ლითონიშ მასალა C ოცხოვრებელ ჸუდეშ ორთვალიშ კარკასშო.

გიოჯინუ სამხრეთშე; უკახალაშე რჩქუ ლურჯი ტობა, წოხოლეშე იძირე, მუჭო ენაბუნა B ოცხოვრებელ ჸუდეშ ფუნდამენტის. ოშენებელ ობიექტის 13 ემაჭოფალ მანქანა მუშენს.

რკინაშ შველერეფი დო ძელეფი გახაზირებულ რე კარკასიშ ეიონწყუალო. რკინაშ თეცალ დიდ დო ფართო კონსტრუქციეფით იშენებაფუაფ დარბაზეფი დო თინა პროექტიშ თებას ხოლო აჩქარენს.

C ოცხოვრებელ ჸუდეშ ორთვალშო ენწყილ კარკასი მეტალით დო წყარვეკლურსინ ფერ მასალათ იფორუ. უკახალეშე იძირე, მუჭო აშენენა გვერდგანიან ორთვალიშ კარკასის.

კონტრაქტორეფი რკინაშ შველერეფით ეკოდგუნა კარკასის. თე შენობას იჸუაფ ოჭკომალიშ ოკეთებელ ოთახი, ოსადილებერ ოთახი, ონახვალეფიშ ოთახი დო შხვა განყოფილებეფი.

ჯიმას, ნამუთ კანალიზაციაშ ინჭას ენოხენ, ოხეხალს არზენა.

გასამორსე კიდალა თიშ გურშენ აშენეს, ნამდა ქუგუგებდესკონ, მუნერ იჸუაფუდ კიდალაშ კიდირ ანგურაშ დო ჩიკატურიშ გიმორინაფაშ უკულ. თის ახალმოულირ მოხელეეფშიშ ოძირაფალო ხოლო გიმირინუანდეს. თინა ანწი ვა რე საჭირო დო აკარღვანა.

ეიონწყუალ ორთვალიშ ართ ძგას ემაჭოფალ მანქანათ შენობას გედვანა. სუმკუნთხუან ორთვალი გასქვამენს შენობაშ წოხოლენ კიდირს.

ემაჭოფალ მანქანათ გიმუღნა 95 000 ლიტრიანი ბაკი საწვავშო. თეცალ ბაკეფით ბოილერეფშო ახაზირენა საწვავს.

სურათშე იძირე შენობაშ გალენ პიჯი. სურათის მარძგვანშე იძირე ლურჯი ტობა. შენობაშ გალენ კიდირიშ ოსქვამებელო შხვადოშხვა ფერიშ მასალას გიმირინუანა.

სანტექნიკოსი ჩილ დო ქომონჯი ამონტაჟენს კანალიზაციაშ მილეფს, თეშ უკულ ჟიშე ბეტონს გიობნა.

მოხალისეეფი ორთვალს წიმინდანა თირშე.

ხოლო ართ სანტექნიკოსი ჩილ დო ქომონჯი წყარიშოულარ სისტემაშ გეგმას გინაჯინე.

მეურს გორქიებულ მუშება. ეიონწყუნა ბეტონიშ ენაბუნალეფს და გიობნა ბეტონს. სურათის კვარჩხანშე იძირე ოშენებელ ადმინისტრაციულ შენობა. თიშ ართ კუნთხუ ფორილ რე სპეციალურ ბრეზენტით, ნამუთ დაჩხირს ურზუნ ფერ მასალას დო ენობუნილ ბეტონს საჭირო ტემპერატურას ვა უდინუანს. ათეშნერო სამუშეფი ზოთონჯიშ ხოლო ვა რე პრობლემა.

კიდალაშ პანელეფიშ მიკომარგებაშახ მაშენებელეფი ორქის ვემშიშკვანსინ ფერ მასალათ ფორნა ბეტონიშ ფილეფს დო სვეტეფს.

დასავლეთშე ათეცალ მიოჯინუ უღუ. სურათიშ ბოლოს იძირე ოცხოვრებელ ჸუდეეფი, ოშკაშეთ, მარძგვანშე — ჩე ფერიშ ადმინისტრაციულ შენობა. სოდგარენ 100 გექტარი დიხაშ 20 პროცენტშე ნაკლებიქ იჸუ გიმორინაფილქ ოშენებელო, მუთ საშუალებას ირზენს, გოხოლუას რენ თი ტყას ხე ვემეფთხათ.

აღმოსავლეთშე ათეცალ მიოჯინუ უღუ. წოხოლეშე ვორწყეთ C დო D ოცხოვრებელ შენობეფს. მუშება ითებუ C ოცხოვრებელ ჸუდეშ ორთვალს, სოდეთ ლითონიშ პანელეფს გიამარგენა.

მოხელე ლამინატის გიორჩანს ოთახის. წინასწარ მოხაზირებულ ოთხი თეცალ ოთახშე ართის გიშაგორუნა ოცხოვრებელ ჸუდეეფს ოთახეფიშ მანწყუალო. თეცალ ოთახეფშო წინასწარ რე გიშაგორილ ოკრასკალი, ნოხი, ლამინატი, კაფელი დო ოჭკუმალიშ ოთახიშ მონწყილობა.

მოხელე ხეთ თიშენ ასწორენს ბეტონიშ ჟინპიჯის, ნამდა პროლს გიოლაფუქ ქაშუას დო წყარქ ვეგესკიდას.

77 წანერ ტექნიკოსის ოპტიკურ-ბოჭკოვანი კაბელი მინოჸუნს. მუჟამს თე პროექტი გეთებუნ, გვალო 32 კილომეტრიშ სიგინძაშ კაბელი იჸუაფუ გოჸუნაფილ.