1, 2. მუშ კეთება შემლებნა, ნამდა ვორდათ ღორონთიშ ჸოროფაშ ღირსეფ?

არძას მოკონა, ვორდათ ძალათ ეფშა დო მიღდან ჯგირ ჯამრთელობა. ათეშენ ვოცადუთ, ბჭკუმათ, მუთ მარგებელ რე, რეგულარულო ივაბრჯიშათ დო ჯამრთელობას მიკვოჯინათ. მართალ რე, თე ირფელს მონდომა ოსაჭირ, მარა თეს ჯგირ შედეგეფ მოჸუნს. მარა დასაბაღ ვა რე ხვალე ფიზიკურო ვორდათ ჯამრთელეფ დო ძალათ ეფშა.

² მართალ რე, უკვე ბრელს მიოჭირინე თით, ნამდა დოჭყაფილ გაფჷ იეჰოვაწკუმა მეგობრობა, მარა საჭირო რე, მუთ დრო მიკურს თეშ, უმოსო გამანგარე თე ურთიერთობა. მუჟამსით მოწაფე იუდაქ გურშა ელუკინ ქრისტიანეფს თეცალ სიტყვეფით: „ირო რდათ ღორონთიშ ჸოროფაშ ღირსეფ“, თინა ხოლო გეუნწყჷ, მუ ოკო აკეთესკო თეშ მიოჭირნაფალო: „გემანგარით დუდ თქვან უწმინდეს რწმენათ“ (იუდა 20, 21). თაშ ნამდა, მუჭო შემლებნა რწმენაშ გამანგარება?

3—5. ა) მუ ოკო სატანას გოფიქრებაფუას იეჰოვაშ პრინციპეფშე? ბ) სი მუს ფიქრენქ იეჰოვაშ კანონეფ დო პრინციპეფშე?

³ მნიშვნელოვან რე, ბოლოშა რდე დარწმუნებულ, ნამდა იეჰოვაშ პრინციპეფ არძაშ უჯგუშ რე. სატანას ოკო,  გოფიქრებაფუას, ნამდა იეჰოვაშ პრინციპეფით ცხოვრება მანგარ ძნელ რე დო უმოს ბედნერ იჸუაფუქ, მუჟამსით სქანით გინოჭყვიდუნქ, მუ რე ჯგირ დო მუ რე ფურ. სატანაქ დიო ხოლო ედემიშ ბაღის მინდომ, პირველ წყვილს თენა ქუდაჯერუკო (დაბადება 3:1—6). თინა ამდღა ხოლო ირნერო ოცად თეშ კეთებას.

⁴ ქორენო სატანა მართალ? მართალო შეულებნო იეჰოვაშ პრინციპეფს თავისუფლებაშ მიდაღალა? მუშო ოკო რაგად, ვარ. მაგალთო, წერმიდგინ, ნამდა სქვამ ბაღის რექ დო ართუცფას თოლქ ქუმოიოლ მაღალ კიდალაშა, ნამუთ ბაღის გოჸუნს. შილებე იფიქრე, „მუ საჭირო რე თე კიდალა?“ მარა კიდალაშ იქილეშე ქიგეგონ ლომიშ ღირთაფ. მუს იგინანდჷ თე დროს? ალბათ მარდულ იჸუაფუდ, ნამდა თე კიდალაშ ჭყოლოფათ ლომიშ თიათ ვეგნირთჷ! იეჰოვაშ პრინციპეფ თე კიდალას მოგენს დო ეშმაკ — ლომს. ღორონთიშ სიტყვა მაფრთხილენა: „კურცხას რდათ! თქვან ნტერ, ეშმაკ, გილესოფუ, მუჭოთ მაღირთალ ლომ დო გორუნს, მი გინორყინტას“ (1 პეტრე 5:8).

⁵ იეჰოვას არძაშ უჯგუშ ოკო ჩქინო. თის ვაკო, სატანაშე ღორებულქ დოფსქიდათ. ათეშენ ღორონთიქ მუჩეს კანონეფ დო პრინციპეფ, ნამდა თხილერ დო ბედნერ ვორდათ (ეფესოელები 6:11). მოწაფე იაკობიქ ჭარჷ: „მით ოკვირ თავისუფლებაშ სრულყოფილ კანონს დო დოჸუნს თის . . . ბედნერ იჸუაფ“ (იაკობი 1:25).

