1. მუნერ დამოკიდებულება ოკო მიღდან ლოცვაშ მიმართ?

 ᲩᲥᲘ მიღნა დიდებულ პატი, ქუდურაგადუათ ცა დო დედამიწაშ გუმაჭყაფალს. უბრალოთ დეფიქრით: შემლებნა გურ გეგნუფაჩათ იეჰოვას ნებისმიერ დროს დო ნებისმიერ ნინაშა წინასწარ ენოჭარუაშ უმშო. შემლებნა იბლოცათ საავადმყოფოშე, ციხეშე დო დარწმუნებულ ვორდათ, ნამდა ჩქინ მოჸოროფე ზეციერ მუმა ქუმომრჩქილუანა. ჯგირო მარჩქილენა, მუშმადიდა პატი რე თენა.

2. მუჭო ოძირუ მეფე დავითიქ, ნამდა აფასენდჷ ლოცვაშ პატის?

² მეფე დავით მანგარო აფასენდჷ ლოცვაშ პატის. თიქ იეჰოვას უბირ: „საკმელცალო მიმზადას ჩქიმ ლოცვაქ სქან წოხოლე“ (ფსალმ. 141:1, 2). დავითიშ დროს წმინდა საკმელს, ნამდგას მღვდელეფ ჭეშმარიტ თაყვანიშცემაშო ირინუანდეს, დიდ მოწიწებათ ამზადენდეს (გამ. 30:34, 35). დავით საკმელს თიშენ მიშინუანს, ნამდა ოკოდ, მუშ ორაგადე ხოლო თეცალ მოწიწებათ გეგნოჩკო იეჰოვას. ჩქი ხოლო თენა მოკონა.

3. მუნერ დამოკიდებულება ოკო მიღდან, მუჟამსით იეჰოვას ლოცვას ვეჩიებუთ დო მუშენ?

³ ლოცვას იეჰოვას მოწიწებათ დო პატიცემათ ოკო ვეჩუათ. დეფიქრით ესაიაშ, ეზეკიელიშ, დანიელიშ დო იოანეშ სარკო ხილუეფშე. თინეფ შხვადოშხვა ხილუეფ რდჷ, მარა მუდგარენ საერთო ხოლო უღდეს. თინეფ იეჰოვას ეჭარუნდეს, მუჭოთ დიდებულ მეფეს. ესაიაქ ძირჷ „იეჰოვა, ნამუთ ემაღალებურ ტახტის გეხედ“ (ეს. 6:1—3). ეზეკიელქ ძირჷ იეჰოვა, ნამუთ მუშ ზეციერ ეტლის გეხედ. თის გოურდჷ ცისარტყელას მოგენდუნ ფერ ბრწყინვალება (ეზეკ. 1:26—28). დანიელქ ძირჷ თინა, „მით მარადიულო არსებენს“. თის ჩე მიკაქუნალ მიკაქუნდჷ დო თიშ ტახტშე  დაჩხირ გიმიშ (დან. 7:9, 10). იოანექ ძირჷ იეჰოვა, ნამუთ გეხედ ტახტის, ნამდგას სქვამ ზურმუხტიშფერ ცისარტყველაცალ მუდგარენ გოურდჷ (გამოცხ. 4:2—4). იეჰოვაშ მუთუნშა ვეშიდარებენ ფერ დიდებულებაშე ფიქრ გუმოშინანა, მუშმადიდა პატი რე, თიწკუმა ლოცვათ ჩიებაშ საშვალება მიღნან დო მუზმათ მნიშვნელოვან რე, თენა დიდ მოწიწებათ ვაკეთათ. მარა მუშ გურშენ ოკო იბლოცათ?

4. მუს ბგურაფლენთ მათეშ 6:9, 10-ის მოჩამილ ლოცვაშ ნიმუშიშ პირველ სიტყვეფშე?

