1, 2. მუ ოკო კითხე სქან დუდის ცრუ რელიგიაშ დოტებაშ უკულ დო სქან აზრით, მუშენ რე თენა მნიშვნელოვანი?

წერმიდგინ, ნამდა სქან ჸუდეწკუმა ხოლოს, ტყობაშე ორღვანა კოჩის წამალანსინ ფერ გვამს დო თექიან რინა ოშქურანჯ რე. მუს ქიმინუნდ თე დროს? მუშო ოკო რაგად, შურო ქეშქალებედ-და, შხვადო გეგნიშ ოცხოვრებშა. მარა თეშ უკულ ხოლო გოეჭუდკონ იჸიდ დო იფიქრენდი: „უკვე მოწამალერ ხომ ვა ვორექ?“

² თეცალ სიტუაცია რე ცრუ თაყვანიშცემაშ დროს ხოლო. ბიბლია მოგურუანა, ნამდა თეცალ თაყვანიშცემა წიკვილ რე სწორ ვა რენ ფერ გურაფეფით დო ტრადიციეფით (2 კორინთელები 6:17). ათეშენ აუცილებერ რე გეგშაფრთათ „დიდ ბაბილონშე“, ცრუ რელიგიაშ მსოფლიო იმპერიაშე (გამოცხადება 18:2, 4). გვალო ჯგირ რე, ქუგაფ თენა კეთებულ-და. მარა „დიდ ბაბილონშე“ გიშაულარო ხვალე ცრუ რელიგიაშ დოტება ვა ბაღუ საქმეს; თევრეშე გიშაულარო უმოს მეტ რე საჭირო. სქან დუდის ოკო ქოკითხე: „ხოლო ხო ვათოპუნს მუთუნ ცრუ რელიგიაშე?“ ქობძირათ მუსხირენ მაგალითი.

3. ა) მუს იჩიებ ბიბლია ხატეფიშ გიმორინაფაშ გურშენ დო მუშენ შილებე ნამთინეს გუჭირდას თე დროს ღორონთიშ მოსაწონო მიქცუასინ? ბ) მუჭო ოკო მიქცუე ცრუ რელიგიას ოხუნ ფერ ნივთეფ ქოიღუნ-და?

³ ნამთინეს ჸუდეს ხატეფი დო ოლოცებელ კუნთხ უღუ. სი ხოლო ქოიღ თეცალ კუნთხუ-და, შილებე ფიქრენდე, ნამდა თეშ უმშო ლოცვა ვეშილებე. ალბათ ნამთინე ნივთის სქანო დიდ ფას უღუ. მარა ღორონთი გინმოჭყვიდუნს დო ვართ ხოლო ჩქი, მუჭო ოკო ფცათ თის თაყვანი. ბიბლიას ჭარ, ნამდა ღორონთის ვა მოწონს, მუჟამსით ხატეფს ფცენთ თაყვანს (წეკითხი გამოსვლაშ 20:4, 5; ფსალმუნი 115:4—8; ესაია 42:8; 1 იოანე 5:21). თაშ ნამდა, ჭეშმარიტ თაყვანიშცემაშ მხარეს გერინა ქუგოკონ-და, ოკო მოსპე არძა სქან ნივთი, მუთ ცრუ რელიგიას ოხუ. თე ნივთეფშე თიცალ თოლწონუა ოკო მიღუდან, მუნერით იეჰოვას უღუ. იეჰოვას „ჯოგუ“ თინეფი (კანონი 27:15).

4. ა) სოვრეშე მიჩქნა, ნამდა ჩქინ ჯვეშეფიშ თაყვანიშცემა პოტიკ რე? ბ) მუშენ უვარანდ იეჰოვა ისრაელეფს სპირიტიზმიშ ირნერ ფორმას მონაწილებას?

