დიაჩქიმქ დო მუაჩქიმქ, ჯეიმზი დო ჯესი სინკლერეფქ XX საუკუნეშ 30-იან წანეფს ნიუ-იორკიშ ჭიჭე ქალაქ ბრონქსის ქიდიხორეს, სოდეთ გეჩინებაფეს ვილი სნედონი. თინა ხოლო შოტლანდიაშე რდუ მოულირ. თინეფქ ხეთეშე მუნეფიშ ოჯახიშ ამბეეფიშ ჩიება ქიდიჭყეს. თექ ჩქიმ დაბადებაშახ ჟირ წანათ ადრე მოხვად.

დიაჩქიმქ ვილის უწუ, ნამდა პირველ მსოფლიო ჩხუპშახ, მუჟამსით მუშ მუმა დო უნჩაშ ჯიმა ჩრდილოეთიშ ზღვას ჩხომენდესინ, თინეფიშ ნავქ ნაღმის ეფეთქ დო ჟირხოლოქ დოღურ. ვილიქ დიაჩქიმს უწუ: „სქან მუმა ჯოჯოხეთის რე!“. ვილი იეჰოვაშ მოწმე რდუ დო თიშ თეცალ ნარაგადიქ მანგარო გუკვირდ დიაჩქიმს.

ვილიშ ნარაგადიქ ხასიათ წაუჸონ დიაჩქიმს, მუშენდა თის უჩქუდ მუჭო მუამუშ ჯგირ კოჩ რდუ. მარა თეშ უკულ ვილიქ ქიგუძინ: „გურშა ქელაიკინანსო ქოიწუე, ნამდა იესო ხოლო რდუ ჯოჯოხეთის?“. დიაჩქიმს ქუგაშინ ეკლესიაშ გურაფაქ, სოდეთ იჩიებდეს, ნამდა იესო ღურაშ უკულ ჯოჯოხეთის რდუ დო მასმა დღას გეთელ. თაშ ნამდა, დიაჩქიმს ოინტერესუდ, ჯოჯოხეთ უბადოეფიშ ოწამებელ დაჩხირამ ადგილ ქორენ-და, მუშენ რდუ იესო თექ. თაშ დეინტერეს ჩქიმ დიდაქ ჭეშმარიტებათ. თეშ უკულ თიქ კრებაშ შეხვალაფემშა ქიდიჭყ გილულა დო 1940 წანას დინათ.

თიმ დროს დიდ ყურადღება ვექციებუდ თის, ნამდა ქრისტიან მშობლეფქ მუნეფიშ სქუალეფს ოგურესკო ბიბლია. ჭიჭე ვორდინ თეშ, მუჟამსით ჩქიმ დიდა კრებაშ შეხვალამეფშა დო საბატონ დო ჟეშხას ოქადაქებშა გილეშუნ, მა ჩქიმ მუმა მილუანდ. 5 წანაშ უკულ მა დო ჩქიმ მუმაქ ხოლო ქიდიბჭყით კრებაშ შეხვალამეფშა გილულა. დიაჩქიმ გურგედვალირო ქადაქენდ სახიოლო ამბეს დო მუსხირენ პიროვნებას ოგურუანდ ბიბლიას. რდუ პერიოდ, მუჟამსით თინა მუსხირენ კოც ართათ ოგურუანდ, მუშენდა თიშ დაიტერესებულეფ ართიანიშ გოხოლუას ცხოვრენდეს. მუჟამსით სკოლაშე აკმორღვანდესინ, დიაჩქიმს მა ხოლო გილაპჸუნდ ოქადაქებშა. ჭიე-ჭიეთ ბრელ მუთუნ ქიგებგი ბიბლიაშე დო თიშე, მუჭო ვუქადაქკო შხვეფს.

ბნარღენქ, ნამდა ჭიჭენობას ბოლოშა ვა ვაფასენდ ჭეშმარიტებას დო იზმათ მნიშვნელოვანო ვემმორჩქუდ. მარა 12 წანერ ვორდინ თეშ, უნათ მაუწყებელო გინიფრთ დო  თევრეშე მოჸუნაფილ რეგულარულო ბღებულენდ მონაწილებას ქადაქებაშ საქმეს. 16 წანერ ვორდ, მუჟამსით იეჰოვას დუდ მეუძღვინ დო 1954 წანაშ 24 ივლისის დიმნათ კონგრესის, ნამუთიქ ტორონტოს (კანადა) ჩეტარ.