⁴ წეკითხით მათეშ 6:9, 10. გვალას ქადაგებაშ დროს იესოქ მუშ მოწაფეეფს ქუდაგურუ, მუჭო ილოცესკო ღორონთიშ მოსაწონო. თიშ უკულ, მუთ იესოქ თქუ „ათეშ გურშენ, თაშ ილოცით“, პირველო ქიმიშინუ თი მნიშვნელოვან საკითხეფ, ნამუთ პირდაპირ ოხუ იეჰოვაშ განზრახვას: თიშ სახელიშ განწმენდა; სამეფოშ მოულა, ნამუთ განადგურენს ღორონთიშ არძა მოწინააღმდეგეს დო მომავალ კურთხევეფ, ნამუთ ღორონთის დედამიწაშო დო კაცობრიობაშო აფჷ განზრახულ. თე საკითხეფიშ ლოცვეფს მოშინაფათ ვოძირანთ, ნამდა ღორონთიშ ნებაშ შესრულება ჩქინო მნიშვნელოვან რე.

5. შილებენო პირად საკითხეფშე იბლოცათ?

⁵ ლოცვაშ უკულიან ნაწილს იესოქ ქუმოძირეს, ნამდა შემლებნა პირად საკითხეფშე ხოლო იბლოცათ. მაგალთო, ქოფთხუათ იეჰოვას, ქომჩან ამდღარშო დასაბაღ ოჭკუმალ, ქუმაპატუან ცოდვეფ, დოფთხილუან ცდუნებაშე დო მირსხან უბადო ადამიანეფშე (მათ. 6:11—13). თეცალ საკითხეფიშ მოშინაფათ ვოძირანთ იეჰოვას, ნამდა მარჩქილენა, თიშ მოხვარაშ უმშო მუთუნ ვა მაკეთებენან დო მოკონა, თის ვასიამოვნათ.

6. ხვალე თი საკითხეფშო ოკო იბლოცათო, ნამუთ ლოცვაშ ნიმუშის რე მოშინაფილ? გენწყით.

⁶ იესოს ვაკოდ, მუშ მიმაჸუნალეფქ ლოცვაშ ნიმუშიშ სიტყვეფ ზუსტას გემეორესკო. შხვა დროს, მუჟამსით ლოცულენდჷ იესოქ თი საკითხეფ მიშინუ, ნამუთ თიმ დროს აწუხენდჷ (მათ. 26:39, 42; იოან. 17:1—26). თეშნერო, ჩქი ხოლო შემლებნა იბლოცათ ნებისმიერ საკითხშე, ნამუთ მაწუხენა. მუჟამსით გადაწყვეტილება მაფნა მიოღებელ, შემლებნა  ღორონთის სიბრძნე დო ინონჭაფაშ უნარ ფთხუათ (ფსალმ. 119:33, 34). მუჟამსით იეჰოვაშ მსახურებას რთულ დავალებაშა მაფნა ხე მიოთხუმალ, შემლებნა ქოფთხუათ თის მოხვარა, ნამდა ქუგმოგებაფუან, მუჭო ვაკეთათ თინა (იგავ. 2:6). მშობლეფს შეულებნა ილოცან მუნეფიშ სქუალეფშო, სქუალეფს — მშობლეფშო. თეწკუმა ართო, არძას შემლებნა დო ქოთ ოკო იბლოცათ ბიბლიაშ მაგურაფალეფშო დო თინეფშო, მიდგას უქადაგუთ. მარა, მუშო ოკო რაგად, ჩქინ ლოცვეფს ხვალე ოთხუალ ოკო ვა რდას მოშინაფილ.

7. მუშენ ოკო განვადიდათ იეჰოვა ლოცვას?

⁷ ლოცვაშ დროს იეჰოვაშ განდიდებაქ ოკო ვაგმოჭყორდან. მითინ ვემსახურენს დიდებას თეშ, მუჭოთ იეჰოვა. თინა ჯგირ, მპატიებელ, მოჭყოლოფე დო შხვეფიშ გაჭირებაშ გურშა მიმაღალარ ღორონთ რე. იეჰოვა ადვილო ვერისხებ, „ართგურ ჸოროფას“ გიმირჩქინანს დო „უზომეთ ართგურ“ რე (ფსალმ. 86:5, 15). ნამდვილო ჯგირ მიზეზ მიღნა, განვადიდათ იეჰოვა თიშ გურშენ, მუნერ ღორონთ რე თინა დო მუს ორთჷ ჩქინო.

