ქოგორუნთო დუდიშ გითაფორაფალს იეჰოვაწკუმა?
„იეჰოვა გეგშეჸიდენს მუშ მსახურეფიშ სიცოცხლეს; ნამთინს, მით თის დუც გითუფორუანსინ, ბრალ ვაღვენუ“ (ფსალმ. 34:22).
ობირეშეფი: 49, 65
1. მუჭო გინაფლენა დუც ღორონთიშ ართგურ მსახურეფ, მუჟამსით აშენა?
პავლე მოციქულქ ჭარ: „ცოდა კოჩ ვორექ!“ (რომ. 7:24). ბრელ ქრისტიან ამდღა ხოლო თეშნერო გინაფლენს დუც, მუშენდა არძა ცოდამეფ ვორეთ. მოკონა იეჰოვას გურ გუხარათ, მარა გურ მიტირხუნა, მუჟამსით ღორონც ვა მოწონსინ თეშ იფქციებუთ. ნამთინე ქრისტიანქ, ნამუთიქ სერიოზულო დაშუნ, შილებე იფიქრას, ნამდა იეჰოვა დღას ვა გიჭყოლიდუანს თეს.
2. ა) მუჭო ოძირანს ფსალმუნიშ 34:22, ნამდა ვეგნვაჸუნათ ოკო დაშებულიშ გურშენ წუხებას? ბ) მუს გუვარჩიენთ თე სტატიას? (ქოძირით ჩარჩო „წინასწარმეტყველურ მნიშვნელობა ხომ ვა უღუდ თე ქალაქეფს?“).
2 ბიბლია მირაგადნა, ნამდა თინეფქ, მით იეჰოვას დუც გითუფორუანან, დაშებულიშ გურშენ წუხებას ოკო ვეგნაჸუნან (წეკითხით ფსალმუნი 34:22). * მუს ნიშნენს იეჰოვაწკუმა დუდიშ გითაფორაფალიშ გორუა? მუ ოკო ფქიმინათ, ნამდა ღორონთიქ ჩქინწკუმა ჭყოლოფა გეგმირჩქინას? თე კითხვეფშე პასუხის მიბღენთ, მუჟამსით უმოსის ქიგებგენთ დუდიშ გითაფორაფალ ქალაქეფიშ გურშენ. მოსეშ კანონს, ნამუთიქ ახ. წ. 33 წანაშ ჟარნეჩდომავითა დღაშ დღახუშე ძალა მიოდინუნ, ინოჭარუდ, მუშენ რდუ საჭირო თე ქალაქეფი. თე კანონ იეჰოვაშე მიშ. თაშ ნამდა, დუდიშ გითაფორაფალ ქალაქეფიშ გურშენ კანონშე ბგებულენთ, მუჭო უჯინე იეჰოვა ცოდას, ცოდამეფს დო დაშებულიშ გურშენ დანარღებას. მორთ, დიო გუვარჩუათ, მუ საჭირო რდუ თე ქალაქეფი.
„გეგშაგორით თქვანო დუდიშ გითაფორაფალ ქალაქეფი“
3. მუნერო ოკო დუსაჯებდესკო კოჩიშ გარძახ მაჸვილარი?
3 იეჰოვა სერიოზულო უჯინედ კოჩიშ ჸვილუას. კოჩიშ გარძახ მაჸვილარ, ღურელიშ უხოლაშ ნათესეს ოკო უჸვილუდკო (რიცხ. 35:19). თეგვარო, მაჸვილარ მუშ სიცოცხლეთ გინიგანდ ბრალ ვა უღუდუნ ფერ კოჩიშ სიცოცხლეშ საფასურს. ბიბლიაშე იძირე, ნამდა მაჸვილარს ხეთეშე ვა ჸვილუნდეს-და, გეუწმინდურებუდ ისრაელიშ დიხა, სოდეთ იეჰოვა კვირდენდ. ღოროთნიქ მუშ ხალხის უწუ: „უწმინდურო ვეგნაშკვათ დიხა, ნამუსით დეკვირდენთ, მუშენდა [კოჩიშ დოწუმილ] ზისხირ უწმინდურო გინაშკვანს დიხას“ (რიცხ. 35:33, 34).
