1. მუ გებგით 2023 წანაშ ირწანიან შეხვალამას?

 ᲣᲚᲘᲠ ირწანიან შეხვალამას a ქიმიფრჩქილეთ, მუქ ითირ ჩქინ მსახურებაწკუმა დაკავშირებით დო უჯგუშო ქინვანჭით მუსხირენ ბიბლიურ საკითხის ხოლო. მაგალთო, ქიგებგით, ნამდა 2023 წანაშ ნოემბერშე მოჸუნაფილ, მაუწყებელეფს მეტო ვემეთხიებუნა მსახურებაშ ანგარიშიშ ბლანკის ირფელიშ ინოჭარუა. თინა ხოლო ქიგებგით, ნამდა „დიდ ბაბილონიშ“ განადგურებაშ უკულ ხოლო შილებე მიაჩან ადამიანეფს იეჰოვაშ მსახურო გინორთაშ საშვალებაქ. ნიშნენსო თე ცვლილებეფ, ნამდა ქადაგებაშ საქმე აიშახ რდუნჷ თიცალ მნიშვნელოვან ვა რე? მუთუნით ვარ!

2. მუშენ რე მნიშვნელოვან შურ დო გურით ქადაგება? (მარ. 13:10).

² დღაშ მიკულაწკუმა ართო, ქადაგებაშ საქმე უმოს მნიშვნელოვან რე, მუშენდა გვალო აკაბცხა მეძჷ აღსასრულშახ, შხვანერო ქოფთქუათინ, სატანაშ უბადო ქვეყნიერებაშ განადგურებაშახ. იესოქ იწინასწარმეტყველ, ნამდა თე დროშ მოულაშახ არძას ოკო ექადაგუკო სახიოლო ამბექ (წეკითხით მარკოზიშ 13:10; მათ. 24:14). იეჰოვას „დრო დო საათ“ აფჷ მერჩქინელ თი მოვლენეფშა, ნამდგაქ მალას ოკო მოხვადას (მათ. 24:36; 25:13; საქ. 1:7). მუთ დრო მეურს, უმოს ხოლოს ვორეთ თე დღაწკუმა, ათეშენ მუთუნით ოკო ვემვოტუათ შურ დო გურით ქადაგება (რომ. 13:11).

3. მუშენ ფქადაგენთ?

³ ჯგირ იჸუაფ, დეფიფქრათ თეცალ კითხვაშე: მუშენ ფქადაგენთ? თეს ჸოროფა მოკეთებაფუანა. მუჟამსით ფქადაგენთ, ვოძირანთ, ნამდა მიჸორა ჭეშმარიტება, ადამიანეფ  დო, მუთ არძაშ უმოს მთავარ რე, მიჸორა იეჰოვა დო თიშ სახელ. მორთ, ქიფჩუათ თითოულ მხარეშე.

ᲤᲥᲐᲓᲐᲒᲔᲜᲗ, ᲛᲣᲨᲔᲜᲓᲐ ᲛᲘᲸᲝᲠᲐ ᲭᲔᲨᲛᲐᲠᲘᲢᲔᲑᲐ

4. მუს ვორთუთ, მუჟამსით ჯგირ ამბეს ბგებულენთ?

⁴ ქიგიშინით, მუნერ ხიოლ გიღუდეს, მუჟამსით მუდგაინ ჯგირ ამბე გეგით. მაგალთო, თქვან ოჯახიშ წევრის ბაღანაქ შეძინ ვარდა თიცალ სამუშა იშით, ნამუთ მანგარო გოსაჭირუდეს. ალბათ შურ გოლუდესკონ იჸიდ, მუჟამ უწინდით თქვან საჸოროფო ადამიანეფს თე სახიოლო ამბეს. თაშ ქორდითო თიმწკუმა ხოლო, მუჟამსით გეგით არძაშ უჯგუშ ამბე — სახიოლო ამბე ღორონთიშ სამეფოშ გურშენ?