8. მუშ გურშენ შემლებნა მადლობა უწუათ იეჰოვას? (ფსალმ. 104:12—15, 24)

⁸ ლოცვას იეჰოვაშ განდიდება გინმოჭყვიდირაფუანა, მადლობა ქუწუათ თი ირფელშე, მუდგას მარზენა. მაგალთო, შემლებნა მადლობა უწუათ, ნამდა ვორწყეთ ყვავილეფიშ ართო სქვამ ფერეფს, არსებენს ანდანერ გემუან ოჭკუმალ დო მიღნა საშვალება, იფსიამოვნათ ჩქინ ძვირფას მეგობრეფწკუმა ურთიერთობათ (წეკითხით ფსალმუნიშ 104:12—15, 24). თეწკუმა ართო, ჩქინ მოჸოროფე მუმა ხოლო ბრელ მუდგარენს მარზენა, ნამდა უბრალოთ ბედნერეფ ვორდათ. მუთ უმოს მნიშვნელოვან რე, ჩქი მარდულეფ ვაფუთ იეჰოვას, ნამდა ვა მარკენა სულიერ საზრდოს დო მარზენა მომავალიშ დიდებულ იმენდის.

9. მუ მიმეხვარებნა, ნამდა ვაგმოჭყორდან ღორონთშა მადლობაშ რაგადიქ? (1 თეს. 5:17, 18)

⁹ შილებე გურ გეგშუჸუნუათ იეჰოვაშა მადლობაშ რაგადის თი ირფელშე, მუდგას თინა ჩქინო ორთჷ. თექ ვაგგოჭყორდანინ, შეილებნა გეგმოჭარათ, კონკრეტულო მუ თხით იეჰოვას დო უკულ დროშ მიკულაწკუმა ართო გეგნაჯინათ, მუჭო გიპასუხეს თიქ თქვან ლოცვეფშა.  უკულ ქილოცით დო მადლობა ქუწით იეჰოვას მოხვარაშენ (წეკითხით 1 თესალონიკელეფიშ 5:17, 18). დეფიქრით: ჩქი მოხიოლნა დო დუდის დაფასებულო ბგინაფლენთ, მუჟამსით შხვეფ ჩქინ მიმართ მარდულობას გიმოხანტნა. თაშ რე იეჰოვა ხოლო; თის გურ ხიოლით ეიაფშაფუ, მუჟამსით ლოცვაშ პასუხიშ მეღებაშ უკულ, ვა მოჭყორდუნა თიშა მადლობაშ რაგად (კოლ. 3:15). ხოლო მუ მნიშვნელოვან მიზეზ მიღნა ღორონთშა მადლობაშ ორაგადეთ?

10. მუჭოთ 1 პეტრეშ 2:21-შე იძირე, მუშენ ოკო გიმოფხანტათ იეჰოვაშ მარდულობა იესოშ გურშენ?

¹⁰ წეკითხით 1 პეტრეშ 2:21. მადლობა ქუწით იეჰოვას, მუშ საჸოროფო სქუაშენ. მადლობა ოკო ქუწუათ იეჰოვას, ნამდა ჩქინდა დაგურაფალო დედამიწაშა მუშ საჸოროფო სქუა გოუტუ. იესოშ ცხოვრებაშ გიმორკვიებათ, ბრელ მუდგარენს ბგებულენთ იეჰოვაშენ დო თიშ გურშენ, მუჭო ვასიამოვნათ თის. ქრისტეშ მსხვერპლიშ მიმართ რწმენას გუვავითარენთ-და, შემალებენა იეჰოვაწკუმა ხოლოშიან დო მშვიდობიან ურთიერთობათ გეფხარათ (რომ. 5:1).

11. მუშენ ბლოცულენთ იესოშ სახელით?

¹¹ ჩქი მარდულ ვაფუთ იეჰოვას, ნამდა თიშ სქუაშ საშვალებათ შემლებნა ლოცვათ ქუდურაგადუათ. ჩქინ ლოცვეფშა პასუხიშ მიოჩამალო იეჰოვა იესოს ირინუანს. თინა ირჩქილე დო პასუხენს იესოშ სახელით რაგადებულ ლოცვეფს. იესოქ ენწყჷ: „ჩქიმ სახელით მუდგა ვეთხუათინ, გუვაკეთენქ, ნამდა განდიდებულქ იჸუას მუაჩქიმქ სქუაშ საშვალებათ“ (იოან. 14:13, 14).

12. ხოლო მუ მიზეზ მიღნა, ნამდა მადლობა ქუწუათ იეჰოვას მუშ სქუაშენ?

