ამდღა მილიონობით ხალხი დიდ პატის ცენს ჯვარს დო თის თაყვანიშცემაშ დროს გიმირინუანს. ენციკლოპედია „ბრიტანიკას“ ჭარუ, ნამდა ჯვარი „ქრისტიანობაშ არძაშ უმოს მთავარ სიმბოლო“ რე. მარა ჭეშმარიტ ქრისტიანეფი ჯვარს თაყვანიშცემაშ დროს ვეგმირინუანა. მუშენ?

მთავარ მიზეზ თინა რე, ნამდა იესო ქრისტე მართალო ჯვარს მიკოჭკადილო ვა ღურე. ბერძნულ სიტყვა „სტავროს“, ნამუთ „ჯვარო“ რე თარგმნილინ, ნიშნენს მოკვათილ „სწორ ჯას“ (ძელს). ართ წიგნის ჭარუ: «[„სტავროს“] ვა ნიშნენს ართიანს გინოჯვარედინებულ ჟირ ჯას . . . [„ახალ აღთქმაშ“] ბერძნულს თიცალ მუთუნ ვა ჭარუ, მუთ გინოჯვარედინებულ ჟირ ჯაშა მიანიშნენდას» (The Companion Bible).

 ბიბლიაშ მაჭარალეფქ მუსხირენ მუხლის იესოშ ღურაშ ეიოჭარალო გიმირინუეს ბერძნულ სიტყვა „ქსილონ“ (საქმეები 5:30; 10:39; 13:29; გალატელები 3:13; 1 პეტრე 2:24). თე სიტყვა ნიშნენს „ძელს“, „სწორ ჯას“ ვარდა „ჯაშ გინნაკვათას“.

წიგნის „ჯვარი დო ჯვარს მიკოჭკადუა“ ჰერმან ფულდა იჩიებ, მუშენ გიმირინუანდეს ხშირას ჯაშ გინნაკვათას, მუჟამსით კოჩის ღურას მეუსაჯენდესინ: „ჯალეფი ირდიხას ვა ჩანდუ, სოდეთ სახალხოთ ოკო მოხვადკო ღურათ დასაჯებაქ. ჯაშ გინნაკვათას დიხას ენაშკვანდეს. გლახაშ მაკეთებელს თიშა ჟირ ხოლო ხეს მიკუკირანდეს ვარდა ლისმარეფით მიკუჭკადანდეს. მინშა კუჩხეფს ხოლო მიკუკირანდეს ვარდა მიკუჭკადანდეს“.

არძაშ უმოს დუმაჯერებელ არგუმენტი ღორონთიშ სიტყვას რე მოჩამილი. მოციქულ პავლე იჩიებ: «ქრისტექ გიშაჸიდირალით გუმანთავისუფლეს კანონიშ ჭყალაშე — მუქ გინირთ ჭყელო ჩქინ მანგიორო, მუშენდა ჭარილ რე: „ჭყელ რე არძა, მით ძელს რე მიკობუნაფილი“» (გალატელები 3:13). პავლეს კანონიშ 21:22, 23-ს მოშინაფილ სიტყვეფ მოჸუნს, სოდეთ ძელიშ გურშენ მეურს რაგადი დო ვართ ხოლო ჯვარშენ. კოჩი, ნამუსით ათეშნერო ასაჯენდესინ, „ჭყელ“ რდუ, ათეშგურშენ ვეჸუაფ სწორ, ქრისტიანს ჸუდეს ნაწამებ ქრისტეშ გამოსახულება უღდას.

ვა არსებენს მუთუნნერ მტკიცებულება, ნამდა ქრისტეშ ღურაშე პირველ 300 წანას თაყვანიშცემაშ დროს ჯვარს გიმირინუანდეს თინეფი, მიდგას დუდ ქრისტიანო მეუღუდ. მარა მანთხა საუკუნეს იმპერატორ კონსტანტინექ, ნამუთ წარმართ რდუ, განდგომილ ქრისტიანო გინირთ დო ხე შეუნწყუ, ნამდა ჯვარი ქრისტიანობაშ სიმბოლო ჸოფედკონ. ვა უღუ მნიშვნელობა, მუშენ აკეთ თენა კონსტანტინექ, ჯვარი მუთუნნერო ვა რდუ დაკავშირებულ იესო ქრისტეწკუმა. სინამდვილეს, ჯვარი წარმართალაშე მოურს. „ახალ კათოლიკურ ენციკლოპედიას“ ჭარუ: „ჯვარს გიმირინუანდეს ქრისტიანობაშახ დო ქრისტიანულ ვარდუნ ფერ კულტურეფს“. შხვა ავტორიტეტულ წყაროეფს ჯვარი ბუნებაშ თაყვანიშცემაწკუმა დო წარმათულ სექსუალურ რიტუალეფწკუმა რე დაკავშირებული.

მუშენ იჸუ თე წარმართულ სიმბოლოქ აღიარებულქ? მუჭოთ იძირე, იმპერატორ კონსტანტინეს ოკოდ „ქრისტიანობაშ“ მიღებაქ წარმართეფს უმოსო გეადვილესკონ. მუჭოთ ვა ჸოფედკონ, ბიბლია პირდაპირ ოწინააღმდეგუ ირნერ წარმართულ სიმბოლოშ თაყვანიშცემას (2 კორინთელები 6:14—18). ბიბლია არძანერ კერპთაყვანიშცემას  კრძალენს (გამოსვლა 20:4, 5; 1 კორინთელები 10:14). მუჭოთ ვორწყეთინ, ჭეშმარიტ ქრისტიანეფს უღუნა თიშ ნამდვილ მიზეზ, ნამდა ჯვარ თაყვანიშცემაშ დროს ვეგმირინუან. *