„თე ირფელ ქოიჩქუნან-და, ბედნერეფ რეთ, მუჟამსით თაშ იქციებუთ“
„ჩქიმ ოჭკომალ თინა რე, ნამდა ჩქიმ მუმაშკუმალარიშ ნება შევასრულე დო თიშ საქმე ბოლოშა ქიმიპჸონე“ (იოან. 4:34).
ობირეშეფი: 80, 35
1. მუჭო შილებე ქვეყნიერებაშ შურქ იმოქმედას ჩქინ თანდაბლობაწკუმა?
მუშენ ვა რე ადვილ თიშ გიმორინაფა, მუდგას ღორონთიშ სიტყვაშე ბგურაფლენთ? ართ მიზეზ თინა რე, ნამდა თეშო თანდაბლობა რე საჭირო დო თე თვისებაშ გიმორჩქინას სატანაშ ქიანა მოცილნა. ჩქი ფცხოვრენთ „ბოლო დღალეფს“, სოდეთ ხალხ „დუდიშ მოჸოროფე, ფარაშ მოჸოროფე, მუშ დუდშა დარწმუნებულ, ამაყი“ დო „დუდიშ შეკება უჭირს ფერ“ რე (2 ტიმ. 3:1—3). ღორონთიშ მსახურეფს მიჩქუნა, ნამდა თეცალ საქციელ გლახა რე, მარა მინშა თეშ იძირე, ითამ თეცალ კათა უმოს წარმატებულ დო ცხოვრებათ კმაყოფილ რე (ფსალმ. 37:1; 73:3). შილებე კითხვაქ გომრჩქინდან: „დასურო უღუნო აზრ ჩქიმ ინტერესეფიშ წოხოლე შხვაშ ინეტერესეფიშ გერინაფას? ქაღვენუნო ხალხის ჩქიმ პატიცემა, მუჟამსით თანდაბლობას გეგმიფრჩქინანქ?“ (ლუკ. 9:48). ქვეყნიერებაშ შურს ჩქინწკუმა მოქმედებაშ საშვალება ქიმეფჩით-და, შილებე და დო ჯიმალეფწკუმა ურთიერთობაქ გილმელან. თეს გეძინელ, შხვეფს გუჭირდუნა თიშ ძირაფა, დასურო იეჰოვაშ მოწმეეფ ვორეთ დო ვარ. მარა ბიბლიას მოჩამილ ჯგირ მაგალითეფს ქიმვაჸუნუთ-და, ირიათო კურთხევეფ მაღვენუნა.
2. მუჭო მიმეხვარებნა ჯვეშ დროს მახორუ ღორონთიშ ართგურ მსახურეფიშ მაგალით?
2 ქუმოკონა ჯვეშ დროს მახორუ ართგურ მსახურეფიშ მაგალითის მივაჸუნათ-და, ოკო ქიგებგათ, მუ საქმეეფიშ კეთებაქ მოუღ თინეფს კურთხევეფი. მუჭო მიოჭირინეს ღორონთწკუმა ჯგირ ურთიერთობას დო მუჭო მიღეს თიშ მოწონა? სოვრე უღდეს თიშ ძალა, უკეთებდესკო თინა, მუთ სწორ რე? თეცალ საკითხეფიშ გაგება მნიშვნელოვან რე ჩქინ სულიერობაშო.
მუჭო შემლებნა რწმენაშ გამანგარება
3, 4. ა) მუ საშვალებეფით ბღებულენთ სულიერ საზრდოს? ბ) მუშენ შემლებნა ფთქუათ, ნამდა სულიერ საზრდოშა ღორონთიშ ნებაშ შესრულება მიშურს?
3 ჩქი სასარგებლო რჩევეფს დო მითითებეფს ბღებულენთ ბიბლიაშე, ქრისტიანულ პუბლიკაციეფშე, ვებ-გვერდშე, JW მაუწყებლობაშე, კრებაშ შეხვალამეფშე დო კონგრესეფშე. მარა იესოქ თქუ, ნამდა ინფორმაციაშ მეღებაშე უმოს მეტ მოსაჭირნა. იოანეშ 4:34-ის თინა იჩიებ: „ჩქიმ ოჭკომალ თინა რე, ნამდა ჩქიმ მუმაშკუმალარიშ ნება შევასრულე დო თიშ საქმე ბოლოშა ქიმიპჸონე“.