ჩქინ კრებაშე მუსხირენ ჯიმა თიმ დროს ბეთელს მსახურენდ. რდეს თიცალ ჯიმალეფ ხოლო, ნამუთ ადრე მსახურენდეს თექ. ჩქიმწკუმა მანგარო იმოქმედ თიქ, ნამდა თე ჯიმალეფ ჯგირო გინმოჩანდეს დო ენწყუნდეს ბიბლიურ ჭეშმარიტებას. სკოლაშ მასწავლებელეფს ოკოდეს, უნივერსიტეტის იბგურეკო, მარა მა ბეთელს მსახურება მაფუდ გინოჭყვიდილ. თაშ ნამდა, ტორონტოს ჩატარებულ კონგრესის ბეთელიშ ბლანკი შევავსი. 1955 წანას ქალაქ ნიუ-იორკის, იანკიშ სტადიონს ჩატარებულ კონგრესის კინ შევავსი თე ბლანკი. თეშ უკულ ბრელ დროს ვემკურთუმუნ თეშ, 1955 წანაშ 19 სექტემბერს, ბრუკლინიშ ბეთელშა ქუდომძახეს. თე დროს 17 წანერ ვორდ. მაჟია დღაშე მუშება ქიდიბჭყი საამკინძაოს ადამს სტიტიშ 117-ის. თიცალ დანადგარწკუმა მუფშენდ, ნამუთ 32 გვერდიან წიგნეფს აკმოშაყარანდ დო აკადგუმალო ახაზირენდ.

საამკინძაოს ართ თუთაშ მუშობაშ უკულ ჟურნალეფიშ განყოფილებაშა გომტუეს, მუშენდა ბეშტუა მიჩქუდ. თი კათაშ მისამართეფ, მით გიშეჭარუნდ ჟურნალეფს „გინაჯინალ კოშკი“ დო „გეგშაკურცხით!“, და დო ჯიმალეფს ობეშტალ მანქანაშ საშვალებათ მეტალიშ ჭიჭე შაბლონეფშა გინმუღდეს. მუსხირენ თუთაშ უკულ გინოჯღონუაშ განყოფილებაშა გეგნომიჸონეს. განყოფილებაშ ზედამხედველქ, კლაუს ჯენსენქ პკითხუ, ქეშემლებუდ დო ვარ, ქიგლვაჸუნკო დიდ მანქანაშ მძღოლს პორტეფშა, სოვრეშეთ მსოფლიოშ შხვადოშხვა ადგილშა იჯღონუდ ლიტერატურა. თეს გეძინელ, ჟურნალეფ ფოსტეფშა ხოლო რდუ ოღალარ, სოვრეშეთ შეერთებულ შტატეფიშ არძა  კრებეფშა იჯღონუდ. ჯიმა ჯენსენქ მიწუ, ნამდა ფიზიკურ სამუშა ჩქიმო ჯგირ იჸუაფუდ. თიმ დროს გვალო ძვალ დო ტყებ ვორდ, 57 კილოშ მეტ ვა ვორდ. პორტეფშა დო ფოსტეფშა გილულაქ ფიზიკურო გუმამანგარ. დასურო, ჯიმა ჯენსენს უჩქუდ, მუ იჸუაფუდ ჩქიმო ჯგირ!

ჟურნალეფიშ განყოფილება ხოლო ბრელს ხანდენდ, ნამდა კრებეფს მუშ დროს ქაშუკო ლიტერატურაქ. თეგვარო ქიგებგი თი ნინეფიშ გურშენ, ნამდგაშა ბრუკლინს ჟურნალეფ იბეშტუდ დო იჯღონუდ მსოფლიოშ შხვადოშხვა კუნთხუშა. ბრელ ნინაშ გურშენ დღას ვა მაფუდ გუნაგებ დო მოხიოლუდ, ნამდა ანთასობით ჟურნალ იჯღონუდ არძაშ უმოს შორ ადგილეფშა. თიმ დროს წარმოდგენა ვამღუდ, ნამდა წანეფიშ უკულ მაღვენუდ თიშ პატი, მიდამრთუმუდკო თე ადგილეფშა.