5. მუ იგინით, მუჟამსით ჭეშმარიტება გეგით? (ქოძირით სურათეფ)

⁵ ქიგიშინით, მუ იგინით, მუჟამსით ჭეშმარიტება მირჩქილეთ. ქიგეგით, ნამდა თქვან ზეციერ მუმას უჸორთ დო მანგარო ოკო, თიშ მსახურეფიშ დიდ ოჯახის რდათჷ. გოპირუნა, ნამდა მოსპუნს ჭუას დო ტანჯებას დო გარზენა იმენდის, ნამდა ახალ ქვეყნიერებას კინ დოირთინუანა თქვან საჸოროფო ადამიანეფს, მით ღურელ გაფუნა (მარ. 10:29, 30; იოან. 5:28, 29; რომ. 8:38, 39; გამოცხ. 21:3, 4). ბიბლიაშე თე დო შხვა ბრელ ჯგირ ამბეშ გაგებაქ გურ ხიოლით ეიფშეს დო თეშ ქიგეჸოროფეს ღორონთიშ სიტყვაშე ნაგურეფუქ, ნამდა შურ გოლუდეს, შხვეფს ხოლო ქეჩითკო თე ირფელ (ლუკ. 24:32; ქეშუდარით იერემიაშ 20:9).

6. მუს გურაფლენთ ერნესტიშ დო როზიშ შემთხვევაშე?

⁶ გუვარჩუათ ართ შემთხვევა. ართ ჯიმა, სახელო ერნესტ b, სოდგარენ 10 წანერ იჸუაფუდ, მუმაქ უღურუნ. თინა იშინანს: „ირიათო თი აზრ მისოფუანდჷ, სო რდჷ მუაჩქიმ. ზეცაშა იდუო დოვარ შურო სოთინ ვა რდჷ. მონჯარუდ თი ბაღანეფიშ,  მიდგას მუმა ჸუნდეს“. ერნესტ ირიათო გილეშ მუამუშიშ სასაფლაშა დო ღორონთის ბირგულდოშქუმალირო ურაგადუდ: „გოხვეწუქ, ქუგმოგებაფე, სო რე მუაჩქიმ“. მუამუშიშ ღურაშე სოდგარენ 17 წანაშ უკულ, ერნესტის ბიბლიაშ გურაფა შეთავაზეს, მუდგას ხიოლით დეთანხმჷ. ერენსტშა მანგარო იმოქმედ თიშ გაგებაქ, ნამდა ღურელეფ მუთუნს ვა გინაფლენა, ლურდანინ თეშ რენა, დო თინეფშო გათელებაშ იმენდ არსებენს (ეკლ. 9:5, 10; საქ. 24:15). თინა მანგარ გახარებულ რდჷ ჭეშმარიტებაშ გაგებათ, მუშენდა მუთ იჸუნ ქიმიოგორუ თი კითხვეფიშ პასუხეფს, ნამუთ თეზმა ხანს სვანჯის უდინუანდჷ. უკულ თიშ მეუღლე როზიქ ხოლო ქიდიჭყჷ ბიბლიაშ გურაფა დო თის ხოლო ქეჸოროფ სამეფოშ ცნობაქ. 1978 წანას ჟირხოლოქ დინათეს დო შურ დო გურით ქიდიჭყეს თე ძვირფას ცნობაშ ქადაგება ოჯახიშ წევრეფწკუმა, მეგობრეფწკუმა დო ირკოჩწკუმა, მით მურჩქილუანდ. შედეგო, თინეფქ 70-შე უმოს ადამიანს მეხვარეს იეჰოვაშ გაჩინებაფას დო ნათუას.

7. მუ ხვადუ, მუჟამსით ადამიანს მთელ გურით ეჸოროფებ ჭეშმარიტება? (ლუკ. 6:45).

⁷ ვორწყეთ, მუჟამსით ჭეშმარიტება მანგარო მეჸოროფებუნა, თინა გურშა ველმახვილენა დო ვეშემლებუნა, შხვეფს ვევეჩუათ (წეკითხით ლუკაშ 6:45). ჩქი ხოლო იესოშ მოწაფეეფცალო ვორეთ, მიდგაქ თქუეს: „ვემმატებენა თიშ გურშენ ჩიება, მუთ ბძირით დო მიფრჩქილეთ“ (საქ. 4:20). თიცალო მიჸორა ჭეშმარიტება, ნამდა მოკონა, მუთ შილებენ უმოს ადამიანს ქუგვოგებაფუათ თინა.

ᲤᲥᲐᲓᲐᲒᲔᲜᲗ, ᲛᲣᲨᲔᲜᲓᲐ ᲛᲘᲸᲝᲠᲐ ᲐᲓᲐᲛᲘᲐᲜᲔᲤ

8. მუ გინმოჭყვიდირაფუანა შხვეფშა ქადაგებას? (ქოძირით ჩარჩო  „გიჸორდას ადამიანეფ — მამზად მოწაფეეფ“; ქოძირით სურათეფ).

