მა ავსტრიაშ ქალაქ გრაცის მიბრდი. ამშვ წანერ ვორდინ თეშ, მოსამზადებელო რელიგიურ სკოლაშა გემშამჸონეს. მარა ვორწყედ ნამდა, თექ უზნეობა ჩვეულებრივ მუდგარენ რდუ მღვდელეფ დო მონაზონეფ შკას, მუდგაქ გომჯოგუ თექიანობა. თაშ ნამდა, ჩქიმ დიდაქ უფლება ქომუჩ ართ წანაშა თე სკოლა ქუდომტებუდკო.

უმოს გვიანო სკოლა ინტერნატშა გემშამიონეს. ართ სერს, ჩქიმ მუმაქ ქუმორთ დო უმოს უშკურანჯ ადგილშა, ქალაქ შლადმინგშა მიდამჸონ, მუშენდა გრაცი იბომბუდ. ონდეთ ვოჭიშეთ ხიდიშ გინულა, თიშენ ნამდა, მუჭო გეგნოფრთითინ, თინა აფეთქეს. ართშა მა დო ჩქიმ ბები ეზოს ვორდით თეშ, თვითმფრინავეფშე ბომბუა ქიდიჭყეს დო ჩქი ხოლო დებზიანით. არგამა რდუ, ნამდა ვართ მთავრობას დო ვართ ეკლესიას მუთუნქ ვაკეთინ დო იმენდეფ მემდინუეს.

1950 წანას ართ იეჰოვაშ მოწმე ჩქიმ დიდაშა გილეშ დო ბიბლიურ ცნობას უქადაქუდ. მა ვურჩქილედ თინეფიშ ჩიებას დო მინშა კრებაშ შეხვალამეფშა ხოლო გილაპჸუნდჷ. თიქ დერწმუნ, ნამდა იეჰოვაშ მოწმეეფ ჭეშმარიტებას ოგურუანდეს, ათეშენ 1952 წანას დინათ.

ადგილობრივ კრებაშ შეხვალამა, სოდეთ გილეფშითინ, ჩქიმ თოლს ხანშა მიშულირ ოსურეფიშ ოშაყარუცალ რდუ. ართშა შხვა კრებაშა მიდაფრთით, სოდეთ ბრელ ახალგაზრდა რდუ დო თინა შუროთ ვაგუდ თი კრებას, ნამდგაშა გილეფშით. გრაცშა დიბრთითინ, კრებაშ არძა შეხვალამას ვოსწრუდ დო დებრწმუნ, ნამდა მუდგას ბგურაფლენდინ, ჭეშმარიტება რდუ. თის ხოლო ქიმეფხვად, ნამდა იეჰოვა რდუ ღორონთ, ნამუთ მუშ მსახურეფს დღას ვა უდინუანს იმენდის, თიმწკუმა ხოლო, მუჟამსით ფიფქრენთ, ნამდა ურთულაშ სიტუაციას ვორეთ (ფსალმ. 3:5, 6).

მოკოდ ჭეშმარიტება შხვეფშა ხოლო გეგნომჩამუდკო. გვალო დუდშე ჩქიმ და დო ჯიმალეფს ვუქადაქ. ჩქიმ ოთხ უნჩაშ და ვა ცხოვრენდჷ ჩქინწკუმა ართო, მუშენდა შხვადოშხვა  სოფელს სკოლაშ მასაწვლებერეფო მუშენდეს. ათეშენ ართშა ქიმვაკითხე თინეფს დო ბიბლიაშ გურაფაშ დოჭყაფა ქელუჩ. საბოლათ, არძა ჩქიმ და დო ჯიმაქ იეჰოვაშ მოწმეთ გინირთჷ.

