2014 წანაშ 8 მარტის, საბატონს, ხუთთუთიან ინტენსიურ გურაფაშ უკულ ბიბლიურ სკოლა „გალაადიშ“ 136-ა კლასიშ თებაშ პროგრამაქ ჩეტარუ. თე სკოლას იეჰოვაშ მოწმეეფი გურაფლენა, მუჭო აკეთან მუნეფშა მენდებულ საქმე უმოს უჯგუშო დო მუჭო გამანგარან და დო ჯიმალეფი. პროგრამა გვალო 11 548 კოჩიქ მირჩქილუ, ნამუქით იეჰოვაშ მოწმეეფიშ ოგურაფალ ცენტრის, პატერსონს (ნიუ-იორკი) ჩეტარუ; ამერიკაშ შხვა ქალაქეფს დო შტატეფს, კანადას, იამაიკას დო პუერტო-რიკოს პროგრამა ვიდეოტრანსლაციათ მიშუ.

„თიცალ აზრი გიღუდან, მუნერით ქრისტე იესოს უღუდ!“ იეჰოვაშ მოწმეეფიშ ხემანჯღვერე საბჭოშ წევრიქ, დეივიდ სპლეინქ, ნამუსით პროგრამა მეჸუნდ, ფილიპელეფიშ 2:5—7-ს ინოჭარილ სიტყვეფი მიჸონ. თაქ ჭარუ: „თიცალ აზრი გიღუდან, მუნერით ქრისტე იესოს უღუდ!“. დედამიწას რდუნ თიმწკუმა იესო მუშ დუდშე ვა ფიქრენდ; თინა თანდაბალო ორთუთ ღორონთშე მენდებულ საქმეს.

მაგალთო, მუჟამს ეშმაკი ოცადუდ იესოშ ჩილათას, ღორონთიშ სქუა თაშ პასუხენდ: „ჭარილ რე“ დო უკულ მოჸუნდ თი სიტყვეფი, ნამუთ მოსექ ისრაელ ხალხის უწუ (მათე 4:4, 7, 10; კანონი 6:13, 16; 8:3). იესოს შეულებუდ ვა მუშინუაფუდკო მოსეშ სიტყვეფი დო მუშით ქიმუჩამუდკო სატანაშა პასუხი, მუშენდა თინა ღორონთიშ ცხებულ სქუა რდუ, მარა თეცალ საქციელით ოძირუ, მუშმადიდა საქმე აკეთუ მოსექ. თეშნერო, ჩქი ხოლო ქობძირათ ოკო შხვეფიშ რჩქინა დო ნიჭი დო ვა მუარკათ ოცქვაფურ სიტყვეფი.

ჯიმა სპლეინქ თინა ხოლო თქუ, ნამდა იესოს ბოლოშა სწორი თოლწონუა უღუდ, მუჟამს დედამიწას მსახურენდ. ღურაშახ ჭიჭე ხანით ადრე თიქ მუშ ზეციერ მუმას ათეცალ სიტყვეფი უწუ: „მა განგადიდ დედამიწას, ბოლოშა ქიმიპჸუნ საქმე, ნამუშ კეთება დუმავალ. ასე, მუმა, განგადიდენქ თი დიდებათ, ნამუთ სქანწკუმა მიღუდ ქიანაშ გოჭყაფაშახ“ (იოანე 17:4, 5). იესოს დღას ვაკოდ თიშე მეტ, მუთ დედამიწაშა მოულაშახ უღუდ. თის ხვალე თინა ოკოდ, ნამდა მუჟამს ზეცაშა დირთუდუნ, ღორონთის თიშა დუდშე უღუდუნ თი მდგომარეობა დურთინუაფუდკონ. „გალაადიშ“ სკოლათებულეფქ იესოშ მაგალითის ოკო მიჸაუნან; თინეფქ მუნეფშა მენდებულ საქმეშ კეთებაშენ ოკო იფიქრან დო ვართ ხოლო მუნეფიშ მდგომარეობაშენ. ხოლო მეტ საქმეშ კეთება ვა დავალეს-და, თის ოკო გეჯერდან, მუდგას ადრე ორთუდეს.

