1. მუშენ რე საჭირო მეტ ქიგებგათ ანგელოზეფშენ?

მითინიშ ხოლოშე გაჩინებაფა მოკონა-და, ვა რე გასაკვირი, თიშ ოჯახი ხოლო მოინტერესუდანი. ზუსტას თეშნერო, იეჰოვა ღორონთის დევეახლოვათინ თიშენ, მეტ ოკო გებგათ ანგელოზეფიშ გურშენ, ნამუთ თიშ ზეციერ ოჯახიშ წევრეფ რენა. ბიბლია ანგელოზეფს „ღორონთიშ სქუალეფს“ უძახ (იობი 38:7). მუ როლ უღნა თინეფს ღორონთიშ განზრახვაშ შესრულებას? მუ როლ უღდეს ანგელოზეფს კაცობრიობაშ ისტორიას? ორწყექო თინეფიშ მუთუნნერ გავლენას სქან ცხოვრებას? ქარწყექ-და, სოვრეშე იძირე თენა?

2. სოვრეშე გორჩქინდეს ანგელოზეფქ დო მუსხი ანგელოზ არსებენს?

² ბიბლიას ანგელოზეფ ოშობით ადგილს რენა მოშინაფილი. გუვარჩუათ მუსხირენ თეცალ მუხლი, ნამუთ მიმეხვარებნა უმოს ქიგებგათ ანგელოზეფიშ გურშენ. სოვრეშე გორჩქირდეს ანგელოზეფქ? კოლოსელეფიშ 1:16-ის ინოჭარ: „თიშ [იესო ქრისტეშ] მონაწილებათ გორჩქინდ შხვა ირფელქ ზეცას დო დედამიწას“. მუჭოთ თავრეშე იძირე, იეჰოვაქ არძა ანგელოზი გაჭყუ მუშ პირველგოჭყაფილ სქუაშ მონაწილებათ. მუსხი ანგელოზი არსებენს? ბიბლიაშე იძირე, ნამდა თინეფიშ რიცხვი ოშობით  მილიონ რე დო თინეფ არძა „ძალათ ძალიერ“ რენა (ფსალმუნი 103:20). *

3. მუს ბგებულენთ ანგელოზეფიშ გურშენ იობიშ 38:4—7-შე?

³ ღორონთიშ სიტყვა ბიბლია მირაგადნა, ნამდა დედამიწაშ გოჭყაფაშ დროს „ღორონთიშ სქუალეფ იჭიჭოლდეს“ (იობი 38:4—7). თაშ გიშურს, ნამდა ანგელოზეფ კოჩიშ დო დედამიწაშ გოჭყაფაშახ ბრელ ხანით ადრე არსებენდეს. ათე ბიბლიურ მუხლეფშე თინა ხოლო იძირე, ნამდა ანგელოზეფს გრძნობეფ უღუნა, მუჭოთ მა-7 მუხლის პკითხულენთ, თინეფ ხიოლით „ართო იჭიჭოლდეს“. ყურადღება ქიმიაქცი, ნამდა „ღორონთიშ სქუალეფი“ ართო ხარენდეს. თი დროს არძა ანგელოზი ართ მთლიან ზეციერ ოჯახიშ წევრი რდუ დო იეჰოვა ღორონთის ომსახურუდ.

4. მუჭო ოძირანს ბიბლია, ნამდა ართგურ ანგელოზეფ დაინტერესებულ რენა ხალხიშ ჯგირობუათ?