ართშა კარდოკარ მსახურებაშ დროს ქეშეფხვად 30 წანას გინოჩილათირ ოსურს დო თის ბიბლიაშ გურაფა ქიდუჭყჷ. თიქ სულიერო წიმი მიდართ დო დინათ. ჭიჭე ხანშა თიშ ქომონჯიქ დო ჟირ ბოშიქ ხოლო დინათ. თე ოსურწკუმა ბიბლიაშ გურაფაქ ჩქიმ რწმენა უმოსო გამანგარ, მუშენდა ჩქიმდა ბიბლიაშ ოფიციალურ გურაფა მითინს ვაჩუტარებ. თაშ ნამდა, ირ გაკვეთილშო ჯგირო ვემზადებუდ. ფაქტიურო, დიო ჩქიმ დუც ვოგურუანდ დო უკულ ჩქიმ მოსწავლეს. შედეგო, უმოსო ქინვანჭჷ ჭეშმარიტებას. 1954 წანაშ აპრილს დუდ მევუძღვინ იეჰოვას დო დიმნათ.

1955 წანას ქიდვესწრჷ საერთაშორისო კონგრესეფს გერმანიას, საფრანგეთის დო ინგლისის. ლონდონს საშვალება მიღუდ, გეფჩინებაფეკო ალბერტ შრედერი. თინა ბიბლიურ სკოლა „გალაადიშ“ მასწავლებელ დო უმოს გვიანო ხემძღვანელ საბჭოშ წევრ ხოლო რდუ. ბრიტანეთიშ მუზეუმს ექსკურსიაშ დროს ჯიმა შრედერქ თი ბიბლიურ ხეშნაჭარეფ ქუმოძირეს, სოდეთ მოჩამილ რდუ ღორონთიშ სახელ ებრაულ ასოეფით დო თიშ მნიშვნელობა ხოლო გემინწყეს. თექ უმოსო ქომჸოროფუ იეჰოვა დო გეგნმოჭყვიდირაფუ, მეტ გურგედვალირო მიქადაგებუდკო ჭეშმარიტება ღორონთიშ სიტყვაშე.

პიონერო მსახურება 1956 წანაშ 1 იანარს ქიდიბჭყჷ. ოთხ თუთაშ უკულ სპეციალურ პიონერო დაბნიშნეს ავსტრიაშ ქალაქ მისტელბახის, სოდეთ საერთოთ ვა რდეს მოწმეეფი. თექ მსახურებაშ დროს ართ პრობლემას ქეშეფხვად. მა დო ჩქიმ პარტნიორ, მიდგაწკუმა ართო ფცხოვრენდინ, ხასიათეფით შურო ვაბგუდით ართიანს. მა 19 წანერ ვორდჷ დო ქალაქის იბრდუდჷ. თინა ჩქიმდე უნჩაშ რდუ ამშვ წანათ დო სოფელშე რდუ. მა ოჭმარეს გითორულაფა მიჸორდ, თის — ადრე ედგინა. სერით გვიანობაშახ ვამოკოდ დორულაფა, ის ხოლო ადრე უსხუნუდ დონჯირა. მარა ჩქი ჟირხოლოქ ბიბლიურ რჩევა გეგმიბრინეთ დო განსხვავებულ ხასიათეფიშ უმკუჯინუო, ვაგრძელენდით მსახურებას დო წარმატებეფი ხოლო მიღდეს.

ჭიჭე ხანშა უმოს დიდ სირთულეეფს ქეშეფხვადით. მაგალთო, მიღდეს წინააღმდეგობეფ დო თხოზინ, მარა ხვალე ვადოფსკილადეთ (2 კორ. 4:7—9). ართშა სოფელს ქადაქებაშ დროს თექიანეფქ ჯოღორეფ ქუმომთხოზინუეს. მა დო ჩქიმ პარტნიორს ქიანაშ მადიდა ჯოღორეფქ ქუგმაშაყარეს, თინეფქ ლალუა დო ღირინ ქუდმოჭყეს. ჩქი ხელეფ ქიმეპკიდით ართიანს დო მა ლოცვა ქიდიპჭყჷ: „იეჰოვა, რთხინქჷ, გეკოპჭკუმეს-და, ვებწვალათ თეშ, მალას ქუდუშვჷ ჩქინ ღურა!“. მუჟამსით ჯოღერფქ ხოლოშა მიმანჭესინ, მიოტუეს ლალუა, კუდელს ქიდუქანცუეს დო მიდართეს. თაქ დასურო იეჰოვაშ ხე რდუ. თეშ უკულ მთელ სოფელს იფქადაქით დო ჩქინ გასაკვირო, ხალხ ჯგირო ირჩქილუაფუდ. შილებე თინეფს გუკვირდეს თიქ, ნამდა ჯოღორეფს მუთუნ ვადუშებნა ჩქინდა დო გინვოსკიდით. თინეფშე მუსხირენქ იეჰოვაშ მოწმეთ გინირთ.