„ემსახური იეჰოვას ვენარღენ თეშ!“. უილიამ მალენფანტიქ, ნამუთ ხემანჯღვერე საბჭოშ გურაფაშ კომიტეტის ოხვარუ, სკოლათებულეფს უწუ, ნამდა პავლეცალო დუდი უდუზოგებუო უმსახურებდესკო. პავლე ულირს ვეკანარღუდ დო ათეცალ სიტყვეფს იჩიებუდ: „იპჭყოლიდუანქ ულირს დო მიმჭუაფუქ მუთ წოხლე რენ თიშა, მიმჭუაფუქ მიზანჸურე“ (ფილიპელები 3:13, 14).

სკოლათებულეფი ირიათო ვენარღენან თეშ ქემსახურებნა ღორონთის-და, თი ართგურ მსახურეფცალო მიქციებნა, მით ჯვეშ დროს ცხოვრენდეს დო ქოთ ჩქინ დროს ცხოვრენა. ჯიმა უილიამქ ართ დაშ, კლარა გერბერ-მოიერიშ სიტყვეფი გიშინუ, ნამუთ ჭიჭენობაშე ომსახურუდ ღორონთის. თე და იჩიებ: „მუშმადიდა ხიოლი მოუღუ თიშე ფიქრის, ნამდა 80 წანა რე ღორონთის ვომსახურუქ. ართ წუთის ხოლო ვა მნარღენქ თეს. დუდშე ქეშემლებდას ცხოვრებაშ დოჭყაფან, კინ თე შარას გივოდორთუდ“.

„ფქადაგენთ ანგელოზეფწკუმა ართო დო თინეფცალო მსახურენთ“. ხემანჯღვერე საბჭოშ წევრიქ გერიტ ლოშიქ სკოლათებულეფიშ გასაგონეთ თქუ, მუშმადიდა პატი უღუნა თინეფს, მით სახიოლო ამბეს ქადაგენს. თინეფი ანგელოზეფცალო მსახურენა, მუჟამს ხალხის ღორონთიშ სამეფოშ გურშენ სახიოლო ამბეს გინოჩანა, მუშენდა ბიბლიას „ანგელოზო“ გინოთარგმნილ ებრაულ დო ბერძნულ სიტყვა „ამბეშ მიმაღალარს“ ნიშნენს. ჯიმა ლოშიქ თინა ხოლო თქუ, ნამდა მუჭოთ მოწაფე ფილიპეშ მაგალითი ოძირანსინ, სახიოლო ამბეშ ქადაქებას ანგელოზეფი ხენჯღვერანა (საქმეები 8:26—35).

ჯიმა ლოშიქ მუსხირენ შემთხვევა გიშინუ, ნამუთ იეჰოვაშ მოწმეეფს მსახურებაშ დროს უღდეს. მაგალთო ართ იეჰოვაშ მოწმე გაბინო, ნამუთ მექსიკაშე რე, ქადაგებაშ დროს კარს ხვალე ართშა ვარდა ჟირშა უხაკუანს, მარა ართშა, მუჟამს ჟირშა დოხაკაფაშ უკულ კარი მითინქ ვაგუნჯუნ, ხოლო ჟირშა ქუდუხაკუ. თეშ უკულ კარი ართ ქომოლკოჩიქ განჯუ. თიქ გაბინოს უწუ, ნამდა გვალო თე წუთის დუდიშ ჸვილუა ულამუდ. „მუჟამს კარს მანთხაშა ქიდომხაკეთინ, კისერშა თოკი მაფუდ მოსკუაფილ, მარა გეიმწყი თოკი დო კარი გოინჯით. მადლობა ხაკაფი ვემიოტეთინ თიშენ. თაშ ვა ჸოფედკონ, ამდღა ცოცხალ ვეპჸიდ“.

მინშა შილებე თეცალ სიტუაციეფშენ ფთქუათ, ნამდა შემთხვევით მოხვად, მარა შემლებნა ბჯერდან, უმენტაშო თენა თაშ ვა რე. თეცალ შემთხვევეფშე იძირე, ნამდა მთელ მსოფლიოს ქადაქებაშ საქმეს ღორონთიშ ანგელოზეფი ხენჯღვერანა (გამოცხადება 14:6).

