ზედამხედველობაშ მენჭირნაფას ქაცად-და, ჯგირ საქმე ნოკობუე“ (1 ტიმ. 3:1). მარა, მუჟამსით ჯიმა პასუხიშმგებლობას ღებულენს, მუშ დუდშე თიშე უმოს ოკო ვეფიქრას, ვინემ ოკო ფიქრენდას (ლუკ. 17:7—10). თიშ მიზან ოკო რდას, ნამდა შხვეფს თანდაბლურო მემსახურას (2 კორ. 12:15).

8. მუს ბგურაფლენთ დიოტრეფე, უზია დო აბესალომიშ მაგალითეფშე?

⁸ ბიბლიას მოჩამილ რე თინეფიშ გუმაფრთხილებერ მაგალითეფ, მით მუნეფიშ დუდშე ზედმეტო ფიქრენდეს. დიოტრეფე მოკრძალებას ვეგმირჩქინანდჷ დო ოცადუდ, პირველ ადგილ დეკინკო კრებას (3 იოან. 9). უზიაქ სიამაყე გიმირჩქინ დო თიშ კეთება მინდომ, მუთ იეჰოვას თიშა ვა დუვალებ (2 მატ. 26:16—21). აბესალომქ ეშმაკურო ეცად, ხალხიშ გურ მიგუკო, მუშენდა მეფობა ოკოდ (2 სამ. 15:2—6). თე ბიბლიურ მაგალითეფშე არგამათ იძირე, ნამდა იეჰოვას ვა მოწონს თინეფ, მიდგა მუშ დუდიშ განდიდებას ოცად (იგავ. 25:27). საბოლათ, ამაყ დო ამბიციურ კათას გლახაშ მეტ ჯგირ ვაღოლე (იგავ. 16:18).

9. მუ მაგალით დომტუეს იესოქ?

⁹ იესო ვა გუდჷ თე ამაყ კათას. „მართალ რე, თინა ღორონთცალ რდუ, მარა თეშ ხოლო ვა უფიქრებ, მიღუკო თინა, მუთ ვაკუთვნუდ, შხვანერო ქოფთქუათინ, ღორონთის გაუმანგკო დუდ“ (ფილ. 2:6). იესო, ნამუთ იეჰოვაშ უკულ მაჟია პიროვნება რე, მუშ დუდშე თიშე მეტის ვა ფიქრენს, ვინემ საჭირო რე. თიქ მუშ მოწაფეეფს უწუ: „მიდგა თქვან შქას თეშ მიქციებ, მუჭოთ არძაშ უჭიჭაშ, თინა იჸუაფ არძაშ უდიდაშ“ (ლუკ. 9:48). მართალო დიდ კურთხევა რე, იფთანამშრომლათ თიცალ პიონერეფ, მომსახურეეფ, უხუცესეფ დო რაიონულ ზედამხედველეფწკუმა, მით იესოცალო გიმირჩქინანა თანდაბლობას! იეჰოვაშ თანდაბალ მსახურეფ გიმირჩქინანა ჸოროფას, მუთ ღორონთიშ ნამდვილ მსახურეფიშ გიშაჩინებელ ნიშან რე (იოან. 13:35).

10. მუ ოკო აკეთათ, მუჟამსით ფიქრენთ, ნამდა უხუცესეფ საჭირო რენ თეშ ვემკაჯინენა პრობლემეფს?

¹⁰ მუ ოკო აკეთათ, მუჟამსით მიგორჩქნა, ნამდა კრებას პრობლემეფ რე დო ფიქრენთ, ნამდა  უხუცესეფ საჭირო რენ თეშ ვემკაჯინენა თე პრობლემეფს? უკმაყოფილებაშ გიმოხანტუაშ მანგიორო შეილებნა, ხუჯ დუკინათ ხემძღვანელ ჯიმალეფს დო თეშნერო თანდაბლობა გიმირჩქინათ (ებრ. 13:17). მუ მიგეხვარებნა თეშ კეთებას? ქოკითხით თქვან დუდის: მართალო თიცალ სერიოზულ რენო თე პრობლემეფ, ნამდა აუცილებერ რე თინეფიშ მოგვარება? ასე ქორენო თე პრობლემეფიშ მოგვარებაშ დრო? მა მოვალნო თინეფიშ მოგვარება? ალალას ქოფთქუენ, სინამდვილეს მშვიდობას ვუნწყუნქო ხეს დოვარ დუდიშ გიმორჩქინას ვოცადუქ?

11. მუჭოთ ეფესოელეფიშ 4:2, 3-ს ჭარჷ, მუ შედეგეფ მიღნა, მუჟამსით თანდაბლურო ვომსახურუთ იეჰოვას?