⁴ ანგელოზეფ პირველ კოჩიშ გოჭყაფაშ მოწმეეფ რდეს დო თი დროშე მოჸუნელი თე ართგურ სულიერ ქმნილებეფ დაინტერესებულ რენა ხალხიშ ჯგირობუათ დო ღორონთიშ განზრახვაშ შესრულებათ (იგავები 8:30, 31; 1 პეტრე 1:11, 12). მუჭო დროქ მიკორთუნ თეშ, ანგელოზეფქ თიშ მოწმეეფქ ქიჸის, ნამდა ბრელ კოჩიქ ვეკორინუ მოჸოროფე ღორონთიშ მსახურება. მუშო ოკო რაგად, თენა მანგარ საწყენ რდუ ართგურ ანგელოზეფშო. თი შემთხვევას, მუჟამს იეჰოვას კოჩ კინ ართუნ, ბიბლიას ჭარუ, ნამდა თენა ანგელოზეფს ოხიოლნა (ლუკა 15:10). ანგელოზეფს აწუხენა ხალხიშ მდგომარეობა. ათეშენ გასაკვირ ვა რე, ნამდა ღორონთის თინეფ ბრელშა გიმურინუაფ დედამიწას მუშ მსახურეფიშ გასამანგარებელო დო ოთხილარო (წეკითხი ებრაელეფიშ 1:7, 14). ქობძირათ მუსხირენ მაგალითი.

5. ანგელოზეფიშ ალარინაშ მუ მაგალითეფ რე მოჩამილ ბიბლიას?

 ⁵ ჟირ ანგელოზიქ ღორონთიშ მოშიშ ლოტი დო თიშ ცირასქუალეფი უბადობათ ეფშა ქალაქეფიშ — სოდომ დო გომორიშ განადგურებაშახ თევრეშე გეგშეჸონ დო ღურას გინასქილიდუ (დაბადება 19:15, 16). საუკუნეეფიშ უკულ წინასწარმარაგადე დანიელ ნტერეფქ ლომეფს ქინურაგვეს, მარა თიქ ცოცხალო ქუდოსკიდ. თეშ მიზეზ დანიელქ თეშნერო გენწყუ: „ჩქიმ ღორონთიქ მუშ ანგელოზ ქუმაშკუ დო ლომეფს პიჯ გეუკირუ“ (დანიელი 6:22). პირველ საუკუნეს ანგელოზიქ მოციქულ პეტრე ციხეშე დერსხუ (საქმეები 12:6—11). ანგელოზეფქ მემსახურეს იესოს დედამიწას მსახურებაშ დოჭყაფაშ დროს (მარკოზი 1:13). ღურაშა ჭე ხანით ადრე იესოშა ანგელოზიქ მორთ დო გამანგარ თინა (ლუკა 22:43). მუშმაშხვა ალარინა იჸუაფუდ იესოშო თენა, მუჟამს უჭირდუნ!

6. ა) მუჭო თხილანა ანგელოზეფ ღორონთიშ ხალხის ამდღა? ბ) მუ კითხვეფს გენიფხილენთ?

⁶ ამდღა ანგელოზეფ თაშ არგამათ ვეცხადებნა ღორონთიშ მსახურეფს დედამიწას. ღორონთიშ ძალიერ ანგელოზეფ კოჩიშ თოლშო უძირაფ რენა, მარა თინეფ თიშ ხალხის ამდღა ხოლო თხილანა, განსაკუთრებით, სულიერო ვედეზიანანინ თიშენ. ბიბლია იჩიებ: „იეჰოვაშ ანგელოზი დაბანაკებულ რე მუშ მოშიშეფიშ მუკი-მუკი დო ირსხენს თინეფს“ (ფსალმუნი 34:7). მუშენ რე თე სიტყვეფ ჩქინო გურიშ ემაკინალი? მუშენდა არსებენა უბადო სულიერ ქმნილებეფ დო თინეფს ჩქინ მოსპუალა ოკონა! მი რენა თინეფი? სოვრეშე გორჩქინდეს? მუჭო ოცადნა ჩქი დუმაზიანანინ თის? პასუხეფ მიბღათინ თიშენ, გენიფხილათ, მუქ მოხვად კაცობრიობაშ ისტორიაშ დაჭყაფუს.

7. მუსხით ბრელ კოჩ მაშორუ სატანაქ ღორონთის?