„ღირსუანეფს ხვამა ვა მაკორდუნა!“ გალაადიშ სკოლაშ ართ-ართ მასწავლებელქ მაიკლ ბარნეტიქ იაბეციშ მაგალით მიჸონ, ნამუთ იუდაშ გამნარყი რდუ დო მუშ ჯიმალეფშე უმოს პატიგედვალირ კოჩო ითვალუდ. იაბეციქ ღორონთის ათეცალ მუდგარენ თხუ: „დოფხვამანქ-და, დიხას უმოსის ქომჩანქ-და, სქან ხე ქიჸუაფუ ჩქიმწკუმა-და, დოფთხილანქ უბედრობაშე-და ...“ (1 მატიანე 4:9, 10).

სკოლათებულეფს შეულებნა იაბეციშ მაგალითის მიაჸუნან დო კონკრეტულო ილოცან; თინეფქ არძაშ უმოსო თიშენ ოკო ილოცან, ნამდა „გალაადის“ ნაგურეფი პრაქტიკულო გეგმირინუან. სკოლათებულეფს შეულებნა ღორონთის თხუან, დოთხილუას თინეფი უბედრობაშე, მარა თენა თის ვა ნიშნენს, ნამდა დღას პრობლემა ვაღვენუნა; უბრალოთ ღორონთი ძალას ქიმეჩანს, ბრელ ვედარდან დო გურქ ვაგუტირხან. ზეციურ მუმაქ იაბეციშ ლოცვას ქუპასუხ, თინა „გალაადიშ“ სკოლათებულეფიშ ლოცვას ხოლო ვედიტენს პასუხიშ უმშო.

„ირიათო ერზამილეფი რდათ!“ აუდიტორიაშ წოხოლე მოხსენებათ გიშართუ „გალაადიშ“ ხოლო ართ მასწავლებელქ მარკ ნიუმარქ, ნამუთ გურაფაშ კომიტეტის ოხვარუ. მოხსენება 1 თესალონიკელეფიშ 5:16—19-შა რდუ გერსხილ. თიქ თქუ, ნამდა დაჩხირქ ვა შკირტასინ თიშო, საჭირო რე დაჩხირიშ დარზამალ, ჟანგბადი დო სიფურალა. თეშნერო, სკოლათებულეფს ხოლო სუმ მუდგარენ ოსაჭირნა, ვაშკირტან დო კინ ერზამილო იმსახურანინ თიშენ.

პირველ რიგის თინეფს 1 თესალონიკელეფიშ 5:16-ის ინოჭარილ სიტყვეფიშ გიმორინაფა მეხვარებუ. თე მუხლის ჭარ: „ირიათო გოხიოლდან“. ხიოლი დაჩხირიშ დარზამალცალ რე დო მუჟამს სკოლათებულეფი ჯგირო დეფიქრებუნა, მუშმადიდა ბედნერობა რე იეჰოვაშ მოწონა უღუნან თინა, თინეფი უმოს გურერზამილო იქადაქენა. თეშ გარდა, აუცილებერ რე ირიათო იბლოცათ (1 თესალონიკელები 5:17). ლოცვა ჟანგბადცალ რე, ნამუთ საჭირო რე დაჩხირქ ვა დოშკირტას თიშენ. ჩქი მოსაჭირნა „ჟანგბადი“, ნამდა ვაფშქირტათ დო ერზამილ ვორდათ მსახურებას. თენა თის, ნიშნენს ნამდა უმოს მეტ დრო გეგმურთათ ლოცვას დო გური გეგნუფაჩათ იეჰოვას. დიდ მნიშვნელობა უღუ სიმარდულიშ გიმოხანტუას, მუშენდა ღორონთიშ სიტყვა მირაგადუნა: „ირფელშენ მარდულეფი რდათ“ (1 თესალონიკელები 5:18). სიმარდულით ეფშა გური იეჰოვაწკუმა დო და დო ჯიმალეფწკუმა ხოლოს პჸოფირენა; თეგვარო ჩქინ დო თინეფშკას ურთიერთობეფი ტიბუ. ჯიმა ნიუმარქ არძაშ გასაგონეთ თქუ: „ვა რდათ კრიტიკულეფი, რდათ მარდულეფი, გიღუდან ჸოროფა, ნამუთ ჸინ ჰაერს ვაგარგილე“.