¹¹ იეჰოვაშო უმოს მნიშვნელოვან რე, თანდაბლობა მიღდან ვინემ უნარიანეფ ვარდა ნიჭიერეფ ვორდათ; თიშო უმოს მნიშვნელოვან რე, კრებას ართობა მიღდან ვინემ პასუხიშმგებლობეფს ეფექტურო ვასრულენდათ. ათეშენ, მუთ შეილებნა ირფელ გაკეთით, ნამდა თანდაბლურო ემსახურათ იეჰოვას. თეშნერო, კრებაშ ართობას შეუნწყუნთ ხეს (წეკითხით ეფესოელეფიშ 4:2, 3). აქტიურ მონაწილება მიღით მსახურებას. გორით საშვალებეფ, ნამდა ჯგირ გუკეთათ შხვეფს დო თეშნერო მემსახურათ თინეფს. არძაწკუმა გეგმირჩქინით სტუმარიშ პატიცემა, თინეფწკუმა ხოლო, მიდგას ვა უღჷ პასუხიშმგებლობეფ კრებას (მათ. 6:1—4; ლუკ. 14:12—14). მუჟამსით კრებაწკუმა თანდაბლურო თანამშრომლენთ, შხვეფ ხვალე თქვან უნარს ვარინ, თქვან თანდაბლობას ხოლო ქოძირნა.

12. მუს იჩიებ ბიბლია მეგობრეფიშ გურშენ? გენწყით.

¹² იეჰოვას ოკო, ნამდა ჩქინ მეგობრეფ დო ოჯახიშ წევრეფწკუმა ჯგირ ურთიერთობათ ფხარენდათ (ფსალმ. 133:1). იესოს ჯგირ მეგობრეფ  ჸუნდჷ (იოან. 15:15). ბიბლია მირაგადნა, მუშენ რე ჯგირ, პჸუნდან ნამდვილ მეგობრეფ (იგავ. 17:17; 18:24). ბიბლია თის ხოლო მირაგადნა, ნამდა გლახა რე, მუჟამსით მეგობრეფ ვა პჸუნა დო ჩქინ დუდშო ვორეთ (იგავ. 18:1). ბრელ ფიქრენს, ნამდა სოციალურ ქსელეფ ჯგირ საშვალება რე, რჸუნდას ბრელ მეგობარ დო დუდის ხვალახეთ ვა გინაფლენდე. მარა სოციალურ ქსელეფიშ გიმორნაფაშ დროს სიფრთხილე რე საჭირო.

13. მუ მიზეზიშ გურშენ შილებე, ნამდა ნამთინე, მით სოციალურ ქსელეფს ირინუანს დეპრესიულ რდას დო ხვალახეთ გინაფლენდას დუდის?

¹³ მეცნიერეფქ დადგინეს, ნამდა თინეფ მით ბრელ დროს ახარჯენა სოციალურ ქსელეფს პოსტეფიშ გოჯინას, უმოს დეპრესიულეფ რენა დო ხვალახეთ გინაფლენა დუდის. მუ რე თეშ მიზეზ? თეშ ართ-ართ მიზეზ შილებე თინა რდას, ნამდა ხალხ სოციალურ ქსელეფს უმოსო ცხოვრებაშ მნიშვნელოვან მომენტეფს გინოღალირ გიშნაგორა სურათეფს გედვანს. მაგალთო, მუნეფიშ, მეგობრეფიშ დო თი ჯგირ ადგილეფიშ სურათეფს, სოდეთ რდეს. პიროვნებაქ, ნამუთ გაჯინე თეცალ სურათეფს, შილებე იფიქრას, ნამდა შხვეფიშ კარს, მუშ ცხოვრება ვა რე საინტერესო. ართ 19 წანერ და იჩიებ: „მანგარ უბედურო ბგინაფლენდჷ დუდის, მუჟამსით ვორწყედ, ნამდა შხვეფ საბატონ დო ჟეშხას ჯგირ დროს ატარენდეს დო მა ჸუდეს მილვოხედ“.

14. მუჭო მიმეხვარებნა 1 პეტრეშ 3:8-ს ინოჭარილ რჩევა სოციალურ ქსელეფიშ გიმორნაფაშ დროს?

¹⁴ მუშო ოკო რაგად, სოციალურ ქსელეფიშ გიმორნაფა ჯგირ მიზანით ხოლო შილებე. მაგალთო, ჩქინ ოჯახიშ წევრეფ დო მეგობრეფწკუმა ურთიერთობაშო. მარა ქუდაკვირებეთო, ნამდა ნამთინე თიცალ კომენტარეფს, სურათეფს ვარდა ვიდეოეფს გედვანს სოციალურ ქსელს, ნამდგათ ოკო, შხვეფ შქას გიშეძირედას? თეშ იძირე, ნამდა მუშ საქციელით იჩიებ: „ქომჯინით, მუ მანგარ ვორექ“. ხვალე თენა ვარინ, ნამთინე უხეშ დო უზნეო კომენტარეფს გეუჭარანს მუშ ვარდა შხვეფიშ სურათეფს. თეშ გინაწონს, ბიბლია ქრისტიანეფს მომწოდენა, ნამდა გუვავითარათ თანდაბლობა დო ჸოროფა (წეკითხით 1 პეტრეშ 3:8).

