1, 2. ა) მუ „მშვიდობა“ მიღნა ამდღა? ბ) მუ მოცილნა, ნამდა მშვიდობიანო იფცხოვრათ? (ქოძირით სურათი თე გვერდის).

არძას მოკონა მშვიდობიანო იფცხოვრათ დო ოწუხებელ ვამღუდან. მარდულეფ ვორეთ თიშენ, ნამდა „ღორონთიშ მშვიდობა“ მიღნა, ნამუთ მიცვენა თიცალ ფიქრეფშე დო გრძნობეფშე, მუთ სიმშვიდეს მიდმამღანა (ფილ. 4:6, 7). ჩქი მშვიდობიან ურთიერთობა მიღნა ღორონთწკუმა, მუშენდა თიშა მაფნა დუდ მეძღვინელი (რომ. 5:1).

² ღორონც ოკო დედამიწას მშვიდობაქ ქიჸუას, მარა თე დრო დიო ხოლო ვა რე მოულირი. ჩქი ფცხოვრენთ ბოლო დღალეფს, ნამუთ პრობლემეფით რე ეფშა დო უბადოშ მაკეთებელეფს ირდიხას შეფხვადუთ (2 ტიმ. 3:1—4). ქრისტიანეფ ვა დოპჸუნთ სატანას დო ვა ურჩქილეთ თიშ ტყურა გურაფეფს (2 კორ. 10:4, 5). მარა ჩქინ მშვიდობას არძაშ უმოსო შილებე იეჰოვაშ მოწმე ვა რენ ფერ მოჯგირეეფქ ეცილან. ნამთინე შილებე გიმაძიცენდან, ოჯახიშ ეკორღვაფას ეკმაბრალენდან ვარდა მორცქინანდან, ნამდა რწმენას ვა დაფთმენთ-და, საბოლათ მიმოდინუანა. მუჭო ოკო ვუჯინედათ ოჯახიშ წევრეფიშ წინააღმდეგობას დო მუჭო შემლებნა გურზათ თეს?

3, 4. ა) მუ მაჸუნუდ იესოშ გურაფეფს? ბ) მუ დროს მაჸუნუდ პრობლემეფ იესოშ მეჸუნას?

³ იესოს უჩქუდ, ნამდა თიშ გურაფეფ გორთუნდ ოჯახეფს დო თიშ მიმაყუნალეფს გაბედულებაშ გიმორჩქინა დესაჭირებდეს, ნამდა ქუგურზესკო წინააღმდეგობას. თე ირფელ გილალუანდ ოჯახიშ წევრეფ შქას მშვიდობიან ურთიერთობას. იესოქ თქუ: „ვეფიქრათ, ნამდა დედამიწაშა მშვიდობაშ მაღალშა მოფრთი, მშვიდობაშ ვარინ ყამაშ მაღალშა მოფრთი. თიშა მოფრთ, ნამდა დუთხინუე კოჩ მუშ მუმას, ოსურსქუა — დიდას დო ნოსა — დიანთილს. კოჩის მუშ ოჯახ გინართუ ნტერო“ (მათ. 10:34—36).

⁴ იესოქ თქუ: „ვეფიქრათ, ნამდა . . . მშვიდობაშ მაღალშა მოფრთი“. თეშ რაგადით თის ოკოდ მუშ მიმაჸუნალეფს გაგებაფუკო, ნამდა თე შარაშ მეჸუნას შილებედ ოჯახეფიშ გორთუალაქ მაჸუნკო. მუშო ოკო რაგად, იესოშ მიზან ღორონთიშ გურშენ ჭეშმარიტებაშ გაცხადება რდუ დო ვართ ხოლო ოჯახეფიშ აკორღვაფა (იოან. 18:37). მარა იესოშ გურაფეფიშ ართგურო დაცვება მუშ მიმაჸუნალეფს პრობლემეფს ქუმუღანდ, მუჟამსით თინეფიშ მეგობრეფ ვარდა ოჯახიშ წევრეფ ჭეშმარიტებას ვემიღენდეს.

5. მუშა აჸიდეს გარზებელ იესოშ მიმაჸუნალეფს?

⁵ იესოქ თქუ, ნამდა თიშ მიმაჸუნალეფს ოჯახიშ წევრეფიშ წინააღმდეგობაშა ხოლო აჸიდეს გარზებელ, მაგალთო, გეძიცა დო ნტერალაშა (მათ. 10:38). მარა თინეფს თიშე უმოს აშიდეს, ვინემ ოდინუანდეს (წეკითხით მარკოზი 10:29, 30). *

6. მუ ოკო ფშუდან, მუჟამსით ხოლოშიანეფ მოწინააღმდეგნა?