4 იესოშ მოშინაფილ ოჭკუმალშა ღორონთიშ ნებაშ შესრულება ხოლო მიშეშ. მუ გაგებათ რე ღორონთიშ ნებაშ შესრულება სულიერ საზრდო? მაგალთო, ჯანსაღ ოჭკუმალ ჯგირო მოქმედენს დო ამანგარენს ჩქინ ორგანიზმის. თეგვარო, ღორონთიშ ნებაშ შესრულება ხოლო ოჭკუმალცალო რე, ნამუთ ამანგარენს ჩქინ რწმენას. მაგალთო, დღას ქოიღუდესო თიცალ სიტუაცია, მუჟამსით სამქადაქებლო შეხვალამაშა ვა გოხიოლდეს ულა, მარა იშენით მიდართით დო დორთელს დუდ ჯგირო იგინით?
5. მუ კურთხევეფ მოჸუნს სიბრძნეშ გიმორჩქინას?
5 სიბრძნეშ გიმორჩქინაშა მეღებულ ინფორმაციაშ პრაქტიკულო გიმორნაფა მიშურს, მუდგას დიდ კურთხევეფ მაჸუნუ (ფსალმ. 107:43). ბიბლიას პკითხულენთ: „თიშა მუთუნ ვეშიდარებე, მუსით სიამოვნება მოუღ . . . სიცოცხლეშ ჯა რე თინეფშო, მით ხეს მეთხუნს თის დო ბედნერ იჸუაფ თინა, მისით მანგარო მეუთხ თიშა ხე“ (იგავ. 3:13—18). იესოქ თქუ: „თე ირფელ ქოიჩქუნან-და, ბედნერეფ რეთ, მუჟამსით თაშ იქციებუთ“ (იოან. 13:17). იესოშ მოწაფეეფ ბედნერეფ იჸუაფდეს, მუჟამსით ირიათო თეშ მიქციებდეს, მუჭოთ თიქ უწუ. თინეფშო იესოშ გურაფეფიშ დო მაგალითიშ მეჸუნაქ ცხოვრებაშ წესო გინირთჷ.
6. მუშენ ოკო გუვაგრძელათ ნაგურეფუშ პრაქტიკულო გიმორნაფა?
6 ჩქი ოკო გუვაგრძელათ თიშ გიმორნაფა, მუდგას ბგურაფლენთ. ქიმიპჸონათ მაგალითი: მოხელე უღჷ სამუშა იარაღეფ, მასალეფ დო რჩქინა. მარა თე ირფელ ვეგმირინუ-და, სარგებელს ვემიღენს. შილებე წანეფ რე თე საქმეს ორთჷ დო გამოცდილება ხოლო აფდას მეღებულ. მარა თიქ ოკო გაგრძელას ნაგურეფუშ გიმორნაფა დო გეუჯგუშას მუშ საქმეს. შილებე კონკრეტულ სიტუაციას ბიბლიაშე ნაგურეფუშ პრაქტიკულო გიმორნაფაქ ჩქი ხოლო ბედნერობა მომღან. მარა მარადიულ ბედნერობაშო, საჭირო რე, ირ დღას ოკო გიმიბრინუათ თინა, მუდგას იეჰოვა მოგურუანა.
7. მუშ გურაფა შემლებნა ბიბლიას მოჩამილ მაგალითეფშე?
7 მორთ, გუვარჩუათ ოთხ შხვადოშხვა სიტუაცია, სოდეთ შილებე ჩქინ თანდაბლობაქ გეგმიცადას. თეს გეძინელ, ქობძირუნთ, მუჭო იქციებდეს თეცალ დროს ღორონთიშ ართგურ მსახურეფ. ქუმოკონა სულიერო მანგარო ქუვორდათ-და, ინფორმაციაშ მეღებაშე მეტ რე საჭირო. ათეშენ, დეფიქრით, მუჭო შეილებნა თე საკითხეფიშ გიმორნაფა დო უკულ მოქმედება.