ჩქი ხოლო ართშა ქიგებდირთით ოშკურანჯ სიტუაციაშ წოხოლე. ართშა ჩქინ ჸუდეშ მინჯექ შუმილო ქუმორთ დო ჸვილუათ დუმორცქინეს. თიქ მიწუეს, ნამდა მეზობელეფს ვაწუხენდით. თიშ ოსურ ოცადუდ, დუწყნარებუდკო თინა, მარა მუთუნქ ვაქიმინ. თე ირფელ ჩქინ ოთახშე  მარჩქილედეს, ნამუთ ჟინ სართულს რდუ. კარს ხეთეშე სკამეფ ქიმკობდგით დო ქინვონწყეთ ჩქინ ჩემოდანეფ. კარ გივონჯითინ, ჸუდეშ მინჯეს ხეს დიდ ხამ უკინებუდ დო კიბეეფს გერდჷ. ჩქი უკახალენ კარშე იმტით ჩანთეფით დო თექ დღას ვადომრთინნა.

სასტუმროშა ქიმეფრთით დო ნომერ მიფთხით. თაქ სოდგარენ ართ წანას ქუდოფსკიდით, მუდგაქ ხე ქეშუნწყუ ჩქინ მსახურებას, მუშენდა სასტუმრო ქალაქიშ ცენტრის რდუ დო ნამთინე ჩქინ დაინტერესებულს ონწყუნდჷ, თაქ ჩამტარებდესკო ბიბლიაშ გურაფა. თაშ ნამდა, ჩქინ ოთახის ბიბლიაშ გურაფას ვატარენდით დო ირ მარას „გინაჯინალ კოშკის“ ვარჩიენდით, ნამდგას სოდგარენ 15 პიროვნება ოსწრუდ.

მისტელბახის ართ წანაშე მეტ ხანს ვორდით. უკულ გრაცის სამხრეთ აღმოსავლეთით ქალაქ ფელდბახის ქუდმანიშნეს, სოდეთ შხვა პარტნიორწკუმა ართო ვმსახურენდჷ, მარა თაქ ხოლო კრებაშ შეხვალამეფ ვა რდუ. ჩქი ჯვეშ ჸუდეშ მაჟია სართულს, ჭიჭე ოთახის ფცხოვრენდით. ოთახის ირდიხაშე უმბარდ, ათეშენ ვოცადუდით გაზეთიშ ფურცელეფით გემფშაფდესკო რხვილეფ. წყარ ინჭაშე ეკომღუდეს. მარა თე ირფელ ღირუდ თი კურთხევეფშა, ნამუთ მსახურებას მიღდეს. მუსხირენ თუთაშა ჯგუფიქ გინწყჷ. დროხანიშ უკულ, ართ ოჯახიშ 30 წევრიქ, მიდგას ვოგურუანდით, იეჰოვაშ მოწმეეფო გინირთეს!

თეცალ შემთხვევეფიშ უკულ უმოს მარდულ ვორდჷ იეჰოვაშ, მუშენდა ვორწყედ, ნამდა თინა ირიათო ელურდჷ თინეფს, მიდგას სამეფოშ საქმე პირველ ადგილშა გეურდჷ. იეჰოვა ირიათო ჩქინ გვერდით რე თიმწკუმა ხოლო, მუჟამსით ხალხის ვამახვარებე ჩქინდა (ფსალმ. 121:1—3).