⁶ თიშ უმკუჯინუო, ნამდა ხოლოშიანეფ მოწინააღმდეგნა იეჰოვაშ თაყვანიშცემას, ჩქი იშენით მიჸორა თინეფი. მარა იეჰოვაშ დო იესოშ ჸოროფა პირველ ადგილშა ოკო გემრდან (მათ. 10:37). სატანას უჩქ, ნამდა მანგარო მიჸორა ოჯახიშ წევრეფ დო ირნერო ოცად თენა გეგმირინუას, ნამდა ართგურობა მიმოდინაფუან. მორთ გუვარჩუათ ნამთინე სიტუაცია დო ქობძირათ, მუჭო შემლებნა მიფქცუათ თეცალ დროს.

7. მუჭო ოკო მიქცუას დაოჯახებულქ, მუჟამსით მეუღლე ვა რე იეჰოვაშ მოწმე?

⁷ ბიბლიას ჭარ, ნამდა თინეფს, მით იქორწინებნან, „ხორციელ გაჭირება აღვენუნა“ (1 კორ. 7:28). თქვან მეუღლე იეჰოვაშ მოწმე ვარენ-და, მეტ პრობლემა დო ოწუხებელ გაღვენუნა. თეშ უმკუჯინუო, თქვან მდგომარეობას იეჰოვაშ თოლით ოკო უჯინათ. მეუღლე ვემეჸუნს ქრისტეშ მითითებეფს-და, თენა ვა გარზენა თიშ უფლებას, ცალ-ცალკე იცხოვრათ ვარდა დეთხუათ ართიანს (1 კორ. 7:12—16). ქრისტიან ოსურქ პატი ოკო ცას ქომონჯის, მუჭოთ ოჯახიშ დუც. ქრისტიან ქომონჯიქ ხოლო დიდ ჸოროფა ოკო გიმირჩქინას მუშ ოსურწკუმა, ნამუთ ვა რე იეჰოვაშ მოწმე (ეფეს. 5:22, 23, 28, 29).

8. მუ ოკო კითხათ თქვან დუც?

⁸ მუჭო ოკო მიქცუათ, მუჟამსით მეუღლე ვა გარზენა საშვალებას, უმოს ხშირას იმსახურათ? მაგალთო, ართ დას მუშ ქომონჯიქ უწუ, ნამდა მარაშე ხვალე მუსხირენ დღას უმსახურებუდკო დო შხვა დღალეფს ჸუდეს ჸოფედკო. თეცალ სიტუაცია თქვა ხოლო ქოიღუნან-და, ქოკითხით თქვან დუც: „მსახურებაშ მეტებას ხომ ვა ფთხულენს ჩქიმ ქომონჯი? თაშ ვა რენ-და, უჯგუშ ხომ ვეჸუაფ ქუდვაჸუნე თის?“. ჭკვერულო ქიმიქციებუთ-და, ნაკლებ პრობლემა გაღვენუნა ოჯახის (ფილ. 4:5).

9. მუჭო შეულებ ქრისტიან მშობელს, ოგურუას სქუალეფს პატი ცას მშობელს, ნამუთ ვა რე იეჰოვაშ მოწმე?

⁹ ბაღანეფიშ რდუალა არძაშ უმოს რთულ  თიმწკუმა რე, მუჟამსით ართ-ართ მეუღლე ვა რე იეჰოვაშ მოწმე. მაგალთო, თქვა ვალდებულ რეთ ოგურუათ ბაღანეფს ბიბლიურ პრინციპი: „პატი ქოც მუმას დო დიდას“ (ეფეს. 6:1—3). მუშ რაგად შილებე, მუჟამსით თქვან მეუღლე ბიბლიურ ნორმეფით ვა ცხოვრენს? თიშ პატიცემა გეგმირჩქინით დო თეთ ბაღანეფს ჯგირ მაგალით ქაძირეთ. ყურადღება თიშ ჯგირ თვისებეფშა გეგნიღით დო გეგმოხანტით ჸოროფა. ვა თქუათ მეუღლეშ გლახა ბაღანეფ ირჩქილენან თეშ. გეუნწყით სქუალეფს, ნამდა არძაქ მუშით ოკო გინოჭყვიდას, ემსახურას დო ვარ იეჰოვას. ბაღანეფიშ ჯგირ საქციელიშ მეჯინუ, შილებე იეჰოვაშ მოწმე ვა რენ ფერ მეუღლექ ჭეშმარიტებათ დეინტერესას.