შხვეფ თქვან თანასწორო მირჩქინით
8, 9. მუს ბგებულენთ საქმეეფიშ 14:8—15-შე პავლეშ გიმორჩქინელ თანდაბლობაშ გურშენ? (ქოძირით სურათ მა-3 გვერდის).
8 ღორონთიშ ნება რე, „არძანერ კოჩიქ გეგნოსქიდას დო ჭეშმარიტებაშ ზუსტ რჩქინა მიღას“ (1 ტიმ. 2:4). მუჭო უჯინეთ თი ხალხის, მიდგას დიო ხოლო ვა გუგებ ჭეშმარიტება? მოციქულ პავლე სინაგოგეფს თი იუდეველეფს გორუნდჷ, მით უკვე იჩინენდჷ ღორონც, მარა თინეფწკუმა ხოლო ქადაქენდჷ, მით შხვა ღორონთეფს ომსახურუდ. პავლეს თანდაბლობა ოსაჭირუდ, ნამდა ქუქადაქუკო თე ხალხის. მუშენ იფჩიებუთ თეს?
9 პირველ მისიონერულ მოგზაურობაშ დროს, ლიკაონიელეფქ პავლე დო ბარნაბა მუნეფიშ ღორონთეფო — ზევსო დო ჰერმესო მირჩქინეს. ქიმეწონესო პავლე დო ბარნაბას ლიკაონიელეფიშ თეცალ საქციელქ? ხომ ვესიამოვნეს თექ, განსაკუთრებულო თიშ უკულ, მუთ შხვა ჟირ ქალაქის წინააღმდეგობას შეხვადეს? ხომ ვა უფიქრებნა, ნამდა თეცალ პოპულარობათ სახიოლო ამბეშ გავრცელებას შეუნწყუნდეს ხეს? მუშო ოკო რაგად, ვარ! თინეფქ ხეთეშე ბარგი ქიგისოფეს დო ხალხის ხონარმაღალო ურაგადდეს: „მუშენ ორთუთ თეს? ჩქი ხოლო თქვანცალ უბრალო ხალხ ვორეთ“ (საქ. 14:8—15).
10. მუ გაგებათ რდეს პავლე დო ბარნაბა ლიკაონიელეფცალ უბრალო ხალხი?
10 მუჟამსით პავლე დო ბარნაბაქ თქუეს, ნამდა თინეფ ხოლო უბრალო კათა რდესინ, მუნეფიშ არასრულყოფილებას გულისხმენდეს დო ვართ ხოლო თის, ნამდა ლიკაონიელეფცალო ტყურა ღორონთეფს ომსახურდეს. პავლე დო ბარნაბა მისიონერეფ რდეს დო განსაკუთრებულ დავალებას ასრულენდეს (საქ. 13:2). თინეფ წმინდა შურით რდეს ცხებულეფ დო დიდებულ მომავალიშ იმენდ უღდეს. პავლე დო ბარნაბას ჯგირო არჩქილედეს, ნამდა ლიკაონიელეფს ხოლო შეულებდეს თე კურთხევეფიშ მეღება, სახიოლო ამბეს ქიმირჩქილუანდეს-და.
11. მუჭო შემლებნა მივაჸუნათ პავლეშ თანდაბლობაშ მაგალითის ქადაქებაშ დროს?