6. მუ მარწმუნენა, ნამდა იეჰოვაშ მითითებეფ ირფელიშ უჯგუშ რე?

⁶ მუჟამსით მეპჸუნთ იეჰოვაშ მითითებეფს, ჩქინ ცხოვრება იუჯგუშებ დო თიწკუმა ჩქინ მეგობრობა — იმანგარებ. მაგალთო, ჯგირობუას მომღანა, მუჟამსით ვომორჩილუთ იეჰოვაშ მითითებას, ხშირას იბლოცათ (მათე 6:5—8; 1 თესალონიკელები 5:17). ჩქინდა ბედნერობა მოუღ თის, მუჟამსით მეპჸუნთ იეჰოვაშ მითითებას, ნამდა ართო  დიბშაყარათ, თაყვან ფცათ ღორონთის დო გურშა ელუკინათ ართიანს. თეს გეძინელ, ბედნერეფ ვორეთ, მუჟამსით მონაწილებას ბღებულენთ ქადაგებაშ დო მოწაფეეფიშ მომზადებაშ საქმეს (მათე 28:19, 20; გალატელები 6:2; ებრაელები 10:24, 25). თიშე დაფიქრება, მუჭო მოხვარნა თე ირფელ რწმენაშ გამანგარებას, უმოსო მარწმუნენა, ნამდა იეჰოვაშ მითითებეფ ირფელიშ უჯგუშ რე.

7, 8. მუ მიმეხვარებნა, ვებწუხათ რწმენაშ თი გამოცდეფშე, ნამუთ მომავალს მელნა?

⁷ შილებე ამდღა ბწუხენდათ, ნამდა რწმენაშ გამოცდეფ, ნამუთ წოხლე მელნა, ძნელ გინაღალარ მაჸინა. თეცალ ფიქრეფ ქუგაწუხენს-და, ირო რშუდას იეჰოვაშ სიტყვეფ: „მა, იეჰოვა, სქან ღორონთ ვორექ, მა გოგურუანქ სქან საჯგირობუოთ დო გილაიჸონანქ თი შარათ, ნამდგათ ოკო გილართე! ნოტე ქოირჩქილუდკო ჩქიმ მცნებეფშა! თიმწკუმა  მალწყარცალო იჸუაფუდ სქან მშვიდობა დო სქან სიმართლე — ზღვაშ ტალღეფცალო“ (ესაია 48:17, 18).

⁸ მუჟამსით ვურჩქილეთ იეჰოვას, ჩქინ მშვიდობა მალწყარცალო იჸუაფ, ნამუთ ვეგესქირუ დო სიმართლე — ზღვაშ ტალღეფცალო, ნამუთ დღას ვა ჩენდუ. ჩქინ ცხოვრებას მუდგაქ ვა მოხვადას, შემლებნა ბოლოშა ართგურეფქ დოფსქიდათ. ბიბლია მოპირნა: „იეჰოვას მიანდ სქან ოღალ დო თინა ხუც ქელაიდირთუ, თინა დღას ვა დუშვენს მართალიშ დონთხაფას“ (ფსალმუნი 55:22).

9, 10. მუს ნიშნენს, ვორდათ სულიერო მოწიფულ?

⁹ მუთ უმოს ხოლოშიან ურთიერთობა გაღვენუ იეჰოვაწკუმა, თით უმოსო იჸუაფუქ სულიერო მოწიფულ პიროვნება (ებრაელები 6:1). მუს ნიშნენს ვორდათ სულიერო მოწიფულ?

¹⁰ ჩქი სულიერო მოწიფულ ქრისტიანეფო უბრალოთ ასაკიშ მოძინათ ვეგნიფრთუთ. მოწიფულობაშო საჭირო რე, გუვავითარათ იეჰოვაწკუმა ხოლოშიან, მეგობრულ ურთიერთობა დო ქეშვეცადათ, იეჰოვაშ თოლით ვუჯინათ საკითხეფს (იოანე 4:23). მოციქულ პავლექ ჭარჷ: „მით ხორციელ სურვილეფით ცხოვრენს, ხორციელშე ფიქრენს, მარა მით სულიერ სურვილეფით ცხოვრენს, სულიერშე ფიქრენს“ (რომაელები 8:5). სულიერო მოწიფულ პიროვნებაშო მთავარ ვა რე მუშ დუდიშ სიამოვნება ვარდა მატერიალურ საკითხეფ. თეშ მანგიორო, თიშო მთავარ რე იეჰოვაშ მსახურება დო თიშ მოსაწონ გადაწყვეტილებეფიშ მეღება (იგავები 27:11; წეკითხ იაკობი 1:2, 3). მოწიფულ პიროვნება მუშ დუც ვემეჩანს თიშ უფლებას, გაკეთას თინა, მუთ გლახა რე. თის უჩქჷ, მუ რე სწორ დო გინოჭყვიდილ აფჷ, შესაბამისო იმოქმედას.

