Baiboly mandrisiky atsika ho tia man̈amia raha olo, ke tokony ho antony tsara mahavy atsika man̈ano zen̈y. Jesosy koa nivolan̈a fa “man̈amia raha olo ten̈a mampasambatra tozay amezanolo raha.” (Asan’ny Apostoly 20:35) Fa tsy olo amian̈a raha io fo ho ravoravo fa mboany olo nan̈amia izio.​—Ohabolana 11:25; Lioka 6:38.

•  Ino ma mahatsara man̈amia raha olo?

•  Misy raha maharatsy man̈amia raha olo koa ma?

•  Toko sy andininy mandrisiky atsika ho tia man̈amia raha olo

 Hahatsara atsika man̈amia raha olo, izikoa baka amy fontsika an̈anaovantsika izio. Baiboly mivolan̈a: “Irarian̈a olo tsiaraikiaraiky han̈ano eraka fanapahankevitrinany tan̈aty fonany, tsy an̈atiny alahelo sady tsy niforsen̈a, fotony Zan̈ahary tia olo pan̈amia ankaravoan̈a.”​—2 Korintianina 9:7.

 Izikoa atsika tia man̈amia raha olo ke amy fontsika jiaby han̈anaovantsika zen̈y, Zan̈ahary hankasitraka fivavahan̈antsika. (Jakoba 1:27) Ravoravo Zan̈ahary izikoa atsika tsy matity aminolo sahiran̈a. Mira mampitrosa Zan̈ahary atsika, izikoa man̈ano ambaka zen̈y. (Ohabolana 19:17) Baiboly mivolan̈a fa Zan̈ahary han̈efa raha namiantsika in̈y.​—Lioka 14:12-14.

 Ia, izikoa baka amy fitiavanten̈a mahavy atsika han̈amia raha olo. Ohatra:

•   Izikoa nohony atsika tiho hita mahavy atsika man̈amia raha olo.​—Matio 6:2.

•   Izikoa nohony atsika tihahazo raha aminolo io mahavy atsika man̈amia raha izy.​—Lioka 14:12-14.

•   Izikoa nohony atsika tiho voavonjy fo mahavy atsika man̈amia raha olo.​—Salamo 49:6, 7.

 Izikoa efa haintsika fa raha hamiantsika olo io handeha hampiasainy amy raha tsy tiany Zan̈ahary. Ohatra, handeha han̈anaovany loka, na hivangan̈a jamala na higiahan̈a toaka dila loatra. (1 Korintianina 6:9, 10; 2 Korintianina 7:1) Tsy mety koa izikoa atsika man̈amia vola olo mbala tokony mahavita miasa tsarabe, kanefa izy kamo miasa.​—2 Tesalonianina 3:10.

 Tsy pare izikoa atsika man̈amia olo raha, kanefa fianakavian̈antsika tsy jirentsika. Baiboly mivolan̈a fa lohany fianakavian̈a tsy maintsy mamelon̈o fianakavian̈anany. (1 Timoty 5:8) Ke tsy mety izikoa olo hafa tsisy raha tsy amiany iro, kanefa fianakavian̈anany tsy amiany raha foeky. Jesosy koa nivolan̈a fa ten̈a tsy mety izikoa olo araiky ‘manokan̈a fanan̈ananany jiaby amiany Zan̈ahary’, kanefa izy tsy mijery olobenany efa matoe.​—Marka 7:9-13.