11 მუჭო შემლებნა მივაჸუნათ პავლეშ თანდაბლობაშ მაგალითის? პირველ, ჩქი ოკო ვადვაჸუნათ თიშ ცდუნებას, ნამდა გუმაამაყან თი საქმეეფქ, მუდგას იეჰოვაშ ძალათ ვორთუთ. მაჟია, თითოულქ ოკო პკითხათ ჩქინ დუც: მუჭო ვუჯინექ თი ხალხის, მიდგას ვუქადაქუქ? ხომ ვეგმიფრჩქინანქ გიშაკერძაფას, ნამთინე ეროვნებაშ კათაწკუმა? მთელ მსოფლიოს იეჰოვაშ მოწმეეფ ოცადნა თიცალ ხალხიშ გორუას, მით მზათ რე სახიოლო ამბე მირჩქილუას. ნამთინე მაქადაქებელ გურაფლენს თიშნერ ხალხიშ ნინას დო ტრადიციეფს, მით შხვეფს მუთუნო ვემიორჩქუნა. მარა ღორონთიშ ხალხის მუნეფიშ დუდ შხვეფშე უჯგუშო ვემიორჩქ დო ქადაქებაშ დროს მითინს ვეგშაგორნა. თინეფ ოცადნა გეგმირჩქინან ყურადღება დო ქიმეხვარან ირნერ კათას სახიოლო ამბეშ გაგებას.
ლოცვაშ დროს სახელით ქიმიშინეთ შხვეფ
12. მუჭო ოძირუ ეპაფრაქ, ნამდა ზრუნენდჷ შხვეფშო?
12 თანდაბლობაშ გიმორჩქინაშ ხოლო ართ საშვალება ჩქინ თანამორწმუნეეფშო ლოცვა რე (2 პეტ. 1:1). თაშ იქციებუდ ეპაფრა, ნამუთ ბიბლიას ხვალე სუმშა რე მოშინაფილ დო სუმხოლოშა მოციქულ პავლეშ წერილეფს. მუჟამსით პავლე რომს დაპატიმრებულ რდუნ, კოლოსელ ქრისტიანეფს მეჭარ, ნამდა ეპაფრა თინეფიშ გურშენ ირიათო ლოცულენდჷ (კოლ. 4:12). თინა ჯგირო იჩინენდჷ ჯიმალეფს დო ზრუნენდჷ თინეფშო. მართალ რე, ეპაფრა პავლეწკუმა ართო რდუ დაპატიმრებულ, მარა თე სიტუაცია ვაცილებ, შხვეფიშ სულიერ საჭიროებეფშე ქიზრუნკო (ფლმ. 23). თინა ლოცვაშ დროს სახელეფით მიშინუანდჷ ჯიმალეფს, მუთ ჯგირ მაგალით რე ჩქინო. თეგვარ ლოცვეფს დასურო დიდ ძალა უღჷ (2 კორ. 1:11; იაკ. 5:16).
13. მუჭო შეილებნა მიაჸუნათ ეპაფრაშ მაგალითის ლოცვაშ დროს?
13 ქიფიქრით თინეფშე, მიდგაშ გურშენ შეილებნა ლოცვა. ეპაფრაცალო, ბრელ და დო ჯიმა ლოცულენს მუნეფიშ კრებაშ წევრეფშე დო თი ოჯახეფშე, მიდგას რთულ პასუხიშმგებლობა უღჷ ვარდა სერიოზულ განსაცდელიშ წოხოლე გერე. ბრელ ლოცულენს თი და დო ჯიმალეფშე, მიდგაშ სახელეფ ვებ-გვერდის რე მოშინაფილ (ქოძირით განყოფილება, ახალი ამბები > იურიდიული საქმეები > ქვეყნები, სადაც იეჰოვას მოწმეები რწმენის გამო არიან დაპატიმრებული). თეს გეძინელ, ჯგირ იჸუაფ ირიათო ქოფშუდან თინეფ, მიდგას საჸოროფო კათა აფჷ ღურელ, მიდგაქ სტიქიურ უბედრობეფ ვარდა ჩხუპ გინიღ დო თინეფ ხოლო მისით, ფინანსურო უჭირს. მუშო ოკო რაგად, ბრელ და დო ჯიმას ოსაჭირ ქიბლოცათ თინეფშო. მუჟამსით თეცალ კათაშე ბლოცულენთინ, ვოძირანთ, ნამდა ხვალე ჩქინ დუდშე ვარინ, შხვეფიშ საჭიროებეფშე ხოლო ბზრუნენთ (ფილ. 2:4). იეჰოვა პასუხენს თეცალ ლოცვეფს.