1958 წანას ქალაქ ნიუ-იორკის იანკიშ სტადიონს დო პოლო-გრაუნდსის საერთაშორისო კონგრესიქ ჩეტარ. მუჟამსით თექ დასწრებაშ ანკეტა შევავსინ, ავსტრიაშ ფილიალქ ქეშმეკითხჷ, ხომ ვამღუდ სურვილ, სკოლა „გალაადიშ“ 32-ა კლასის ქომგურუაფუდკო. მუშო ოკო რაგად, ვარია მუჭო ოკო ფთქვიკო თეცალ ჯგირ ამბეშე დო ხეთეშე დევეთანხმი.

„გალაადის“ მარტინ პოეტზინგერიშ გვერდით ვოხედ. თის მერეთ დღა აფუდ გინნაღელ ნაცისტეფიშ საკონცენტრაციო ბანაკის. უმოს გვიანო ხემძღვანელ საბჭოშ წევრო მსახურენდჷ. გაკვეთილეფიშ დროს მარტინ მინშა ალმოფუცქინანდჷ: „ერიკა, მუს ნიშნენს თენა გერმანულო?“.

 გურაფაშ შკა პერიოდის ნეითან ნორქ გეგმომცხადეს, სო ვორდით დანიშნული. მა პარაგვაის დუმანიშნეს. თიმ დროს მანგარ ახალგაზრდა ვორდჷ, ათეშენ თე ქიანაშა გენმაშკვესკონინ, ჩქიმ მუმაშ თანხმობა მოსაჭირუდ. მუაჩქიმიშ თანხმობაშ უკულ 1959 წანაშ მარტის პარაგვაიშა მიდაფრთჷ. ასუნსიონს მისიონერეფიშ ჸუდეს ახალ პარტნიორწკუმა ართო ფცხოვრენდჷ.

ჭიჭე ხანშა ვოლტერი ბრაითი გეფჩინებაფე, ნამუთ მისიონერო მსახურენდჷ დო „გალაადიშ“ 30-ა კლასი აფუდ თებულ. დრო ხანიშ უკულ დეფქორწინით დო ართო ვობრძოლუდით ცხოვრებაშ სითრულეეფს. ირიათო, მუჟამსით რთულ პრობლემაშ წოხოლე გივორდითინ, პკითხულენდით ესაიაშ 41:10-ის, სოდეთ იეჰოვაშ დაპირება ინოჭარ: „ვა გაშქურნას, მუშენდა სქანწკუმა ვორექ. იშო-აშო ვეჯინა, მუშენდა სქან ღორონთი ვორექ. მა გუგამანგარენქ“. თე სიტყვეფ მარწმუნენდეს, ნამდა იეჰოვა დღას ვემმოტენდეს, მუჟამსით თიშ ართგურეფ ქიდოფსკიდუდით დო სამეფოშ საქმეს პირველ ადგილს ქიგვორინუანდით.

ჭიჭე ხანშა ბრაზილიაშ საზღვარიშ გოხოლუა ტერიტორიას ქუდმანიშნეს. თაქ მღვდელეფქ ახალგაზრდეფ აიახნარეს, ნამდა ჩქინ ოცხოვრებელშა, ნამუთ თეშით ვარდ ჯგირ მდგომარეობას, დიდ ქუალეფ ქუჸოთამდესკო. უკულ ვოლტერქ პოლიციაშ უნჩაშწკუმა ბიბლიაშ გურაფა ქიდიჭყჷ. თეშ უკულ მითინს ვეშუწუხებუთ, მუშენდა თიქ პოლიციელეფ ქუმაშკვ დო თინეფ ართ მარას ჩქინ ჸუდეშ ხოლო გერდეს დო ფთხილანდეს. ჭიჭე ხანშა, უმოს უჯგუშ ადგილშა გეგნოფრთით, ნამუთ ბრაზილიაშ საზღვარიშ მაჟია მხარეს რდუ. თაქ გინულაქ ჯგირქ იჸუ, მუშენდა შემლებდეს შეხვალამეფ ჩამტარებდესკო მუჭოთ ბრაზილიას თეშ, პარაგვაის ხოლო. თაქ ჩქინ მსახურებაშ დროს ჟირ ჭიჭე კრებაქ გინწყჷ.

