ჩქი ვა ვურიდანთ დუც თი ნათილ იეჰოვაშ მოწმეეფწკუმა ურთიერთობას, მით უკვე ვა ქადაგენს დო შილებე თანაქრისტიანეფს ხოლო რდას ჩათხიებულ. თეშ გინაწონს, ვოხვარუთ თინეფს, გურშა ელვუკინანთ დო ვოცადუთ კინ გოვურჩქინათ სულიერ საზრდოშ ინტერეს.

 თინა მით აშენს, ავტომატურო ვეგერიცხებ. მარა, მუჟამსით იეჰოვაშ მოწმე, ნამუთ ნათილ რე, შეგნებულო ვემეჸუნს ბიბლიურ ზნეობრივ პრინციპეფს დო ვა ნარღენს დაშებულს, შხვა იეჰოვაშ მოწმეეფ მიოტენა თიწკუმა ურთიერთობას დო თინა ქრისტიანულ კრებაშე გერიცხებ. ბიბლიას პირდაპირ ინოჭარ: „ჩეთხინეთ უბადო ადამიანეფ“ (1 კორინთელები 5:13).

 მარა ქრისტიანულ კრებაშე გარიცხულ პიროვნებაშ ჩილ დო სქუა იეჰოვაშ მოწმე ქორენ-და, თინეფ, მუშო ოკო რაგად აგრძელენა ართ ოჯახო ცხოვრებას, მარა ართ რელიგია უკვე ვაერთიანენა.

 გარიცხულ პიროვნებას შეულებ დესწრას ჩქინ რელიგიურ შეხვალამეფს. ქაკონ-და, შეულებ სულიერ მოხვარა ხოლო მიღას ქრისტიანულ კრებაშ უხუცესეფშე. ჩქინ მთავარ მიზან რე, მივეხვარათ თის, კინ გინირთას იეჰოვაშ მოწმექ. მუჟამსით გარიცხულ პიროვნებეფ მიოტენა ღორონც ვა მოწონსინ ფერ ცხოვრებაშ წესის დო შურ დო გურით ქეცადებნა ბიბლიურ მოთხოვნეფიშ თანახმათ ქიცხოვრან, ქრისტიანულ კრება თინეფს ხიოლით მიღენს.