⁴ ბრელ ცრუ რელიგიას მიღებულ რე ჯვეშეფიშ თაყვანიშცემა.  ბიბლიურ ჭეშმარიტებაშ გაგებაშახ, ნამთინეს წანდ, ნამდა ღურაშ უკულ სიცოცხლე იგრძელებ დო ღურელეფს შეულებნა კოჩის ერგან, ვარდა ეცილან. შილებე სი ხოლო ბრელ მუთუნს ორთუდ სქან ჯვეშეფიშ შურეფშო, მარა მუჭოთ თე წიგნიშ მა-6 დუდშე გებგითინ, ღურელეფი სოთინ ვაგრძელენა სიცოცხლეს. ათეშგურშენ თინეფშა მუთუნნერო ვედეკავშირებე. ირნერ ინფორმაცია, ნამუთ ითამ ღურელეფშე რე, სინამდვილეს დემონეფშე მოურს. ათეშგურშენ ისრაელეფს იეჰოვაშ კანონით ევარებუდეს ღურელეფიშ გიშაძახება დო თინეფქ დუდ ოკო არიდესკო სპირიტიზმიშ ირნერ ფორმას (წეკითხი კანონიშ 18:10—12).

5. მუ ოკო აკეთე, ხატეფს ვარდა სქან ჯვეშეფს თაყვანს ქოცენდი-და?

⁵ მუ ოკო აკეთე ადრე ხატეფს ვარდა სქან ჯვეშეფს თაყვანს ქოცენდი-და? წეკითხი ბიბლიურ მუხლეფი, სოვრეშეთ რჩქუ, მუს ფიქრენს ღორონთი თეცალ თაყვანიშცემაშ გურშენ? დეფიქრ თე მუხლეფშე. შეილებ ირ დღას ილოცე დო ეჩუე იეჰოვას, ნამდა გოკო ჭეშმარიტ თაყვანიშმცემლობაშ მხარე დეკინე. ქოთხი, ქიმგეხვარას, თინერ თოლწონუა გიღუდას, მუნერით მუს უღუ (ესაია 55:9).

6, 7. ა) მუს აღნიშნენს ხალხ ქირსეთ დო ზეიმენდეს დო ვარ თის იესოშ მიმაჸუნალეფ პირველ საუკუნეს? ბ) მუწკუმა რდუ დაკავშირებულ დაბადებაშ დღალეფიშ გინოგაფა იესოშ პირველ მოწაფეეფიშ დროს?

⁶ ცრუ რელიგიაქ შილებე ხალხიშ აზრიშ „ოწამალარო“ პოპულარულ დღახუეფ გიმირინუას. ართ-ართ დღახუ ქირსე რე. ქირსეშ დროს ხალხ იესო ქრისტეშ დაბადებას აღნიშნენს. თეს დახე არძა ქრისტიანულ რელიგია მეჸუნს. მარა ვა არსებენს მუთუნნერ ფაქტი, იესოშ პირველ მოწაფეეფ ქირსეს აღნიშნენდესინ. ართ წიგნის, ნამუთ დღახუეფს ოხუნ, ინოჭარ: „ქრისტეშ დაბადებაშ უკულ ჟირ საუკუნეშ დინახალე მითინს ვა უჩქუდ — დო ჭიჭე მითინს ქაინტერესუდ-და — თიშ დაბადებაშ თარიღი“ (Sacred Origins of Profound Things).

 ⁷ მოწაფეეფს ქრისტეშ დაბადებაშ რიცხვ უჩქუდესკონ ხოლო, იშენით ვაღნიშნენდეს თის. მუშენ? «ენციკლოპედია „უორლდ ბუკის“» ჭარ, ნამდა პირველ ქრისტიანეფს „დაბადებაშ დღაშ გინოგაფა წარმართულ წესო მიორჩქუდეს“. ბიბლიას დაბადებაშ დღაშ გინოგაფაშ ხვალე ჟირ შემთხვევა რე მოჩამილი. ჟირხოლო შემთხვევას დაბადებაშ დღა გინიგეს მართველეფქ, მით ვა რდეს იეჰოვაშ თაყვანიშმცემელეფი (დაბადება 40:20; მარკოზი 6:21). დაბადებაშ დღას წარმართ ღორონთეფიშ პატიშ ოცემელო გინმიგანდეს. მაგალთო, 24 მესის რომაელეფ დიაღორონთ დიანაშ დაბადებაშ დღას ზეიმენდეს, ართ დღაშ უკულ — ბჟაშ ღორონთ აპოლონიშ დაბადებაშ დღას. თაშ ნამდა, დაბადებაშ დღაშ გინოგაფა წარმართალაშე მოურს, დო ვართ ხოლო ქრისტიანობაშე.