¹² ჩქინ ცოდვეფიშ პატიება იესოშ მსხვერპლიშ საფუძველშა ხვადუ. წმინდა წერილეფ იესოშ გურშენ იჩიებ, ნამდა თინა რე „მღვდელმთავარ, ნამდგაქ ზეცას დიდებულ ღორონთიშ ტახტიშ მარძგვანშე ქუდოზოჯ“ (ებრ. 8:1). იესო რე ჩქინ „აკმარიგებელ მუმაწკუმა“ (1 იოან. 2:1). მანგარ მარდულ ვაფუთ იეჰოვას, ნამდა პჸუნა ჩქინ გაჭირებაშ გურშა მიმაღალარ მღვდელმთავარ, ნამდგას არჩქილე ჩქინ არასრულყოფილება დო მოხვარნა ღორონთწკუმა ჯგირ ურთიერთობაშ გავითარებას (რომ. 8:34; ებრ. 4:15). ჩქი, არასრულყოფილ ადამიანეფს, იესოშ მსხვერპლიშ უმშო დღას ვეშმალებედეს იეჰოვაწკუმა ლოცვათ დაახლოება. არძას ჯგირო მარჩქილენა, ნამდა დასაბაღო დღას ვეგნმახანტენა მარდულობა თი ძვირფას ძღვინიშ გურშენ, ნამუთ იეჰოვაქ მუჩეს; თენა რე თიშ ძვირფას სქუაშ ძღვინ!

13. მუჭო ოძირუ იესოქ ღურაშ წოხოლენ სერს, ნამდა უჸორდჷ მუშ მოწაფეეფ?

¹³ ღურაშ წოხოლენ სერს, იესო ბრელ ხანს ლოცულენდჷ მუშ მოწაფეეფშო დო მუამუშის თხინდჷ, უბადოშე დოთხილუკო თინეფ (იოან. 17:15). მუშმადიდა ჸოროფა იძირე თავრეშე! თიშ უმკუჯინუო, ნამდა თის წოხოლე რთულ განსაცდელ ელუდ, იშენით მუშ მოციქულეფშე წუხენდჷ.

14. მუჭო შემლებნა ვოძირუათ, ნამდა მიჸორა და დო ჯიმალეფ?

¹⁴ ჩქი ხოლო მეპჸუნთ იესოშ მაგალითის დო ხვალე ჩქინ პირად საჭიროებეფშე ვა ფიფქრენთინ, ირიათო ბლოცულენთ და დო ჯიმალეფშო. თეშნერო ვომორჩილუთ იესოშ მითითებას, ნამდა მიჸორდან ართიან დო იეჰოვას ვოძირანთ, მუსხით მიჸორა თანაქრისტიანეფ (იოან. 13:34). და დო ჯიმალეფშო ლოცვა დროშ დინაფა ვა რე, მუშენდა, მუჭოთ  ღორონთიშ სიტყვა იჩიებ, „მართალ კოჩიშ ხვეწებას დიდ ძალა უღჷ“ (იაკ. 5:16).

15. მუშენ ოსაჭირნა და დო ჯიმალეფს ჩქინ ლოცვეფ?

¹⁵ თანაქრისტიანეფს ოსაჭირნა ჩქინ ლოცვა, მუშენდა ბრელ სირთულეს ხვადუნა. შემლებნა ქოფთხუათ იეჰოვას, ქიმეხვარას თინეფს, ქუგურზან ლახალას, სტიქიურ უბედრობეფს, ომეფს, თხოზინს დო შხვა სირთულეეფს. თეს გეძინელ, შემლებნა იბლოცათ თი დუდგინოდვალირ და დო ჯიმალეფშო, მით ბრელს ხანდენა დაზარალებურ თანაქრისტიანეფიშ მახვარებელო. შილებე თქვა ხოლო იჩინენდათ თეცალ სირთულეეფ უღნან ფერ და დო ჯიმალეფს. ჯგირ იჸი, თინეფ თქვან პირად ლოცვეფს სახელეფით ქიმიშინუათ. ნამდვილ ჯიმალურ ჸოროფას გეგმიფრჩქინანთ, მუჟამსით იეჰოვას ფთხინთ, ქიმეხვარას თინეფს გარზებას.

16. მუშენ ოკო იბლოცათ პასუხიშმგებელ ჯიმალეფშო?