1961 წანას ფინანსურ განყოფილებას დაბნიშნეს, ნამუსით ჯიმა გრანტ სუიტერი ხემძღვანელენდ. მუსხირენ წანაშ უკულ, ნეითან ნორქ, ნამუთ თიმ დროს იეჰოვაშ მოწმეეფიშ საქმეს ხემძღვანელენდუნ, მუშ ოფისშა ქუდომძახ. თიქ მიწუ, ნამდა ართ ჯიმა, ნამუთ მუშ განყოფილებას მუშენსინ, ართ თუთათ ოგურაფშა მიშ სამეფო მსახურებაშ სკოლაშა დო თიშ თებაშ უკულ სამსახურებრივ განყოფილებას იმსახურებუდ. მა თიშ ადგილშა გეგნომიჸონეს დო დონ ადამსწკუმა ართო მუფშენდი. თურმე დონი ჸოფე თი ჯიმა, ნამუსით 1955 წანაშ კონგრესის ჩქიმ შენავსებ ბეთელიშ ანკეტა გინოფჩი. თე განყოფილებას რობერტ ვოლენ დო ჩარლზი მალეჰანი ხოლო მსახურენდეს. ჩქი ოთხოლო 50 წანაშე მეტ ხანს მსახურენდით ართო თე განყოფილებას. დასურო, მანგარ ბედნერობა რე თეცალ ართგურ ჯიმალეფწკუმა ართო მსახურება (ფსალმ. 133:1).

1970 წანაშე მოჸუნაფილ ირ წანას ვარდა ჟირ წანაშე ართშა მუსხირენ მარათ იბძირუანდ საზოგადოება „გინაჯინალ კოშკიშ“  ფილიალეფს, ნამუსით თიმ დროს ზონალურ მეკითხირს უძახდეს. თეშა მიშეშ მთელ მსოფლიოშ ბეთელიშ ოჯახიშ წევრეფიშ დო მისიონერეფიშ ძირაფა, სულიერო გურიშ ელაკინა დო ფილიალეფიშ საქმიანობაშ შემოწმება. ჩქიმო დიდ ხიოლ მოუღუდ თი და დო ჯიმალეფიშ ძირაფას, მიდგაქ სკოლა „გალაადი“ მიკორთეს დო ართგურო აგრძელენდეს მსახურებას შხვა ტერიტორიას. ჩქიმო დიდ პატი რდუ თე საქმეშ დინახალე 90-შე მეტ ქიანას და დო ჯიმალეფიშ ძირაფა დო თინეფიშ გურშა ელაკინა.

ბეთელიშ ოჯახიშ წევრეფ ქალაქ ნიუ-იორკიშ შხვადოშხვა კრებეფს რდეს დანიშნულ. მა ბრონქსიშ კრებას დაბნიშნეს. თე მხარეს თენა პირველ კრება რდუ, სოდეთ ხალხიშ რიცხვიქ მიძინ დო გირთ. მა გილეფშ თი კრებაშა, ნამუსით ჟიმოლენ ბრონქსი ჯოხოდ.

1960-იან წანეფიშ ოშქაშეთ ართ ლატვიელ ოჯახიქ, ნამუთიქ ჭეშმარიტება სამხრეთ ბრონქსის გეგუნ, ოცხოვრებშა ჩქინ კრებაშ ტერიტორიაშა გეგნორთ. თინეფიშ უნჩაშ ცირასქუა, ლივიაქ სკოლაშ თებაშ უკულ პიონერო ქიდიჭყ მსახურება. მუსხირენ თუთაშა თიქ მასაჩუსეტსიშ შტატშა გეგნორთ, სოდეთ მაქადაქებელეფიშ საჭიროება რდუ. მა თის ჩქინ კრებაშ ახალ ამბეფიშ გურშენ მებჭარუნდ დო თინა ხოლო ბოსტონიშ ტერიტორიას მსახურებაშ ამბეფს ბჭარუნდ.

მუსხირენ წანაშ უკულ ლივია სპეციალურ პიონერო დანიშნეს. თის მუთ შილებენ მეტიშ კეთება ოკოდ იეჰოვაშ მსახურებას, ათეშგურშენ ბეთელიშ ბლანკი შეავს დო 1971 წანას ქოთ ქუდუძახეს. თეშ იძირედ, ითამ იეჰოვაშ ხე რდუკო თაქ. 1973 წანაშ 27 ოქტომბერს ჩქი დებქორწინით დო მიღდეს თიშ პატი, ქორწინებაშ მოხსენება ჯიმა ნორქ წეკითხკო. იგავებიშ 18:22-ს ჭარ: „დოგორუო მითინქ ჯგირ ოსურ? ჭყოლოფა დუგორ. იეჰოვაშ ჭყოლოფა აში თის“. მა დო ლივია იეჰოვაშ ჭყოლოფათ 40 წანაშე მეტ რე ბეთელს ვმსახურენთინ. თეს გეძინელ, ჩქი ვმსახურენთ დო ვოხვარუთ კრებას ბრონქსიშ ტერიტორიას.