„მზათ ქორდათ მარჩქილაფარო“
14. მორჩქილაფაშ მუნერ მაგალითის მარზენა იეჰოვა?
14 თანდაბლობაშ გიმორჩქინაშ ხოლო ართ საშვალება შხვეფიშ მორჩქილაფა რე. იაკობიშ 1:19 იჩიებ: „მზათ ქორდათ მარჩქილაფარო“. იეჰოვა თეშ ჯგირ მაგალითის მარზენა (დაბ. 18:32; იეს. 10:14). გუვარჩუათ, მუშ გურაფა შემლებნა გამოსვლაშ 32:11—14-ის (წეკითხით) * მოშინფილ შემთხვევაშე. მართალ რე, იეჰოვას თეშით ხოლო უჩქუდ მოსეშ სიტუაცია, მარა საშვალება ქიმეჩ, მუშ გრძნობეფ გეგმოხანტკო. ქუმურჩქილუანდითო თიცალ პიროვნებას, მით ჩირთუ დო გეთვალისწინენდითო თიშ რჩევას? იეჰოვა მოთვინებათ ურჩქილე არძა პიროვნებას, მით რწმენათ ლოცულენს.
15. მუჭო შემლებნა მივაჸუნათ იეჰოვაშ მაგალითის დო გეგმიფრჩქინათ შხვეფიშ პატიცემა?
15 იეჰოვაქ თანდაბლობა გეგმირჩქინ დო ქუმურჩქილუ თიშნერ ხალხის, მუნერით რდეს აბრაამი, რახელი, მოსე, იესო ნავეშ სქუა, მანოახი, ელია დო ხიზკია. თეგვარო ჯგირ იჸუაფ, ჩქი ხოლო მივაჸუნათ ღორონთიშ მაგალითის, თით ნამდა, თანაქრისტიანეფწკუმა მეტ პატიცემა გეგმიფრჩქინათ, ქუმურჩქილუათ თინეფიშ აზრის დო გეფთვალისწინათ ნარაგად. ჯგირ იჸუაფ ჩქინ დუც ქოპკითხათ: „ხომ ვასაჭირ ჩქიმ კრებაშ ვარდა ოჯახიშ წევრის უმოს მეტ ყურადღება? მუჭო შემლებ თე საკითხის გაუჯგუშება?“ (დაბ. 30:6; მსაჯ. 13:9; 1 მეფ. 17:22; 2 მატ. 30:20).
„ეგება იეჰოვაქ მუშ თოლით ქოძირას ჩქიმ უბედრობა“
დავითიქ თქუ: „დუდ დანებით!“. თქვა მუჭო მიქციებუდით? (ქოძირით აბზაცეფი 16, 17)
16. მუჭო მიქცუ მეფე დავითიქ, მუჟამსით შიმეიქ გლახათ მექცუ?
16 თანდაბლობა მოხვარნა დუდშეკება გეგმიფრჩქინათ, მუჟამსით უსამართლოთ მოქცუნა (ეფეს. 4:2). თეშ ჯგირ მაგალით ინოჭარ 2 სამუელიშ 16:5—13-ს (წეკითხით). * მეფე დავითიქ დო თიშ მსახურეფქ დუდშეკება გიმირჩქინეს, მუჟამსით საულიშ ნათესე შიმეი თინეფს ლანძღუნდჷ დო ქუალეფს ოჸოთანდჷ. დავითის შეულებუდ თიშა პასუხიშ მეჩამა, მარა თიქ მოთვინება გეგმირჩქინ. სოვრეშე უღუდ დავითის თიშ ძალა, გაკონტროლკო მუშ დუდ? თეს ჯგირო ეთმონწყუნს მა-3 ფსალმუნი.
17. მუქ მეხვარ დავითის დუდ შეკებაშ გიმორჩქინას დო მუჭო შემლებნა მივაჸუნათ თიშ მაგალითის?