¹⁶ პასუხიშმგებელ ჯიმალეფ მანგარო აფასენა, ნამდა ბლოცულენთ თინეფშო. ჩქინ ლოცვეფს თინეფშა ჯგირობუა მოუღ. თენა ჯგირო არჩქილედ პავლე მოციქულს ხოლო, ნამდგაქ ჭარჷ: „ჩქიმო ხოლო ქილოცით, ნამდა მუჟამსით ჩიებას ქიდიბჭყანქ, საჭირო სიტყვეფ ქოფთქუე დო თამამას გუვაცხადე სახიოლო ამბეშ წმინდა საიდუმლო“ (ეფეს. 6:19). ამდღა ხოლო პჸუნა პასუხიშმგებელ ჯიმალეფ, მით ბრელს ხანდენა. ჸოროფას გიმიფრჩქინანთ, მუჟამსით იეჰოვას ფთხინთ, ნამდა აკურთხას თინეფიშ საქმე.

17, 18. მუ სიტუაციეფიშ დროს შილებე მაჸუან შხვაშ სახელით ოლოცებერქ დო მუ ოკო ფშუდან?

¹⁷ მინშა ფთხინა, შხვაშ სახელით ქიბლოცათ. მაგალთო, დაქ, ნამუთ ბიბლიაშ გურაფას ატარენს, შილებე მაჟია დას ქოთხუას ლოცვა. თე და ბიბლიაშ მაგურაფალს ჯგირო ვეჩინენს-და, შილებე ბოლოს ისხუნუას ლოცვა. თეშნერო უჯგუშო შეიალებე ლოცვას მაგურაფალიშ საჭიროებეფ მიშინუას.

¹⁸ ჯიმას შილებე კრებაშ ვარდა სამქადაგებლო შეხვალამაშ დროს ქოთხუან, ქილოცას, მუთ დიდ პატი რე. თე ჯიმას ოკო შუდას, მუ რე შეხვალამაშ მიზან. თიქ ლოცვაშ დროს ვართ რჩევა ოკო მეჩას  კრებას დო ვართ განცხადება აკეთას. შეხვალამეფიშ უმენტაშის ლოცვა დო ბირაშო გვალო ხუთ წუთ რე გიშართილ. ათეშენ ჯიმაქ ბრელ ხანს ოკო ველოცას, განსაკუთრებულო შეხვალამაშ დოჭყაფაშ დროს (მათ. 6:7).

19. მუ მიმეხვარებნა ღორონთიშ დღას მომზადებულო ქეშეფხვადათ?

¹⁹ მუთ უმოს ხოლოს ვორეთ იეჰოვაშ დღაწკუმა, თით უმოს მეტ ყურადღება ოკო მივაქცუათ ლოცვას. თეშ გურშენ იესოქ თქუ: „კურცხას რდათ დო ირიათო ეხვეწით ღორონთის, ნამდა დუდ დერსხათ თიშე, მუდგაქ ოკო მოხვადას“ (ლუკ. 21:36). რეგულარულ ლოცვა მიმეხვარებნა, სულიერო კურცხას ქუდოფსქიდათ, ნამდა იეჰოვაშ დღას მომზადებულო ქეშეფხვადათ.

20. მუჭო შემლებნა ჩქინ ლოცვეფ ჯგირ შურ უღუნ ფერ საკმელცალო რდას?

²⁰ მუ გუვარჩით? ჩქი მანგარო ვაფასენთ ლოცვაშ პატის. ლოცვაშ დროს მთავარ ყურადღება გინოღალირ ოკო მაფდან თი საკითხეფშა, ნამუთ პირდაპირ ოკავშირ იეჰოვაშ განზრახვას. თეს გეძინელ, ჩქი გიმოფხანტუნთ მარდულობას ღორონთიშ სქუაშენ, თიშ სამეფოშენ დო ბლოცულენთ ჩქინ თანაქრისტიანეფშო. მუშო ოკო რაგად, შემლებნა იბლოცათ ჩქინ ფიზიკურ დო სულიერ საჭიროებეფშო ხოლო. მუჟამსით ლოცვეფიშ დროს ფრთხილას გიშაბგორუნთ სიტყვეფს, ვოძირანთ, ნამდა ვაფასენთ თე დიდებულ პატის. ჩქინ სიტყვეფ იეჰოვაშო ჰამო შურ უღუნ ფერ საკმელცალო იჸუაფ, ნამუთ მუჰამუანს თის (იგავ. 15:8).