მუჭო ფიქრენქ, მუ რე შური? ბრელს წანს, ნამდა შური უძირაფ დო უღურალ ძალა რე, ნამუთ კოჩის უღუ. თინეფიშ აზრით, ღურაშ დროს შური იტენს სხეულს დო აგრძელენს არსებობას. თენა ბრელს წანს. ათეშგურშენ, ბრელს უკვენს, მუჟამს გებულენს, ნამდა თეცალ მუთუნს ვაგურუანს ბიბლია. მუ რე შური დო მუ მნიშვნელობათ რე თინა ბიბლიას გიმორინაფილი?

ალბათ რშუ, ნამდა ბიბლიაქ ძირითადო ებრაულ დო ბერძნულ ნინეფშა იჭარუ. სიტყვა „შური“ ნათარგმნა რე ჟირ ებრაულ სიტყვაშე („ნეფეშ“ დო „რუახ“) დო ჟირ ბერძნულ სიტყვაშე („ფსიქე“ დო „პნევმა“). თავრეშე „ნეფეშ“ დო „ფსიქეს“ ართ დო იგივე მნიშვნელობა უღუ ბიბლიას, „რუახ“ დო „პნევმას“ — შხვა მნიშვნელობა.

დიო ქიგებგათ, მუს ნიშნენს „ნეფეშ“ დო „ფსიქე“. თე ჟირ სიტყვა ბიბლიას 800-შე მეტშა რე მოშინაფილი. მუჭო რე თე სიტყვეფ ბიბლიას მოშინაფილინ  თის ქიდვეკვირებუთ-და, ქობძირუნთ, ნამდა სიტყვა შურს იგულისხმებ 1) კათა, 2) ცხოველეფი, 3) კოჩიშ ვარდა ცხოველიშ სიცოცხლე. ქობძირათ მუსხირენ მუხლი, სოდეთ სიტყვა „ნეფეშ“ დო „ფსიქე“ თე სუმ მნიშვნელობათ რე გიმორინაფილი.

კათა. „ნოეშ დროს . . . მუსხირენ კოჩიქ, გვალო ბრუო შურქ გინასკიდ წყარალას“ (1 პეტრე 3:20). თე მუხლის, სიტყვა „შურს“ იგულისხმებუნა კათა — ნოე, მუშ ოსური, სუმ ქომოლსქუა დო თინეფიშ ოსურეფი. გამოსვლაშ 16:16-ის ჭარუ, მუჭო ოკო უშაყარდესკო ისრაელეფს მანანა. ღორონთიქ თინეფს უწუ: „დოშაყარეთ არძაქ . . . კარეს მუსხი შურ რეთინ თიშ მიხედვით“. მუჭოთ ვორწყეთინ, მანანა თინეფს ოჯახის მუსხი წევრ რდესინ თიშ მიხედვით ოკო უშაყარუდესკო. ბიბლიაშ შხვა მუხლეფშე ხოლო იძირე, ნამდა სიტყვა „შურს“ კათა იგულისხმებ, მაგალთო დაბადებაშ 46:18-ს, იესო ნავეშ ძეშ 11:11-ს, საქმეეფიშ 27:37-ს დო რომაელეფიშ 13:1-ს.

ცხოველეფი. ბიბლიას ცოცხალ არსებეფიშ გოჭყაფაშენ ინოჭარ: «უკულ თქუ ღორონთიქ: „იბუძოლან ცოცხალ არსებებქ [შურეფქ] წყარს დო დიხაშ ჟი, ცას გილაფურინან ფრინველეფქ“ . . . უკულ თქუ ღორონთიქ: „გარჩქინას დიხაქ არძანერ ჯიშიშ ცოცხალ არსებეფი [შურეფი], არძანერ შინურ ცხოველეფი, ქვეწარმავლეფი დო ტყარ ცხოველეფი“. დო ქოთ თაშ იჸუ» (დაბადება 1:20, 24). თე მუხლეფს ჩხომეფი, შინურ დო ტყარ ცხოველეფი „შურეფო“ რენა მოშინაფილი. ცხოველეფი დო ფრინველეფი შხვა მუხლეფს ხოლო შურეფო რენა მოშინაფილი: დაბადება 9:10; ლევიანები 11:46 დო რიცხვები 31:28.

კოჩიშ სიცოცხლე. მინშა სიტყვა „შური“ კოჩიშ სიცოცხლეს ნიშნენს. იეჰოვაქ მოსეს უწუ: „მიდგა სი რგორუნდუნ [სქან შურს გორუნდუნ], არძა ღურელ რე“ (გამოსვლა 4:19). მუს „გორუნდეს“ მოსეშ ნტერეფი? თიშ სიცოცხლეს. თე ამბეშახ დიდ ხანით ადრე, ბენიამინიშ დაბადებაშ დროს, რახელს „შურ ეშმალუდ“ (დაბადება 35:16—19). თიმ დროს რახელქ დოღურ. ჸუჯი ქუვოთხუათ იესოშ სიტყვეფს: „მა ჯგირ მაჭყიშალ ვორექ,  ჯგირ მაჭყიშალს მუშ სიცოცხლე [„შური“] ვაზოგუ მუშ შხურშო“ (იოანე 10:11). იესოქ მუშ შური ანუ სიცოცხლე ხალხიშ ორსხებელო გაწირუ. არგამა რე, ნამდა თე ბიბლიურ მუხლეფს სიტყვა „შური“ კოჩიშ სიცოცხლეს ნიშნენს. სიტყვა „შური“ თე მნიშვნელობათ რე გიმორინაფილ შხვა მუხლეფს ხოლო: 1 მეფეები 17:17—23; მათე 10:39; იოანე 15:13 დო საქმეები 20:10.

