Olo afaka anaka ndreky man̈adoso tsaiky zen̈y tsy mira. Baiboly nata tsy mikoran̈a momba “fan̈adosoan̈a tsaiky”, koran̈iny ao karakory hevitriny Zan̈ahary momba fahin̈ana ndreky tsaiky mbala an̈aty kibo.

 Fahin̈ana io kadô baka amy Zan̈ahary. (Genesisy 9:6; Salamo 36:9) Amy Zan̈ahary, samy valera fahin̈ananolo jiaby, an̈isanizen̈y fahin̈anany tsaiky mbala an̈aty kibo. Ke izikoa olo araiky man̈adoso tsaiky, izy mamono olo.

 Zan̈ahary nan̈amia lalàn̈a Israelita aby io mivolan̈a karaha ty: “Izikoa misy olo miady, ke mahavoa man̈angy mavesatra, baka io zanany teraka tsy ampy fanjava, ndray tsisy olo naty, irahin̈y man̈efa onitry olo io, arakaraka raha takiny vadiny man̈angy io. Mandeha amy pitsara izy koa fa han̈efa izio. Fa izikoa ndraiky misy naty, anao tsy maintsy man̈amia ain̈y hatao solony ain̈y.”​—Eksodosy 21:22, 23. a

•  Lera karakory ma tsaiky vo olo?

•  Zan̈ahary ma mamela helokonolo efa navy nan̈adoso tsaiky?

•  Mety ma man̈adoso tsaiky izikoa avozoan̈a tsao hofoaty tsaiky io miboaka baka ao na mety hanahiran̈a reniny?

 Izikoa Baiboly zahan̈a, miaraka tsaiky araiky miforon̈o an̈aty kibony reniny, efa olo edy izy. Amy Zan̈ahary, mira fo fahin̈anany tsaiky efa teraka ndreky fahin̈anany tsaiky mbala an̈aty kibo. Misy ohatra vitsivitsy mankamarin̈y zen̈y ty:

•   Panjaka Davida nahazo fan̈ahy masin̈y nivolan̈a karaha ty: “Masonao efa nahita zaho, rango zaho vo niforon̈o.” (Salamo 139:16) Hitantsika baka amy zen̈y fa nata izy mbala tan̈atiny kibo, efa olo edy izy tamy Zan̈ahary.

•   Karaha zen̈y koa paminan̈y Jeremia. Izy mbala tsendriky teraka, Zan̈ahary efa nivolan̈a fa hamiany andraikitry maventy izy. Ho Zan̈ahary taminany: “Efa haiko anao talohany namoron̈ako anao tan̈aty kibo, baka io efa nankamasin̈iko anao talohany anao teraka. Anao nataoko paminan̈y amy firenena aby io.”​—Jeremia 1:5.

•   Araiky amindro nanoratra Baiboly io dokotera. Lioka an̈arany. Nisy lera izy nikoran̈a momba tsaiky araiky mbala tankibo ndreky tsaiky araiky vo teraka. Volan̈a griky araiky fo nampiasainy izy koa fa nikoran̈a momba iro tsaiky aroe io.​—Lioka 1:41; 2:12, 16.

 Ia. “Jehovah mamindra fo ndreky tsara fan̈ahy ... Mira halavirany antin̈iana ndreky andrefa an̈adosoany fahotan̈antsika lavitry atsika.” b (Salamo 103:8-12) Olo io fo tokony han̈eky fa valera amy Zan̈ahary fahin̈ana io, firaka fahin̈anany tsaiky mbala an̈atiny kibo. Ke izikoa izy mibebaka ankitin̈y, Jehovah hamela helokonany, nata izy nan̈adoso tsaiky, nata izy nan̈ano raha ratsy hafa. (Salamo 86:5) Ke izy koa fa nan̈ano zen̈y, tsy tokony ho kivy ndreky han̈ameloten̈a eky izy.

 Izikoa Baiboly zahan̈a, zen̈y tsy mety atao fialantsin̈y baka han̈adosoan̈a tsaiky.

 Karakory fo basy izikoa misy problemo maventy, ke tsy maintsy mifidy na tsaiky io avotan̈a na reniny? Mahalan̈a fo vo misy raha karaha zen̈y. Ke izikoa zen̈y ankitin̈y raha miboaka, olo voakasiky amizio fo manapakevitry azovy avotan̈a.