10. მუჭო შეულებ ქრისტიან მშობელს, ოგურუას ბაღანეფს ჭეშმარიტება რელიგიურო გორთილ ოჯახის?

¹⁰ მინშა იეჰოვაშ მოწმე ვა რენ ფერ მშობელქ შილებე ბაღანეფს მოთხუას მონაწილება მიღან ბიბლია ვეწონუანს ფერ დღახუეფს ვარდა ქიდეჯერან ტყურა რელიგიურ გურაფეფი. ნამთინექ შილებე მოთხუას მუშ ოჯახობას, ნამდა ვაგურუას ბაღანეფს ბიბლია. თეშ უმკუჯინუო, ქრისტიან მეუღლექ ირნერო ოკო ქეცადას, ნამდა ქუდაგურუას ბაღანეფს ბიბლიურ ჭეშმარიტება (საქ. 16:1; 2 ტიმ. 3:14, 15). მაგალთო, შილებე ქომონჯიქ უფლება ვემეჩას მუშ ოჯახობას ოფიციალურო ჩაუტარას ბაღანეფს ბიბლიაშ გურაფა ვარდა ქიგლეჸონას კრებაშ შეხვალამეფშა. თეცალ დროს ოსურქ ქუდაჸუნას ოკო მუშ მეუღლეს, მარა თეწკუმა ართო ოკო გეგმირინუას ირნერ საშვალება, ნამდა ბაღანეფს მუშ რწმენა ქაძირუას. თეგვარო, ბაღანეფ მიღენა იეჰოვაშ გურშენ რჩქინას დო ქოძირნა მუ რე თიშ თოლს ჯგირ დო ფური (საქ. 4:19, 20). მუშო ოკო რაგად, ბაღანეფ საბოლათ მუნეფიშით გეგნოჭყვიდნა  ემსახურან დო ვარ იეჰოვას (კან. 30:19, 20). *

11. მუშენ შილებე გაშუან პრობლემაქ იეჰოვაშ მოწმე ვა რენ ფერ მოჯგირეეფწკუმა?

¹¹ დუდშე შილებე ვაითქუალნა ოჯახიშ წევრეფშა, ნამდა იეჰოვაშ მოწმეეფწკუმა ბიბლიას გურაფლენდით. მარა მუჟამსით რწმენაქ გეგემანგარესინ, გუცხადით თინეფს თქვან რწმენაშ გურშენ (მარ. 8:38). ათეშენ მოჯგირეეფწკუმა პრობლემაქ ქუგაშის-და, შეილებნა დეფიქრათ მუსხირენ რჩევაშე, ნამუთ მიგეხვარებნა მშვიდობა გიღდან მოჯგირეეფწკუმა დო იეჰოვაშ ართგურქ ხოლო ქუდოსკიდათ.

12. მუშენ შილებე მოწინააღმდეგუდან მოჯგირეეფ, მარა მუჭო შემლებნა ქუგუგათ თინეფს?

¹² ქეცადით, ქუგუგათ თინეფს. შილებე მანგარო მოხიოლდან, ნამდა ბიბლიურ ჭეშმარიტება გებგით, მარა ჩქინ მოჯგირეეფ ფიქრენდან, დებღორით ვარდა მუდგარენ გლახა სექტას ქუვაკათით. შილებე თიცალო გინაფლენდან დუც, ნამდა ვა მიჸორა თინეფ, მუშენდა მუნეფწკუმა ართო დღახუეფს ვა ბღებულენთ მონაწილებას. ნამთინე შილებე თიშე ხოლო წუხენდას, ნამდა ღურაშ უკულ ჯოჯოხეთის ქუმოფხვადუთ. ქივეცადათ ოკო თინეფიშ თოლით ქუჯინათ თე სიტუაციას დო ქიგებგათ, სინამდვილეს მუ აწუხენს თინეფს (იგავ. 20:5). პავლე მოციქულ ოცადუდ არძას ქუგუგკო, ნამდა სახიოლო ამბე გეგნუჩამუდკო თინეფშა. თე მაგალითიშ მეჸუნა ჩქი ხოლო მიმეხვარბნა ქუგუგათ დო ჯგირ ურთიერთობა მიღდან მოჯგირეეფწკუმა (1 კორ. 9:19—23).

13. მუჭო ოკო იფჩუათ იეჰოვაშ მოწმე ვა რენან ფერ მოჯგირეეფწკუმა?

