ქო. მართალ რე, ბიბლია ვა რე მენციერულ წიგნ, მარა თინა მთელ სიზუსტეთ ეჭარუნს მეცნიერულ საკითხეფს. მორთ გუვარჩუათ მუსხირენ მაგალით, ნამუთ ოძირანს, ნამდა ბიბლია დო მეცნიერება ართიანს ვაწინააღმდეგ. თეს გეძინელ, ქობძირათ ბიბლიას მოჩამილ მუსხირენ მეცნიერულ ფაქტ, ნამდგაშ გურშენ ბიბლიურ დროს მახორუ კათას შურო მუთუნ ვა უჩქუდ.

•   ბიბლიას მოჩამილ რე, ნამდა სამყაროს დაჭყაფ უღუდ (დაბადება 1:1). თეშ გინაწონს, ჯვეშო გავრცელებურ რდუ მითეფ, ნამდა სამყაროს დაჭყაფ ვა უღუდ დო თიქ ქაოსიშ შედეგო გორჩქინდჷ. ბაბილონელეფს წანდეს, ნამდა თი ღორონთეფქ, მიდგაქ სამყარო გაჭყეს, ჟირ დიდ ოკეანეშე გორჩქინდეს. შხვა ლეგენდა იჩიებ, ნამდა სამყაროქ ქიანაშმადიდა კვერცხშე გორჩქინდჷ.

•   ბიბლია იჩიებ, ნამდა სამყარო ფიზიკურ კანონეფს ომორჩილ დო ვართ ხოლო მოგონილ ღორონთეფს (იობი 38:33; იერემია 33:25). შხვადოშხვა ქიანას გავრცელებურ რე მითეფ, ნამდა ხალხ თხილერ ვა რე უბადო ღორონთეფშე.

•   ბიბლია იჩიებ, ნამდა დედამიწა მუთუნს ვემკობ (იობი 26:7). ჯვეშ დროს მახორუ ხალხის ჯერდჷ, ნამდა დედამიწას სწორ პიჯ უღუდ დო გოლიათეფს უკინებდეს ვარდა სპილოს ვარდა კუს გიმადგუდ.

•   ოკეანეეფშე წყარ იორთქლებ დო ჭვემათ, თირო ვარდა კირცხო ართუ დედამიწას, ნამდგაშ საშვალებათ მალწყარეფ იფშაფუ (იობი 36:27, 28; ეკლესიასტე 1:7; ესაია 55:10; ამოსი 9:6). ჯვეშ დროს მახორუ ბერძნეფ ფიქრენდეს, ნამდა მალწყარეფ დიხაშ თუდო რენ თი წყარეფით იფშაფუდ დო თე აზრ მა-18 საუკუნეშახ რდუ გავრცელებურ.

•   თექ სოდეთ, ართ დროს გვალეფ რდუ ამდღა თინეფ ვა რე დო თი გვალეფ, მუდგას ამდღა ვორწყეთ ადრე შილებე ოკეანეს აფუდ ფორილ (ფსალმუნი 104:6, 8). ნამთინე მითიშ თანახმათ თე გვალეფს დაჭყაფ მოგონილ ღორონთეფქ მეჩეს.

•   ჰიგიენაშ დაცვება მოხვარნა, მიღდან ჯგირ ჯამრთელობა. ისრაელ ერშა მეჩამილ კანონ თინეფშე ითხინდჷ, ნამდა ღურელს ხეს ქუმოთხუნდეს-და, ოკო გიბონესკო, გინმიდვალუნ ფერ ლახალა უღუდუნ თინეფ ცალკე გუტესკო დო დიხას ქინანთხორესკო განავალი (ლევიანები 11:28; 13:1—5; კანონი 23:13). ისრაელეფ მეჸუნდეს თე კანონს, მარა თინეფიშ გინაწონს, ეგვიპტელეფ ადამიანიშ განავალს გიმირინუანდეს ჭრილობაშ ოსქილიდაფარო.

 ბიბლიას საფუძვლიანო გეგმირკვიენთ-და, ქოძირუნთ, ნამდა თე კითხვაშ პასუხ უარყოფით რე. თუდო მოჩამილ რე ართიანწკუმა დაპირისპირებულ სწორ დო არასწორ შეხედულებეფ:

 ტყურა: ბიბლია იჩიებ, ნამდა სამყაროქ ამშვ 24 საათიან დღაშ დინახალე გორჩქინდჷ.

