იეჰოვაშ მოწმეეფშო ბიბლია არძაშ უმოს მნიშვნელოვან წიგნი რე. თე წიგნის მოწმეეფი ხშირას გიმირინუანა პირად გურაფაშ დო ქადაქიშ დროს (მათე 24:14). ათეშგურშენ ბიბლიეფი მალას აშირუნა. იეჰოვაშ მოწმეეფქ ბრელ იხანდეს, ბიბლიაშ გინომუშებულ „ახალი ქიანაშ თარგმანი“ (2013 წანას გიშაშკუმალირ) სქვამ დო გარზე ქოჸოფედკონ.

ახალი ბიბლიაქ მუთ შილებე ბრელ ხანს ოკო გარზუკო. მუჟამსით უოლკილიშ (ნიუ-იორკი, აშშ) სტამბაშე მუსხირენ იეჰოვაშ მოწმექ კინძუაშ განყოფილებაშ დირექტორს ქუდურაგადუნ, თიქ თქუ: „თქვა გოკონან თიცალ ბიბლიეფიშ კეთება გამორიცხულ რე. ამდღარ ბიბლიეფიშ უმენტაშ მეჯინელო სქვამ რე დო შკაფიშ მითადვალარო ირგუ, მარა გარზე შუროთ ვა რე“.

ვართ ჯვეშ გიშნაშკუმელ „ახალი ქიანაშ თარგმანიშ“ ნამთინე ვერსია რდუ გარზე. თე ბიბლიეფს მალას უდინუდ ფორმა; მაგალთო მანგარ სინჩხე რენ ფერ ქიანეფს, ბიბლიეფი შქას ინწყუმუდ დო კაბრეფი ინწკირუდ. სტამბას მუშენან ფერ მოწმეეფქ ჯგირო ქიდეკვირეს კაბრეფიშ ოკეთებელ მასალეფს დო ოჭაბალ საშვალებეფს; თინეფქ კინძუაშ შხვადოშხვა მეთოდი ხოლო გეჩინებაფუეს. თე ირფელიშ უკულ ომორსებელო გეგშაშკვეს ბიბლიაშ მუსხირენ ვარიანტი დო მიდაჯღონეს თიცალ ქიანეფშა, სოდეთ შხვადოშხვანერ კლიმატ რე.

ამშვი თუთაშ უკულ თე ბიბლიეფი კინ უკახალე დართინუეს, მოწმეეფქ უმოსო გაუჯგუშეს თინა დო კინ ომორსებელო მიდაჯღონეს. გვალო 1 697 ბიბლიას დეკვირეს. დაკვირებაშ დროს მუსხირენ შემთხვევაქ მოხვადუ. მაგალთო, ართ იეჰოვაშ მოწმეს მთელ სერს ჭვემას გალე ქელასკიდ ბიბლიაქ; შხვა ბიბლიას ტაიფუნიშ წყარქ გინულუ. თეცალ შემთხვევეფშე ბრელ მუთუნ გეგეს თე წიგნიშ გურშენ.

2011 წანას, ბიბლიეფიშ დაკვირებაშ დროს, მოწმეეფქ უოლკილიშ დო ებინაშ (იაპონია) სტამბეფშო მაღალსიჩქარეშ დანადგარეფი ქიჸიდეს, ნამუთ კინძუნდ დო ბიბლიეფს კაბრას გოუდვანდუ. მოწმეეფს ოკოდეს, ჟირხოლო სტამბას ართნერ ბიბლიეფი დუბეშტუდესკო დო გეგშუშკუმალდესკო არძაშო დასაბაღ ინგლისურ ბიბლიეფი ირწანიან შეხვალამაშო.

