Ia, amy Baiboly ao misy porofo mankamarin̈y fa ten̈a misy ankitin̈y Zan̈ahary io. Izio mandrisiky atsika hino Zan̈ahary, ke hampiasa tsara eritreritrintsika, fa tsy hinohino raha ampianariny fivavahan̈a fo. (Romanina 12:1; 1 Jaona 5:20) Diniha baka porofo aby ty:

•   Na raha an̈abo an̈y na raha ambony tany eto, samby milamin̈y tsara, sady feno raha manampahin̈ana. Zen̈y efa man̈ambara fa misy Pamoron̈o. Baiboly mivolan̈a: “Mazava hoazy fa tran̈o jiaby tsy maintsy nisy olo niasa izy, fa raha jiaby ndraiky, Zan̈ahary niasa izy.” (Hebreo 3:4) Marin̈y raha zen̈y. Maro koa manampahaizan̈a man̈eky zen̈y. a

•   Atsika olombelon̈o mila raha arapan̈ahy. Ankoatrany raha ilainy vatan̈antsika, zen̈y koa an̈isany raha tadiavintsika. Tiantsika, ohatra, hahay ino antony namoron̈ana atsika, avio atsika “mahatsiaro fa mila Zan̈ahary” ke manjary tihahay raha momba izy ndreky tihanompo izy. (Matio 5:3; Apokalypsy 4:11) Fan̈irian̈antsika aby zen̈y an̈isany porofo ahitan̈a fa misy ankitin̈y Zan̈ahary, sady ten̈a Pamoron̈o be fitiavan̈a izy fotony tiany hahazo fahafahampo atsika amy raha ilaintsika.—Matio 4:4.

•   Amy Baiboly ao misy faminanian̈a maro be tsipiriany, sady nisoratin̈y efa taonjato maro taloha be tan̈y. Tanteraka aby iro jiaby, karaha efa nambara. Be tsipiriany sady ten̈a marin̈y iro faminanian̈a aby io. Ke zen̈y porofo maventy ahitan̈a fa tsy maintsy nisy olo araiky ten̈a mahay fo naviandro io.—2 Petera 1:21.

•   Iro panoratra Baiboly aby io koa nahay raha mbala tsy hainolo niain̈y taminy andrandro. Taloha, ohatra, olo maro nino fa tany ty mipetraka an̈abony biby, karaha ataony elefan, lambo dy, na aomby. Kanefa Baiboly mivolan̈a fa Zan̈ahary “mampihevaheva tany ty.” (Joba 26:7) Baiboly koa mivolan̈a mazava tsara fa tany ty “boribory.” (Isaia 40:22) Maro olo mahatsapa fa tsy maintsy Zan̈ahary fo nan̈ambara raha aby zen̈y iro panoratra Baiboly aby io, matoa raha zen̈y efa haindro tsialohaloha.

•  Misy olo manjary tsy mino fisiany Zan̈ahary, izikoa fa tsy hitandro valiny fan̈ontanian̈andro. Fa amy Baiboly ao misy valiny fan̈ontanian̈a maro sarotro aby io. Tafiditry amy zen̈y ohatra: Izikoa Zan̈ahary io be fitiavan̈a ndreky farany mahery, nan̈ino ma feno fijalian̈a ndreky faharatsian̈a amy donia ty? Nan̈ino ma fivavahan̈a fo matetiky mahavy olo man̈ano ny ratsy, fa tsy ny tsara?—Titosy 1:16.