11, 12. ა) მუ თქუ მოციქულ პავლექ ჯგირ დო ფურიშ გარჩიებაშ უნარშე? ბ) მუჭო შემლებნა მოწიფულ ქრისტიანო გინორთა შევადარათ ტანმოვარჯიშეთ გინორთას?

 ¹¹ სულიერ მოწიფულობაშო მონდომა რე საჭირო. მოციქულ პავლექ ჭარჷ: „მანგარ ოჭკუმალ მოწიფულეფშო რე, მიდგას გოწაფილ აფჷ გონება ჯგირ დო ფურიშ გარჩიებელო“ (ებრაელები 5:14). სიტყვა „გოწაფილ“ ნიშნენს ტანმოვარჯიშეცალო გავარჯიშებულს.

¹² მუჟამსით ვორწყეთ დახელოვნებულ ტანმოვარჯიშეშ ილეთეფს, არგამათ იძირე, ნამდა თის ბრელ დრო აფჷ მიკოხარჯებულ ვარჯიშშა. თინა ტანმოვარჯიშეთ ვა დაბადებე. ახალ დაბადებულ ბაღანას ვა უჩქჷ ხე დო კუჩხიშ გიმორნაფა. მარა, მუჭოთ დრო მიკურს თეშ, თინა ჭიე-ჭიეთ ოცად, მუდგაინს ხე ქიმეკიდას დო ნაბიჯეფ გეგნოდგას. ბაღანა ბრელს ქივარჯიშენს-და, საბოლათ შილებე ტანმოვარჯიშეთ ხოლო გინირთას. თეშნერო, ჩქი ხოლო დროს გეგმურთუნთ დო ქივაბრჯიშენთ-და, შემალებენა სულიერო მოწიფულ ქრისტიანო გინიფრთათ.

13. მუ მიმეხვარებნა, იეჰოვაშ მოსაწონ აზროვნება მიღდან?

¹³ თე წიგნის გუვარჩით, მუჭო შემლებნა იეჰოვაშ მოსაწონ აზროვნება მიღდან დო თიშ თოლით ვუჯინათ საკითხეფს. თეწკუმა ართო, დიბგურეთ, ნამდა დუვაფასათ დო მიჸორდან იეჰოვაშ პრინციპეფ. სოიშახ მუთუნს გინობჭყვიდუნდათ, ჩქინ დუც ვოკითხუთ: ნამ ბიბლიურ კანონ დო პრინციპ უხუჯანს ჩქიმ სიტუაციას? მუჭო შემლებ გიმიბრინუე თინეფ? მუს ელჷ იეჰოვა ჩქიმდე? (წეკითხ იგავები 3:5, 6; იაკობი 1:5).

14. მუ ოკო ვაკეთათ, ნამდა გუვამანგარათ ჩქინ რწმენა?

¹⁴ ჩქი ირო მოსაჭირნა რწმენაშ გამანგარება. მუჭოთ მარგებელ ოჭკუმალ მოხვარნა ფიზიკურო ჯამრთელეფ დო ძალათ ეფშა ვორდათ, თეშ იეჰოვაშ გურშენ მეტიშ გურაფა მოხვარნა რწმენაშ გამანგარებას. მუჟამსით ბიბლიაშ  გურაფა დიბჭყით, გეფჩინებაფეთ იეჰოვა დო ქიგებგით თიშ ძირითად გურაფეფ. მარა დროშ მიკულაწკუმა ართო საჭირო რე, უმოსო ქინვანჭათ ბიბლიურ სიტომბეეფს. ზუსტას თეს გულისხმენდჷ პავლე, მუჟამსით თქუ: „მანგარ ოჭკუმალ მოწიფულეფშო რე“. ნაგურეფუშ მეჸუნა, მიმეხვარებნა სიბრძნეშ მეღებას. ბიბლია მირაგადნა: „სიბრძნე არძაშ უმოს მთავარ რე“ (იგავები 4:5—7; 1 პეტრე 2:2).