ღორონთიშ სიტყვაშ გურაფაშ დროს ქოძირუნქ, ნამდა ბიბლიას სიტყვეფი „უღურალ“ დო „მარადიულ“ მუთუნ შქას ვა რე სიტყვა „შურწკუმა“. ბიბლია იჩიებ, ნამდა შური ღურუ (ეზეკიელი 18:4, 20). ათეშგურშენ ბიბლია ღურელს „ღურელ შურო“ მიშინუანს (ლევიანები 21:11).

ასე ქობძირათ მუ მნიშვნელობათ რე გიმორინაფილ ბიბლიას ებრაულ სიტყვა „რუახ“ დო ბერძნულ სიტყვა „პნევმა“. მაგალთო ფსალმუნიშ 104:29-ს ინოჭარ: «[იეჰოვა] შურს [„რუახ“] გემდუღანქ-და, გოჭყორდუნა დო დიხას დართუნა». იაკობიშ 2:26 ჭარუ, ნამდა «სხეული შურიშ [„პნევმა“] უმშო ღურელ რე». თე ბიბლიურ მუხლის სიტყვა „შურს“ იგულისხმებ თინა, მუთ სხეულს სიცოცხელს არზენს. შურიშ უმშო სხეულ ღურელ რე. ათეშგურშენ ბიბლიას სიტყვა „რუახ“ ხვალე „შურს“ ვა ნიშნენს, თინა „მაცოცხლებელ ძალას“ ხოლო ნიშნენს. მაგალთო, ნოეშ დროს მოხვალამირ დიდწყარალაშენ ბიბლიას ინოჭარ: „დიდწყარალას ქიმიპონანქ ქიანაშა, ნამდა ცაშ თუდო არძა ხორციელ მოფსპენ, ნამუსით მაცოცხლებელ ძალა [„რუახ“] უღუ“ (დაბადება 6:17; 7:15, 22). თაშ ნამდა, „შური“ არძანერ ცოცხალ არსებაშ ვეძირენფერ მაცოცხლებელ ძალას ხოლო ნიშნენს.

თე ძალა ანუ შური თიცალო ოსაჭირ სხეულს, მუჭოთ რადიოს ელექტროენერგია. წერმიდგინ ჭიჭე რადიო, ნამუთ ელემენტეფით მუშენს. თე რადიო ხვალე თიმწკუმა იმუშენს, მუჟამს ელემენტეფს ქინოდვანქ დო ჩართენქ. ელემენტეფიშ უმშო რადიო ვემუშენს. შტეფცელშე მოთიშილ ქორენ-და, ელექტროენერგიაშ უმშო ვართ მუთუნნერ რადიო იმუშენს. ათეცალო, ჩქინ სხეულ ხოლო შურიშ ანუ მაცოცხლებელ ძალაშ  უმშო ვეარსებენს. ელექტროენერგიაცალო, შური ხოლო მუთუნს ვა გინაფლენს დო ვა ფიქრენს. თინა უბრალოთ ძალა რე. მარა მაცოცხლებელ ძალაქ ვაღვენუეს-და, მუჭოთ ფსალმუნმაბირექ ჭარუნ თეშ, ხალხი „გოჭყორდუ დო დიხას დართუ“.

კოჩიშ ღურაშენ ეკლესიასტეშ 12:7 იჩიებ: „[თიშ სხეულიშ] ტვერი დიხას დართუ, სოდეთ თეიშახ რდუ, შური ჭეშმარიტ ღორონთის დართუ, თიშ მუმაჩამალს“. მუჟამსით შური ანუ მაცოცხლებელ ძალა სხეულს იტენსინ, სხეულ ღურუ დო დიხას ართუ. ათეშნერო, მაცოცხლებელ ძალა ხოლო უკახლე ართუ ღორონთის (იობი 34:14, 15; ფსალმუნი 36:9). მარა თენა თის ვა ნიშნენს, ნამდა მაცოცხლებელ ძალა პირდაპირ გაგებათ ზეცაშა მეურს. თენა თის ნიშნენს, ნამდა ღურაშ უკულ, იეჰოვა ღორონთშა რე დამოკიდებულ, მომავალს კინ დართუ დო ვარ კოჩის სიცოცხლე. თიშ სიცოცხლე, თაშ ქოფთქუათინ, ღორონთიშ ხეს რე. ხვალე ღორონთიშ ძალათ რე შეიოლებერ, კოჩის მაცოცხლებერ ძალაქ დართას დო თიქ კინ იცოცხლასინ.

გურიშ ემაკინალ რე თინა, ნამდა ღორონთი თეს გაკეთენს თინეფშო, „მით ონთხორუეს რენან“ (იოანე 5:28, 29). ღურელეფიშ გათელებაშ დროს იეჰოვა თინეფს ახალ სხეულს ქიმეჩანს დო მაცოცხლებელ ძალას დურთინუანს. თი დროს ხალხიშ ხიოლს საზღვარ ვაღვენუ!

ქუგოკო მეტ ქიგეგენ-და, მუჭო რე ბიბლიას გიმორინაფილ სიტყვა „შური“, ქოძირ ბროშურა „იგრძელებნო ცხოვრება ღურაშ უკული?“ [ქორთ.] დო წიგნი „მსჯელობა წმინდა წერილეფშე“ [ქორთ.], გვერდეფი 336—343. იეჰოვაშ მოწმეეფიშ გიშაშკუმალირ რე.