⁸ იეჰოვა დო იესოცალო ჩქი ხოლო მანგარო მიჸორა ადამიანეფ დო მთელ გურით მოცოდუნა თინეფ, მით „უიმენდოთ დო უღორონთეთ“ რენა (იგავ. 8:31; იოან. 3:16; ეფეს. 2:12). ამდღა ქვეყნიერებას ადამიანეფ პრობლემეფს „იშქვიდუნა“, მარა ჩქი მიღუნა თინეფიშ ეშაჸუნაფალ „თოკ“ — სახიოლო ამბე სამეფოშ გურშენ. თე ადამიანეფიშ ჸოროფა დო სიცოდილ გინმოჭყვიდირაფუანა, თინეფიშ გურშა ქიმიბღათ ჭეშმარიტება. თე ძვირფას ცნობა თინეფს იმენდის ქიმეჩანს, მეხვარებ, უღუდან ბედნერ ცხოვრება ამდღა დო ქიმეჩანს საშვალებას, მომავალს ღორონთიშ დუნაპირებ ახალ ქვეყნიერებას იცხოვრან (1 ტიმ. 6:19).

9. მუშ გურშენ ვაფრთხილენთ ხალხის დო მუშენ? (ეზეკ. 33:7, 8).

⁹ ადამიანეფიშ ჸოროფა თის ხოლო გინმოჭყვიდირაფუანა, ნამდა გუვაფრთხილათ თინეფ თე უბადო ქვეყნიერებაშ აღსასრულიშ  გურშენ (წეკითხით ეზეკიელიშ 33:7, 8). ჩქი არძა მოცოდუნა, მით ვამსახურ იეჰოვას, ჩქინ ოჯახიშ წევრეფით დოჭყაფილ, შურო ვეფჩინენთინ ფერეფით თებულ. ბრელ გემუანო მეჸუნს მუშ ცხოვრებას დო შურო აზრის ვა რე, ნამდა მალას „თიცალ დიდ გაჭირება იჸუაფ, მუნერით ვა ჸოფე ქიანაშ დაჭყაფშე ამდღარშახ დო ვართ უკულ იჸუაფ“ (მათ. 24:21). მოკონა, თინეფს ხოლო ქუგვოგებაფუათ, ნამდა გასამართლებაშ დროს დიო ტყურა რელიგია გენადგურებ დო უკულ არმაგედონს — სატანაშ უბადო ქვეყნიერება (გამოცხ. 16:14, 16; 17:16, 17; 19:11, 19, 20). ბლოცულენთ, ნამდა, მუთ შილებენ მეტიქ ქალერჩქილუას თე გაფრთხილება დო ასეშე ქიდიჭყას იეჰოვაშ მსახურება. მარა მუშ რაგად შემლებუნა თინეფშე, მით ამდღა ვამრჩქილენა, თინეფ შქას ჩქინ საჸოროფო ოჯახიშ წევრეფშე?

10. მუშენ რე მნიშვნელოვან, გუვაფრთხილათ ადამიანეფ მომავალ მოვლენეფიშ გურშენ?

¹⁰ მუჭოთ წოხოლენ სტატიას გუვარჩით, იეჰოვაქ შილებე გინასქილიდუას თი ადამიანეფ, მით „დიდ ბაბილონიშ“ განადგურებაშ ძირაფაშ უკულ ქირწმუნენა თის. თეშ რჩქინა ხოლო უმოსო ვეგნმოჭყვიდირაფუანანო, ნამდა ამდღარშე გუვაფრთხილათ ადამიანეფ? დეფიქრით: ჩქი ვა მიჩქუნა, მის მუჟამ გაშინე თინა, მუდგას ამდღა ვეჩიებუთ (ქეშუდარით ეზეკიელიშ 33:33). შილებე თი მოვლენეფიშ ძირაფაშ უკულ მიდგაინს ზუსტას ჩქინ სიტყვეფქ ქუგაშინას დო გეგნოჭყვიდას, ონდო გვიან ვეჸი, ჩქინწკუმა ართო ქიდიჭყას იეჰოვაშ მსახურება. ქიგიშინით, თი ციხეშ ყარულქ, სოდეთ პავლე დო სილა ხედეს, თიშ უკულ ირწმუნ იეჰოვა, მუთ მანგარ დიხანწალუაქ მოხვად (საქ. 16:25—34). თეშნერო, ნამთინექ, მით ამდღა ვამრჩქილენა, შილებე თიშ უკულ ქიდიჭყას იეჰოვაშ მსახურება, მუჟამსით „დიდ ბაბილონიშ“ განადგურება ქუდუზარზალუანს მსოფლიოს.