15. მუსხით მნიშვნელოვან რე, მთელ გურით მიჸორდან იეჰოვა დო და დო ჯიმალეფ?

¹⁵ შილებე პიროვნება ჯამრთელ დო ძალათ ეფშა რდას, მარა თენა ქეშინარჩუნასინ, საჭირო რე, ირო ქიმკაჯინას მუშ ჯამრთელობას. თეშნერო, სულიერო მოწიფულ პიროვნებას უჩქჷ, ნამდა დიდ მონდომა ოსაჭირ იეჰოვაწკუმა ხოლოშიან ურთიერთობაშ შეიონარჩუნებელო. მოციქულ პავლე გუმოშინანა: „ირიათო შეამოწმით თქვან დუდ, რწმენას ქორეთ დო ვარ, გეგმოცადით თქვან დუდ“ (2 კორინთელები 13:5). მარა დასაბაღ ვა რე, ხვალე თით ვორდათ კმაყოფილ, ნამდა მანგარ რწმენა მიღნა. საჭირო რე, ხოლო უმოსო ქიპჸოროფუათ იეჰოვა დო ჩქინ და დო ჯიმალეფ. მოციქულ პავლექ თქუ: „ირნერ რჩქინა მიღუდას დო თიცალ რწმენა, ნამდა გვალეფიშ გინოდგუმა შემლებდას, მარა ჸოროფა ვა მიღ-და, მუთუნ ვეპჸიქ“ (1 კორინთელები 13:1—3).

16. მუ ოკო სატანას მოფიქრებაფუან?

¹⁶ სატანას ოკო, მოფიქრებაფუან, ნამდა ჩქი დღას ვეშმალებენა იეჰოვაშ გურიშ გახარება. თის ოკო, ხიოლ მიმოდინაფუან დო პრობლემეფიშ დროს მოფიქრებაფუან, ნამდა საშველ ვა რე. თის ვაკო ვონდუდათ თანაქრისტიანეფს დო ვორდათ ბედნერეფ (ეფესოელები 2:2). სატანას უჩქჷ, ნამდა უარყოფით ფიქრეფს შეულებ გლახათ იმოქმედას  მუჭოთ ჩქინწკუმა, თეშ იეჰოვაწკუმა ჩქინ ურთიერთობას ხოლო. მარა იმენდ, ნამუსით იეჰოვა მარზენა, მოხვარნა, გივორჯგინათ უარყოფით ფიქრეფს.

17. მუსხით მნიშვნელოვან რე იმენდ?

¹⁷ 1 თესალონიკელეფიშ 5:8-ს ჩქინ იმენდ შედარებულ რე მუზარადის, ნამუთ „რსხებაშ იმენდ“ რე. მუჭოთ მუზარად იცვენს ჯარიშკოჩიშ დუც ჩხუპიშ დროს, თეშ იეჰოვაშ დუნაპირებუშ იმენდ იცვენს ჩქინ გონებას დო მოხვარნა, გივორჯგინათ უარყოფით ფიქრეფს.

18, 19. მუჭო ამანგარენდჷ იესოს იმენდ?

¹⁸ იმენდ იესოს დიდ ძალას არზენდჷ. ღურაშ წოხლენ სერს თიქ ართ-ართ რთულ სიტუაციას ქუმოხვად. იესოს მუშ ხოლოშიან მეგობარქ უღალატ, შხვაქ გეგნივარუ, ნამდა იჩინენდჷ თის, მოწაფეეფქ ხოლო მიოტეს დო ინტეს. თეს გეძინელ, იუდეველეფქ თიშ წინააღმდეგ მიდართეს დო მითხის თიშ ტანჯებათ ღურა. მუქ მეხვარ იესოს, ქუგურზუკო  თე ირფელს? „თი ხიოლიშ გურშენ, ნამდგას ელუდ, ონჯღორე მუთუნო ვემირჩქინ დო ბოძის წამებას ქუგურზჷ დო თეშ უკულ ღორონთიშ ტახტიშ მარძგვანშე ქუდოზოჯ“ (ებრაელები 12:2).