8. გენწყი, მუ კავშირ უღუ დაბადებაშ დღალეფიშ გინოგაფას ცრუ რწმენაწკუმა?

⁸ არსებენს ხოლო ართ მიზეზ, მუშენ ვა ზეიმენდეს პირველ საუკუნეშ ქრისტიანეფ ქრისტეშ დაბადებაშ დღას. მოწაფეეფს არჩქვენუდეს, ნამდა დაბადებაშ დღაშ გინოგაფა ცრუ რწმენაშე მიშუ. მაგალთო, ჯვეშო ბერძნეფს დო რომაელეფს წანდეს, ნამდა ირ კოჩის, დებადებუდუნ თიმ დღაშე, შურ თხილანდ. ართ წიგნი, ნამუთ დაბადებაშ დღალეფიშ დაჭყაფუს ოხუნ, იჩიებ: „თე შურს მისტიკურ ურთიერთობა უღუდ წარმართულ ღორონთწკუმა, ნამუშ დაბადებაშ დღას რდუ დაბადებულ თე კოჩი“ (The Lore of Birthdays). მუშო ოკო რაგადი, იეჰოვა ღორონთშო ვეჸი მოსაწონ, ნამთინ დღახუ, ნამუთ იესოშ დაბადებას ცრუ რწმენაწკუმა აკავშირენს (ესაია 65:11, 12). აბა მუშენ აღნიშნენს ხალხ ქირსეს?

9. მუშენ დიჭყეს იესოშ დაბადებაშ დღაშ აღნიშნება 25 დეკემბერს?

⁹ ქრისტეშ დედამიწას ცხოვრებაშე მუსხირენ საუკუნეშ უკულ ხალხიქ 25 დეკემბერს თიშ დაბადებაშ დღაშ გინოგაფა ქიდიჭყუ. მარა თე დღას ვა დაბადებე იესო ქრისტე. მუჭოთ  იძირენ, იესოქ ოქტომბერს დებადუ. * აბა სოვრეშე მიღეს 25 დეკემბერი? ნამთინეს, მიდგა დუდის ქრისტიანო თვალუნდუნ, «ოკოდ, ნამდა თე თარიღიქ მუხვადუკო წარმართულ რომაულ დღახუს. თეთ ზეიმენდეს „ძალიერ ბჟაშ დაბადებაშ დღას“» («ახალ ენციკლოპედია „ბრიტანიკა“»). ზოთონს, მუჟამს ბჟა მუშ ძალას ოდინუანდუნ, წარმართეფ ზეიმენდეს თის, ნამდა სინთეშ დო სიტიბაშ მუმაჩამალს შორ შარაშე დურთინუდკო. თაშ ნამდა, 25 დეკემბერ ითვალუდ დღათ, მუჟამსით ბჟა დორთინას იჭყანდუ. რელიგიურ ხემანჯღვერეფქ წარმართეფიშ მიკართინაფალო თე დღახუ გეგმირინეს დო „ქრისტიანულო“ გინართინუეს. *

10. მუშენ ვაღნიშნენდ ქირსეს ნამთინე ჯვეშო?