2012 წანაშ დაჭყაფუს იეჰოვაშ მოწმეეფქ მუნეფიშ ჟირ სტამბას ქიდიჭყეს ბიბლიეფიშ („ახალი ქიანაშ თარგმანი 1984 წანას გიშაშკუმალირ“) გიშაშკუმალა უჩა დო მონჭირელ შიდნიშფერ პოლიურეთანიშ კაბრათ. თე ბიბლიეფიშ გიშაკუმალარო თინეფქ თიცალ წებო დო სარჩულიშ ოკეთებელ მასალა გეგმირინუეს, ნამუთ დღას ვაფდეს გინამორსი; მუჟამს ბიბლიას კაბრა გაუკეთესინ, თის ხეთეშე ფორმაქ მეუდინ დო მანგარო დიჭყინჭყოლ. ირნერო ქეცადეს თე პრობლემაშ გინოჭკირუას, მარა მუთუნქ ვაგშურთეს.

კაბრეფიშ ოკეთებელ მასალაშ გიშმაშკუმალარ ართ-ართ კომპანიაშ წარმომადგენელეფქ თქუეს, ნამდა ლიბკაბრამ წიგნეფს ფორმა უდინუ დო თე პრობლემაშ გინოჭკირუა გვალო ახრებულ საქმე ვა რე. მარა, მოწმეეფს დუდი ვადუნებებნა თე საქმეშა დო ვა უფიქრებნა, ნამდა მანგარ კაბრამ ბიბლიაშ გიშაშკუმალაშ მეტი შხვა საშველი ვა რდუ. თინეფს გინოჭყვიდილ აფდეს თიცალ ლიბკაბრამ ბიბლიაშ გიშაშკუმალა, ნამუთ დიგაჸუნუ დო ხეთეშე ვადინუანს ფორმას. ოთხი თუთაშ დაკვირებაშ დროს გიმირინუანდეს შხვადოშხვა წებოს დო სარჩულიშ ოკეთებელ მასალას; ბოლოს ქიმიოგორუეს თიცალ კომბინაციას, ნამუქით გამართუ. თაშ ნამდა, ამდღა ჩქი მიღუნა თიცალ ბიბლია, ნამუთ ხეს დიგაჸუნუ დო ფორმა ხოლო ვა უდინუ.

2012 წანაშ ეკენიას იეჰოვაშ მოწმეეფიშ სტამბეფს მიოტუეს ჯვეშ ბიბლიეფიშ გიშაშკუმალა; მოწმეეფს ოკოდეს ბიბლიაშ გინომუშებულ „ახალი ქიანაშ თარგმანიშ“ გიშაშკუმალაშახ ჯვეშ ბიბლიეფიშ თება. ბიბლიაშ გინომუშებულ თარგმანიშ გიშაშკუმალა 2013 წანაშ 5 გიმათუთაშო, ბიბლიაშ დო ტრაქტატეფიშ საზოგადოება „საგუშაგო კოშკიშ“ ირ წანაშ შეხვალამაშო, აფუდეს გინოჭყვიდილ.

2013 წანაშ 9 არგუსოს, ობიშხას, ბიბლიაშ გინომუშებულ თარგმანიშ ელექტრონულ ვერსია ჩქინ სტამბეფშა მიდაჯღონეს; ბეშტუა მაჟია დღაშე ქიდიჭყეს. 15 არგუსოშო ხაზირ რდუ მთლიან ბიბლიაშ პირველ ეგზემპლარი. თეშ უკულ 7 მარაშ დინახალე უოლკილიშ დო ებინაშ სტამბეფს მოწმეეფი ართიანს თირანდეს თეშ 24-სათიან რეჟიმს მუშენდეს; თინეფქ 1 600 000 ცალი ბიბლია ბეშტუეს. თენა არძაშო დასაბაღ რდუ, თითოცალქ ქაშუკო, მიდგა ირ წანაშან შეხვალამაშა რდუ მოულირ.

მართალ რე, თე ახალი ბიბლია სქვამ დო გარზე რე, მარა არძაშ უმოს მნიშვნელოვან რე თექ ინოჭარილ სიცოცხლეშო აუცილებერ ინფორმაცია. ართ ოსურქ, ნამუთ შეერთებულ შტატეფს ცხოვრენს, ბიბლიაშ ეჭოფუაშე მაჟია დღას ათეცალ სიტყვეფი მოპჭარეს: „თე ახალი ბიბლიაშ ჭყოლოფუათ, უჯგუშო ბგებულენქ ნაკითხერს“.