¹³ მშვიდას იჩით. ბიბლიას ჭარ: „თქვან სიტყვა ირო მარდიან რდას“ (კოლ. 4:6). შეილებნა იეჰოვას წმინდა შურ ქოთხუათ, ნამდა მოჯგირეეფწკუმა რაგადიშ დროს ჯგირ თვისებეფ გეგმირჩქინათ. თინეფს ბრელ მუთუნ ჯერა, მუსით ბიბლია ვაგურუანს, მარა თეშ გურშენ ოკო ვევენირზათ. მუნეფიშ რაგადით ვარდა საქციელით ქუმოწყინებაფეს-და, შემლებნა მოციქულეფიშ მაგალითის მივაჸუნათ. პავლექ ჭარ: „ბლანძღუნან — ფხვამანთ; ფთხოზუნან — იფთვინენთ; სახელს მიტახნან — პატიებას ფთხულენთ“ (1 კორ. 4:12, 13).

14. მუ შედეგ მოჸუნს ჯგირ საქციელს?

¹⁴ ირიათო ჯგირო მიქცით. მშვიდ ჩიებას ჯგირ შედეგ მოუღ, მარა ჯგირ საქციელს ხოლო მეტიშ კეთება შეულებ (წეკითხით 1 პეტრე 3:1, 2, 16). * ჩქინ მაგალითით ქუვოძირათ ნათესეფს, ნამდა იეჰოვაშ მოწმეეფს ბედნერ ოჯახეფ უღნა, ბაღანეფს ჯგირო რდუნა დო მორალურო სუფთა ცხოვრება უღნა. მოჯგირეეფქ ჭეშმარიტება ვემიღანინ ხოლო, ჩქი მიღნა ხიოლ, ნამუთ იეჰოვაშ ართგურო მსახურებას მოუღ.

15. მუჭო მივემზადათ თიცალ სიტუაციეფშო, მუ დროსით შილებე ნირზიქ ქუმომრთან?

¹⁵ წინასწარ დაგეგმით. დეფიქრით სიტუაციეფშე, მუ დროსით შილებე ნირზიქ ქუმოირთან მოჯგირეეფწკუმა დო მუჭო ეუჩილითუათ თეს დუდ (იგავ. 12:16, 23). ართ ავსტრალიელ და იჩიებ: „ჩქიმ მუანთილ მანგარო მოწინააღმდეგუდეს. სოიშა თის ტელეფონით დურაგადუანდითინ, მა დო ჩქიმ ქომონჯ იეჰოვას ფთხულენდით მოხვარას, ნამდა თიშ გლახა სიტყვეფშა გლახათ ვამპასუხებდესკონ. წინასწარ ფიფქრენდით მუ საკითხეფშე იფჩითკო, ნამდა ვა ვოწყინებაფეთკო ართიანს. დიდ ხანს ვებჩიებუდით, ნამდა ჩქინ რაგადის ნირზიშა ვეგნურთუმუდკო“.

16. მუჭო ოკო მიქცუათ, მუჟამსით ფიქრენთ, ნამდა თქვან ბრალ რე მოჯგირეეფწკუმა პრობლემეფი?

¹⁶ მუშო ოკო რაგად, არძა პრობლემაშა, ნამუთ რწმენაშ გურშენ რჩქინდუნ, დუდ ვეგაჩილითენა.  შილებე იფიქრათ, ნამდა თენა თქვან ბრალ რე, განსაკუთრებულო თი დროს, მუჟამსით მანგარო გიჸორა ხოლოშიანეფ დო ოცადუთ თინეფიშ მოსაწონო მიქცუათ. დუც თაშ ქოგინაფლენთ-და, ოჯახიშ წევრეფიშ ჸოროფაშ წოხოლე იეჰოვაშ ართგურობა ქიგიორინეთ. თქვან თეცალ პოზიციათ შილებე მოჯგირეეფქ ქოძირან, ნამდა ბიბლიურ პრინციპეფიშ გიმორნაფა ღურა დო თელაშ საკითხ რე. მუჭოდგა ვა რდასინ, ვაგგოჭყორდან, ნამდა მითინშა ვადგანძალებენა ჭეშმარიტებაშ მეღება. თეშ მანგიორო, თქვან საქციელით ქაძირეთ, მუ ჯგირობუა მოუღ იეჰოვაშ შარაშ მეჸუნას. მოჸოროფე ღორონთი, მუჭოთ ჩქი თეშ, თინეფს ხოლო არზენს საშვალებას, გეგშაგორან, ნამ შარას მიაჸუნან (ეს. 48:17, 18).

17, 18. მუ მიგეხვარებნა გიორჯგინათ გურჭუას, მუჟამსით ოჯახიშ წევრ იტენს იეჰოვას?