ექიმეფქ მიწუეს, ნამდა ბაღანა დღას ვა მაშიდ, მარა თინეფქ მეჩირთეს, მუშენდა 1962  წანას ორსულო ქიდოფსქიდ. ჩქი ჰოლივუდშა (ფლორიდა) გეგნოფრთით ოცხოვრეფშა, სოდეთ ვოლტერიშ ოჯახი ცხოვრენდჷ. წანეფიშ დინახალე მა დო ვოლტერს ვამღდეს საშუალება მიმსახურებდესკო პიონერო, მუშენდა ოჯახშა მაფდეს მიკაჯინალ. მარა თეშ უმკუჯინუო, სამეფოშ საქმე იშენ პირველ ადგილშა გემრდეს (მათ. 6:33).

1962 წანაშ ნოემბერს, მუჟამსით ფლორიდაშა ქუმოფრთითინ, გაკვირვებულ ვორდით თიშ ძირაფათ, ნამდა თაქ გავრცელებულ რასობრივ გორთუალაშ გურშენ, უჩა კანიან დო ჩე კანიან და დო ჯიმალეფ ცალ-ცალკე ატარენდეს კრებაშ შეხვალამეფს დო ოქადაგეფელ ტერიტორიეფ ხოლო შხვადოშხვა უღდეს. მუშო ოკო რაგად, თენა იეჰოვაშო ვარდჷ მოსაწონ, ათეშენ ჭიჭე ხანშა არძა რასაშ და დო ჯიმალეფ ართო იშაყარდეს კრებაშ შეხვალამეფს. თე საქმეს დასურო იეჰოვაშ ხე რდუ, მუშენდა ამდღა თე ტერიტორიას ვითობით კრება რე.

სანარღოთ, 2015 წანას ვოლტერქ ტვინიშ კიბოთ დოღურ. თის მანგარო უჸორდ იეჰოვა დო ბრელ და დო ჯიმას მეხვარ. თინა გემუან ქომონჯ მაფუდ დო ჩქი ართო 55 წანა იფცხოვრით. ართ შურ მოლ თიმ დროშ მოულაშა, მუჟამსით იეჰოვა გათელენს თის დო ჯამრთელს ქობძირუნქჷ (საქ. 24:15).

მარდულ ვორექ, ნამდა 40 წანაშე მეტ ხანს სრულ დროთ ვმსახურენდჷ, მუდგაქ ბრელ ხიოლ დო კურთხევა მომიღ. მაგალთო, ართ-ართ თინა რე, ნამდა ჩქიმ დო ვოლტერიშ 136 ბიბლიაშ მაგურაფალქ დინათ. მუშო ოკო რაგად, ჩქი სირთულეეფ ხოლო მიღდეს, მარა დღას ვამფიქრებნა, მემტებდესკო მსახურება. თეშ მანგიორ, უმოსო დევეახლოვით ღორონც დო გადაწყვეტილებეფიშ მეღებაშ დროს ირიათო ვონდუდით თის. თაშ ნამდა, იეჰოვას დღას ვემუტებუთ! (2 ტიმ. 4:16, 17).

მუშო ოკო რაგად, მანგარო მონატრჷ ვოლტერ, მარა პიონერო მსახურება მოხვარ, მივერუე თე გრძნობას. ჩქიმო დიდ ხიოლ მოუღჷ შხვეფშა სახიოლო ამბეშ დო განსაკუთრებულო ღურელეფიშ გათელებაშ გურშენ იმენდიშ გინოჩამას. დასურო, სიტყვეფით ვეგნმაჩინე, მუჭო ელამდირთჷ იეჰოვაქ შხვადოშხვა სიტუაციეფს. მუჭოთ მუშ სიტყვა იჩიებუნ, თინა მამანგარენდჷ დო ირიათო ჩქიმ გვერდით რდუ (ეს. 41:10).