„ზეცა განადიდენს ღორონთის, სი ხოლო განადიდ ღორონთი!“ სემ რობერსონქ, ნამუთ თეოკრატიულ სკოლეფიშ განყოფილებას მსახურენს, თემაშ დაჭყაფუ სიტყვეფი ბიბლიურ მუხლეფშე მიჸონუ, სოდეთ რაგად რე, ნამდა ბჟა, თუთა დო მურიცხეფი განადიდენა იეჰოვას, მუნეფიშ გუმაჭყაფალს (ფსალმუნი 19:1; 89:37; 148:3). თიქ თქუ, ნამდა სკოლათებულეფს ბრელშა უღუდეს ღორონთიშ განდიდებაშ საშუალება. თიქ თხუ სკოლათებულეფს, ინსცენირებეფით ქოუძირაფდესკო შემთხვევეფი, ნამუთ სკოლას გურაფაშ დროს უღუდეს. მაგალთო, ართ სკოლათებულს ათეცალ შემთხვევა უღუდ: ართშა მანქანათ მიშუნ თეშ შარა ქიმეჩუ ართ ქომოლკოჩის, ნამუთ ინვალიდიშ სავარძელს გეხედუ დო ქუჩას გინმიშუ. თე კოჩიქ მადლობა გინუგ ჩქინ ჯიმას. თინეფ შქას საინტერესო ჩიებაქ მიდართუ დო ბოლოს თე კოჩის ბიბლიაშ გურაფაქ ხოლო მეკორინ. თეშ უკულ მუსხირენ მარაშ დინახალე, მუჟამს ჩქინ ჯიმა ბიბლიაშ დაგურაფშა გილეშუ თე კოჩშან, თიქ თიშ ნათესეფს ხოლო ქუქადაქუ. საბოლათ, შკვით კოჩიქ ქიდიჭყუ ბიბლიაშ გურაფა.

„რჩქინა, ნამუსით ღორონთშე ბღებულენთ, ძალას მარზენა!“ დონალდ გორდონქ, ნამუთ გიშაშკუმალაშ კომიტეტის ოხვარ, ინტერვიუ ეჭოფუ ჟირ სკოლათებულ წყვილშე. ართი ჯიმაქ გიშინუ, ნამდა გურაფაშ დროს ბრელშა რდუ რაგად ეფესოელეფიშ 3:16—20-ის ინოჭარილ სიტყვეფშენ. თაქ მოშინაფილ აზრეფშე სტუდენტეფქ ქოძირეს, ნამდა სულიერო გემანგარანინ თიშო, დიდ მნიშვნელობა უღუ, რდან თანდაბლეფი, აკეთან ირფელ, შხვეფქ თავისფალო ქიგინან დუდი თინეფწკუმან თიშო დო ჯგირო გეაზრან, ნამდა იეჰოვას დიო ხოლო ბრელ საქმე უღუ თითოულ მუშ მოწმეშო. ართ დაქ გიშინუ, მუჭო ელუკინუ გურშა სტუდენტეფს „გალაადიშ“ მასწავლებელიშ სიტყვეფქ. თიქ ჩხომეფიშ მაგალით მიჸონუ დო თქუ, ნამდა დიდ ჩხომს ჭიჭე აკვარიუმს რდუალა ვეშულებ. ათეშგურშენ სტუდენტეფს უწუ, ჸოფედესკო ჭიჭე ჩხომეფცალ დო თაშ ქოფთქუათინ, უნჩურდესკო დიდ ოკეანეს, სოდეთ ირიათო აღვენუდეს რდუალაშ საშუალება. თე და იჩიებუ: „თე მაგალითიქ მოძირუ, ნამდა იეჰოვაშ ორგანიზაციას არძაშ უჭიჭაშ ქიპჸუაფუქ-და, იეჰოვა მიმეხვარებ სულიერო მიბრდენ“.

„საჯგირობუოთ ქიგომშინ იეჰოვა“. ხემანჯღვერე საბჭოშ წევრიქ, მარკ სანდერსონქ აუდიტორიაშ წოხოლე მთავარ მოხსენებათ გიშართუ. თიქ მუშ მოხსენება გიორსხუ ნეემიაშ სიტყვეფს, ნამუთ ლოცვაშ დროს თქუ: „საჯგირობუოთ ქიგომშინ, ჩქიმ ღორონთი“ (ნეემია 5:19; 13:31). ნეემიას შურო ვაეჭუდ, ნამდა იეჰოვა გიჭყოლიდუანდ მუს ვარდა მუშ ხანდას, ნამუთ ღორონთიშ მსახურებაშა მიშუძუდ. თინა ღორონთის თხინდუ, ჸოროფათ ქიგუშინუდკო დო დუხვამუდკონ.