¹⁰ ახალ ვა რე თინა, ნამდა ქირსე წარმართალაშე მოურს. ზუსტას თეშგურშენ მა-17 საუკუნეშ დინახალე ინგლისიშ დო ამერიკაშ ნამთინე კოლონიას ქირსეშ აღნიშნება ვარიებულ რდუ. თინეფს ხოლო აჯარიმენდეს, მით ქირსე დღას სამუშაშა ვეგშეშ. მარა ვემკურთუმ ბრელ დროს დო ჯვეშ წესიქ კინ დირთუ; თის ახალ წესეფქ ხოლო ქიგიაძინ. ქირსექ კინ დიდ დღახუთ გინირთ დო ბრელ ქიანას თინა ამდღარშა პოპულარულ რე. ქირსეს ცრუ რელიგიაწკუმა უღუ კავშირი, ათეშგურშენ თის ვაღნიშნენა ჭეშმარიტ ქრისტიანეფ, მუშენდა ოკონა ღორონთიშ მოსაწონო მიქცუან. თეწკუმა  ართო თინეფ წარმართულ თაყვანიშცემაშე მოურსინ ფერ შხვა დღახუეფს ხოლო ვაღნიშნენა. *

11. მუშენ აღნიშნენს დღახუეფს ნამთინე, მარა მუ ოკო რდას ჩქინო არძაშ უმოს მნიშვნელოვანი?

¹¹ ბრელს ჯერს, ნამდა ნამთინე დღახუ დო თიწკუმა ართო ქირსე ხოლო, წარმართალაშე მოურს. მარა თინეფიშ აზრით, მუთუნ გლახა ვა რე თე დღახუეფიშ აღნიშნებას, მუშენდა თე დროს უმენტაშ ვა ფიქრენს ცრუ თაყვანიშმცემლობაშ გურშენ. თეცალ დღახუეფიშ დროს ოჯახიშ წევრეფს ართო აკოშაყარუაშ საშვალება უღუნა. სი ხოლო თაშ ქოფიქრენქ-და ალბათ, ოჯახიშ — დო ვართ ხოლო ცრუ რელიგიაშ — ჸოროფაშ გურშენ გიჭირს ჭეშმარიტ რელიგიაშ მხარეს გერინა. რჯერდას, ოჯახ იეჰოვაშ გოჭყაფილ რე დო თის ოკო მუთ შილებე ჯგირო რდე ოჯახიშ წევრეფწკუმა (ეფესოელები 3:14, 15). სი შეილებ თინეფწკუმა ხოლოშიან ურთიერთობას მიოჭირინუე ღორონთის ვაწყინებაფუენ თეშ ხოლო. მოციქულ პავლექ თქუ, მუ ოკო რდას ჩქინო არძაშ უმოს მნიშვნელოვან: „ირო შეამოწმით, მუ რე უფალშო მოსაწონი“ (ეფესოელები 5:10).

12. ქიმიჸონ მაგალით დო გენწყი, მუშენ ოკო ვემკვუანჭათ თი ტრადიციეფს დო დღახუეფს, ნამუთ წარმართალაშე მოურს.

¹² შილებე ფიქრენდე, ნამდა დღახუეფს ამდღა გვალო შხვანერო დო შხვა მიზანით აღნიშნენა. მარა ჩქინო უღუდასო ოკო მნიშვნელობა, დღახუ სოვრეშე მოურსინ თის? მუშო ოკო რაგადი! ქიმიპჸონათ თეცალ მაგალითი: ორწყექ, ნამდა კანფეტ ლეტას რე ინოლაფირი. გეჭოფუნდ დო ოჭკომუნდიო თის? მუშო ოკო რაგად, ვარ, მუშენდა თინა ლეტამ რე. თეშნერო დღახუეფ ხოლო შილებე მიკოიჭოფანსინ ფერ რდას, მარა თინეფ „უწუნდურობაშე“ რე ეჭოფილი. ქუმოკონა ჭეშმარიტ თაყვანიშმცემლობაშ მხარეს გერინა-და, წინასწარმარაგედე ესაიაცალო ოკო  ფიფქრენდათ. თიქ ჭეშმარიტ თაყვანიშმცემელეფს უწუ: „უწუნდურს ვემკანჭათ“ (ესაია 52:11).

13. მუ პრობლემეფს შილებე შეხვადე დღახუეფს ვა მონაწილენქინ თიშენ?