4. მუჭო ოკო მექცუესკო ისრაელეფქ თის, მიდგას კოჩი შემთხვევით ქაღურუდ?
4 მუჭო ოკო მექცუესკო ისრაელეფქ თის, მიდგას კოჩი შემთხვევით ქაღურუდ? თიშ უმკუჯინუო, ნამდა თექ შემთხვევით მოხვადუნ, თეცალ კოჩის იშენით უღუდ ბრალ (დაბ. 9:5). მარა საბედნეროთ, თის შეულებუდ დუდიშ გითაფორაფალ ამშვ ქალაქშე ნამდგაინშა უნტებუდკო. თინა თექ მღვდელმთავარიშ ღურაშახ ოკო გაჩერებედკო დო თეგვარო, თხილერ იჸუაფუდ (რიცხ. 35:15, 28).
5. მუჭო მოხვარნა დუდიშ გითაფორაფალ ქალაქეფ, ნამდა მეტ ქიგებგათ იეჰოვაშ გურშენ?
5 დუდიშ გითაფორაფალ ქალაქეფ კოჩიშ მოგონილ ვა რდუ. იეჰოვაქ იესო ნავეშ სქუას უწუ: «ქუწი ისრაელეფს: „გეგშაგორით თქვანო დუდიშ გითაფორაფალ ქალაქეფი“». თენა წმინდა ქალაქეფ რდუ (იეს. 20:1, 2, 7, 8). თე ქალაქეფიშ გიშაგორუა ისრაელეფს იეჰოვაქ დავალ, ათეშგურშენ ჩქინ დუც ოკო ქოპკითხათ: მუჭო მოხვარნა თე კანონი უჯგუშო ქინვანჭათ იეჰოვაშ ჭყოლოფას? მუჭო შემლებნა ამდღა იეჰოვაწკუმა დუდიშ გითოფორაფა?
„ქეჩუას . . . მუშ ამბე ქალაქიშ უხუცესეფს“
6, 7. ა) მუ ოვალდეს უხუცესეფს? (ქოძირით სურათი მა-8 გვერდის). ბ) მუშენ ოკო მერთუკო უხუცესეფშა მაჸვილარქ, ნამუსით კოჩიქ შემთხვევით ქაღურ?
6 მუჟამსით მითინს კოჩი ქაღურუდუნ, თიქ ინტუკო ოკო დუდიშ გითაფორაფალ ქალაქშა დო კარმინოლწკუმა ოკო ქეჩუკო უხუცესეფს მუშ ამბე (იეს. 20:4). ჭიჭე ხანშა თის მუშ ქალაქშა დართინუანდეს, სოდეთ ჸვილუაქ მოხვად დო თექიან უხუცესეფ გარჩიენდეს თიშ საქმეს (წეკითხით რიცხვები 35:24, 25). * მუჟამსით დემტკიცებუდ, ნამდა ჸვილუაქ შემთხვევით მოხვადუნ, მაჸვილარს კინ დუდიშ გითაფორაფალ ქალაქშა დართინუანდეს.
7 მუშენ არჩიენდეს თე საქმეს უხუცესეფი? თიშენ ნამდა, თინეფ ისრაელ ხალხიშ სიწმინდეს იცვენდეს. თეს გეძინელ, თი პიროვნებას, ნამუსით კოჩიქ შემთხვევით ქაღურუნ, ოხვარდეს ქაშუკო იეჰოვაშ ჭყოლოფაქ. ართ ბიბლეისტიქ ჭარ, ნამდა მაჸვილარს, ნამუთ უხუცესეფშა ვემიშ დო თე მოხვარას ვემიღენდუნ, აუცილებერო დოჸვილუნდეს დო თიშ მაჸვილარს პასუხ ვემეთხიებუდ. ათეშენ თიქ ოკო ინტუკო დუდიშ გითაფორაფალ ქალაქშა.
8, 9. მუშენ ოკო თხუას უხუცესეფს მოხვარა ქრისტიანქ, ნამუსით სერიოზულო აფუ დაშებული?