17 ფსალმუნიშ მა-3 დუდიშ ეპიგრაფშე იძირე, ნამდა მუჟამსით დავითიქ თე ფსალმუნ ჭარუნ, თინა მუშ სქუა აბესალომს ატყობუდ, ნამუთ თიშ ჸვილუას ოცადუდ. 1 დო მა-2 მუხლეფ ემთხვიებ თი მოვლენეფს, ნამუთ ეჭარილ რე მაჟია სამუელიშ მა-16 დუც. ფსალმუნიშ 3:4-ე იძირე დავითიშ ნდობა დო რწმენა: „ხონარმაღალო ქუდუძახუქ იეჰოვას დო მუშ წმინდა გვალაშე ქომპასუხენს“. ჩქი ხოლო შემლებნა იბლოცათ, მუჟამსით უსამართლოთ მოქცუნა. იეჰოვა ქომჩანა მუშ წმინდა შურს, ნამუთ მიმეხვარებნა ბოლოშა გავურზათ პრობლემეფს. ქეშეილებნანო უმოს დუდშეკება გეგმირჩქინათ დო ქაპატუათ შხვეფს, მუჟამსით გლახათ გოქცუნა? ქორჯერანო, ნამდა იეჰოვა ორწყე თქვან ტანჯებას დო აუცილებერო ქიმგეხვარებნა?
„სიბრძნე არძაშ უმოს მთავარ რე“
18. მუ კურთხევეფს მომღანა ღორონთიშ ხემძღვანელობა?
18 გონივრულო იფქციებუთ დო იეჰოვა ხოლო მაკურთხენა, მუჟამსით ვორთუთ თის, მუთ მიჩქნა, ნამდა სწორ რე. ვა რე გასაკვირ, მუშენ იჩიებ იგავეფიშ 4:7, ნამდა „სიბრძნე არძაშ უმოს მთავარ რე“. სიბრძნე რჩქინაშ მეღებაწკუმა რე დაკავშირებულ, მარა თეშა ხვალე ფაქტეფიშ რჩქინა ვარინ, გადაწყვეტილებეფიშ მეღება ხოლო მიშურს. სიბრძნე ბუტუტიეფს ხოლო უღნა. მაგალთო, თინეფ ინსტიქტურ სიბრძნეს გიმირჩქინანა, მუჟამსით ზარხულს იხაზირენა ოჭკუმალს (იგავ. 30:24, 25). ქრისტე, ნამუთ „ღორონთიშ სიბრძნე რე“, ირიათო მუშ მუმაშ მოსაწონ საქმეეფს ორთუდ (1 კორ. 1:24; იოან. 8:29). ღორონთ აკურთხენს თინეფს, მით თანდაბლობას გიმირჩქინანს დო სწორას იქციებ (წეკითხით მათე 7:21—23). * ირნერო ქეცადით, ხე ქეშუნწყუათ სულიერ გარემოს კრებას, სოდეთ არძა თანდაბლურო ომსახურ იეჰოვას. სწორაშო ქიმიფქცუათინ, დრო დო მოთვინება მოსაჭირნა, მარა თეთ თანდაბლობას გიმიფრჩქინანთ, მუთ ბედნერობას მომღანა, მუჭოთ ამდღა თეშ მომავალს ხოლო.
^ აბზ. 14 გამ. 32:11—14: 11 მოსექ ხვეწება ქუდუჭყ იეჰოვას, მუშ ღორონც, გურიშ მაგებელო: «იეჰოვა, მუშენ ოკო გერისხე სქან ხალხიშ წინააღმდეგ, ნამუთ ეგვიპტეშ დიხაშე დიდ ძალათ დო ძალიერ ხეთ გიშეჸონ? 12 მუშენ ოკო თქუან ეგვიპტელეფქ, უბადო განზრახვათ მიდეჸონუა თინეფ, ნამდა დუჸვილუდკო გვალეფ შქას დო მუსპუდკო დიხაშ პიჯშე? ოჭიშ ქურთინე სქან რისხუას დო ქეშიცოდილე სქან ხალხ; ვეგიოტახა უბედრობა, 13 ქიგიშინ აბრაამი, ისააკი დო ისრაელი, სქან მსახურეფ, ნამუსით სქან დუდ დუფუჩე: „ცაშ მურიცხეფცალო გუვამრავლენქ სქან გამნარყის დო მთელ თე დიხას, ნამუსით გოძირანთ, ქიმეფჩანქ თქვან გამნარყის, ნამდა მარადიულო დემკვირდას თექ“». 14 ქეშიცოდილუ იეჰოვაქ მუშ ხალხ დო ვეგიოტახ უბედრობა, მუჭოთ ნარაგად აფუდ.