⁷ მუჭო თე წიგნიშ მა-3 დუდშე ბძირითინ, ართ ანგელოზიქ შხვეფიშ უნჩაშალა მიკორინუ დო ღორონთის დეპირისპირ. დრო-ხანიშ უკულ თე ანგელოზის სატანა ეშმაკიქ ქიგიადუ (გამოცხადება 12:9). ევაშ ჩილათაშ უკულ 16 საუკუნეშ დინახალე სატანაქ  ღორონთის დახე ირ კოჩ მაშორუ. ხვალე მუსხირენ კოჩიქ დოსკიდ ღორონთიშ ართგურო, მაგალთო აბელქ, ენოქიქ დო ნოექ (ებრაელები 11:4, 5, 7).

8. ა) მუჭო გინირთ ნამთინე ანგელოზიქ დემონო? ბ) მუჭო გინისკილიდეს დემონეფქ დუდ ნოეშ დღალეფს მოხვალამირ დიდწყარალაშ დროს?

⁸ ნოეშ დროს შხვა ანგელოზეფქ ხოლო დეპირისპირეს იეჰოვას. თინეფქ ქიდიტეს მუნეფიშ ზეციერ ოჯახი, გეგმორთეს დედამიწაშა დო ხორციელ სხეულ მიღეს. მუშენ? დაბადებაშ 6:2-ს ჭარუ: „ჭეშმარიტ ღორონთიშ სქუალეფქ ქოძირეს, ნამდა სქვამეფ რდეს კოჩიშ ოსურსქუალეფ, დო მოჸუნდეს ოსურო მიდგა მეწონებდესინ“. მარა იეჰოვა ღორონთიქ ნება ვემეჩ ანგელოზეფს თეცალ მოქმედება გაგრძელესკო დო კაცობრიობა  ზნეობრივო გეგნუჯიშებდესკონ. ათეშგურშენ ღორონთიქ დიდწყარალათ განადგურ არძა უბადო კოჩი. ხვალე თიშ ართგურ მსახურეფქ გინოსკიდეს (დაბადება 7:17, 23). ღორონთიშ კვარჩხი ანგელოზეფს შხვა შარა ვა უღუდეს, ქიდიტეს ხორციელ სხეულ დო მუჭო სულიერ ქმნილებეფინ თეშ ზეცას დართეს. თინეფ ეშმაკის არზენდეს ხუჯის. ათეშნერო გინირთ ეშმაკიქ „დემონეფიშ მართველო“ (მათე 9:34).

9. ა) მუქ მოხვადუ, მუჟამს დემონეფქ ზეცაშა დირთეს? ბ) მუს გენიფხილენთ დემონეფიშ გურშენ?

⁹ მუჟამს კვარჩხი ანგელოზეფქ ზეცაშა დირთესინ, მუჭოთ სატანა თეშ, თინეფ ხოლო ვემიღ ღორონთიქ (2 პეტრე 2:4). ამდღა თე ანგელოზეფს ვეშულებნა მიღან ხორციელ სხეულ, მარა თინეფს იშენ დიდ გავლენა უღნა ხალხწკუმა. სატანა დემონეფს გიმირინუანს თიშო, ნამდა მიოჩილითუას მთელ მსოფლიო (გამოცხადება 12:9; 1 იოანე 5:19). მუჭო? დემონეფს მუნეფიშ მეთოდეფ უღნა ხალხიშ ოჩილითაფარო (წეკითხი 2 კორინთელეფიშ 2:11). ქობძირათ მუსხირენ მეთოდი.

10. მუ რე სპირიტიზმი?

¹⁰ ხალხიშ ოჩილითაფარო დემონეფი სპირიტიზმის გიმირინუანა. სპირიტიზმი ნიშნენს დემონეფწკუმა ურთიერთობას პირდაპირ ვარდა მედიუმიშ მოხვარათ. ბიბლია ოგურუანს, ნამდა ღორონთის ჯოგუ სპირიტიზმი დო მაფრთხილენა, ვემკვუანჭათ მუთუნს, მუთ სპირიტიზმის ოხუ (გალატელები 5:19—21). სპირიტიზმი დემონეფშო თიცალ იარაღ რე, მუჭოთ მეჩხომეშო ჩხომეფიშ მიოტყურაფალი. მეჩხომე შხვადოშხვანერ ჩხომიშ ოჭაფალო შხვადოშხვა მიოტყურაფალს გიმირინუანს. თეგვარო, უბადო ანგელოზეფ ხალხიშ ოჩილითაფარო სპირიტიზმიშ შხვადოშხვა ფორმას გიმირინუანა.