ᲤᲥᲐᲓᲐᲒᲔᲜᲗ, ᲛᲣᲨᲔᲜᲓᲐ ᲛᲘᲸᲝᲠᲐ ᲘᲔᲰᲝᲕᲐ ᲓᲝ ᲗᲘᲨ ᲡᲐᲮᲔᲚ

11. მუჭო უძღვინენთ იეჰოვას დიდებას, პატის დო ძალიერებას? (გამოცხ. 4:11; ქოძირით სურათეფ).

¹¹ მთავარ მიზეზ, მუდგაშ გურშენ ხალხის სახიოლო ამბეს უქადაგუთ, რე თინა, ნამდა მიჸორა იეჰოვა დო თიშ წმინდა სახელ. მარჩქილენა, ნამდა ქადაგება რე ართ-ართ საშვალება, მუდგათ შემლებუნა, განვადიდათ ჩქინ ღორონთ, ნამუთ მანგარო მიჸორა (წეკითხით გამოცხადებაშ 4:11). ჩქი ხოლო მთელ გურით ვოთანხმუთ თის, ნამდა იეჰოვას ოკუთვნ „დიდება, პატი დო ძალიერება“. დიდებას დო პატის იეჰოვას თიმწკუმა უძღვინენთ, მუჟამსით შხვეფს ვოძირანთ თიშ მტკიცებულებეფს, ნამდა  ირფელ იეჰოვაშ გოჭყაფილ რე დო სიცოცხლე ხოლო თიშე მიღუნა. მუშ რაგად შილებე ძალიერებაშე? თის თიმწკუმა უძღვინენთ იეჰოვას, მუჟამსით ჩქინ დროს, ენერგიას დო ირფელს თიშო იბრინუანთ, ნამდა მუთ შილებენ მეტის უქადაგათ (მათ. 6:33; ლუკ. 13:24; კოლ. 3:23). ჩქი მანგარო მოსიამოვნუნა ჩქინ ღორონთიშ გურშენ შხვეფწკუმა ჩიება, მუშენდა მანგარო მიჸორა თინა. შურ დო გურით მოკონა, ხალხის ქუგვოგებაფუათ თიშ სახელ დო ქივეჩუათ, მუნერ ღორონთ რე იეჰოვა. მუშენ რე საჭირო თენა?

12. მუჭო უნწყუნთ ხეს იეჰოვაშ სახელიშ განწმენდას?

¹² იეჰოვაშ ჸოროფა გინმოჭყვიდირაფუანა, ხე შეუნწყუათ თიშ სახელიშ განწმენდას (მათ. 6:9). ათეშენ, მოკონა შხვეფს ქუწუათ, ნამდა თი ირფელ, მუდგას სატანა იეჰოვაშ გურშენ იჩიებ, ტყურა რე (დაბ. 3:1—5; იობ. 2:4; იოან. 8:44). ქადაგებაშ დროს ვოცადუთ, არძას, მით მომრჩქილუანა, ქივეჩუათ, მი რე იეჰოვა დო სინამდვილეს მუნერ ღორონთ რე თინა. მოკონა, ირკოჩის ქუგვოგებაფუათ, ნამდა თინა მოჸოროფე დო სამართლიან ღორონთ რე, თიშ სამეფო მალას მოსპუნს ტანჯებას დო ადამიანეფს ნამდვილ მშვიდობას დო ბედნერობას ქუმუღანს (ფსალმ. 37:10, 11, 29; 1 იოან. 4:8). მუჟამსით ხალხის თე ირფელს ვეჩიებუთ იეჰოვაშე, ხეს უნწყუნთ თიშ სახელიშ განწმენდას. ჩქინდა თიშ რჩქინას ხოლო მოუღ ბედნერობა, ნამდა თეშ ფცხოვრენთ, მუჭოთ ჩქინ სახელს „იეჰოვაშ მოწმეეფს“ მეურე. მუშენ იფჩიებუთ თეს?

13. მუშენ მოამაყუნა, ნამდა ბჯოხონა იეჰოვაშ მოწმეეფ? (ეს. 43:10—12).

