იეჰოვაშ მოწმეეფიშ ლიტერატურა მთელ მსოფლიოს არძაშო რე ხეშამალაფარი. მილიონობით კოჩი თის თქვანცალო ელექტრონულ მონწყილობათ კითხულენს. ალბათ, გაიკვირდუნა თიშ გაგება, მუშმადიდა ტირაჟით იბეშტუ ჩქინ ლიტერატურა. 2013 წანაშე ბიბლიაშა გერსხილ ლიტერატურა სოდგარენ 700 ნინაშა გიშიშკუმალუაფ დო 239 ქიანას ივრცელებუ.

1920 წანაშახ ჩქინ ლიტერატურა შხვადოშხვა კომერციულ სტამბას იბეშტუდ. 1920 წანას მუსხირენ ჟურნალიშ დო ბროშურაშ ბეშტუა ბრუკლინს (ნიუ-იორკი) ართ ქირებულ ჭიჭე შენობას ქიდიპჭყით. ამდღარდღაშოთ თე ლიტერატურა 15 სტამბას იბეშტუ — აფრიკას, აზიას, ავსტრალიას, ევროპას, ჩრიდილოეთ დო სამხრეთ ამერიკას.

არძაშ უმოს მნიშვნელოვან წიგნი, ნამუსით ბეფშტანთინ, მუშო ოკო რაგად, ბიბლია რე. პირველ ბიბლია, „მეფე ჯეიმზიშ თარგმანი“ ინგლისურ ნინაშა, 1942 წანას ბეშტუეს. 1961 წანაშე მოჸუნაფილ იეჰოვაშ მოწმეეფი თარგმნუნა დო გიშაშკვანა „ბიბლია — ახალ ქიანაშ თარგმანიშ“ მთლიან ვერსიას. 2013 წანაშო ბიბლიაშ 148 მილიონშე მეტ ეგზემპლარი 121 ნინაშა რდუ გიშაშკუმალირ.

ოკო ქირაგადუას თიქ ხოლო, ნამდა ბიბლია, ნამუსით ჩქი გიშვუაშკვანთინ, სარკო გარზე რე, მუშენდა ჯგირ აკონწყილ რე. თეშ გარდა, ქარღადის, ნამუსით თიშ ობეშტალო გიმირინუანა, ვა უღუ მჟავა, ნამუთ დროხანიშ უკულ აჸვინთელენს ფურცელს. თაშ ნამდა, ირდღაშ გიმორინაფათ ბიბლია ვეფუჭებუ დო ბრელხანს გაირზუნა.

ჩქი პუბლიკაციეფს ხოლო გიშვაშკვანთ, ნამუთ ხალხის ბიბლიაშ გაგებას ოხვარუ. თუდო მოჩამილ რე 2013 წანაშ ნამთინე მონაცემეფი:

• „საგუშაგო კოშკი“, არძაშ უმოს მთავარ ჟურნალი რე, გიშიშკუმალუაფ 210 ნინაშა დო არძაშ უმოსო ივრცელებუ მთელ მსოფლიოს. თითოულ 16-გვერდიან ნომერიშ საშუალო ტირაჟი რე 45 000 000.

• „საგუშაგო კოშკიშ“ ეკმაჸვენჯი ჟურნალი რე „გამოიღვიძეთ!“, ნამუთ 99 ნინაშა გიშიშკუმალუაფ. თითოულ ნომერიშ ტირაჟ რე სოდგარენ 44 000 000.

• „მუს მოგურუანა ბიბლია სინამდვილეს?“, 224 გვერდი უღუნ ფერ ლიბკაბრამ წიგნი რე. თე წიგნი ხალხის ოხვარ ბიბლიაშ მთავარ გურაფეფიშ გაგებას. 2005 წანაშე თე წიგნიშ 214 მილიონშე უმოს ეგზემპლარი 240-შე მეტ ნინაშა ბეშტუეს.

• „ურჩქილით ღორონთის“, 32 გვერდი უღუნ ფერ ბროშურა თინეფშო რე გიშაშკუმალირ, მიდგას კითხირ უჭირს. თე ბროშურას უღუ სქვამ სურათეფი, ნამუსით თუდო ეთუჭარ ბიბლიურ ჭეშმარიტება ადვილო გაგებელ ნინაშა. თე ბროშურაშ 42 მილიონშე მეტ ეგზემპლარი გიშაშკუმალირ რე 400-შე მეტ ნინაშა.

ჟიშე მოშინაფილ პუბლიკაციეფიშ გარდა, იეჰოვაშ მოწმეეფი გიშაშკვანა შხვადოშხვა წიგნის, ბროშურას დო ბუკლეტის, ნამუთ ბიბლიაშ მაგურაფალეფს ოხვარ, ქიგეგან ბიბლიურ კითხვეფიშ პასუხეფი, მერუან პრობლემეფს დო უღდან ბედნერ ოჯახი. 2012 წანას იეჰოვაშ მოწმეეფიშ სტამბეფს 1,3 მილიარდშე მეტ ჟურნალი დო 80 მილიონი წიგნი დო ბიბლია ბეშტუეს.

ჩქინ სტამბეფიშ გაჯინუშა მოულირ კათა გაკვირებულ რენა, მუჟამსით ორწყენა, მუჭო მუშენა და დო ჯიმალეფი დო ოხვარა ლიტერატურაშ ბეშტუას. თაქ მუშენან თინეფი მუნეფიშ დრო დო ენერგიას შურ დო გურით ახარჯენა. უმენტაშის ბეთელიშ (ნიშნენს „ღორონთიშ ჸუდეს“) მოულაშახ დღას ვა უმუშებ თეცალ სამუშას. მარა თინეფქ ბეთელს მიკორთეს სპეციალურ გურაფაშ კურსი დო პრაქტიკულო ხოლო გიმირინუანდეს ნაგურეფუს. თაშ ნამდა, თინეფქ ჯგირო ქიდიგურუეს თე საქმე. მაგალთო, თაქ ბრელშა ძირუნთ, მუჭო მუშენს 20 წანას გინოჩილითარ ახალგაზრდა მაღალსიჩქარეშ ობეშტალ მანქანაწკუმა, ნამუთ საათის 16 გვერდი უღუნ ფერ 200 000 ჟურნალს ბეშტანს.

მთელ მსოფლიოს იეჰოვაშ მოწმეეფიშ საქმიანობა ნებაყოფლობით შესაწირავეფით იფინანსებუ. „სიონიშ საგუშაგო კოშკიშ“ (ამდღანერ „საგუშაგო კოშკი“) 1879 წანაშ არგუსოშ ნომერს ჭარუდ: «ჩქი ბჯერა, ნამდა „სიონიშ საგუშაგო კოშკი“ იეჰოვაშ ჭყოლოფუათ გიშიშკუმალუაფ, ათეშგურშენ ხალხის დღას ვა ფთხინთ ფარას». ჩქი ამდღა ხოლო თე აზრიშ ვორეთ.

მუშენ მიკვახარჯენთ თესხი დროს, ფარას დო ხანდას პუბლიკაციეფიშ გიშაშკუმალას? იმენდი მიღუნა, ნამდა ჩქინ გიშაშკუმალირ ბიბლიეფი, წიგნეფი დო ჩქინ ვებ-გვერდის გედვალირ პუბლიკაციეფი ღორონთწკუმა ხოლოს რჸოფირენა.