15. მუჭო მიმეხვარებნა ბიბლია, გივორჯგინათ დუდიშ გიმორჩქინაშ სურვილს?

¹⁵ სოციალურ ქსელს ქირინუანთ-და, ქოკითხით თქვან დუდის: ჩქიმ გედვალირ კომენტარეფ, სურათეფ ვარდა ვიდეოეფ ხომ ვაფიქრებაფუანს შხვეფს, ნამდა დუდშა იფცქვანქ? შხვეფს ხომ ვა ვონჯარუანქ? ბიბლიას ჭარჷ: „ირფელ, მუთ ქვეყნიერებას რე — ხორციშ  სურვილ, თოლიშ სურვილ დო ქონებათ ცქვაფა — მუმაშე ვარინ, ქვეყნიერებაშე რე“ (1 იოან. 2:16). ბიბლიაშ ართ თარგმანს ფრაზა „ქონებათ ცქვაფა“ თარგმნილ რე, მუჭოთ „დუდიშ გიმორჩქინაშ სურვილ“. ქრისტიანეფს ვაკონა დუდიშ გიმორჩქინა. თინეფ მეჸუნა ბიბლიურ რჩევას: „ვეგნიფრთათ დიდებაშ მოჸოროფეთ, ვართ შევეჯიბრათ დო ვართ მენჯარან ართიანიშ“ (გალ. 5:26). თანდაბლობა მიმეხვარებნა, ვა ვაგურათ თე ქვეყნიერებას მახორუ ხალხის, მით ირო დუდიშ გიმორჩქინას ოცად.

16. მუშენ ოკო ვა ვორდათ ამაყეფ?

¹⁶ თანდაბლობაშ გავითარება მნიშვნელოვან რე, მუშენდა ამაყეფს „საღ აზროვნება“ ვა უღნა (რომ. 12:3). ამაყ კათა აგრესიულ დო დიდებაშ მოჸოროფე რე. თინეფიშ აზროვნება დო საქციელ, ხშირას ქოთ მუნეფს უწყუნუანს გურს დო ქოთ შხვეფს. თინეფქ ვეთირეს-და, სატანა გილულუანს აზროვნებას დო ვეშიალებენა, საღას იაზროვნან (2 კორ. 4:4; 11:3). თეშ გინაწონს, თანდაბალ პიროვნებას საღ აზროვნება უღჷ. თის გაწონასწორებულ თვალსაზრის უღჷ მუშ დუდშე დო არჩქილე, ნამდა მუდგარენ მხარეეფს შხვეფ თიშე უჯგუშეფ რენა (ფილ. 2:3). თეწკუმა ართო, თანდაბალ ადამიანს უჩქჷ, ნამდა „ღორონთ ამაყეფს ოწინააღმდეგ, მარა თანდაბლეფწკუმა ჭყოლოფას გიმირჩქინანს“ (1 პეტ. 5:5). საღ აზროვნებაშ ადამიანეფს ვაკონა, ნამდა იეჰოვა თინეფიშ მოწინააღმდეგე რდას.

17. მუ ოკო ვაკეთათ, ნამდა ბოლოშა თანდაბლეფ ვორდათ?

¹⁷ ბოლოშა თანდაბლეფ ვორდათინ, ოკო გეგმიბრინუათ ბიბლიურ რჩევა: „[ქიდიბტუათ] ჯვეშ პიროვნება თიშ საქმეეფწკუმა ართო დო [დიფთირათ] ახალ პიროვნებათ“. თეშო ძალისხმევა რე საჭირო. ჩქი ოკო ქიდვეკვირათ იესოშ მაგალითის დო ვეცადათ, მუთ შემლებნან ირნერო მივაჸუნათ თის (კოლ. 3:9, 10; 1 პეტ. 2:21). თეს გუვაკეთენთ-და, ჯგირ შედეგ მაღვენუნა. თანდაბლობას გუვავითარენთ-და, უმოს ბედნერ ოჯახურ ცხოვრება მაღვენუნა, ხეს შევუნწყუნთ კრებაშ ართობას დო მარჩქვენუნა, მუჭო გიმიბრინუათ სოციალურ ქსელეფ გონივრულო. მუთ არძაშ უმოს მნიშვნელოვან რე, იეჰოვაშე კურთხევეფს დო მოწონას მიბღენთ.