¹³ დღახუეფს მონაწილებას ვა ღებულენქინ თიშენ, შილებე პრობლემეფქ ქუგაშუას. მაგალთო, სქან სამუშას შილებე ვა გაიგან, მუშენ ვაღნიშნენქ თინეფწკუმა ართო დღახუეფს. მუს ქიმინუნქ ქირსე დღას მითინქ საჩუქარ ქუგაჩუქ-და? ქიჸიდუო სწორ თიშ გიწოღალა? მუჭო ოკო მიქცუე, მეუღლე ვა რე სქან რწმენაშ-და? მუშ კეთება შეილებ დღახუეფიშ დროს, სქან ბაღანეფქ მუთუნ ორკუნან თეშ ვეგინან დუდი?

14, 15. მუჭო შეილებ მიქცუე, მუჟამს დღახუს მიგახვამანა ვარდა საჩუქარს გარზიენა?

¹⁴ გურიშ გოჩამა რე საჭირო, თეცალ სიტუაციეფს ტაქტიანო ქიმიფქცუათინ თიშენ. დღახუშ დროს მეშარე მიგახვამანს დო ჯგირობუას გიზალანს-და, სი შეილებ უბრალოთ მადლობა უწუენ. მარა წერმიდგინ, თეცალ სიტუციაქ სამუშას ვარდა ნაჩინებუეფწკუმა ქუგაღვენუ-და. თე დროს შილებე უმოს მეტიშ რაგად გინოჭყვიდე. მუდგა თინა ვა რდასინ, გეგმირჩქინ ტაქტიანობა. ბიბლია მიზუკოლუნა: „თქვან სიტყვა ირო მარდიან რდას, ჯიმ კათაფილ, ნამდა გიჩქუდან, მის მუნერ პასუხ მეჩათ“ (კოლოსელები 4:6). შხვას უპატიცემუო დღას ვემექცუა. წესიერო დო ზრდილობიანო გეუნწყი თინეფს სქან პოზიცია. ჯგირო ქაძირე, ნამდა ვა რექ საჩუქარიშ დო სტუმარუაშ მოვარიე, ოღონს თეს შხვა დროს ისხუნუანდი.

¹⁵ მუჭო შეილებ მიქცუე, მუჟამს მითინს სქანდა საჩუქარიშ ჩუქება ოკო? თე დროს ქიდეკვირ კონკრეტულ სიტუაციას. მიდგა საჩუქარს გარზიენსინ თიქ შილებე გიწუას: „მიჩქ, სი თე დღახუს ვაღნიშნენქ, მარა მა იშენ მოკო თენა გაჩუქე“. თე დროს შილებე გინოჭყვიდე საჩუქარიშ ეჭოფუა, მარა თენა ვა ნიშნენდას იჸი დღახუს მონაწილებას. საჩუქარს, სქან რწმენაშენ ვა უჩქუნ თინა ქუგაჩუქენს-და, შეილებ გეუნწყე, მუშენ ვაღნიშნენქ თე დღახუს. თეცალ მოქმედებათ ოძირანქ თის, სი მუშენ  ვაჩუქენქ მუთუნს თე დღახუს, მუჟამს საჩუქარს აშო ემოჭოფუნქ. მარა ჭკვერულ იჸუაფუდ, ვეჭოფე საჩუქარ თინეფშე, მიდგას სქან რწმენაშ გიმოცადუა ოკო, ვარდა ოინტერეს, დათმენქ დო-ვარ თის საჩუქარიშ გურშენ.

16. მუჭო შეილებ ტაქტიან რდე ოჯახიშ წევრეფწკუმა დღახუეფიშ დროს?

¹⁶ მუჭო ოკო მიქცუე, სქან ოჯახიშ წევრეფს ვაკონა სქან რწმენა-და? თაქ ხოლო ტაქტიანობა მიგეხვარებ. ირ დღახუ დო ტრადიცია, ნამუსით სქან ოჯახიშ წევრეფ აღნიშნენა, ონირზებელო ვეგნაშკვე ოკო. თინეფს უფლება უღუნა გიმოხანტან მუნეფიშ აზრი. ათეშენ პატი ცი თინეფიშ აზრის, ქუგოკო სქან აზრის ხოლო პატი ქოცან-და (წეკითხი მათეშ 7:12). დუდ ეუჩილითე თიცალ საქმეეფს, ნამუთ დღახუშ მონაწილეთ გინგორთინუანს. გეგმირჩქინ გონიერება, მუჟამს თიცალ მუდგარენიშ კეთებას რთხინა, მუთ პირდაპირ დღახუშ გინოგაფას ვახუ. მუშო ოკო რაგადი, ირო თეშ ოკო მიქცუე, ნამდა უკულ სინდისიქ ვეშქაწუხას (წეკითხი 1 ტიმოთეშ 1:18, 19).

