ახალ ამბეფს ხშირას იფრჩქილეთ, მუჭო გიმოხანტუნს ხალხ ართიანიშ გოჯოგაფას. ვორწყეთ, მუჭო ჯოგუნა ართიან ეთნიკურ მიზეზით. იფრჩქილუაფუთ ომეფიშ გურშენ ხოლო.

•   „ისრაელ დო ღაზაშ შქას კონფლიქტიშ გურშენ ამდღა სოციალურ მედიას ხალხ უმოს ხშირას გიმოხანტუნს ართიანიშ გოჯოგაფას“ („ნიუ-იორკ თაიმზ“, 15 ნოემბერ, 2023 წანა).

•   „7 ოქტომბერიშ უკულ, მსოფლიოს ხალხ ხოლო უმოსო გიმოხანტუნს ართიანიშ გოჯოგაფას დო ძალადობას, მუთ წინასწარ შექმნილ აზრიშ შედეგ რე“ (დენის ფრანსის, „გაეროშ გენერალურ ასამბლეაშ“ პრეზიდენტ, 3 ნოემბერ, 2023 წანა).

 ართიანიშ გოჯოგაფაშ გიმოხანტუა, ძალადობა დო ომეფ ახალ ამბე ვა რე. ბიბლია მიშინუანს თინეფს, მიდგას ულირს „ყამაცალო [აფუდ] ნინეფ ლასირელ“ დო მით ხეს უნწყუნდჷ ძალადობას დო ომეფს (ფსალმუნი 64:3; 120:7; 140:1). მარა თინა თის ხოლო იჩიებ, ნამდა ამდღა ვორწყეთინ თი გოჯოგაფას უმოს დიდ მნიშვნელობა უღჷ.

 ბიბლია მიშინუანს თიშ ჟირ მიზეზის, მუდგაშ გურშენ გიმირჩქინანა ამდღა გოჯოგაფას.

1.  1) თექ ნაწინასწარმეტყველებ რე, ნამდა „ხალხიშ უმენტაშის ჸოროფა მეუდინუ“ (მათე 24:12). ჸოროფაშ მანგიორო ხალხ თიშნერ გრძნობეფს გიმოხანტუნს, მუთ ხეს უნწყუნს ართიანიშ გოჯოგაფას (2 ტიმოთე 3:1—5).

2.  2) გოჯოგაფა, ნამდგას ამდღა ვორწყეთ, სატანა დო თიშ ქვეყნიერებაშ გავლენაშ შედეგ რე. ბიბლია მირაგადუნა, ნამდა „მთელ ქვეყნიერება უბადოშ ხეს რე“ (1 იოანე 5:19; გამოცხადება 12:9, 12).

 მარა თექ თინა ხოლო ჭარჷ, ნამდა ღორონთ მალას მოსპუნს გოჯოგაფაშ მიზეზეფს. თეს გეძინელ, თი გურჭუა დო ტანჯებას ხოლო, მუდგაქ გოჯოგაფას მაჸუნ შედეგო. ბიბლია მოპირუნა:

•   „გელუწიმინდანს თინეფს ირნერ ჩილამურს თოლეფშე დო მეტო ვეჸუაფ ღურა, ვართ ნგარა, თვალუა დო ჭუა, მუშენდა მუთ ულირს რდჷ, ირფელქ მისპჷ“ (გამოცხადება 21:4).