2014 წანაშ 1 მარტის, საბატონს, ქალაქ ბენინ-სიტის იეჰოვაშ მოწმეეფიშ სამეფო დარბაზის 823 კოჩიქ დიშაყარ; თინეფი განსაკუთრებულ დღას აღნიშნენდეს. 1999 წანაშე მოჸუნაფილ, მუჟამსით პირველო დიჭყუ სამეფო დარბაზეფიშ გედგუმაქ საშუალება ვა უღუნა ფერ ქიანეფს, იეჰოვაშ მოწმეეფქ 3 000 სამეფო დარბაზი გედგეს.

თე განსაკუთრებულ შაყარუას იჩუეს, მა-20 საუკუნეშ 20-იან წანეფშე დოჭყაფილ მუშმადიდა ხანდა მიკაძირეს იეჰოვაშ მოწმეეფქ კრებეფს ოსაჭირუდუნ თისხი სამეფო დარბაზეფიშ გედგუმას. გვალო დუდშე მოწმეეფი ართიანიშ ჸუდეეფს ვარდა ქირებულ შენობეფს იშაყარუდეს. პირველ შენობა, სოდეთ იეჰოვაშ მოწმეეფი იშაყარუდესინ, სოდგარენ 1935 წანას ქალაქი ილეშას გედგეს. 1938—1990 წანეფს კრებეფიშ რიცხვიქ 200-ით მირდუ; 1938 წანას, გვალო 14 კრება რდუ, მარა 1990 წანაშოთ კრებეფიშ რიცხვი უკვე 2 681 რდუ. თე ხანეფს ნიგერიაშ მოწმეეფშო ეფი ვა რდუ კრებაშ ოტარებელ ადგილეფიშ გორუა. ნამთინე სამეფო დარბაზის ამშვი კრება იტარებუდ, ნამთინე დარბაზშა თისხი კოჩი მიშუ, ნამდა ონტირუ ვა რდუ; ხალხი გალე კუჩხიშ გერინელო ურჩქილედუ პროგრამას. ნამთინე კრება კინ ჸუდეეფს ვარდა სკოლას იშაყარუდ.

1990 წანას იეჰოვაშ მოწმეეფიშ ფილიალქ სამეფო დარბაზიშ ფონდშე დარბაზეფიშ ოშენებელო სესხეფიშ მეჩამა ქიდიჭყუ. 1997 წანას რეგიონულ შენებაშ კომიტეტეფქ 105 კრებას მეხვერუ დარბაზეფიშ გედგუმას დო რემონტის. 1997—1999 წანეფს შენებულ რდუ 13 დარბაზი; თითოულ დარბაზი 7—15 დღას იშენებუდ.

თეცალ ჩქარ ტემპიშ უმკუჯინუო, ნიგერიას იეჰოვაშ მოწმეეფიშ სამეფო დარბაზეფი იშენით ვა ბაღუდ დო საჭირო რდუ მეტიშ გედგუმა. 1998 წანაშ აპრილს იეჰოვაშ მოწმეეფიშ ფილიალქ ქიმერთუ თი აზრიშა, ნამდა ნიგერიას სიჭირო რდუ 1 114 სამეფო დარბაზიშ გედგუმა.

ბენინ-სიტის შაყარელ და დო ჯიმალეფს ნიგერიაშ ფილიალიშ კომიტეტიშ წევრიქ, დონ ტროსტიქ, ათეცალ სიტყვეფი უწუ: „და დო ჯიმალეფქ მანგარო იხანდეს! ფიფქრენდით, ნამდა თესხი დარბაზიშ გედგუმა ვეშმალებედეს“. 1999 წანაშე დოჭყაფილ ირფელქ კარაკანო ქიძირუ; სამეფო დარბაზეფიშ 6—8 კოჩიან მაშენებელ ჯგუფეფქ მთელ მსოფლიოს მუსხირენ კრებას მეხვარეს. თინეფი ეფი კონსტრუქციაშ დარბაზეფს გედგუნდეს, ნამუშ ჭყოლოფუათ ბოლო 14 წანაშ დინახალე თუთას სოდგარენ 17 დარბაზის აშენეს.

თეშ უკულ ჯიმა ტროსტიქ აუდიტორიას ქაცქუ დო უწუ, ნამდა დიო ხოლო ბრელ აფუდეს ოკეთებელ. 2013 წანას ნიგერიას იეჰოვაშ მოწმეეფიშ რიცხვი 8 000-შე მეტ რდუ. თიქ თქუ: „ანწი ხოლო თაშ ქიჸუდა, ირ წანას 100 სამეფო დარბაზი მაჸინა გიოდგუმალი“. 2013 წანას ნიგერიას იეჰოვაშ მოწმეეფიშ რიცხვიქ 351 000 ქიმიოჭირინუ, კრებეფიშ რიცხვიქ 5 700 -ს მიკულუ.