 სიმართლე: ბიბლიას ვა რე მოჩამილ კონკრეტულ თარიღ, მუჟამ გორჩქინდჷ სამყაროქ (დაბადება 1:1). თეს გეძინელ, დაბადებაშ წიგნიშ პირველ დუდის მოჩამილ შემოქმედებით დღა მეუთითენს დროშ გარკვეულ პერიოდშა, ნამდგაშ ხანგრძლივობა მითინს ვა უჩქჷ. მარა არგამა რე, ნამდა დროშ თე გარკვეულ პერიოდ, ბიბლიას მოშინაფილ რე მუჭოთ „დღა“ (დაბადება 2:4).

 ტყურა: ბიბლია იჩიებ, ნამდა დიო მცენარეეფქ გორჩქინდჷ დო უკულ გორჩქინდჷ ჩხანაქ. მარა თენა ოწინააღმდეგ ფოტოსინთეზიშ პროცესის (დაბადება 1:11, 16).

 სიმართლე: ბიბლიას ჯგირო რე ძირაფილ, ნამდა ჩხანა, ნამუთ არძაშ უმოს დიდ მურიცხ რე, თეიშახ რდუ გოჭყაფილ, სოიშახ მცენარეეფ იჸუაფუდ (დაბადება 1:1). ბჟაშ სინთექ დედამიწაშ ზედაპირშა ქუმაჭირინუ პირველ „დღას“ — შემოქმედებით პერიოდიშ დაჭყაფუს. მუჟამსით მასმა „დღას“ ატმოსფეროქ გესუფთ ბჟაშ სინთექ თისხით გემკორჩქინდჷ, ნამდა თენა დასაბაღ რდუ ფოტოსინთეზშო (დაბადება 1:3—5, 12, 13). მუსხირენ დროქ გამკორთჷ, სოიშახ ჩხანაშ ძირაფა დედამიწაშე შეიოლებერ იჸუაფუდ (დაბადება 1:16).

 ტყურა: ბიბლია იჩიებ, ნამდა ბჟა დედამიწას გართუ.

 სიმართლე: ეკლესიასტეშ 1:5 იჩიებ: „ბჟა ეშმურს, ბჟა დინურს, უკულ თი ადგილშა მინჭუაფ, სოვრეშეთ კინ ოკო ეშართას“. თე მუხლ ჯგირო ეთმოჭარუნს, მუჭო იძირე ჩხანაშ მოძრაობა დედამიწაშე. ამდღა არძას მიჩქნა, ნამდა დედამიწა გართუ ბჟას, მარა იშენ იჩიებნა „ბჟა ეშმურს“ დო „ბჟა ინმურს“.

 ტყურა: ბიბლია იჩიებ, ნამდა დედამიწას სწორ პიჯ უღჷ.

 სიმართლე: ბიბლია გიმირინუანს ფრაზას „დედამიწაშ არძა კუნთხუ“, მუთ ნიშნენს დედამიწაშ უკიდურეს წერტილს. თენა ვა ნიშნენს, ნამდა დედამიწას სწორ პიჯ ვარდა კუნთხუეფ უღჷ (საქმეები 1:8). თეშნერო, გამოთქმა „დედამიწაშ ოთხ კუნთხუ“ პირდაპირ მნიშვნელობათ ოკო ვეგებგათ. მუჟამსით თე სიტყვეფს ბკითხულენთ, მარჩქილენა, ნამდა გადატანით მნიშვნელობა უღჷ დო ნიშნენს მთელ დედამიწას. ამდღა ხოლო ადამიანეფ ირინუანა ფრაზას, ნამდგას გადატანით მნიშვნელობა უღჷ, მაგალთო: „კომპასის ოთხ მხარე უღჷ“ (ესაია 11:12; ლუკა 13:29).

 ტყურა: ბიბლია იჩიებ, ნამდა დედამიწაშ წრეწირიშ გარშემოწერილობა სუმშე უმოს რე თიშ დიამეტრშე. მარა მუჭოთ დადგენილ რე, სოდგარენ 3 ,1416-შა (პი [π]) უმოს ოკო რდას.

 სიმართლე: 1 მეფეეფიშ 7:23-ს დო 2 მატიანეშ 4:2-ს ჭარჷ, ნამდა „მრგვალ ზღვაშ“ „ართ კუნთხუშე მაჟია კუნთხუშა 10 წყრთა რდუ“ დო თის „30 წყრთა თოკ განჭუდ“. თე ზომეფ შილებე დამრგვალებურ რდას. თეს გეძინელ, შილებე, მრგვალ ზღვაშ გარშემოწერილობა დო დიამეტრ აუზიშ დინახლენ დო გალენ ზომეფშა მეუთითენდას.