ჯიმა ნორწკუმა მსახურება მართალო დიდ ბედნერობა რდუ. თის დუდ აფუდ გინოდვალირ სამეფო საქმეშ გურშენ დო მანგარო აფასენდ მისიონერეფს მთელ მსოფლიოს. მისიონერეფიშ უმენტაშ პირველ მოწმეეფ რდეს თი ქიანას სოდეთ დანიშნულ რდეს. გურსაჭუო რდუ, ნამდა 1976 წანას ჯიმა ნორს კიბოქ გამკურჩქინდ დო თეშ გურშენ მანგარო წვალენდ. არჩა, თიქ ქუდომძახ დო ქოფთხუ, წამკითხირუდკო მასალა, ნამუთ ობეშტალო რდუ გახაზირებულ. თიქ ქოფთხუ ჯიმა ფრედერიკ ფრენცშა ქუდომძახებუდკო, ნამდა თის ხოლო ქუმურჩქილუაფუდკო, ჩქიმ კითხირშა. უმოს გვიანო ქიგებგი, ნამდა ჯიმა ფრენცის თოლს ორკუდ, ათეშგურშენ ჯიმა ნორ დიდ დროს გიმურთუნდ, წუკითხირუდკო თიშა თე მასალა.

ჯიმა ნორქ 1977 წანას დოღურ, მარა არძას, მიდგა თის იჩინენდუნ, გურშა ელუკინანდ თიშ რჩქინა, ნამდა თინა ბოლოშა ართგურო  ომსახურუდ ღორონც დედამიწას (გამოცხ. 2:10). თეშ უკულ ჯიმა ფრენცი ხემძღვანელენდ იეჰოვაშ მოწმეეფიშ საქმიანობას.

თიმ დროს ჯიმა მილტონ ჰენშელიშ მდივან ვორდი, ნამუთ წანეფიშ დინახალე ჯიმა ნორწკუმა ართო მსახურენდ. ჯიმა ჰენშელქ მიწუ, ნამდა ჩქიმ მთავარ მოვალეობა ბეთელს თინა იჸიდ, ჯიმა ფრენცის ირნერ საქმეს ქიმვეხვარკო. მა თიშა ოკითხე მაფუდ მასალა, ნამუთ ობეშტალო რდუ მოხაზირებულ. ჯიმა ფრენცის თიცალ ჯგირ მახსოვრობა უღუდ, ნამდა შეულებუდ მთლიან ყურადღება ნაკითხირშა გეგნიღკო. ჩქიმო დასურო დიდ ბედნერობა რდუ, მივეხვარკო ჯიმა ფრენცის. თიქ 1922 წანაშ დეკემბერს დასრულ დედამიწას ცხოვრება!

შურო ვამგინაფ მუჭო მიკირულ 61 წანაქ ბეთელს. ჩქიმ მშობლეფ ბოლოშა ართგურო ომსახურდეს იეჰოვას. ველუქ დროს, მუჟამსით კინ ქეშეფხვადუქ თინეფს ბრელით უჯგუშ მსოფლიოს (იოან. 5:28, 29). თე ქიანას ვემიაჩე მუთუნ, მუთ გეგნოწონუნდ თი დიდ პატის, მუნერით რე ართგურ და დო ჯიმალეფწკუმა მსახურება ღორონთიშ ხალხიშ საჯგირობუოთ. მა დო ლივიას დარწმუნებულო შემლებნა ფთქუათ, ნამდა სრულ დროთ მსახურებაშ დოჭყაფაშ დღაშე „იეჰოვაშ ხიოლ [ჩქინ] სიმანგარე რე“ (ნეემ. 8:10).

იეჰოვაშ ორგანიზაციას ვა არსებენს პიროვნება, ნამუშ საქმე შხვას ვა გაგრძელებე. შედეგო სამეფოშ გურშენ ქადაქებაშ საქმე ხოლო ირიათო იგრძელებუ. ჩქიმო დიდ ხიოლ დო პატი რე წანეფიშ დინახალე ბრელ გაბედულ დო ართგურ და დო ჯიმაწკუმა ართო მსახურება. ბრელ ცხებულ, მიდგაწკუმა ართო ვმსახურენდინ, ამდღა ცოცხალ ვა რე, მარა მარდულ ვორექ, ნამდა იეჰოვას თეცალ ართგურ კათაწკუმა ართო ვომსახურუდ.