17. მუშ კეთება შეილებ, სქან ბაღანეფს გურქ ველაჭვან, შხვეფცალო დღახუეფს ვაღნიშნენან თიშენ?

¹⁷ სქან ოჯახ ვაღნიშნენს დღახუეფს-და, მუშ კეთება შეილებ სქან ბაღანეფს გურქ ველაჭვანინ თიშენ? დიდ მნიშვნელობა უღუ, მუს ორთუქ თინეფშო შხვა დღალეფს. ნამთინე მშობელ ოცად, ნამდა მუშ ბაღანას საჩუქარ შხვა დროს გუკეთას. არძაშ უჯგუშ საჩუქარ სქან ბაღანეფშო სქან დრო დო ყურადღება რე.

18. მუჭო მიგეხვარებ ქრისტიანულ შეხვალამეფი, ქიგედირთე ჭეშმარიტ თაყვანიშცემაშ მხარეს?

¹⁸ ქუგოკო ქასიამოვნე ღორონთის-და, აუცილებერო მიოტუე ოკო ცრუ თაყვანიშცემა დო ქიდეკინე ოკო ჭეშმარიტ თაყვანიშცემაშ მხარე. მუ მიშურს თეშა? ბიბლია მირაგადნა: „ყურადღებიანეფ  ვორდათ, ნამდა წუვახალისათ ართიან ჸოროფაშო დო ჯგირ საქმეეფშო. ვემუოტუათ ჩქინ კრება, მუჭოთ ნამთინეს ჩვევათ უღუ, პირიქით გურს ეუქექუათ ართიანს, მუთ უმოსო ვორწყეთ თი დღაშ მონჭაფას“ (ებრაელები 10:24, 25). კრებაშ შეხვალამეფ თიშ საშვალებას მარზენა ღორონთის თეშ ფცათ თაყვანი, მუჭოთ მუს მოწონსინ (ფსალმუნი 22:22; 122:1). თეშ გარდა, თეცალ შეხვალამეფს ართგურ ქრისტიანეფწკუმა ურთიერთობა ხიოლ დო იმენდის მარზენა (რომაელები 1:12).

19. მუშენ რე მნიშვნელოვან, ეჩუე შხვეფს თინა, მუთ ბიბლიაშე გეგი?

¹⁹ ჭეშმარიტ თაყვანიშცემაშ მხარეს გერინა თის ხოლო ნიშნენს, ნამდა ქეჩუე შხვეფს თინა, მუთ იეჰოვაშ მოწმეეფწკუმა ბიბლიაშ გურაფაშ დროს გეგი. ამდღარ ქიანას ბრელ უბედრობა მუთმოხვადუ, ათეშგურშენ ხალხ „წუხენს დო კუსანს“ (ეზეკიელი 9:4). შილებე სი ხოლო იჩინენდე თეცალ ხალხის. ქეჩი თინეფს თი დიდებულ მომავალიშ გურშენ, ნამდგას ბიბლია მოპირუნა. ქოიღ ჭეშმარიტ ქრისტიანეფწკუმა ურთიერთობა დო შხვეფს ბიბლიურ იმენდიშ გურშენ ქეჩიებუქ-და, დრო-ხანიშ უკულ ვაგაკონირე დღახუეფიშ აღნიშნება, ნამუსით წარმართულ დაჭყაფ უღუ. დარწმუნებულ რდა, ნამდა ჭეშმარიტ თაყვანიშცემა დიდ ბედნერობას დო ხვამას მოიღანს (მალაქია 3:10).