8 ამდღა ხოლო, ქრისტიანქ, ნამუსით სერიოზულო აფუ დაშებულინ, აუცილებერო ოკო ქიმერთას უხუცესეფშა. თინეფ თის ქიმეხვარებნა, ნამდა დირთინუას ჯგირ ურთიერთობა იეჰოვაწკუმა. მუშენ რე თენა აუცილებერი? პირველ რიგის თიშ გურშენ, ნამდა მუჭოთ ბიბლიაშე იძირენ, თეცალ საქმეეფიშ მოგვარება უხუცესეფს ოვალნა (იაკ. 5:14—16). მაჟია, უხუცესეფს შეულებნა ნარღენსინ ფერ პიროვნებას ქიმეხვარან, შეცდომა ვეგიმეორას დო იეჰოვაშ მოსაწონო მიქცუას (გალ. 6:1; ებრ. 12:11). მასმა, უხუცესეფ თიშენ რენა გერნაფილ დო მომზადებულ, ნამდა ქიმეხვარან ნარღენან ფერ ქრისტიანეფს, ნაბეტანო ვეგნაჸუნან წუხებას (ეს. 32:1, 2). მუშო ოკო რაგად, თავრეშე იძირე, ნამდა იეჰოვა მუშ ხალხიშ ჭყოლოფას გიმირჩქინანს.
9 ღორონთიშ ბრელ მსახურქ მუშ დუდშა გიმოცად, ნამდა უხუცესეფშე მოხვარას ჯგირ შედეგეფ მოუღ. მაგალთო, ართ ჯიმაქ, სახელო დენიელქ სერიოზულო დაშუ დო მუსხირენ თუთას ვეგნაჭყვიდირ უხუცესეფშა მეულაქ. თინა იჩიებ: „ბრელ ხან რდუ მიკულირ დო ფიფქრენდ, ნამდა ანწ უხუცესეფს ჩქიმდა ვა მახვარებედეს. ირიათო მოშკურუდ, ნამდა ჩქიმ საქციელ გეგმიარგამებუდ დო არძა ლოცვას ბოდიშიშ რაგადით იბჭყანდ“. საბოლათ, დენიელქ უხუცესეფს ქოთხუ მოხვარა. თინა იშინანს: „მოშკურუდ უხუცესეფშა ქიმეფრთიკო. მარა თინეფიშ დორაგადაფაშ უკულ შურქ მუმადგ დო თეშ ბგინაფლენდ დუც ითამ ხუჯშე ოღალქ მუმანწყუკო. ასე თავისფალო შემლებ იეჰოვას დურაგადუე ლოცვას“. ამდღა დენიელს სინდის ვა წუხენს დო ჭიჭე ხანიშ წოხლე მომსახურეთ დანიშნეს.
„ინტას თიქ ართ-ართ ქალაქშა“
10. მუ ოკო აკეთუკო კოჩიშ შემთხვევით მაჸვილარქ, ნამდა ღორონთიშ ჭყოლოფა მიღუკო?
10 კოჩიშ შემთხვევით მაჸვილარქ არძაშ უხოლაშ დუდიშ გითაფორაფალ ქალაქშა ოკო ინტუკო, ნამდა ღორონთიშ ჭყოლოფა მიღუკო (წეკითხით იესო ნავეს ძე 20:4). * თაშ ნამდა, მუშ დუდ გინისკილიდუკო თიშენ, ხეთეშე ოკო ინტუკო დუდიშ გითაფორაფალ ქალაქშა დო ქუდოსკიდკო თექ მღვდელმთავარიშ ღურაშახ. თეშ კეთება ადვილ ვეჸიდ, მუშენდა ბრელ მუთუნ აჸიდ დათმებელი. მაგალთო, ქიდიტუკო ოკო სამუშა დო ჸუდე; თეს გეძინელ, მღვდელმთავარიშ ღურაშახ ვა დატებედ თი ქალაქი * (რიცხ. 35:25). მარა თის უღირუდ თე ირფელიშ დათმება. დუდიშ გითაფორაფალ ქალაქის ქიდიტენდ-და, თეთ ოძირანდ, ნამდა ვა ნარღენდ კოჩიშ ჸვილუას დო მუშ სიცოცხლეს ხოლო საფრთხეს ენმაჸათანდ.
11. მუჭო ოკო მიქცუას ნარღენსინ ფერ ქრისტიანქ, ნამდა ღორონთიქ ქაპატუას?