ნეემიაცალო, სკოლათებულეფს ხოლო საეჭვოთ ოკო ვა უღუდან, ნამდა იეჰოვა თინეფს ხოლო ქიგიშინანს საჯგირობუოთ, „გალაადიშ“ სკოლას ნაგურეფის გეგმირინუანა-და. თინეფს ირიათო ოკო შუდან, ნამდა ღორონთის ჸოროფაშ გურშენ ოკო ცან თაყვანი დო ემსახურან (მარკოზი 12:30). აბრაამს მთელ გურით უჸორდ იეჰოვა, ათეშგურშენ იეჰოვას ვა გუჭყოლიდუაფ თინა. თიშ ღურაშე საუკუნეეფქ გემკორთუ, მარა იეჰოვა აბრაამს მუშ მეგობარო მიშინუანდ (ესაია 41:8).

თეშ უკულ ჯიმა სანდერსონქ სკოლათებულეფს ხოლო ართშა გაშინუ, ნამდა უჸორდესკო მოყვასი, არძაშ უმოსო ქრისტიანი და დო ჯიმალეფი (მარკოზი 12:31). ჯგირიშ მაკეთებელ სამარიელცალო, ნამუქით „გიმარინაფალეფიშ ხეშა ეშალაფირიშ“ მოყვასო გინირთუ, თინეფქ ხოლო არძას ოკო მეხვარან (ლუკა 10:36). თე აზრი ჯგირო ქიგეგესკონ თიშენ, ჯიმა სანდერსონქ, ნიკოლას კოვალეკიშ მაგალითი მიჸონ, ნამუთ ართ დროს „გალაადის“ გურაფლენდ დო საოლქო ზედამხედველო ხოლო მსახურენდ. ჯიმა კოვალეკის არძა თით იჩინენდ, ნამდა მანგარ მოჸოროფე რდუ. ართშა თიქ ართ სარაიონო ზედამხედველს დო თიშ ოსურს კინ გურგედვალირო უმსახურებდესკონ თიშენ, თეცალ სიტყვეფი უწუ: „ირიათო ოჭმარეს ადრე, მარაშ დაჭყაფუს, თუთაშ პირველ რიცხვეფს დო წანაშ დაჭყაფუს დიჭყით მსახურება!“. თინა მუსხირენ დღას სარაიონო ზედამხედველიშ ოსურს ოკვირუდ დო უკულ უწუ: „გიჭყოლიდე მუთ გიწინ; სი თეშით ხოლო ბრელს ხანდენქ! ჭიჭე ქიმისვანჯი, მსახურებაშო ძალაქ ქუგობაღას თიშენ“. თეცალ გემუან რაგადიქ თე დას მეხვარუ, ნამდა წანეფიშ დინახალე სრულ დროთ უმსახურებუდკო.

ბოლოს ჯიმა მარკ სანდერსონქ სკოლათებულეფს უწუ, დღას ვაგოჭყოლადდესკო, თე სკოლაშ მიზანი — ნაგურეფი შხვეფშა ოკო გეგნუჩამდესკო დო ჯგირ საქმეეფიშ კეთება ქუდუგურუაფდესკო (2 ტიმოთე 2:2). ჯიმა მარკიქ თქუ, ნამდა მუჟამს თინეფი მუნეფშა მენდებულ საქმეშ კეთებას ქიდიჭყანან, თინეფიშ შური შხვეფს ხოლო გეგნადვალუდ, და დო ჯიმალეფს გურშა ელუკინანდეს დო ქუდაჯერენდეს, ნამდა იეჰოვა საჯგირობუოთ ქიგიშინანს თინეფს (ფსალმუნი 20:1—5).

ბოლო სიტყვა. დიპლომეფიშ გინოჩამაშ უკულ, ართ სკოლათებულქ არძაშ სახელით სიმარდულიშ წერილი წეკითხუ. პროგრამაშ ბოლოს ვითოხუთ სკოლათებულქ იბირუ 123-მა ობირეში წიგნიშე „უბირით იეჰოვას“.