¹⁷ მუჟამსით ოჯახიშ წევრ ირიცხებ ვარდა ორგანიზაციას იტენსინ, თენა გურს ხამცალო მოფხვადნა. მუჭო შემლებნა გივორჯგინათ გურჭუას, ნამუთ თე ირფელს მოჸუნს?

¹⁸ ყურადღება მსახურებაშა გეგნიღით. გემანგარით რწმენა ბიბლიაშ ირდღაშიან კითხირით, კრებაშ შეხვალამეფშო მომზადებათ დო დასწრებათ. თეს გეძინელ, ვემიოტუათ ქადაქება დო ილოცით, ნამდა ღორონთქ ქიმერჩან ძალა, ქუგურზათ თე ირფელს (იუდ. 20, 21). მარა მუჭო ოკო მიქცუათ, თეშ უმკუჯინუო, იშენით გურჭუას ქოგინაფლენთ-და? გურ ვეგიტახათ! ჯგირ სულიერ გეგმაშ მეჸუნა მიგეხვარებნა, გაკონტროლათ თქვან ფიქრეფ დო გრძნობეფი. მორთ, გუვარჩუათ 73-ა ფსალმუნიშ მაჭარალიშ მაგალითი. თის პრობლემეფქ ქაშუ დო სწორ ვა რდუნ ფერ აზრეფქ გურჩქინდ. მარა იეჰოვაშ მსახურებაქ ქიმეხვარ, ნამდა სწორ აზროვნება დირთინუკო (ფსალმ. 73:16, 17). თქვა ხოლო იეჰოვას ართგურო ქემსახურებუთ-და, თენა მიგეხვარებნა გიღდან სწორ აზროვნება.

19. მუჭო შეილებნა, დაფასათ დასაჯება, ნამუთ იეჰოვაშე მოურს?

¹⁹ დაფასით დასაჯება, ნამუთ იეჰოვაშე მოურს. იეჰოვას უჩქ, ნამდა დასაჯებას არძაშო, თინეფწკუმა ართო გარიცხულეფშა ხოლო, მოუღ სარგებელი. მართალ რე, საჸოროფო პიროვნებაშ გირიცხვა მანგარ გურსაჭო რე, მარა თექ შილებე ქიმეხვარას თის, ნამდა კინ დართას იეჰოვას (წეკითხით ებრაელები 12:11). * მაგალთო, იეჰოვა მირაგადნა, ვამღუდან ურთიერთობა თინეფწკუმა, მით ვა ნარღენს მუშ შეცთომას (1 კორ. 5:11—13). მართალ რე ეფი ვა რე თეშ კეთება, მარა ირნერო დუდ ეუჩილითუათ ოკო გარიცხულ ოჯახიშ წევრწკუმა ურთიერთობას, თენა იჸინო ტელეფონით, ესემესით, იმეილით ვარდა სოციალურ ქსელით.

20. მუშ იმენდი ოკო ვა ვოდინუათ?

²⁰ ვადინუათ იმენდი. ჸოროფას „ირფელიშ იმენდი უღუ“, მუთ თის ნიშნენს, ნამდა იმენდის იპტენთ, ჩქინ საჸოროფო კათა კინ დართუ იეჰოვას (1 კორ. 13:7). მუჟამსით ორწყეთ, თქვან ოჯახიშ გარიცხულ წევრ ითირუნ, თე დროს შეილებნა ილოცათ, ნამდა თიქ გემანგარას რწმენა დო დართას იეჰოვას (ეს. 44:22).

21. მუჭო ოკო მიქცუათ, რწმენაშ გურშენ ოჯახის პრობლემეფ ქოიღნან-და?

²¹ იესოქ თქუ, ნამდა თიშ მანგიორო პირველ ადგილს შხვა მითინის ქიგვორინუანთ-და, ვეპჸუაფუთ თიშ ღირსეფი. მარა თინა დარწმუნებულ რდუ, ნამდა მუშ მოწაფეეფ წინააღმდეგობეფიშ უმკუჯინუო გეგმირჩქინანდეს გაბედულებას დო ქუდოსკიდუდეს ართგურეფი. რწმენაშ გურშენ ოჯახის პრობლემეფ ქოიღნან-და, მიენდით იეჰოვას, ნამუთ ქიმგეხვარებნა თიშ გარზებას (ეს. 41:10, 13). ხიოლს მარზენა თიშ რჩქინა, ნამდა იეჰოვაშ დო იესოშ თოლს მოსაწონეფ ვორეთ დო თინეფ ართგურობაშ გურშენ კურთხევეფს ვამმარკენა.