11 ღორონთიქ ქაპატუას თიშენ, ნარღენსინ ფერ ქრისტიანქ ოკო მიოტუას თი გლახა საქმეეფ, მუდგაქ თინა ცოდაშა მიჸონ. პავლე მოციქულქ მიშინუ, მუჭო მიქცუეს კორინთელ ქრისტიანეფქ. თიქ ჭარ: „მუნერ გურგედვალირობა მერჩეს ღორონთიშ მოსაწონ დანარღებაქ, მუნერ გამართლება, მუნერ გოჭყორუა, მუნერ შიში, მუნერ ძალიერ კორნება, მუნერ დიდ მონდომა დო უსამართლობაშ გიშასწორება“ (2 კორ. 7:10, 11). მუჟამსით ირფელს ვორთუთ ცოდამ შარას ვადვართათინ, თეთ იეჰოვას ვოძირანთ, ნამდა მაწუხენა თე საკითხ დო ვა ფიფქრენთ, ღორონთ იშენით ქუმაპატიენა.
12. მუ ოკო დათმას ქრისტიანქ, ნამდა ღორონთიქ ირიათო ჭყოლოფა გეგმირჩქინას თიწკუმა?
12 მუ ოკო დათმას ქრისტიანქ, ნამდა ღორონთიქ ირიათო ჭყოლოფა გეგმირჩქინას თიწკუმა? თინა მზათ ოკო რდას, თიცალ მუდგარენიშ დათმებელო ხოლო, მუთ მანგარო მოწონს, მარა შილებე ცოდაშა ქიმიჸონას (მათ. 18:8, 9). მაგალთო, მიოტენდითო თიცალ მეგობარწკუმა ურთიერთობას, მით ოცად ღორონც ვა მოწონსინ ფერ საქმეეფ გუგოკეთებაფუან? შუმა ქოიჸორან-და, არიდანთო დუც თიცალ სიტუაციეფს, სოდეთ ბრელ ოშუმალ რე დო შილებე დუდიშ კონტროლქ მეიდინან? ქოიჭირა უზნეო სურვილეფიშ გაკონტროლება-და, არიდანთო დუც თიცალ კინოეფს, ვებ-გვერდეფს დო ირფელს, მუთ უწუნდურ ფიქრეფს გოირჩქინანდეს? ქორშუდან, ირფელიშ დათმება ღირ თიშო, ნამდა იეჰოვაშ ართგურეფქ ქუდოფსკიდათ. თიშე უარეს მუთუნ ვა რე, მუჟამსით იეჰოვაშე მეტებულო გინაფლენქ დუც დო ვართ თიშე უჯგუშ რე მუთუნ, მუჟამსით ირიათო გინაფლენქ იეჰოვაშ ჸოროფას (ეს. 54:7, 8).
„თინა იჸუაფ თქვანო დუდიშ გითაფორაფალი“
13. მუშენ გინაფლენდ დუც თხილერო დო ბედნერო დუდიშ გითაფორაფალ ქალაქშა ნტებულ კოჩი?
13 დუდიშ გითაფორაფალ ქალაქის მაჸვილარ თხილერ რდუ. თე ქალაქეფიშ გურშენ იეჰოვაქ თქუ: „თინა იჸუაფ თქვანო დუდიშ გითაფორაფალი“ (იეს. 20:2, 3). იეჰოვა ვეთხინდ, ნამდა კოჩიშ შემთხვევით მაჸვილარიშ საქმე მაჟიაშა გურჩიებდესკო. ვართ ჸვილირიშ უხოლაშ ნათესეს შეულებუდ თე ქალაქშა მინულა დო თიშ ჸვილუა. ვართ მითინ გინოჩანდ თის ჸვილირიშ ნათესეს. დუდიშ გითაფორაფალ ქალაქის თინა იეჰოვაშე რდუ თხილერი. თექ რინა ციხეშ დოხუნას ვამოგენდ, მუშენდა თის შეულებუდ იმუშუკო, შხვეფს მეხვარკო დო ემსახურკო იეჰოვას. დასურო, თის შეულებუდ ბედნერო იცხოვრუკო!