¹³ იეჰოვაქ მუშ მოწმეეფო გიშაბგორეს (წეკითხით ესაიაშ 43:10—12). წანეფიშ წოხოლე ხემძღვანელ საბჭოშ ართ-ართ წერილს ჭარუდ: „იეჰოვაშ მოწმეეფ ბჯოხონან  თენა, არძაშ უმოს დიდ პატი რე, მუთ შილებე მიღუდან“. მუშენ რე თენა დიდ პატი? დეფიქრით თეცალ მაგალითშე: წერმიდგინით, ნამდა სასამართლოს ქუგაშის საქმექ, მუშენდა მიდგარენქ ტყურა ეგკაწამეს დო თქვან სიმართლეშ დამტკიცებელო, მოწმე გაფუნა გიშაჸონაფალ. მუნერ კოჩის გირინუანდით მოწმეთ? ალბათ თიცალს, მიდგას ჯგირო იჩინენთ, ონდუთ დო თიცალ ჯგირ სახელ გეძჷ, ნამდა თიშ ნარაგადშა დიჯერებე. თეშნერო, იეჰოვაქ მუშ მოწმეეფო გიშაბგორესინ თით ოძირუ, ნამდა ჯგირო მიჩინენა დო ჯერსჷ, შხვეფს ხოლო ქუგვოგებაფუანთ, ნამდა თინა რე ჭეშმარიტ ღორონთ. თენა ჩქინო თიშმაშხვა პატი რე, ნამდა მოკონა, მუთ შილებე მეტ ადამიანს ქუგვოგებაფუათ თიშ სახელ დო ქუვოძირათ, ნამდა ირფელ, მუდგას თის აბრალუაფუნა, ტყურა რე. მუჟამსით თაშ იფქციებუთ, ვამართლენთ ჩქინ სახელს დო ვოძირანთ, ნამდა დასურო იეჰოვაშ მოწმეეფ ვორეთ! (ფსალმ. 83:18; რომ. 10:13—15).

ᲒᲣᲕᲐᲒᲠᲫᲔᲚᲐᲗ ᲥᲐᲓᲐᲒᲔᲑᲐ ᲐᲦᲡᲐᲡᲠᲣᲚᲨᲐᲮ

14. მუ სასწაულ მოვლენეფს ველუთ?

¹⁴ წიმი მართალო სასწაულ მოვლენეფ მელუნა. იმენდ მიღუნა, ნამდა იეჰოვაშ კურთხევათ, „დიდ გაჭირებაშ“ დოჭყაფაშახ ბრელ ადამიან მიღენს ჭეშმარიტებას. თინა ხოლო მანგარო მოხიოლუნა, ნამდა კაცობრიობაშ ისტორიაშ არძაშ უმოს რთულ პერიოდის, „დიდ გაჭირებაშ“ დროს ხოლო შეიალებენა ადამიანეფს, დუდ დერსხან სატანაშ მადინაფ ქვეყნიერებაშე დო ჩქინწკუმა ართო ქიდიჭყან იეჰოვაშ მსახურება (საქ. 13:48).

15, 16. ნამ საქმეშ კეთებას ვაგრძელენთ დო სოიშახ?

¹⁵ მარა თეიშახ ჩქი თიცალ საქმე მაფუნა ოკეთებელ, ნამდგაშ კეთებაშ პატი ირო ვა მაღვენუნა — მთელ დედამიწას ოკო იფქადაგათ სახიოლო ამბე. თეწკუმა ართო, გაფრთხილებერ მაფუნა ხალხ, ნამდა თე უბადო ქვეყნიერებაშ აღსასრულშახ გვალო აკაბცხა მეძჷ. მუჟამსით გასამართლებაშ დრო ქუდოდირთუ, თინეფ ქიმეხვადუნა, ნამდა ირფელ, მუდგას ფქადაგენდით, იეჰოვაშე რდჷ (ეზეკ. 38:23).

¹⁶ თაშ ნამდა, მუშ კეთება ოკო მაფუდან გინოჭყვიდილ? ჭეშმარიტებაშ, ადამიანეფიშ დო, მუთ არძაშ უმოს მთავარ რე, იეჰოვაშ დო თიშ სახელიშ ჸოროფათ ოკო გუვაგრძელათ მთელ მონდომათ დო უგნუდვალუო ქადაგება, ონდო იეჰოვა ვამწინა: „გეთუ, საქმე კეთებულ რე!“.