¹⁹ იესოს უჩქუდჷ, ნამდა ართგურ ქიჸუაფუდ-და, თეთ განადიდენდჷ მუშ მუმას დო დამტკიცენდჷ, ნამდა სატანა მეტყურე რე. თე იმენდიქ თის დიდ ხიოლ ქუმუღ. იესოს თინა ხოლო უჩქუდ, ნამდა მალას მუშ მუმაწკუმა ართო იჸუაფუდ ზეცას. თე იმენდ ოხვარუდ, გეგნუღალუდკო ირფელ. იესოცალო ჩქი ხოლო ირიათო ოკო ფშუდან ჩქინ იმენდ. თენა მიმეხვარებნა, მუდგაქ ვა მოხვადას, ირფელ გეგნიბღათ.

20. მუ მიგეხვარებ, გიღუდას დადებით განწყობა?

²⁰ იეჰოვა ორწყე სქან რწმენა დო მოთვინებას (ესაია 30:18; წეკითხ მალაქია 3:10). თინა გოპირ, „მუთ მთელ გურით გოკონ თის შეისრულენს“ (ფსალმუნი 37:4). თაშ ნამდა,  ირო თოლიშ წოხლე ეწოირდას სქან იმენდ. სატანას ოკო, მიოდინუე იმენდ დო იფიქრე, ნამდა იეჰოვაშ დუნაპირებ დღას ვეშესრულებ. მარა დუდ მუთუნით ვემეჩა თეცალ უარყოფით ფიქრეფს! მუჟამსით ორწყექ იმენდ გიდინუ, იეჰოვას ქოთხი მოხვარა. ირო რშუდას თი სიტყვეფ, ნამუთ ჭარჷ ფილიპელეფიშ 4:6, 7-ის: „მუთუნშე ვედიჭყათ წუხება, ლოცვათ, ხვეწინით დო სიმარდულით ქუწით არძა თქვან ოთხუალ ღორონთის. დო ღორონთიშ მშვიდობა, ნამუთ ირნერ აზრშე უმოს რე, დოთხილანს თქვან გურეფს დო გონებას ქრისტე იესოშ საშვალებათ“.

21, 22. ა) მუნერ მომავალს მოპირნა იეჰოვა? ბ) მუშ კეთება გილამ?

²¹ რეგულარულო გეგმურთ დრო თი დიდებულ მომავალშე ფიქრის, მუთ წოხლე მელნა. მალას მთელ ქიანას, არძა ხალხ იეჰოვაშ თაყვანიშმცემელ იჸუაფ (გამოცხადება 7:9, 14). წერმიდგინ ცხოვრება ახალ ქიანას; თინა თიშე ბრელით უჯგუშ იჸუაფ, ვინემ სი გაფჷ წარმოდგენილ! სატანა, თიშ დემონეფ დო ირნერ უბადობა ულირს ქაჸუნუ. დღას ვეგინანქ ჭუას დო დღას ვა ღურუქ. თეშ მანგიორო, ირ დღას ახალ ძალეფით ეფშა გოკურცხუქ დო სიცოცხლეთ გეხარებუქ. თი დროს არძა ართო იმუფშენთ, ნამდა დედამიწაქ სამოთხეთ გინირთას. არძას მაღვენუნა გემუან ოჭკუმალ დო უშქურანჯუო იფცხოვრენთ. ხალხ ვეჸუაფ სასტიკ დო უბადოშ მაკეთებელ; თინეფ ჸოროფათ დო შურ დო გურით მექციებნა ართიანს. თი დროს არძა ხალხ „მიღენს ღორონთიშ სქუალეფიშ დიდებულ თავისუფლებას“ (რომაელები 8:21).

²² იეჰოვას ოკო, თინა არძაშ უჯგუშ მეგობარო მიგორჩქუდას. თაშ ნამდა, მუთ შეილებ ირფელ გაკეთ, ნამდა დემორჩილე იეჰოვას დო ირ დღას უმოსო დეახლოვე თის. მორთ თითოულქ თეშ მიფქცუათ, ნამდა ირიათო ღორონთიშ ჸოროფაშ ღირსეფ ვორდათ! (იუდა 21).