რჯერდან, ნამდა იეჰოვა გაპატიენა (ქოძირით აბზაცეფი 14—16)
14. მუშ ოკო ჯერდას ნარღენსინ ფერ ქრისტიანს?
14 ნამთინე ქრისტიანს, ნამუთიქ სერიოზულო დაშებაშ უკულ გეგმისწორუნ, იშენით აწუხენს სინდისი. ნამთინე ხოლო ფიქრენს, ნამდა იეჰოვა დღას ვაპატიენს. თქვა ხოლო დუც თაშ ქოგინაფლენთ-და, რჯერდან, ნამდა მუჟამსით იეჰოვა გაპატიენან, თის ბოლოშა პატიებულ აფუ. ჟიშე მოშინაფილ დენიელქ თენა მუშ დუდშა გეგმოცად. მუჟამსით უხუცესეფქ ქიმეხვარეს სუფთა სინდისიშ დორთინაფასინ, თის ითამ მონკა ოღალქ მანწყ ხუჯშე. დენიელქ თქუ: „შურქ მუმადგ. უხუცესეფშა მეულაშ უკულ, დუც დამნაშავეთ ვა ბგინაფლენდ. იეჰოვაქ ართშა ქუმაპატუნ, თენა თის ნიშნენს, ნამდა დღას ვა გომშინანს“. დუდიშ გითაფორაფალ ქალაქშა ნტებულ კოჩის თიშა ვაშკურუდ, ნამდა ჸვილირიშ ნათესე ქიმიშ თე ქალაქშა დო დოჸვილუნდ თის. თეგვარო, მუჟამსით იეჰოვა ქუმაპატიენან, ვა მოშკურდან ოკო, ნამდა კინ ქუგომშინანა დო დაფსაჯენა (წეკითხით ფსალმუნი 103:8—12). *
15, 16. მუჭო მიმანგარენა ღორონთიშ რწმენას თიშ რჩქინა, ნამდა იესო ჩქინ გიშმაჸიდირალ დო მღვდელმთავარ რე?
15 ჩქი უმოს დიდ მიზეზ მიღნა ბჯერდან იეჰოვაშ ჭყოლოფაშ, ვინემ ისრაელეფს. პავლექ თქუ, ნამდა სრულყოფილო ვეშულებუდ იეჰოვაშ მორჩილება დო გეუძინ: „მადლობა ღორონც ჩქინ უფალ იესო ქრისტეშ ჭყოლოფათ!“ (რომ. 7:25). მართალ რე, პავლეს მინშა დუც გაშინანდ ჯვეშო ნაკეთებ გლახა საქმეეფი, ნამუთ უკვე გიშასწორებულ აფუდ, მარა თეწკუმა ართო ბოლოშა ჯერდ, ნამდა ღორონთიქ იესოშ გიშაჸიდირალით ქაპატუ თის. იესო ჩქინ გიშმაჸიდირალ ხოლო რე, ათეშენ თინა მოხვარნა, მიღუდან სუფთა სინდის დო გურ მშვიდას მაფდან (ებრ. 9:13, 14). იესო ჩქინ მღვდელმთავარ რე დო „თის შეულებ ბოლოშა ირსხას თინეფ, მით თიშ ჭყოლოფათ ღორონთწკუმა ხოლოს რენა, მუშენდა თინა მარადიულო ცოცხალ რე, ნამდა ქიმშადირთას თინეფ შკას“ (ებრ. 7:24, 25). ისრაელეფს მღვდელმთავარიშ არსებობა აჯერენდ, ნამდა იეჰოვა ქაპატიენდ ცოდეფს. მუსხით უმოსო მაჯერენა ჩქინ მღვდელმთავარ იესოშ ნაკეთებ საქმე, ნამდა მიბღენთ ღორონთიშ ჭყოლოფას დო პატიებას (ებრ. 4:15, 16).
16 იეჰოვაქ თქვანო ხოლო ქიჸუას დუდიშ გითაფორაფალქინ, გეგმოხანტით იესოშ გიშაჸიდირალიშ რწმენა. მართალ რე, იესოშ გიშაჸიდირალ არძაშო რე, მარა გეგმირჩქინით თიშ რწმენა, ნამდა პირადო თქვა შეილებნა თიშე სარგებელიშ მეღება (გალ. 2:20, 21). რჯერდან, ნამდა გიშაჸიდირალშა რე გერსხილ თქვან ცოდეფიშ პატიება დო თიშ ჭყოლოფათ შეილებნა გიღდან მარადიულ სიცოცხლეშ იმენდი. იესოშ გიშაჸიდირალ თქვანო იეჰოვაშ საჩუქარ რე.