^ აბზ. 16 2 სამ. 16:5—13: 5 ქიმიოდირთ მეფე დავითიქ ბახურიმს დო მუს ორწყე! გეგმორთჷ თევრეშე შიმეიქ, გერაშ ქომოლსქუაქ, საულიშ საგვარეულო ჸუდეშე, მიშჷ დო იჭყენდჷ. 6 ქუალეფს ოჸოთანდჷ მეფე დავითის დო თიშ მსახურეფს; დავითის მელე-მოლე ხალხწკუმა ართო ძალიერ ქომოლკათა ელაჸუნდჷ. 7 თაშ იჭყენდჷ შიმეი: „ჩეთხი, ჩეთხი თაქიანობას, სი ზისხირიშ დუმაბუნალ დო მუთუნშა ვა ღირუქინ ფერ! 8 იეჰოვაქ მანგიორ გეგნოიგ თიშ გურშენ, ნამდა საულიშ ჸუდეშარეფ გეშაჭყვად დო თიშ მანგიორო გემეფ; ასე სქან ქომოლსქუას, აბესალომს არზენს იეჰოვა მეფობას! ქიგგოტირხ უბედრობაქ დობუნილ ზისხირიშ გურშენ!“. 9 აბიშაიქ, ცერუიაშ ქომოლსქუაქ, უწუ მეფეს: „მუშენ ოჭყაფუანს მეფე-ბატონ დუც თე ღურელ ჯოღორს? ქიმმაშქვჷ დო დუც გეგნომწყუნქ“. 10 მარა მეფექ უწუ: „თქვა მუ გოსაქმუნა, ცერუიაშ ქომოლსქუალეფ? დიჭყუას, მუშენდა იეჰოვაქ უწუ, დოჭყევა დავითი, დო მი უწინს, თაშ მუშენ მიქცია?“. 11 დავითიქ უწუ აბიშაის დო მუშ მსახურეფს: „ჩქიმ კვირდჷ სქუა, ჩქიმდე გიშულირ, ოჸვილარო გილაგორუნს ჩქიმ შურს დო ბენიამინელიშ მუ გიკვენა! დუდ დანებით, იჭყუას, მუშენდა იეჰოვაქ უწუ! 12 ეგება იეჰოვაქ მუშ თოლით ქოძირას დო ამდღანერ ჭყალაშ მანგიორო იეჰოვაქ ირნერ ჯგირობუა მიკეთას. 13 დავითიქ დო მუშ ხალხიქ შარა გაგრძელეს, შიმეი თინეფიშ მანგო მიშჷ გვალაშ ფერდის დო იჭყენდჷ, ქუალეფს ოჸოთანდჷ თინეფს დო ტვერს გარღვანდჷ.
^ აბზ. 18 მათ. 7:21—23: 21 არძას, მით მირაგად: „უფალ, უფალ“, ვემნართე ზეციერ სამეფოშა; სამეფოშა ხვალე თინა მინურს, მით ასრულენს ჩქიმ ზეციერ მუმაშ ნებას. 22 ბრელ მიწის თიმ დღას, უფალ, უფალ, სქან სახელით ვა ბწინასწარმეტყველენდითო, სქან სახელით ვა ფთხოზუდითო დემონეფს დო სქან სახელით ვა ვორთუდითო ბრელ სასწაულს?! 23 თიმწკუმა ვუწინქ თინეფს: „დღას ვაიჩინენდით! ჩემეთხით უკანონობაშ მაკეთებელეფ!“.