11. მუ რე კითხირ დო მუშენ ოკო ვემკვუანჭათ თის?

¹¹ დემონეფიშ ართ-ართ საშვალება კოჩიშ ოღორებელო კითხირ რე. მუ რე კითხირი? კითხირიშ დროს ოცადუნა, მაკითხეწკუმა მომავალიშ ვარდა ვაუჩქუნა დო ოინტერესუნან ფერ ამბეშ  გაგებას. კითხირშა მიშურს: ასტროლოგია, კარტით კითხირ, ყავათ დო ხეშ გურით კითხირ დო სიზმარეფიშ ენწყუმა. ბრელ ფიქრენს, ნამდა კითხირს მუთუნ გლახე ვარე, მარა ბიბლია მოძირანა, ნამდა მაკითხეფს დემონეფი ოხვარნა. მაგალთო, საქმეეფიშ 16:16—18 მოშინაფილ რე დემონი, ნამუთ კითხირიშ დო მომავალიშ წინასწარ რაგადიშ ძალას არზენდ ართ ძღაბის. მარა თის მეუდინ თეშ ძალაქ, მუჟამს დემონქ გიშელ თიშე.

12. მუშენ იჸუაფ საღამაკო ღურელეფწკუმა ურთიერთობას ქეშუეცადებუთ-და?

¹² დემონეფს შხვა მეთოდი ხოლო უღნა ხალხიშ ოღორებელო, თენა რე ღურელეფწკუმა ურთიერთობა. გურნჭყოლირ წირსფალ ღორებულო დუთმოსკიდ, მუშენდა ღურელეფშენ სწორ ვარენ ფერ შეხედულებეფი უღნა. მედიუმს შეულებ თინეფს კონკრეტულ ინფორმაცია გინოჩას ვარდა ღურელიშ ხონარით დურაგადუას. ათეშგურშენ ბრელ ფიქრენს, ნამდა ღურაშ უკულ კოჩ აგრძელეს ცხოვრებას დო თიწკუმა ურთიერთობა წირსფალს მუეფუანს გაჭირებაშ გინოღალას. მუშენ? დემონეფს შეულებნა მუნეფიშ ხონარ ქიმუგურუან ღურელიშ ხონარს დო მედიუმს თიშ გურშენ ინფორმაცია გეგნოჩან (1 სამუელი 28:3—19). მა-6 დუდშე  ჩქი თინა ხოლო გებგით, ნამდა ღურელფ ვაგრძელენა ცხოვრებას (ფსალმუნი 115:17). თაშ ნამდა, „შურეფიშ გიშმაძახებელეფს“ დემონეფი აღორენა დო თინეფ ოწინააღმდეგუნა ღორონთიშ ნებას (წეკითხი კანონიშ 18:10, 11; ესაია 8:19). ათეშგურშენ ფრთხილას ოკო ვორდათ, ნამდა ვემეფჩირთათ დო დემონეფიშ ანკესის ვამკვუაბუნათ.

13. მუ შილებუ ბრელქ, მით ართ დროს დემონეფიშ გავლენაშ თუდო ცხოვრენდ?

¹³ უბადო სულიერ ქმნილებეფ ხალხის ხვალე ვაღორენან, ქოთ ოშკურინუანა. სატანა დო დემონეფს უჩქნა, ნამდა „ჭიჭე დრო აფუნა დოსკილადირ“ მუნეფიშ გემოშა ოთარეშებელო, დო ათეშგურშენ, თინეფ ამდღა უკანასკნელშა რენა გაჟღამებული (გამოცხადება 12:12, 17). ანთასობით კოჩიქ, მით ართ დროს დემონეფიშ შიშით ცხოვრენდუნ, გენთავისუფალუ თიშე. მუჭო შილებუეს თეშ კეთება? მუ ოკო ქიმინე სპირიტიზმით ქორექ დაინტერესებულ-და?