17. მუშენ ოკო რდას თქვანო იეჰოვა დუდიშ გითაფორაფალი?
17 დუდიშ გითაფორაფალ ქალაქეფშე ვორწყეთ, ნამდა ღორონთ მუშ ხალხწკუმა ჭყოლოფას გიმირჩქინანს. თეს გეძინელ, თინა ხოლო იძირე, ნამდა ღორონთიშ თოლს კოჩიშ სიცოცხლე წმინდა რე. თეწკუმა ართო, თის ხოლო ბგებულენთ, მუჭო შეულებნა უხუცესეფს ჩქინ მოხვარა, მუ ოკო ვაკეთათ, დაშებულ გეგშვასწორათ დო მუშენ შემლებნა ბჯერდან, ნამდა იეჰოვა სრულაშე მაპატიენა. ქორენო თქვანო იეჰოვა დუდიშ გითაფორაფალ? თიშე უჯგუშ დუდიშ გითაფორაფალ სოთინ ვა გაგორენა! (ფსალმ. 91:1, 2). ანწიან სტატიას გუვარჩიენთ, მუჭო მოხვარნა დუდიშ გითაფორაფალ ქალაქეფ, მივაჸუნათ იეჰოვაშ სამართლიანობაშ დო პატიებაშ მაგალითის.
^ აბზ. 2 ფსალმ. 34:22: იეჰოვა გეგშეჸიდენს მუშ მსახურეფიშ სიცოცხლეს; ნამთინს, მით თის დუც გითუფორუანსინ, ბრალ ვაღვენუ.
^ აბზ. 6 რიცხ. 35:24, 25: 24 მაჸვილარქ დო ზისხირიშ ემაჭოფალქ ქიგედირთას ეკოშაყარელ ხალხიშ წოხოლე დო თინეფქ თე კანონით გარჩუან თინეფიშ საქმე. 25 უკულ აკოშაყარელ ხალხი დერსხენს მაჸვილარს ზისხირიშ ემაჭოფალიშ ხეშე დო დართინუანს დუდიშ გითაფორაფალ ქალაქშა, სოდეთ ნტებულ რდუ დო თექ იცხოვრენს წმინდა ზეთით ცხებულ მღვდელმთავარიშ ღურაშა.
^ აბზ. 10 იეს. 20:4: ინტას თიქ ართ-ართ ქალაქშა, ქიგედირთას ქალაქიშ კარმინოლწკუმა დო უხუცესეფიშ გასაგონეთ ქოთქუას მუშ ორაგადე; გემნაშქვან თინფქ ქალაქშა, ქიმეჩან ადგილ დო თინეფწკუმა იცხოვრას.
^ აბზ. 10 ართ ებრაულ ნაშრომს ჭარ, ნამდა კოჩიშ შემთხვევით მაჸვილარიშ ოჯახიშ წევრეფქ, დუდიშ გითაფორაფალ ქალაქის თიწკუმა ართო ოკო იცხოვრესკო.
^ აბზ. 14 ფსალმ. 103:8—12: 8 იეჰოვა ჭყოლოფას გიმირჩქინანს, უცფას ვერისხებ დო სიჯგირათ რე ეფშა. 9 ირიათო ვეგერდვანს ბრალს დო ირიათო ვეჸუაფ ნაწყენი. 10 ჩქინ ცოდეფიშ გურშენ, მუჭოთ მოკუთნუდესინ თეშ ვემმექცის დო ვართ დუნაშებუშ გურშენ გინომგეს მანგიორი. 11 მუჭოთ ზეცა რე დედამიწაშე მაღალინ, თიშნერ მაღალ რე თიშ სიჯგირა თიშა ოშქურნან თინეფშო; 12 მუჭოთ ბჟა ეიოლ რე შორს ბჟა დინოლშენ, თეშ დამთხინუეს თიქ ჩქინ ცოდეფი.
