იესოქ იწინასწარმეტყველ, ნამდა თე ქიანაშ ბოლო დღალეფს მუშ მიმაჸუნალეფ ხვეიან მოსავალს გეჭოფუნდეს (მათ. 9:37; 24:14). მორთ, ქობძირათ მუჭო შისრულ თე სიყტვეფქ იმიერკარპატეთის, უკრაინაშ ართ-ართ მხარეს. თე მხარეშ სუმ ქალაქის, ნამუთ ართიანიშ ხოლოს რენ, 50 კრება რე, სოდეთ 5 400 მაუწყებელ მსახურენს. * გასაკვირ რე, მარა თე სუმ ქალაქიშ მახორუ ირ 4 კოჩშე 1 იეჰოვაშ მოწმე რე!

მუნერ ხალხ ცხოვრენს თე ტერიტორიას? ადგილობრივ ჯიმა ვასილი იჩიებ: „თაქიან ხალხ პატის ცენს ბიბლიას, აფასენს სამართლიანობას, ჯგირ ურთიერთობა უღნა ოჯახიშ წევრეფწკუმა დო შურ დო გურით ოცადნა ართიანიშ მოხვარას“. თინა გეუძინანს: „თინეფ ირიათო ვათანხმუნა ჩქინ რწმენას. მარა ბიბლიურ მუხლეფიშ კითხირიშ დროს, მთელ ყურადღებათ მირჩქილენა“.

მუშო ოკო რაგად, და დო ჯიმალეფ სირთულეეფს ხოლო შეხვადუნა, თიცალ ტერიტორიას ქადაქებაშ დროს, სოდეთ ბრელ მაუწყებელ რე. მაგალთო, ართ კრებას 134 მაქადაქებელ რე დო თინეფს ხვალე 50 ჸუდე უღნა დასამუშებელო! მუს ორთუნა ჩქინ და დო ჯიმალეფ თეცალ სიტუაციაშ დროს?

ბრელ და დო ჯიმაქ თიცალ ადგილშა გინორთ ოქადაქებშა, სოდეთ მაქადაქებელეფიშ საჭიროება რე. ართ 90 წანერ ჯიმა იონაშ იჩიებ: „ჩქინ კრებაშ ტერიტორიას 1 მაუწყებელშა 2 კოჩ მოურს. ამარდეშახ, სოიშა ჯამრთელობაშ მდგომარეობა გეუფრაშებუდუნ, სოფელს ფქადაქენდჷ. 160 კილომეტრის მიფშჷ დო განაწილებურ ვა რდუნ ფერ ტერიტორიას უნგრულ ნინაშა ფქადაქენდჷ“. შხვა ტერიტორიეფს ქიმსახურანინ თიშენ, მაქადაქებელეფ მინშა მსხვერპლიშა მეულა. იონაშ აგრძელენს: „მატარებელს ქიმვოჭიშეკონ ოჭმარეშ 4 საათის პკურცხუდ. მატარებელ ჸუჩა ონჯუაშ 6 საათის ირთუდ დო მა თე დროშა ფქადაქენდჷ. თეცალ გრაფიკით მარაშე ჟირშა ვარა სუმშა ვმსახურენდჷ“. ქუღირუდ დო ვარ თე ჯიმას თეცალ მსხვერპლიშა ულა? თინა პასუხენს: „თეშნერ მსახურებას ჩქიმდა დიდ ხიოლ მოუღუდ. თიშ უპირატესობა ხოლო მიღუდ, ნამდა დაშორებულ ტერიტორიას ცხოვრენსინ ფერ ოჯახშა ჭეშმარიტება მიგურუაფუდკო“.

გასაგებ რე, ნამდა თე მხარეს რენ თი კრებეფიშ არძა წევრის ვეშულებ დაშორებულ ადგილეფს მსახურება. მარა არძა დო თინეფწკუმა ართო ხანშა მიშულირ მაუწყებელეფ ხოლო ოცადნა ადგილობრივ ტერიტორიეფს იქადაქან. შედეგო, 2017 წანას თე სუმ ხოლო ქალაქის, გოშინაშ ონჯუას ბრელ პიროვნებაქ დესწჷ. თინეფიშ რაოდენობა მაუწყებელეფიშ რაოდენობაშე დახე ჟირ თისხით უმოს რდუ, შხვანერო ქოფთქუათინ, შეხვალამას თე მხარეშ მახორუ კათაშ გვერდ ოსწრუდ! სოდგა ვა ვმსახურენდათინ, იშენით ბრელ ოკო იფხანდათ „უფალიშ საქმეს“ (1 კორ. 15:58).