14. მუჭო შემლებნა ეფესოშ ქრისტიანეფცალო უბადო შურეფიშ გავლენაშე გემნთავისუფლათ?

¹⁴ ბიბლია მოგურუანა, მუჭო შევეწინააღმდეგათ დო დეფთხინუათ უბადო სულიერ ქმნილებეფი. მორთ ქობძირათ, მუ აკეთეს პირველ საუკუნეს ქალაქ ეფესოშ ქრისტიანეფქ. ნამთინე ქრისტიანობაშა სპირიტიზმით რდუ დაკავებული. მუ ქიმინეს თინეფქ, დუდ დანებესკო სპირიტიზმისინ თიშენ? ბიბლია იჩიებ: „ბრელქ, მიდგა ჯადოქრობას მეჸუნდუნ, ქიმიღუ მუშ წიგნეფ დო ირკოჩიშ წოხოლე არძა დოჭუ“ (საქმეები 19:19). მაგიაშ წიგნეფიშ ჭუალათ ახალმუკორთელ ქრისტიანეფქ მაგალით მეჩეს თინეფს, მიდგას ამდღა მართალო ოკო შეწინააღმდეგას უბადო შურეფს. ღორონთიშ მსახურება ოკონ თინეფქ, დეთხინუან ოკო ირფელ, მუთ სპირიტიზმწკუმა რე დაკავშირებული. თენა შილებე რდას, წიგნეფი, ჟურნალეფი, კინოეფი, პლაკატეფი დო მუსიკეფი, მუთ კოჩის სპირიტიზმიშ ინტერესის ურჩქინანს დო თიშ საქმეეფს ოკეთებაფუანს.  სპირიტიზმშა თილისმა დო შხვა მუდგარენეფ ხოლო მიშმურს, ნამუსით გიმირინუანა უბედრობაშე დუდიშ ოთხილარო (1 კორინთელები 10:21).

15. მუ ოკო ვაკეთათ, უბადო ძალეფს შევეწინააღმდეგათინ თიშენ?

¹⁵ ეფესოშ ქრისტიანეფქ მაგიაშ წიგნეფ განადგურესინ თიშ უკულ მუსხირენ წანაქ გემკორთ. პავლე მოციქულქ თინეფს თეცალ სიტყვეფ მეჭარ: „ვობრძოლუთ . . . უბადო შურეფს“ (ეფესოელები 6:12). დემონეფს თინეფშა დუდ ვა დუნებებნა. თინეფ კინ ოცადუდეს ქრისტიანეფიშ ღორებას. ათეშგურშენ, ხოლო მუშ კეთება ოსაჭირდეს ქრისტიანეფს? პავლექ თქუ: „ირფელიშ წოხლე გეჭოფით რწმენაშ დიდ ფარი, მუდგათ შილებუანთ უბადოშ [სატანაშ] დაჩხერმონტებულ ისარეფიშ შკირიტუას“ (ეფესოელები 6:16). მუთ უმოს მანგარ იჸუაფ ჩქინ რწმენაშ ფარინ, თით უმოსო შევეწინააღმდეგებუთ უბადო ძალეფს (მათე 17:20).

16. მუჭო შემლებნა გუვამანგარათ ჩქინ რწმენა?

¹⁶ მუჭო შემლებუნა რწმენაშ გამანგარება? ბიბლიაშ გურაფათ. ცოკოლ მანგარ ქორენ-და, კიდალა ხოლო მანგარ იჸი. ათეშნერო, ჩქინ რწმენა ხოლო მანგარ იჸუაფ, მუჟამს ბიბლიაშ ზუსტ რჩქინა ქუმაღვენუნა. ჩქინ რწმენა უმოსო გემანგარებ ბიბლიას ირ დღას ქოპკითხულენთ დო ქობგურაფლენთ-და. მანგარ კიდალაშნერო, თეჯგურა რწმენა დოფთხილანა უბადო ძალეფიშ გავლენაშე (1 იოანე 5:5).

17. მუ რე ხოლო საჭირო უბადო ძალეფს შევეწინააღმდეგათინ თიშენ?

¹⁷ ხოლო მუ ოკო აკეთესკო ეფესოელ ქრისტიანეფქ? ქალაქ დემონიზმით რდუ ეფშა, ათეშგურშენ თინეფქ უმოსო ოკო იჸუესკო თხილერქ უბადო ძალეფშე. პავლექ უწუ თინეფს: „ირო მთელ გურით ქუწუათ ირნერ ლოცვა დო ხვეწინ შურით“ (ეფესოელები 6:18). ჩქი ხოლო თიცალ მსოფლიოს ფცხოვრენთ, ნამუთ ეფშა რე დემონიზმით, ათეშგურშენ აუცილებერო ოკო ფთხუათ იეჰოვას, ქომჩან ძალა, შევეწინააღმდეგათ უბადო ძალეფსინ თიშენ. მუშო ოკო რაგად, ლოცვეფიშ დროს იეჰოვას სახელით ოკო მიმაფრთათ (წეკითხი იგავეფიშ 18:10). თაშ ნამდა, ირო ოკო ფთხუათ ღორონთის, დოფთხილუან უბადოშე, სატანა ეშმაკშე (მათე 6:13). იეჰოვა უპასუხენს თეცალ ალალ ლოცვეფს (ფსალმუნი 145:19).

18, 19. ა) მუშენ ვორეთ დარწმუნებული, ნამდა ვორჯგინანთ უბადო სულიერ ქმნილებეფს თინეფწკუმა ბრძოლაშ დროს? ბ) მუ კითხვას გენიფხილენთ ანწიან დუდის?

 ¹⁸ უბადო სულიერ ქმნილებეფ საშიშეფ რენა, მარა თინეფიშ შიში ვა მაღვენუნა, ქუვოწინააღმდეგუთ ეშმაკის, ღორონთის ქევეახლოვებუთ დო თიშ ნებას ქუვასრულენთ-და (წეკითხი იაკობიშ 4:7, 8). უბადო სულიერ ქმნილებეფს ირფელიშ კეთება ვეშულებნა, თინეფიშ მოქმედებას საზღვარ უღუ. ნოეშ დროს თინეფქ დესაჯეს დო მომავალს ღორონთი სისრულეშა ქიმიჸონანს თი განაჩეს, ნამუთ თინეფშა აფუ გიმოღალირი (იუდა 6). ვაგგოჭყორდან, ნამდა ჩქი იეჰოვა ღორონთიშ ძალიერ ანგელოზეფ ფთხილანა (2 მეფეები 6:15—17). თე ანგელოზეფს მანგარო ოკონა, ჩქი ქევეწინააღმდეგათ თე უბადო ძალეფს. თე ართგურ ანგელოზეფ ჩქინ ალმარინჯეფ რენა. ათეშგურშენ ხოლოს ვორდათ იეჰოვაწკუმა დო თიშ ზეციერ ოჯახწკუმა, ნამუთ ართგურ სულიერ ქმნილებეფშე შეთმოდირთუ. ვამკვუანჭათ სპირიტიზმიშ მუთუნნერ ფორმას დო ირო ფშუდან ღორონთიშ სიტყვაშე რჩევეფი (1 პეტრე 5:6, 7; 2 პეტრე 2:9). თაშ ქიმიფქცით-და, ვორჯგინანთ უბადო სულიერ ქმნილებეფს თინეფწკუმა ბრძოლაშ დროს.

¹⁹ მუშენ უთვინენს ღორონთი უბადო შურეფს დო მუშენ არზენს თინეფს გლახაშ კეთებაშ უფლებას, ნამუსით კოჩშო ტანჯება დო წვალება მოუღუ? თე კითხვაშ პასუხ ანწიან დუდის იჸუაფ ენწყუმილი.